LUKE 6

Jisu mu Sabbath tüsozho

1Sabbath vakena-o nha püsajiko zü sako yilü vo, püsajiko sako rütita uko belü süyide. 2Phariseemipü ukoce poti, neko dipü thide Sabbath zhonha thezhokemo thi ya? 3Jisu ukofü kelekesü, neko mha hibiti phrimo zome, David meri ketace, püzü ketako zü dithi. 4Pü kerüshücelü kelüce: mengo keti tsükrida khipüti mu pü püzü ketako pori ti; 5Pü ukoce posa kesü, Themanu-o Sabbath pi sheri Niepo zo.

Ubo lasa ketao thimeve kesü

6Sabbath kekrepünha pü kereshücelü lü mi methaba, sülü mipü pübo uzaco lasa ketapü ba. 7Lesikeseko mu Phariseeko pü peba, Sabbath nha pü mithi kesürho sü tome mo sheri; sülü uko pü mejo keto ngoyi ketola. 8Vele pü uko lüdoko seba, süla pübo lasa ketao ce poti, tasü midolü thasüte, siri uko dolü tasü thayi. 9Süsa Jisu ukoce poti, I nekoce mhapü ketsoto, Sabbath nha mhakeve kethi thezho me, mhakesu kethi thezho? Thüma kelasü tome, mi dokhri ti? 10Pü uko pe metu vosü, side thümao ce poti, nbo meto süte, pübo metosü ri pübo keveco bita. 11Uko lükekripü ukotho kerethide Jisu yo kedipü thisüto sheri mebu bata.

Mi kerikena keda keyi

12Pü ta cejütuyo vode kechothi bata, tüzüzho metü sülü bata. 13Tüso vori cu pü sajiko cüsü, mikerikena kedapü püsaji thiyi, mu süko thopü apostels zisü. 14Simon, püzathopü Peter thi kesüo, Andrew pü sazüo, James mu John ni, Philip mu Bartholomew. 15Mathew mu Thomas, James Alphaeus nu, Simon cüpü Zealots siyo. 16Judas, James sazüo, Judas Iscariot pütüpü zhu kevao. 17Pü cejü kethezholü kiri mu püsajiko risa, thüma kekro Judea metülü mu Jerusalem lü sheri, jükezhokhükolü Tyre, Sidon lüko voride püfü reni mu ukethiko thikesürho ketola vori. 18Therükesu rüpüko po ukebü ketako, süko thikesürho sü. 19Makro tavo pü jüsünyüta, kekrelamori mhakeve püyo prade süko metü thi kesürho sü ketola.

Cejütuyo mi metha kesü

20Pümhü khrüpü methakeyiko pede poti, “neko mhakediko thejo kepütho, kekrelamori Jihova (tüyo) kede neko zhüzo tila. 21Neko tsühi merikebako tsühi krakebako thejo kepütho, kekrelamori neko nüyi (nyüta) ketola. 22Mi neko ngometsüyo tiko thejo kepütho, side mi krolü neko hu kevako, neko meshü, nza cüpü thüma kesuthomithi, kekrelamori thümanuo la. 23Neko sünha neko rechuyite, de prürehü süte, hihe, nekozhokhro tüyo vephizo ketola; uko potsaneko sheri sübiti thipü saju kepokoyo süzotila. 24Vele neko mhakeneko kesukerho, neko lü kelu ngoyi ketala 25Neko chu kebako kesukerho, neko merita ketola, neko tsühi nyü kebako kesu kerho, kekrelamori nekokra mu thekrithita ketola. 26Neko mi metü nechu (pomeve) kebako kesukerho, kekrelamori upotsaneko sheri kecejü saju kepoko yo sübiti thizo tila. 27Vele I neko reni kebakoce kepo, nengomumiko khrüyite, neko metsü ketakoyo mhakeve thisüte. 28Neko reshu ketimiko yo jo (reliphrü) pü tsüte; neko krünyü (ne meshu) ketimila kechothite. 29Nejo püco vü (kekhu) sülize, kekreco kerüpü tsüsa süte; n bola pükhiyi talize nbola (meso-o) ri pü putsü sa süte. 30N ce mhacho keba metü khapü tsü süte, mu nzhü püyi ketakoce cho sala hite. 31Miponekoyo dipü thisüze nenüyo sheri neri miyo sübi thisüte. 32Mi nekekhrüko lebi khrüyo lize, dipü kemeza ngoyita? Kephomako sheri siziti thiyo tila. 33No mhakeve thipü mi mhakeve thipü n ketsüko lebi tsüyo lize, dipü kemezangoyi ta? Kephomamiko sheri sübi keti thiyo tila. 34No mhangoyi ketokoce mhangoyi keto kemerila mhapü mi thepo ti lebi lize, dipü kemeza ngoyita, kekrelamori kephomiko sheri mhapü mithepo süde mhangoyi keto meri yozo. 35Vele n ngomumiko khrüyite, mhakeve thi pü sükoyo süte, mhapü süko tsüte, mhapüri sükoyo meri hite; n zhokhro zhoshuzoto, mu neko kerekrüthoo nune thiyito, kekrelamori pü thüma kesuko yo sheri sizi yo. 36Neko süla mingomezhe zote, neko pori mingo mezheyo tila. 37Mi mejo hite, size mi neko mejo taho; milümesu hite silize mi nelü mesuho; mikejo va mitsüte, silize nekejo va süto. 38Mhakha mi tsüte, size mhakha netsüto; medetsüsüto, nü ketü süto, kena (kenü) süto, tsole (chule) ketakori lapü n khoroyo süpü ntsüto. Kekrelamori no dipü bide thisü sheri sübi tüti thipü ntsü süto.” 39Pü jüve pü ukoce poti, mhücemipü mhücemi chothayi veme? Uni kenani retu tekhülü lüta motome? 40Misajimi pü niepoo ce zhokumo, vele vetsütso ketimi pü kemethami bizo. 41No dipüla kerho nsazüo mhülü kebao peba, n mhülü kerho kebao pe mera mo deno, 42Mori dipübide no n sazüo ce poyiveta, a sazüo apo kerho n mhülü kebao pü vate siziyi veta, nmhülü kerho kebao khiva meramono? No kethera ketao, kerho n mhülü khiva merate, size no kerho ngometseyito mu nsazüo mhülü kerho kebao khivato. 43Kekrelamori sükeve püse kesuzhüta yomo; mori sükesu püse kevezhü yomo. 44Kekrelamori husho süyo khubü sezhü yomo. 45Thümakevemi pü melü lü mhakeve kengu pü metatila mhakeve khiprari yo; mu thüma kesumi mhakesu pumelülü kebala mhakesu khiprariyo. Pü melülü mhakekro kengupü metatila süko utalü püprari yo. 46Neko dipüla akhipü, “Niepoo, Niepoo” siziba; akepoko thisü mode?

Jüve cepü tsüroyo kethi ju

47Kehopü sheri ace kevorimi, akepoko reniyi mu süko thimu züyi lize, I thapü neko meka süto pü kedipü bitosheri. 48Thüma süo pücekhü chürelütsü tsüroyo umeshu yide pücethiyi, jüde süri süova, siri ce süo renamota, süo tsüroyo düyi ketala. 49Vele reniyo, thiyomo lize thümasüo puce thipü nyolulü shukesü cepübizo, jüde vori ce süo va, metha ce süo retuta, ce süo kashuta.

Currently Selected:

LUKE 6: NAG5BSI

Highlight

Copy