CHABANGCHAM 38
38
Judah Nai Tamar
1Sibo tingga, Judah niu pasingna maidungtu phutlujiu, Adullam namdi gasu wangbopiu, pazanniu Hirah khulam lungra tadmide. 2Siga Judah niu Canaan mailiu khat, Shua nahpuitu adaojiu paniu patu majang lungde. 3Sichiujiu paniu panah piumai khat lung-e, paniu pazanse Er chiujiu mathak khaide. 4Paniu pawon phunglanjiu npiumai nah khat lunglande, pazanse Onan chiu mathak khaide. 5Paniu panah piumai khat lunglan-e, pazan leng Shelah chiu mathak khai-e. Sibo ngenatu lungbo tingga, Judah hai Achzib ga lung bambo-e.
6Judah niu panah katingpiu Er leng Tamar kubo puitu panao thiukhai bide. 7Er gu nkhai-rili hai wimakge, haise Rapiu chunning makge, sijengniu patu Rapiu niu kamshat mide. 8Siga Judah niu Er saikariupiu Onan khuga din-e, “Tadlujiu nachipiugu kamipui khuga jikhailo. Sichiujiu nachi nao khuga nangniu kamrabo thiakse kamkhai bilo, sichiusai nachipiu kaikikse bamlubui-e.” 9Chiudi ngenase panah lakge chiubo Onan niu sibo jengniu, paniu pachi naotu nphiujibo wan-ga ngena lungmakra pagu kazitduise kadihga kamkhai mide. 10Paniu kambo hai Rapiu chunning makge, siniu Rapiu niu patudi kamshat mide. 11Siga Judah niu pamupui Tamar khuga din-e, “Anah Shelah niu akhang makhaga tadlujiu nakyga kamipui thiujiu bamniulo.” Paniu haise dinbo rambara, pachipiu kaniatu kumjiu Shelah tudi kamshat mi suma chiujiu pingbo donniu-e. Sijengniu Tamar pakylam malanwang mide.
12Pakak khat saiga Judah nao shai mide. Paniu panaotu huikhai lubosai, Adullam gu pakapiu Hirah tu maluang lujiu pagu mily giu kakipra Timnah lam tadsude. 13Tamar khuga mai khatniu papao hai Timnah lam pagu mily giu kakipra tadmide chiubo dinkhaide. 14Siga paniu kamipui ponse khai kali lujiu, pazuse takum lujiu Timnah namdi lam tadkhaibo puidi Enaim rengmun gase ntao bamde. Haise paniu Judah nah nathubo piu Shelah se akhang mide, chiudi patu maluang lungra pikhai makge chiubo simasan kalu gasu-e.
15Judah niu patu ngaoboga pahai papum kajonpui bam sune chiu maning-e, palamra paniu pazuse takum mide. 16Paniu puidi mung gase tadpad lujiu pakhuga maniu-e, “Wide, nang dejiu luralo?” (Pahai pamupui-e chiubo pah simakbo donniu-e).
Paniu din-e, “Nang degu piralo?”
17Paniu paokakge, “Iniu agu khaorui gasu kamipoi khat langkhai bine.”
Paniu din-e, “Wide, nangniu kamise langwang makhaga ladriat thiubogu aleng pikhai sai sui-e.”
18Paniu maniu-e, “Ladriat thiubogu Iniu naleng degu piralo?”
Paniu paokakge, “Nagu madan diangbo nai nangniu mathun kinbo thunse khaidiaklo.” Sise paniu pakhuga pikhaide. Sichiujiu panai nphiuji khaide, siga pah pawon phungmide. 19Tamar niu pakylam malanwang lujiu papee takum faise lupad mide khatdi kamipui ponse khailan mide.
20Judah niu pakahbo Hirah tu maipui khugase tadlujiu paniu pikhai mibo maniase nkhiak lanra kami khat ponlujiu mengra langkhaide, chiudi Hirah niu patu daolu makge. 21Paniu Enaim ga bammai khangsia khuga maniu-e, “Puidi mungga bambo papum kajonpuise dega bamlo?”
Paliuniu paokakge, “Haiga wadao khatdi papum kajonpui bam makge.”
22Paniu Judah khuga malan wangjiu din-e, “Ira daomakge. Sibo bamga lungmaidung siniudi, siga wadaodi papum kajonpui lungmakge chiujiu din-e.”
23Judah niu din-e, “Sibo mania sira patu pi khoilu sulo. Maidungniu aliutu nuibo aliuniu luni makge. Iniu patu pikhaira kambo-e, chiudi nangniu patu daomak tamibo-e.”
24Chahiu sum kumbo saiga, mai khatniu Judah khuga din-e, “Namupui Tamar hai chakhapui kumjiu kambam-e, phuilo, tuhoi pah pawon phungmide.”
Judah niu chamtan pijiu din-e, “Patuse lenlam puipad lujiu maring rushat milo.”
25Sichiujiu patuse lenlam puitad suboga, paniu papao khuga haichiu chalad din kalen khai-e: “Haibo maniadunggu papao khugasu I awon phungmibo-e. Haise phuilo, saogu madan diangbo gulo khatdi sao thunlo.”
26Judah niu sise silujiu din-e, “Pahai maji-e, Iniu pakhuga kamkhai rabo ngamse kamkhai makbo jengniu-e. Iniu anah Shelah tu pijiu patu majang lungra pikhai rabo gu-e.” Sichiujiu Judah niu patu wadaodi nphiuji tamide.
27Paniu mana surabo ting wangboga, pahai naphin manane chiubo simide. 28Paniu tanah manarabo thad thiusubo tingga, ngena khatse paben kariopad sude, siga patu pon mana bambopui siniu pad thinman lujiu chalangriang kahengbo kabetkhai lujiu din-e, “Haise narai-e.” 29Chiudi paniu pabense thadlan lujiu, pasingna piuse mana rai mide. Sijengniu patu pon manabopui siniu din-e, “Haichiujiu nangniu na-npuise kampang padrabo-e!” Sichiujiu patu hai Perez#38.29: Perez: Hebrew ladga “kampang padbo” chiubo-e. chiujiu kukhaide. 30Sibosai pasingnapiu situ paben-ga chalangriang kahengbo kabetkhai lujiu manapad sude, sichiujiu pazanse Zerah#38.30: Zerah: Hebrew ladga “kahengbo” maksai “Nsuan taka thaobo” kumbotu dinbo-e. chiujiu kukhaide.
Currently Selected:
CHABANGCHAM 38: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
