CHABANGCHAM 39
39
Joseph Nai Potiphar Nao
1Tuhoira Ishmael maidung siniu Joseph tu Egypt dihlam puitad lujiu chawanggu chakampao khat, chawangkining khuanbo charipi, Potiphar khuga jonkhai mide. 2#Tk 7.9.Rapiu niu Joseph tu maluang khai-e, siniu paniu kambo hina tathui kam-e. 3Pahai Egypt mai mawangpao kyga lungbam-e, sichiujiu patu hai Rapiu niu maluang khaibo jengniu pangamkam hina tathui kamme chiubo ngao-e. 4Potiphar niu pakhuga palung kim-e, sichiujiu pahangsiakga paniu patu khailujiu, paky lunggu khatdi pagu bambo mania hina npao pithiu khai-e. 5Sigasu Joseph bambo jengniu Egypt maipiugu bambo paky-palu hina Rapiu niu thoikhai bide. 6Sichiujiu Potiphar niu wahina hai Joseph riga pikhai kam lujiu paniu tiubo katiu ronna sangnu wakhatdi manangta mide.
Joseph hai papumdi wi, pazu-palundi wi-e. 7Sichiujiu pawangpiu nao siniu Joseph tu maraijiu maluangji radi pakhuga dinsude. 8Paniu suimakjiu din-e, “Phuilo, I haiga bambo jengniu awangpiuniu kalungga bambo wakhat jengniudi palung manang makge. Pagu kabambo hina riga atu piphui khaira pikhai bi-e. 9Pakhuga pumtan kabambo hina akhugasu natu makjiu kakira masiak makge. Sichiusai Iniu dechiujiu haikumbo kasabo ngamse kamjiu Tingwang tu atungjiu kamaobose kamsu ralo?” 10Naimachang paniu Joseph tu maluangji khaira dinjiu bamdi, paniu suikhai makge.
11Chiudi naikhatra Joseph niu chaky ngam kamra kalungga ngutbo tingga kavangmai khatdi ha-e. 12Paniu pa-ntiang jamman lujiu din-e, “Akhuga wang jilo.” Chiudi paniu pa-ntiangse paben-ga phutkhai diak lujiu lenlam pakpad mide. 13Paniu pa-ntiangse phutkhai diaklujiu kalung gasu pak mide chiubo siluboga, 14paniu chakyga bammai kavangdungtu kulujiu sensude, “Haise phuilo! Haibo Hebrew maipiu, akinaniu puiwangbo piu hainiu aliutu kam mangam khaira kam bamme. Paniu agu kichen lungga ngutlujiu atu nimra kamsubo-e, chiudi Iniu alai khaijiu akhuan senpadbo-e. 15Iniu marapadbo hai paniu chiuluboga, pa-ntiangse amungga thonkhai diaklujiu kamalam paktad mibo-e.”
16Joseph wangpiuse chakyga wangmak then, paniu pa-ntiangse pakhuga khai nbam-e. 17Sichiujiu paniu pakina khugadi ndanai lad kumgapjiu paokhai sude: “Nangniu puiwangbo Hebrew mai kavang piu siniu agu kichen-ga ngut lujiu atu kam mangamra kambo-e. 18Chiudi Iniu marasuboga, pa-ntiang akhuga thondiak lujiu lenlam pah paktad mibo-e.”
19Joseph wangpiuse palung pomchang-pom mide, 20sichiujiu Joseph tu minlujiu chawanggu kavangkyga khai mide, siga pah lungsude. 21#Tk 7.9.Chiudi Rapiu niu Joseph tu maluang bamme, khatdi thoikhaijiu bamme, sijengniu kavangky thinpao siniu patu lungsa khaide. 22Kavangkyga bammai hinatu kamrabo ngam hina paniu Joseph khuga pikhaijiu, kavangky gase papao thiu bamme. 23Kavangky thinpao siniu, Joseph ngamkam hinaga wakhatdi phuira pageng bamson makge, palamra Rapiu niu Joseph tu maluang bambo jengniu pangam kam hina luitathui kamme.
Currently Selected:
CHABANGCHAM 39: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
