LUKE 22
22
Jesu Tu Kamshatra Phiubo
(Mt 26.1-5; Mk 14.1-2; Jn 11.45-53)
1 #
Tad 12.1-27. Tuhoira, chakhi khai makbo taruak tiubo Kenpadbo Ngee se wangtang kin-e. 2Singku paodung nai Tacheng-tajaigu katipaodung siniu maidungtu pingbo donniu mahim Jesu tu kamshatra tasiam phiusude.
Judas Niu Jesu Tu Jonra Suikhaibo
(Mt 26.14-16; Mk 14.10-11)
3Khommaidung khang kariu-je-niakiu ruanggasu khangkhat Iscariot kubo Judas lunggase Satan ngut mide. 4Sichiujiu Juda niu singku paodung nai charaky akhemaigu chakampaodung khuga tadlujiu paniu dechiujiu Jesu tu paliu khuga pikhai ralo chiubo npao sude. 5Paliu chun wijiu patu rangkang pine chiujiu suikhai mide. 6Judas niu sise suikhai lujiu maidungtu pisi makjiu Jesu tu paliu khuga pikhai rabo wanse phiu sude.
Jesu Niu Kenpadbo Ngee Maluad Leng Kadenbo
(Mt 26.17-25; Mk 14.12-21; Jn 13.21-30)
7Chakhi khaimakbo taruak Ngee se wangtangjiu Kenpadbo Ngee leng milyse kamshat rabo tingse wangtang mide. 8Jesu niu Peter nai John khuga haichiu dinkhaijiu langkhaide: “Kenpadbo Ngee maluadse aliu tiuraleng tadlujiu kaden khailo.”
9Panainiu pakhuga maniu-e, “Debo bamga anainiu kaden khaibo nang lunilo?”
10Paniu paokakge, “Nanainiu namdi gase ngutboga, maipiu khatniu taduikhiu khat ponjiu tadkinbotu adao sune. Paniu ngutbo kygase pasai suilujiu ngutlo, 11khatdi chaky paopiu khugase haichiu dinlo: ‘Katipaoniu nakhuga dinkhai-e, Iniu akhommaidungtu maluang lujiu Kenpadbo Ngee maluad tiurabo bamse dega bamlo?’ 12Siga paniu chakai rilam kam masansiak lujiu khaibambo bamse lenkhai sune, siga nanainiu wahinase kaden khailo.”
13Sichiujiu panainiu tadboga Jesu niu dinkhaibo kumjiu wahinase panainiu daode, siga panainiu Kenpadbo Ngee maluadse kaden khaide.
Rapiu Gu Chawan Maluad
(Mt 26.26-30; Mk 14.22-26; 1 Co 11.23-25)
14Pawanse wangtang miboga Jesu niu pakhommaidung situ maluang lujiu chakuangkai mungga wang ntao kiude. 15Paniu paliu khuga din-e, “Iniu chariu khengrabo suangga, haibo Kenpadbo Ngee maluadse naliutu maluang lujiu tiukhaini sonna bambo-e! 16Iniu naliu khuga pachang paling dinbo-e, haise Tingwang gu Chawangdihga wangtang makthen Iniu tiulan lak mibode.”
17Sibosai Jesu niu chapiangse thinsu lujiu, Tingwang tu thuonkiu lujiu din-e, “Haise lulujiu naliu njan saklo. 18Iniu naliu khuga dinbo-e chiubora tuhoi gasu Tingwang gu Chawangdihse wangkiu lanmak then Iniu haibo mumjawse saklanlak mide.”
19Sibosai paniu taruak khuangse thinlujiu, Tingwang tu thuonkiu lanlujiu khatdi thenpang lujiu, paliu khuga pikhaijiu din-e, “Haise atia-e, naliuleng-e chiujiu pikhai mibo si-e. Haise atu maningtaojiu bamra naliuniu kambamlo.” 20#Jer 31.31-34.Sise kumjiu, katiuse tiuloi luboga paniu chapiangse thinsu lujiu haichiu din-e, “Haise azainiu diangkhai mibo Tingwang gu kasanbo ladriat si-e, haise naliuleng luangkhai mibo si-e.”
21“Chiudi phuilo, atu jonmibo piu bense chakuangkai riga aben panai kario khai ncham bamme! 22Chamai Nahpiu sira Tingwang niu machunbo saisui rabo-e, chiudi patu jonmibo piu sira dejiuga pasan salo!” 23Sichiujiu haise saoniu kamralo chiubo paliu karai khat-khat khuga maniu sude.
