ROMEMAI 5
5
Tingwang Khuga Kam Majikhaibo
1Tuhoira malumbo gasu aliutu kam majikhai mibo donniu, aliu Rapiu Jesu Khrista zan gasu aliu Tingwang khuga agi-manaibo bamme. 2Tuhoira malumbo pen gasu Tingwang lungsiatga aliu bam mide. Sichiujiu Tingwang gu kendibose lutao lude chiubo jengniu aliu chun wijiu bamkhe! 3Sichiujiu aliugu chariubo gase aliuniu chunwi-e, palamra chariubo siniu khengsibose padle, 4sichiujiu khengsibo siniu Tingwang chunning phungwangjiu, sigasu agunbose phungwang-e. 5Haibo agun siniu aliu chun kam masami makge, palamra Tingwang lungsiat gasu, aliu lungga pagu Masanbo Hiupuina kalense runkiu khai bide.
6Palamra aliu pumtan hajiu bambo wan-ga, Tingwang niu Khrista tu kada lujiu kasamai aliuleng shaikhai bide. 7Pacheng matipbo mai khatleng, mai khatniu shaikhai bira kung-e, khatdi kawibo maileng mai khatniu shaikhai biradi kung-e. 8Chiudi Tingwang niu aliutu dejiuga lungsalo chiubo hai lenkhai bide, chiubora aliu nuan phungmai thiujiu bamniubo gasu Khrista niu aliuleng shaikhai bide. 9Pazai luang khaijiu shaikhaibo siniu, Tingwang khuga aliutu kam maji khai bide, sichiusai nkiu-nkenjiu Tingwang gu wangrabo lungpom hina gasu paniu aliutu rankhai mibo-e! 10Aliu hai Tingwang gu mikremai thiujiu bamniu-e, chiudi Panahpiu shaikhai bibo gasu pakamai thiu mide. Tuhoira aliu Tingwang kamai thiu misai, Khrista gu ringting siniu aliutu dejiukha nkiu-nkenjiu rankhaibi ralo! 11Sichiubo ronna makjiu aliu Rapiu Jesu Khrista pen ganiu tuhoi aliu Tingwang kamai thiulubo donniu aliu Tingwang khuga achun wijiu bamkhe.
Adam Nai Khrista
12 #
Chab 3.6. Nuan hai mai khat gasu kadihpiriga wang mide, sichiujiu sibo nuan gasu kashaibo hai wangmide. Sichiujiu kashaibo haise chamai hina khuga wangtang mide, palamra mai hinase nuan ten mide. 13Tacheng-tajai pikhai makbo suang gasu kadihpiriga nuan bamniu-e, chiudi Tacheng-tajai bam makbo donniu nuan situ chakkhai makniu-e. 14Chiudi kashaibo siniu chamai hina riga Adam ken gasu, Mose ken katangbo nuan tenmak mai rigadi mawangjiu bamniubo-e. Sise Adam niu Tingwang gu chamtan majai makbo jengniu wangmibo-e.
Adam haise wangrabo piu khatse kumbo-e. 15Chiudi khangniase ncham makge, palamra Tingwang gu kalen sira Adam gu nuan kum makge. Mai khat nuan jengniu mai kakeng shai mide chiubo majibo-e. Chiudi Tingwang gu lungsiat sira nkiu-nkenjiu dibo-e, sichiujiu mai khat chiubora, Jesu Khrista lungsiat ganiu mai kakeng khuga Tingwang gu lungsiat kalense daomibo-e. 16Sichiujiu Tingwang gu kalen nai mai khat nuan hai ncham makge. Nuan khat kam miboga, “kamaobo” chiubo ladjanse wang-e; chiudi nuan wajiukha tenkhai mibo saiga mai dinsi lakbo, “mao makge” chiubo kalense wang-e! 17Mai khat nuan jengniu kashaibo siniu mawangsu mide. Chiudi tuhoira mai khat chiubora Jesu Khrista niu kamkhai mibo haise dejiukha nkiu-nken ralo! Tingwang gu pamalan thiumakbo lungsiat daolubo mai hina situ Khrista gu lungsiat gasu khenrang thiura kam majikhai mide.
18Sichiujiu mai khat nuan gasu mai hinatu ladjan thiu mibo kumjiu, tacheng matipmai khatgu tienkam gasu mai hinatu khenrang thiukhaijiu tingtheng karingbose pikhai mibo-e. 19Sichiujiu mai khatniu kadin piumakbo gasu mai kakengtu nuan phungmai pithiu khai mibo kumjiu, mai khatgu kadin piubo siniu mathiutu kam majikhai mibo-e.
20Kamao-kamengbo hai nkiu khangra Tacheng-tajai hai pikhaibo-e, chiudi nuan kengpadboga Tingwang gu lungsiatdi nkiu-nkenjiu kengpadle. 21Kashaibo npuiga nuan niu mawangbo kum, Tingwang lungsiat siniu tacheng matipbo npuiga mawangjiu, aliu Rapiu Jesu Khrista pen gasu tingtheng karingboga aliutu maluang khai bide.
Currently Selected:
ROMEMAI 5: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
