ROMEMAI 4
4
Abraham Tu Din Kada Khaibo
1Aliu jatgu papiu thiubo Abraham lamga aliuniu degu dinralo? Paniu degu kamkhai mibo bamlo? 2Pagu tienkam ganiu Tingwang niu patu kam majikhai bisai, paniu pageng dinra palam bamme; chiudi Tingwang suang gara sichiu makge. 3#Chab 15.6; Gal 3.6.Masanbo ariakniu din-e; “Abraham niu Tingwang tu malumme, sichiujiu pagu malum donniu patuse tacheng matip-e chiujiu Tingwang niu lukhai mibo-e.” 4Tatien thiu maigu phijengse pikhai-e, chiudi sise matha pikhaibo kalen makge; sise mai khatniu matan kalubo gu-e. 5Chiudi mai khatniu kamkhaibo makjiu Tingwang tu malumsai, pagu malum siniu kamaobo situ kam maji khaide. Sise pagu malum saisuijiu Tingwang niu kam majikhai bibo-e. 6Changam jaomakjiu Tingwang niu tacheng matipbo leng lukhai bibo maira pasan wi-e, chiujiu David niudi dinmibo-e:
7 #
T.Lui 32.1,2. “Pakhui pamao maning mahakhai mibo mai,
panuan kuakkhai mibo mai hina san wi-e!
8Rapiu niu panuan situ chakkhai makjiu, kam mahakhai mibo maise san wi-e!”
9Chiusai David niu dinbambo thoidam hai pagi rommaileng ronna ma? Pachangjiu sichiu makge. Sise pagi rommak mailengdi-e. Palamra masanbo ariak saisuijiu aliuniu din-e, “Abraham tu pagu malumbo donniu tacheng matipbo leng lukhaibi-e.” 10Haise dekumbo wan-ga padmi gulo? Haise Abraham tu pagi rombo masuang gama, maksai sibo sailam sulo? Sise pagi rom makhabo masuang ganiu-e. 11#Chab 17.10.Pasainiu patu pagi rombo-e, sichiujiu pagirom khaibo hainiu Tingwang tu paniu malumbose kamlen khaijiu patu tacheng matipbo mai-e chiujiu lukhai-e. Sichiujiu Abraham hai Tingwang tu malummai hina khatdi tacheng matip-e chiujiu Tingwang niu lukhai maidung, paliu gi rom makjiu tadi tacheng matipbo mai hinagu hiupuina piu thiulu raleng-e. 12Sichiujiu pahai chagirom mibo maidung khatdi patu pagi rommakbo suangga lungkhai mibo maidung, chiubora malummai mathiu piudi thiu rabo-e.
Malumbo Gasu Tingwang Ladriatse Daolu-e
13 #
Chab 17.4-6; 22.17,18; Gal 3.29. Tingwang niu khatdi pakai pakikdung khuga kadihpiri hai pagu thiu rabo-e chiujiu ladriat khaibose, Abraham niu Tacheng-tajaise majaibo ganiu makge, chiudi paniu malumbo gasu pacheng matip-e chiujiu Tingwang niu lukhaibo jengniu-e. 14#Gal 3.18.Palamra Tingwang gu ladriat haise Tacheng-tajai majaibo ganiu sai, chamaigu malumse wadi makge, khatdi Tingwang gu ladriatse pageng wadi ha-e. 15Tacheng-tajai siniu Tingwang lungpom phungwang-e; chiudi Tacheng-tajai haboga Tacheng-tajaise majaira ha-e.
16 #
Gal 3.7. Sijengniu malumbo pen gasu Tingwang gu khenrang thiubo kalense Abraham kaikik mathiuleng pikhaibo-e, haise Tacheng-tajai majai maileng ronna makjiu, Abraham kumjiu malum lumai mathiu leng-e. Palamra Abraham hai aliu mathiugu hiupuina piu-e. 17#Chab 17.5.Haise Masanbo ariakniu dinkhai mibo-e, “Iniu natu kakengbo jatdung piu pithiu khaine.” Kashai maidungtu piring khaibibo khatdi haniubo situ pagu chamtanniu damkhaibo, Tingwang tu Abraham niu malumbo haise Tingwang suangga kawibo ladriatle. 18#Chab 15.5.Abraham niu daolura agunbo hajiu tadi malumbo, khatdi agun bambo donniu “ Jatdung Kakengbo piu” thiulubo-e. Haise Masanbo ariakniu dinkhai mibo si-e: “Nakai nakikse chagan jiukha lungrabo-e.” 19#Chab 17.17.Malumboga nkhin makbo jengniu, pagu tingkum kaikhat tangmijiu panah lung ngamlak mide, khatdi panao Sarah pawon phung ngamlak mide chiubo paniu chakkhai makge. 20Pagu malum tu phutmakjiu, Tingwang gu ladriat situ paniu malum masabo thiumi makge; pagu malum tanbo donniu, Tingwang gu maken kadibo situ paniu thuonbam niu-e. 21Tingwang niu ladriat thiukhai mibose maomakjiu tenkhai ngamme chiubo paniu masan siakjiu sibam niu-e. 22Sijengniu malumbo gasu Abraham tu, “Tingwang niu tacheng matip-e” chiu lukhaide. 23“Pah tacheng matip-e” chiu lukhai mibose paleng ronna raokhaibo makge. 24Tacheng matip-e chiujiu lukhaibi ramai, Rapiu Jesu tu kashai mai rong gasu piring khaibibo patu malum lumai aliulengdi raokhai mibo-e. 25#Isa 53.4,5.Palamra aliu nuan jengniu patu kamshat mibo-e, khatdi aliutu kam majikhai raleng patu piringsu khai mibo-e.
Currently Selected:
ROMEMAI 4: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