Saoniu Dithu Ralo
24 #
Jer 31.31-34. Saoniu dithuralo chiubo lamga pakhommaidung ruangga ari sude. 25#Mt 20.25-27; Mk 10.42-44.Siga Jesu niu paliu khuga din-e, “Mai nkengmaira paliu wangdungniu maidung riga paliugu pumtan bamme; khatdi paliu wangdungtu ‘Maidung Kamai,’ chiujiu ku-e. 26#Mt 23.11; Mk 9.35. #Mt 20.25-27; Mk 10.42-44.Chiudi haise naliu ruanggara chiumak rabo-e, chiudi dithubo piu siniu nathubo piu kum rabo-e, khatdi jupao siniu kavang kum rabo-e. 27Ntao lujiu tiubambo piu nai machajiu bambo piuse saoniu dilo? Pachangra ntao lujiu tiubambo piu si-e. Chiudi I hai naliu ruangga machajiu bambo piuse kumjiu bambo-e.
28“Agu magenthiubo hinaga naliuniu atu maluang bambo-e; 29Apiuniu atu mawangra agu majileng pikhaibo kumjiu, Idi naliutu naliu majileng pikhaibo-e. 30#Mt 19.28.Sichiujiu Awang kadih gase naliuniu, akuangkai gasu atu maluang tiu ncham khatdi maluang sak ncham rabo-e; khatdi chawangbam gase ntao lujiu Israel mai kiphiu kariu-je-niakiutu mawangjiu bamne.
Peter Niu Suimak Rabo Lamga Jesu Niu Din Masuang Khaibo
(Mt 26.31-35; Mk 14.27-31; Jn 13.36-38)
31“Simon, Simon! Phuilo, chamiubuitu tun kanukbo kumjiu, natudi tun kanukra Satan niu khenglude. 32Chiudi Simon yo, nagu malumse kaomak raleng Iniu khengkhai mide. Sichiujiu nang akhuga malanwang dasai, nangniu nasingna maidungtu pitan khai rabo-e.”
33Peter niu paokakge, “Rapiu, Iniu kavangkyga tadi, kashaibo tangjiu nasai suitadra Iniu kaden lude.”
34Jesu niu din-e, “Peter, Iniu nakhuga dinbo-e, thaichun nangniu atu simakge chiu dinlon sum tangmak thenna maruireng siniu khuang lakge.”
Rangkangkhao, Paibeng Khatdi Chaheng
35 #
Mt 10.9,10; Mk 6.8,9; Lk 9.3; 10.4. Sibosai Jesu niu pakhommaidung khuga maniu-e, “Iniu naliutu rangkangkhao, paibeng maksai chaphitop jaomakjiu langkhaibo tinggase naliuniu wa chang kamakbo bamma?”
Paliuniu paokakge, “Wakhat nakhadi machang kamakbo thiumakge.”
36Jesu niu paliu khuga din-e, “Chiudi tuhoira, mai khatniu rangkangkhao maksai paibeng bamsai sise phungrabo mide; khatdi mai khatniu chaheng hasai, paniu pafai jonlujiu khatra liurabo mide. 37#Isa 53.12.Palamra Iniu naliu khuga dinbo-e chiubora Masanbo ariak gase; ‘Patuse agatiu kaliktiu maidung ruangga chakkhai mide!’ Siniu raokhai mibose ajengniu wangtang rabo-e.”
38Siga pakhommaidung siniu din-e, “Rapiu, phuilo, haiga chaheng niara bamme!”
Paniu paokakge, “Siseniu buide.”
Jesu Niu Olive Luongga Kakheng Thiubo
(Mt 26.36-46; Mk 14.32-42)
39Jesu niu palun jai kumjiu namdi situ phutlujiu Olive Luonglam tadmide; siga pakhommaidung siniu pasai suitadle. 40Paliuniu sibo bamgase mengtangboga, paniu paliu khuga din-e, “Naliu kahiamboga kaokhaimi makra khenglulo.”
41Sichiujiu paniu paliu khugasu tatu phenbo kak khat kumbo tadpad lujiu khudungkiu kakheng thiu sude. 42Paniu haichiu din-e, “Apiu yo, nachunne sai, haibo piangse akhugasu luthon milo. Chiudi achunbo makjiu nachunbose thiu milo.” 43Siga tinggen lamsu maza khatniu kiulujiu patuse pitan khai bide. 44Palung chun magen thiujubo donniu, paniu kakheng thiu katin khaide; sichiujiu pagu kasuangduise tazai puak kumjiu kadihga jaokiude.
45Paniu kakheng thiubo bam gasu sulujiu pakhommaidung khuga malan wangboga, paliu lungchun magenthiujiu jibam niu-e. 46Siga paniu paliu khuga din-e, “Dekamjiu naliu jibam jiulo? Sulo, kahiambo ga kaokhaimi makra sulujiu kakheng thiulo.”
