LUKE 21

Kamipui Potkad

(Mk 12.41-44)

1Jesu niu haichiu phui ajang wangboga, kalekwibo maidungniu charaky gu chakhiu bungga paliu gu kalense khaibambo ngaode, 2khatdi paniu kaleksabo kamipui khatniu paisa nia nakha khaikiubo sidi ngaode. 3Siga Jesu niu paliu khuga din-e, “Iniu naliu khuga dinbo-e chiubora haibo kamipui hainiu maidung mathiu suang kadkhai makeng-e. 4Palamra maidung sira paliugu kamalibo lungwat gasu khaibo-e, chiudi para haijiukha lunglak bamdi, pagu kabambo hina, paniu tiujiu ringbambose pikhai-e.”

Charaky Hamirabo Lamga Jesu Niu Dinbo

(Mt 24.1-2; Mk 13.1-2)

5Pasai suimaidung khangsianiu Charaky hai phuilujiu, dejiukha ngaowilo, khatdi Tingwang leng kadkhaibo hai dejiukha kawibo kalenno chiujiu din-e. 6Siga Jesu niu din-e, “Naliuniu ngao bambo tukang hina hai, wakhat nakhadi masiak makjiu, ponthon kam mirabo tingse wangkinne.”

Magenthiu Chariubo Khatdi Mathadbodung

(Mt 24.3-14; Mk 13.3-13)

7Paliuniu maniu-e, “Katipao yo, haise dedao padsu ralo? Khatdi haise padsu raga degu tasibo lenkhai ralo?”

8Jesu niu din-e, “Maidung kakengniu, ‘I hai pah-e!’ khatdi ‘Pawanse wangtang mide!’ chiujiu chamtan gasu dinwang sune. Chiudi paliu sai suimi tulo. 9Naliuniu chari thiubo khuan khatdi n-gi athaobo khuan chiudi pingmi mane; sikumbo hina padsiak rabo-e, chiudi sise kaloibo makge.”

10Paniu haichiu dinkiu-e, ‘Kadih khatniu kadih khattu chari thiune; khatdi chawang khatniu chawang khattu aphen sune. 11Siga kathi katanbo, charakhum wangbo, khatdi chararet katam tambo pabam hinaga padsune; siga tinggen lam katasi-sibo khatdi kapingbose padsune. 12Haidungse pad makhaga, naliutu minlujiu kam mathad sune, naliutu maduiky-ky gasu ladjan thiujiu kavangkyga jukhai sune; naliutu chawangdung khatdi ladjanpaodung masuangga adon jengniu puiwang sune. 13Haise naliuleng Kawicham dinra padao kachabo wan si-e. 14#Lk 12.11,12.Naliuniu degu dinralo chiubo manangmi tulo, 15palamra Iniu naliuleng ningting tasi pikhaijiu naliugu mikre maidung siniu wadaodi naliutu din masa ngam lakge. 16Naliutu naliu pui-piuniu, naliu singnaniu, naliu kikhun mainiu pipad sune, khatdi paliuniu naliu khangsiatu kamshat sune. 17Adon jengniu naliutu mai hinaniu mareng sune. 18Sichiudi naliu peegiu khatnagadi kam maha lakge. 19Chap matipjiu bamlo, naliutu rankhaibi rabo-e.

Jerusalem Hamirabo Lamga Jesu Niu Dinbo

(Mt 24.15-21; Mk 13.14-19)

20“Jerusalem haitu riphendungniu chap magui lujiu bambo naliuniu ngao dasai, patu kam mahanuang mirabo-e chiubo naliuniu silulo. 21Chiusai Judaea ga bam maidung siniu maluang genlam pakkhai sune; namdiga lungbammai hina pakmi sune, khatdi maluang genlam lungbammai paliura namdilam jontad lakge. 22#Hos 9.7.Palamra ‘Sise Sajai pikhaibo Tingmikdung si-e,’ haise Masanbo ariakga dinkhaibose wangtang raleng-e. 23Sibo tingga papum ripjiu bambo puidung nai npampuidung lengra dejiukha magenthiu ralo! Mainiu din silakbo magenthak hai kadihpiriga padrabo-e, khatdi Tingwang lungpomse paliu riga wangrabo-e. 24Sichiujiu khangsiatu chahengniu bishat sune, khatdi khangsiatu kadih katam tambo lam jutad sune khatdi nkengmainiu paliu tingse loimak thenna Jerusalem riga taomaluijiu bamrabo-e.

Chamai Nahpiu Wangrabo

(Mt 24.29-31; Mk 13.24-27)

25 # Isa 13.10; Ezk 32.7; Joel 2.31; Mad 6.12,13. “Chahiu, naimik khatdi chagandung riga katasi-sibo padsune. Khatdi kadihpiri pabam hinaga kapingbo padsune, duipui kasuakbo khuan khatdi duiliu kahakbo khuan siniu kapingbo padsune. 26Kadihpiriga degu padkinbo gulo chiubo khuanjiu bammaidung siniu pingjiu shaikhang sune, palamra tingpukga bambo pumtan hinatu thin kacha khai kammi rabo-e. 27#Dan 7.13; Mad 1.7.Sibosai Chamai Nahpiu siniu pakendibo nai pumtan jaojiu kamuang rigasu wangkiu sune. 28Haidungse padboga, chapkhang lujiu naliu pi mahen khanglo, palamra naliugu juringbose nawang mibo-e.”

Ndutbang Ganiu Dinlenbo

(Mt 24.32-35; Mk 13.28-31)

29Sibosai Jesu niu paliu khuga din champanbo hai dinkhai-e: “Ndutbang khatdi kakibo singbang hinatu matadjiu phuilo. 30Naliuniu pamum hai padsubo tingga, kariakting wangkinne chiubo si-e. 31Sikumjiu haidungse padsuboga, Tingwang gu Chawangdihse nawang mide chiubo naliu sirabo-e.

32“Haidungse tuhoi lungbambo maidungniu shaikam makhaga padsu rabo-e chiubo maningtao lulo. 33Tinggen nai kadihra hamine, chiudi aladkeng haira wadaodi halakge.

Kadensijiu Bamlo!

34“Kadensijiu bamlo! Haibo karingtingga maluang tiubo, maluang sakbo khatdi haibo ringtingleng manangbo siniu pumi tulo, sichiu maksai sibo Tingmik siniu natu tathak kumjiu mannong mirabo-e. 35Palamra haise kadihpiri pabam hinaga, mai hina khuga padrabo-e. 36Kadensijiu bamlo, sichiujiu haikumbo hina padsai, Chamai Nahpiu masuangga chap ngamlu raleng pawan machang kakheng thiujiu bamlo.”

37 # Lk 19.47. Jesu niu sibo tingmikdung gase Charakyga bamjiu katikhai-e, sichiujiu chawan wangsai tadpadjiu nchun sira Olive Luonglam mathakmi mi-e. 38Nsuan machang maidungniu pacham nkingra Charakyga wang-wang-e.

Currently Selected:

LUKE 21: LIANBSI

Highlight

Copy