LUKE 5

Fü ketü ungo kethi

1Thümako pügü tutu tata, Jihova jü kerenila, pü Gennesaret jükezho poyo thayi. 2Ru kena jükezho khüce ba, vele fü ketüko bamota, uko füketü jal (fü) ko meni bata. 3Pü ru pülülü, süo Simon ru, khupü jülü sünode posü, cejü kesozü kemecu kemoce; Pü bayi de thümako metha. 4Hice püjüpo mota, mu Simon po püru khupü jü kerelü lüphe no posü, de pü jal (ketüfü) khasüte khutüyi ketola. 5Simon püfü kelade pokesü, kemethao hako tüzüzho metü thehe thizole mhapüri tüyimole; sizosheri I n kepo jüla ajal kelhu süto. 6Ukosübide thisü, fü kekro boyita, mu uko jal pretazü. 7Ukokromi ru kekrelü ketako cüsü de ukopo kekhrühi sünosü. Uko tavori mu füko pü rukena nilü chuyi, süla runi relütanu. 8Simon Peter süo ngosüde, Jisu phelü neküki pü reshüta de poti, Acelü tatate, kekrelamori I kephomamipü tila, Oh, Niepoo. 9Kekrelamori püngothi ketala, mu püzü keta metüko, khu kekro tüyi ketala. 10Zebedee nuni James mu John niri sülüta Simon züta; Jisu Simon cepoti, mpepahite, hisaco nothüma ketümi thitato. 11Uko runi cejükesolü vorita, uko mhametü khavade püsa mejita.

Jisu mpa (lepra) kethimi pü thi kesürho kesü

12Pü nadepülü kebace thümapü mpa kethipo püchu pü ba Jisu ngosü pü nekütsü puce umezhemelota, mhace no nmedo lize, no athimeve süyive. 13Pübechopü pü nisü, de poti, I thisüto, no mesa tate, sizisü metha mpa (lepra) kethi dita püyo. 14Püpo süopü mipüceri pohino sisü; vele no tavo thevoo mhüngo thisüte, mu mesaketa Moses zholü popü kemetako thivate, uko mhüjülü zhopo khakesü. 15Vele pü kemele ukhü metülü vo keye süta; makro tavo püfürenita, uko kethathiko thi kesürho sü ketola. 16Pü thüma therüta rayhokolü vode kechothi ta.

Pheyho mipü thi kesürhokesü

17Pünhapü pü mimetha bari, Phariseemiko, mu lesi kesethoko süce ba, Galilee rünakolü vori ba, Judea lüri, mu Jerusalem lüri, Niepoo keku ukothikesürho sü ketola ba. 18Thüma lasaketapü püziyo püpü vori, pü züvo puce süketo chophu, pükhapü pü mhüjülüsü ketola. 19Uko pü zülüsü keto chophu medita, kekrelamori thümakrori ketala, uko cetuyo kuta, cetu cepha sü püzilü pü püki Jisu mhüjülü süsü. 20Pü uko kemelü ngo kesüce “Thümao, n kephomako vasüteho,” ze posü. 21Lesikeseko mu Phariseemiko kepode thüma hio sopüle zi-eno Niepoo kemeshu po bata? Sopüno kephoma vayi veta, Jihova lebisa? 22Jisu uko lüdo sesü de kelakesü, neko melülü dipü lüba? 23Dipüo poreyi kuta? Nkephomava ntsüvaho siti me? Mori tasüte de chotayi tate, süni dipüo poreyi ku? 24Vele nekopo seketola Thümanuo cejülü keku kephoma va keyi ba (side pü lasao ce poti) I nce posüho, tasüte, nzi püyi de ta ncelü votate. 25Rekri thümako mhüjülü pü tasüta, püzü kezüthilü, ta pücelü vota; zapozale Jihova thide. 26Thümametü ungo thita, Jihova zapozale pota, meprüti thümako yo vota, tha uko mha ketekhri tipü ngosüte.

Matthew kecü

27Mha hiko thi kevasa pü tavozü ri thümapü Levi letipü khazhonu khrü bade ngoyi, püce poti, “no asameji yite” 28Pü mhametü khavade püsameji ta. 29Levi pücelü thehüpü kezhopü kesüsü, kezhomi kekro mu thüma kekrekori vori uko kezü ba,

Jisu lesikesethoko mu Pharisee fü kela kesü

30Vele Phariseemiko mu lesikeseko panyode pü sajiko poti, neko dipüla malimiko mu kephomamiko zü mhati mhakra baya? 31Jisu uko fü kelakesü, “kesürhomiko daru kesemiko zü mhapüri kethidi, vele süko kethimiko lazo. 32I kemeziko cü ketola vorimo, vele kephomamiko po thelü redeyi ketola zo.” 33Uko puce poti, dipla John sajiko tsükenu mevoya, mu kechothiyo; sübi Phariseemiko sheri siziyo; vele neko ti mu kra bazo? 34Pü ukoce poti, neko zhosao celü mevo ba tome, zhosao ukozü kebace? 35Vele tüsozhoko vorito, zhosao züta ketasa, (uko celü bamo ketasa) süsa tüso sünhako uko mevo tato.

Vaheko mu fü pü kejüve kesü

36Pü uko ce kejüvede poti, mipüri fükra pü fü kesa mefü yomo, sizilize fü kesaori kroku tato, fü kesao fü kevüo zü kekre mu kemhakebi motayo tila. 37Mipüri hezo kesa khapü vaheri (botol) kevülü süyomo, sizilize hezo kesao vahe kevüo püphro vayo, hezo kelata mu vahe (botol) meka vato. 38Hezo kesa khapü vahe kesalü süyo, sizitisa kenani mekrü yito. 39Hezo kevükramezüyi ketasa mipüri hezo kesa menyü yomo, pü kelüce hezo süketa (kevüo) kevetho (veku) le zi bayo.

Currently Selected:

LUKE 5: NAG5BSI

Highlight

Copy