Jesu Tu Minbo
(Mt 26.47-56; Mk 14.43-50; Jn 18.3-11)
47Jesu niu haichiu dinbam khaga, pakhommaidung ruangga khangkhat Juda siniu chamai dungdi khattu puilujiu wangde. Paniu Jesu khuga wanglujiu pabiang kapup khaide. 48Siga Jesu niu din-e, “Juda, nangniu Chamai Nahpiu situ biangpup khaijiu jonmira dama?”
49Jesu tu maluang bambo khommaidung siniu degu padmi gulo chiubo siluboga, paliuniu din-e, “Rapiu, aliuniu aliu hengse thinsu rama? 50Sichiu bamga paliu ruangga mai khatniu singkupaogu kavangpiu kuon majatlamse bitap mide.
51Siga Jesu niu din-e, “Hainiu buide.” Sichiujiu paniu sinapiu kuonse dikhaijiu wikhai mide.
52Sichiujiu Jesu niu singku paodung, charaky gu chakampaodung khatdi patu minra suiwangbo apaimaidung khuga din-e, “Naliuniu atu agatiu-kaliktiu mai khattu kumjiu chaheng-changiu thinlujiu minra wangkinbo ma? 53#Lk 19.47; 21.37.Naimachang Iniu naliutu Charaky lungga maluang lujiu bambo-e, chiudi siga naliuniu atu minra kam makge. Chiudi tamiubo pumtanniu thinjiu bambo wan naliuniu haise kamrabo pawan mibo-e.”
Peter Niu Jesu Tu Suimakbo
(Mt 26.57-58,69-75; Mk 14.53-54,66-72; Jn 18.12-18,25-27)
54Paliuniu Jesu tu minlujiu Dibo Singkupao kygase juwangde, siga Peter-se pakak diubijiu suitad kimme. 55Kajengga chami thiulujiu ntao magui bambo gase Peter di suiwang ntao bamme. 56Paniu siga ntao bamboga, kavangpui khatniu ngaolujiu din-e, “Haibopiu haidi Jesu saisuibo mai-e!”
57Chiudi Peter niu suini makjiu din-e, “Maipui yo, Iniu patu simakge!”
58Bamnak lubo sai, maipiu khatniu Peter tu ngaolujiu din-e, “Nangdi paliu ruangga jaobo mai khatle.”
Chiudi Peter niu paokakge, “Maipiu yo, I makge.”
59Wanchak khat kumbo bamlubo sai mai khatniu din matanjiu din-e, “Pachang siakjiu hainapiu hai Jesu tu maluang bammai-e, palamra pahaidi Galilee mai-e.”
60Chiudi Peter niu paokakge, “Maipiu yo, nangniu din bambose, I wadi simakge!”
Paniu haichiu dinjiu bambo wan-ga maruireng khatniu khuang mide. 61Siga Rapiu niu mari wangjiu Peter tu phuikhaide; siga Rapiu niu pakhuga, “Thaichun maruireng niu khuang makhaga nangniu atu simakge chiu dinlon sum rabo-e,” chiubose maningtaode. 62Siga Peter niu tadpad lujiu palung kheng ngamlakjiu kapchang-kap sude.
Jesu Tu Tanui Thenbo Khatdi Dapkhaibo
(Mt 26.67-68; Mk 14.65)
63Jesu tu khuanbam maidung siniu patu tanui thiu sude khatdi dapsude. 64Paliuniu pamik domlu, pabiang kaphijiu pakhuga maniu-e, “Saoniu natu dapbam jiulo? Din madu padlo!” 65Sichiujiu paliuniu patu nuimenjiu tacham kengkha madam khaide.
Jesu Tu Apaikyga Puiwangbo
(Mt 26.59-66; Mk 14.55-64; Jn 18.19-24)
66Tingben padboga, katingmaidung, singku paodung khatdi Tacheng-tajaigu katipaodungniu wang madui lujiu, Jesu tu Apaikyga puiwangde. 67Paliuniu din-e, “Nang hai Messiah si-e chiuma? Aliu khuga dinkhailo.”
Paniu paokakge, “Iniu naliu khuga dinkhai tadi, naliuniu atu malum lakge; 68khatdi Iniu naliu khuga wakhat maniu tadi naliuniu atu paokak lakge. 69Sichiudi tuhoi gasuniu Chamai Nahpiu siniu Ngamkambo Tingwang benjad lamse ntaobam mirabo-e.”
70Paliu mathiuniu din-e, “Chiusai, nangse Tingwang Nahpiu sima?”
Paniu paliutu paokakge, “Naliuniu dinbose I-e.”
71Siga paliuniu din-e, “Aliuniu jengdin phiu sonra hade! Aliuniu pamun siak ganiu chiulude!”
Currently Selected:
LUKE 22: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
