LUKE 3
3
John jülokepüo mhatho
1Tiberious Caesar kede thi keba tüce, Pontius Pilate-e Judea lü governor (Angh) thiba, mu Herod Galilee lü tetrarch (kezho) thiba, pü sazüo Philip Ituraca lü tetrarch thiba, trachinitis khü kosa mu lysanias sheri Abiline lü tetrarch thiba. 2Annas mu Caiphais ni thevokezhotho thiba, Jihova jü john cevori, Zacharias nu nhatsalü ketao. 3Jordan rükhü kejovakeyi mu melü vode kephomalü thelü redekeyi mu jülo kepü pü metha. 4Isaiah saju kepoo lesilü thopü kemeta, nhatsalü seketa fü poti, neko Niepoo cho kesüyite, pü chodeko thi kemeziyite. 5Cejü razhoko lü vato, mu cejütu mu cejütu kerenuko metü thi renu vato, chokesu kereviko thi kemezi vato, mu cho meju kemoko thi kemeju vato. 6Uthiupho kenekhü kelakeyi Jihova süngoto, 7Makro ta püce jülo püto kevoriko cepoti, nhibü shuyeko, sopü lekhu vori kezü nekopo tayino posü de ta vorizü sheri? 8Thelü redekeyi se zhüyi keshü pü vorite, neko lulu kelü, hapotsa Abraham siotilühite; I nekoce posüto, Jihova ketsühiko sheri khipü Abraham nuneko thiyi vetila. 9Tsühi sheri merü khapü süboko phelümezü ve, sübo kehopüsheri use kevezhüyi kemoko dathüpü melü süvato, 10Thümako püketsoti, süsa hakopo dipü thita? 11Pü ukofü kela kesü, “ubola kena kebami po khapü kedimi zükezayite, ketico (themu) kebami ri sübi khapü kedimi zü kezayite.” 12Mahomi sheri jülo pü ketola vori, kemethao, hakopo dipü bize veta? 13Pü ukoce poti, mhakhapü nekopo thino kesüko kezü pi miyo mhakhihite. 14Thipahemiko sheri sübi, hakopo dipü bita? Pü ukoce poti, mikehikemu thihite, mori mipüyo sheri kemeda pü mejohite; mu netho ne kaza (zhokhro) pü nenüyite. 15Thümako kemerice mu metüko kelülü John hi Khrista sü tazo motho, si bata. 16John uko metüce posala kesü, “I jülo pü nekotsüsü, vele mipü aceri kupfü ketipü vorizü; Ipü pheku phari phrüyi kesümi mo; pü Kemesa Rüpülü mu melü neko pü jülo püsüto. 17Pübelü hahüri ba mu süpü cehükhro tehako hü she süto, side tehako püvo tehacelü kengu yito. Vele sibüko, kha mhütaküho melü süvato.” 18Mhakekre kekrori pü mi metha mu thümako tarhosü. 19Vele Herod Tetrarch no pü saju-o Philip cemi Herodias yi ketala süsü pütü kemo John no pü lekhusü; mu Herod mhatho kesuthi kesüko sheri sade kerhesü. 20Hipi sheri pü thisakesü, John tüpü thejücelü khava.
Jisu jülo kepü
21Hitüce thüma metü jülopü bata, mu Jisu sheri jülopü yide kecho thiba, tükhri (he) süta. 22Kemesa Rüpü uthiupho kebabi taki püyo bayita, mu tüyo jüpü vori, süo poti, no anu akhrüo zo, I nngo anü shuzo.
Mary shuyezu, Jisu nezu
23Jisu tütse sümeri ta (Joseph nule ziti) Joseph no Heli nu. 24Süo Matthat nu, Levi nu, Melchi nu, Janna nu, Joseph nu. 25Mattathias nu, Amos nu, Naum nu, Esli nu, Nagge nu. 26Süo Maath nu, Mattathias nu, Semei nu, Joseph nu, Judah nu, 27Süo Joanna nu, Rhsa nu, Zorobabel nu, süo salathiel nu, Neri nu, 28Süo Melchi nu, Addi nu, Cosam nu, Elmodam nu, Er nu, 29Süo Jose nu, Eliezer nu, Jorim nu, Matthat nu, Levi nu, 30Simon nu, Judah, Joseph nu, Jonan nu, Eliakim nu, 31Melea nu, Menan nu, Mattatha nu, Nathan nu, David nu. 32Jesse nu, Obed nu, Booz nu, Salmon nu, Noasson nu. 33Aminadab nu, Aram nu, Esrom nu, Phares nu, Judah nu, 34Jacob nu, Isaac nu, Abraham nu, Thara nu, Nachor nu, 35Saruch nu, Ragau nu, Phalec nu, Heber nu, Sala nu, 36Caiman nu, Arphazad nu, sem nu, Noe nu, Lamech nu, 37Methuselah nu, Enoch nu Jared nu, Malelul nu, Cain nu, 38Enos nu, Seth nu, Adam nu, Jihova nu,
Currently Selected:
LUKE 3: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
