LUKE 2

Jisu kemenu

1Augustus kedeo celü thezhopü khakesü, cejü metü theza thosü node posü. 2Theza thopü lesilü kesü theratho-o tüce Quirinius Syria lü Angh thiba. 3Thüma metü uzatho ketola ta utho ura vota. 4Joseph sheri Galilee rüna Nazareth lü ta Judea lükho, David nadelü Bethlehem lü, kekrelamori pü David shuyemi tila. 5Pü Mary züde tavo, uni kevakha meta tila, mu thenopü nunepüta. 6Uni ta kevoce thenopü nuzütü vorita. 7Thenopü thepumipü menuyi de fünyepü pü kezhü sü, de khapü metho mhatibayo sümezü, kekrelamori resomi kerelü thilü uni badi ketala.

Teko kefüko mu tüyochoyi miko pü chu kesü

8Teko kefüko thera yilü tayo, tüzülü teko krofü mu la bayo, 9tüyo Niepoo choyimi ta ukoce vori de Niepoo keve pü uko keba khüko vamve yita, mu uko mpe shuta. 10Tüyochoyio ukoce poti mpe hite, hihe, I theju kevepü khi nekoce vorizütila; thümapo unüphi keto thümametüko 11Kekrelamori tha David nadelü kelakeyipü Niepoo Khrista sü menu yite. 12Zasi hihi nekozü tato, neko nuranu-o fünhe pü kezhüpü cüripo mhaküti bayo khapü mezü de ngo yito. 13Tüyochoyio züde tüyo krode Jihova chusü; 14Püco the kesü, kerekrütho Jihova po zapozale thiyite, cejülü thümako po kezükeve and thümala mhakeve kelü thite. 15Tüyochoyimiko ta ketasa, uko khava ta tüyo khota, süsa teko kefüko hunehuce poti, khe uko tsühi ta Bethlehem lü vo tole, Niepoo uko ce po kesüko pe sükhe. 16Uko ta rekri vori de Mary, Joseph mu nuranu methoco ba-o züde uko ngoyi. 17Uko süo ngo keyice, ukoce po kesüko khapü uko mesesü, nuranu-o ju kepoko. 18Theju süko keseko metü ungo phita, teko kefüko po kesükola. 19Vele Mary mhasüko metü khapü pumelülü mhalü bata. 20Teko kefüko salatata, Niepoo po kemele mu püchu, mhahiko metü se mu ngo keyila ukoce po kesübi.

Jisu yi kerü

21Nuo yirü ketola tüsozho tütha tsota, püza thopü Jisu thisü, püzu nobulü hü keyi mhüjü tüyo choyio thüza putsü kesüo 22Thenopü thi kemesa keyi, Moses zholü thopü kemeta tüsozho tso ketasa, püzü Jerusalem lükho, pü khapü Niepoo mhüjülü sü ketola. 23Thezho lesilü thopü kemeta, thepu nuranu püzu nobu khri (he) kepario Niepoo mhüjülü mesale poto. 24Niepoo thezho lesilü thopü kemeta bide kereshü thipü Niepoo tsüto; therüvü kena mu mekhro kena.

Simeon saju kepofü mu pü rho kesü

25Jerusalem lü thümapü püza Simeon lezi tipüta, thüma hio mhatho, mu kereshülü tayo; Isreal mi thelü kelupü fü mu meri tayo; Kemesa Rüpü püzüta. 26Kemesa Rüpü puce mese kesü, Niepoo Khrista kengo mhüjü püpo sata hole zi tayo. 27Pü Kemesa Rüpü züta de kereshücelü lüri nuranu Jisu krüneko püzü kereshücelü vori; thezho thopü kemetako thipü püyo sü ketola. 28Nu süo püpüboyo süyi, de reliphripü Jihova tsüsü, de poti. 29Niepoo tsüsa n cetao po tatate, pü kenülü n jüpo bide. 30Kekrelamori amhü khipü n kelakeyio ngo kevala. 31No kesüpü thüma metü mhüjülü sü ketala. 32Gentilemiko la kevepü mu Isreal n thümako la zapozale. 33Joseph mu püzuni mha süko la uningo thibata, pü kepo fükola. 34Simeon reliphri pü uko tsüsü, de Mary ce poti, Hihe, nu hiola Isreal mi kekro kritato mu tosü yiri to, ti thisüte, mu zasi popü kemeta pü kemetsülari. 35I le, zechopü n melü kerhü thizoto, thüma melü metüko khipü hala sü ketola.

Anna pürho kesü

36Anna sitipü saju kepopü leno tayo, theno süpü Phanuel nopü, Asher mi ye; theno süpü pethi tsa shuta, süpü tütse thüna pü nopu zühü pü reli phosalü. 37Samepü süo tütse hetütha da, pü kereshücelü cutayomo, vele tüso tüzü mevo, mu kechothide Jihova choyi thi bayo, 38Pütü süce tavoride Niepoo chuta, Jerusalem lü urha küyi fü meri kebako ce püju pü metükoce posü.

Ta sala Nazareth lü vo keta, tütse hu püju sekemo, kemekre keta

39Niepoo thezho lesilü thopü kemetako thitso kevasa uko sala ta Galilee lü Nazareth uko nadelü kita. 40Natsio ma sü rüpülü metüyi, mhasepü pü chuyi, Jihova ngokemezhe püyo ta.

Jisu mu pükrüni kezüde cukevo nyelü kevo

41Hitüce, Jisu krüni Jerusalem lü cukevo nyelü vo süyo, tütse mütsü. 42Pü tütse kerikena ketace uko ta Jerusalem thenye lükho, uko zhoce thiyo tibi, 43Uko thezhoko tso ketasa tasala vo tazü natsio Jerusalem lü thothü bata, Joseph mu püzu ni süo sebamo. 44Vele uni püsheri uko krolü tazo hoti lüba, zhopü chotalü vota; uko pükroko ce mu ucekroko celü pü phuvo. 45Uko pü phu medita, süla ta Jerusalem lü lakho püphu. 46Zhosü sa uko vo pü ngoyi kereshücelü bade, lesikesethoko dolü bade uko fü reni mu mhaketso ziba. 47Püfü keseko ukongophita, pü miketso mu mifü kela kesüko se kesüce. 48Uko tavo püngo keyice ukongophita, püzu puce poti, anu, no dithide haniyo hibi ta? Hihe, npo hani lü kemezhephi de nphu tate. 49Pü unice poti, dithide neni aphu züta? Neni I apocelü pü mhatho thimokesu bati semo zome? 50Uni pü kepoco seyi mota, unice posü zori 51Pü uni züde ta Nazareth lü kita de uni zü bata; vele püzu mhahiko kepo metü pumelülü rekra tazo. 52Jisu mhase lüri mu püchosheri ma keheyi, thüma mu Jihova khrüpü.

Currently Selected:

LUKE 2: NAG5BSI

Highlight

Copy