LUKE 7
7
Thipahe krapikezho-o theküo thi kesürho kesü
1Pü mhahiko potso kevasa, thüma krode koce, püta Capernaun lülüta. 2Krapikezho thekümipü, pü khrüphi yori mhathi tade satanu züta. 3Pü Jisu vori kezü sesüde Jews mehimi ketsüpü Jisu cesü, püpo tavo pü theküo thikesürho süno chota. 4Uko ta Jisu ce voride püpo tavo büno rüdata, poti pü vosheri kezüzo ketithüma püle sizita. 5Pü hashuye kekhrümi mu pü synagogue sheri thisü. 6Süla Jisu ukozü tavota, pü tavo ce süozü kemecu bakemolü tsoyi, krapi kezhoo püzümiko ketsüpü püce süde “no kemezhehite, I npo ace khrikhro lü kesümi mole, Ino”, 7Mori Ita nce vorei kesümi mole, vele no jüpü posü lize, athekü-o sürhoyito. 8Kekrelamori I sheri kekukhrotayo, akhrosheri thipahemiko ba, I püpo tavote, sizi süze pü tavotayi; mu kekrepüce, tavorite zisüsüze, pü tavoriyo; mu athekü mice n mhahio thisüte sizi süze pü thisüyo. 9Pü süko po kesüce Jisu püngo thita, de regüpra pükhüko pesüde, püsameji ketakoce poti, I nekoce posüto, I thüma ukemelü kene hibiti ngomo, Isreal lü zosheri bamo. 10Uko ketsü kesüko ta sala ce sülü vota, tavo theküo mhathi kebao sürho bade ngoyi ta.
Theno samepü nu thi merhü kesü
11Tüso süsanha, püta nade Nain lüvo, pü sajiko mu thüma kekrosheri. 12Pü nade kharü meno vori kezüce, hihe! Kesa mopü püde vorizü ngoyi, thenosamepü mipü nu pule; thümakekro püsamejita. 13Niepoo süo ngosü de püphimezheta, de püce poti, “krahite” 14Pütho phe mopüra püsü, mu kesao pü ketako thakemekre bata, pü poti, “kresa-o, I ncepoyo, tasürite.” 15Kesao tasüri bayi, de mhapo shüdü ta, pü thimerhüpü püzu tsüsü. 16Kemeprü thema metüyo bata; Jihova chu zapozale thita. Uko dolü, mu Jihova pü thümako meho süte. 17Theju hio se Judea cejü metülü vota, mu pükhü kemetuko metülü ri vota. 18Mha hiko metü John sajiko pü John ceposü.
John püsajimi kena ketsüpü Jisu ce kesü
19John pü sajimi kena ketsüpü Jisu cesüde pü ketso, no vori ketoo me? Mano hakopo kekrepü fü bata? 20Ketsü kesüni püce voride uni poti, John Baptist no hani ketsüsüle, no vorito ketao me? Mode hakopü kekre pü fü bata? 21Hitücehi pü kethimi kekrothi kesürho sü, thathi ketako, therükesu ukebü ketako, mu mhücemi kekro mhüthipü mhangosü. 22Jisu süla unicepoti, neni tavote, de John ceposüte, mhücemi mhangoyi bate, pheyhomi chotayi bate, lepra kethiko thi menüsüte, nizhümi mhafü seyibate, kesasmiko thimerhüyi bate, jüyikeve popü kediko cesü bate. 23A yo kejothikemomi thejo kepütho.
Jisu John zhopo kethi
24John sajiko ta ketasa Jisu John zhopo thipü thümakoce kesü, “dipüla neko ta nhatsalü vo dipü peya? Tekhrapo hü melü keba pe toli züme? 25Vele neko tapra dipü peya? Thümapü füne kemenü khiketa püme? Hihe, keretso pü keta thümako kedemi celü bayoho. 26Vele neko tavo kedipü pe ketola vo? Saju kepomi me? Ile, I nekoce kepo, saju kepomi ceri kezükeye. 27Thüma hio thezho lesilü thopü kemetao Hihe, I n mhüjülü saju kepomi, a choyikethi, ketsüsüto, pü n choko thi kerede süto. 28I nekoce kepo, thenomi po menu kesüko dolü John ce saju kepo kezho basamo, vele Jihova kedebalü kenithoo sheri püce zhoku.” 29Thümako metü, püfü sesü, malimiko sheri, Jihova po meveta, uko John Baptist zalü jülopüyi.
Melükemo Jisu po kemede kesü
30Vele Phariseemiko mu thezhokeseko Jihova medolü vori muta, John Baptist zalü ri jülo püyi mota. 31Niepoo poti. Tsüdo nuko pü kedipü zü kemede süta? Dipü bile zide poyi veta? 32Süko natsimiko dukalü bade, hunehu cü de poti, hako leli khusü neko mese, nekonasü mote; hako thekri thisü vele neko krasü mote. 33John Baptist voriti tsükhri timo, mori hezori kramo; neko püpü therü kesu püzüta sizite. 34Thüma nuo tavori mhati mhakra; Hi he, mhati kenyüo mu hezo krakenyü-o, malimi, kephomamiko, khriethoo sizite. 35Vele, mhaselü kemezi mesesüte, pü nune metükola.
Jisu Pharisee mipü celü kevo
36Phariseemipü Jisu po pücelü mhatino pücüsü, pü tavo de bayi sülü mhati ketola. 37Thenomipü, kephomapü, nade sülü, Jisu Pharisee celü keba sesü. Tirü Alabastar büpü, mharükethenyüpü püvori. 38Püphece usaco kratha, pümhüjü popü püphe vade püpitha khi shüsü, de püphe mebosü, süsa tirü süo pü kenhüsü. 39Pharisee pücü kesüo süo ngosü de pülülü ti, mhace thüma hio saju kepomi lize theno hipü sopü mu dibiti nopü sheli seti mesü, püjü kethao; pü kephoma püpü, 40Jisu süo kelakesülü poti, Simon, I n ce mhapü po süto, pü poti, kemethao, posüte.
Mhakethepomi mu thepokepümi pü ju
41Mhapü mithepo ketimipü, püpo kepümi mikena ba, mipü presa krapengu mu kekreo hepüngu de püpo püba. 42Unikenani mhapüri pü püpo shuyi hota, pü süla unipo metü vasüva, uni sopü pü khrü (unü) kutata aceposüte. 43Simon püfü kelakesü, akelüce püpo pü mekrokeba-o totho (vamekro kesüo). Pü ce posala kesü, no sheco thimeve shusüzo. 44Pü regüsü thenopü ceco peyi de poti, Simon, theno hipü no ngoba ile? I ncelü kelürice no jüpü a phekhrümo, vele thenopü pümhüjü pü aphekhrüsü, mu püpithapü kezhü mesosü. 45No amebo sümo, vele I lüri mu metha (culü) aphe mebo zoba, relümo zo, 46No tirü pü apitha kenhümo, vele theno hipü tirü pü aphe kenhüsü. 47Süla I nce posüto, pü kephoma krophi zori vapütsüsüte, kekrelamori pü kekhrü neshu tila, vele kedopü kekhrü kebako kedopü lebi va kesüzo. 48Pü thenopü ce pokesü, n kephomako vapü ntsü süte ho. 49Püzü mhati kebako utho ulü lüti, thüma hio mikephoma va keti hio sopüle zi bata? 50Pü thenopü ce po kesü, n kemelü la nkela süteho, nnüde tavo tate, site.
Currently Selected:
LUKE 7: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
