MARK 12
12
Yitemi kürüzü kropüh püh küzüve küsü
1Süsa Pu züve lüno pukoce mhapo shüdü süta. Mipüh nee khubühyi püh teyi die cokha püh süo mütuyi mu khubühzü gü küto thi heyi mu rikhu bari thisü, sidie khapüh yitemiko mülü va die rüna kükrepüh lü vota. 2Süsa pu khubühse küra tüce yiteko celüno khubühseko ngoyi totho zidie pu cetami püh kütsüh püh süko cesü. 3Eli sükoe pu tü püh vü va die bethu pu kütsüh süva. 4Süsari pu ceta kükre püh kütsüh la püh sükoce la sü, süri puko süo pi vüva die pü brü kümünga shüh sü die pu kütsüh va. 5Süsari pu kükremi püh kütsüh sürü pukoe süo dokhriva, mu kükre kükrori kütsüh sürü pukoe humi vü mu kükreko dokhriva. 6Süsa pu mipüh süosü putho punu pu khrüthoo balu, pue sü, ukoe a nuo rho mutes; zidie künuthoolü süo kütsüh püh pukoce sü. 7Süri yite sükoe puko tho küpo die, hiohi pu lüprao zo, khe! Uko pu dokhri va khe, sülize pu mhako uko zü thita to; zita. 8Sidie uko pu tüyi die pu dokhri püh khubühyi nhaphülü kügü va. 9Süzita lize khubühyi nyepoo dibi tata? Pu vori die yite süko müka vato mu khubühyio püh kükremi prü vato. 10Cethokoe kha küva tsüo; süo po ukülü tsü küzhoo thite. 11Süosü Nyepoo yono tazo; mu umhüce u malhü tazo; ziküti kütholüsi züo nekoe phi mo zo me? 12Süsa pukoe Pu tü küyi rhü süta, eli thümako müprühta kükrelamori, pue züve po küsüo puko mütsu die po küsü se küyi la, sidie puko Pu khava die tata.
Caesar khrükhrü küti jüh kütso küsü
13Sülize Pu zü pojo tüyi künyi la pukoe Phariseeko mu Herodiami hu kütsüh püh Puce sü. 14Mu süko vori die Pu yisü, Kümüthao, Noe züthozo mu mipühri müprüh yo mo küti ha seba, kükrelamori, noe thüma lhüri pe ta mozo die kütholüno Poo shoko po püh mütha süyo tina. Caesar khrükhrü küti thüzho me moa? 15Hapo khrü to me moa? Süri Pu süko thüra seyi die sü, neko dipüh la a müdo phi yola? Duli püh püh vori a müka te; zisü. 16Mu puko süo süh voriyi, mu Pu uko yisü, hihi sopüh marhe mu sopüh za la zisü, puko Caesar zo; zita. 17Jisu puko zü küladie, Caesar züko püh Caesar prü vate, mu Poo züko püh Poo prü vate, zita, mu pukoe Pu la uko malhü thita. 18Sülize rhülaküsü di lie poyo küti Sadduceeko Puce vori Pu kütso die sü. 19Kümüthao, Mosae tho ha prü küsü, mhaceno mipüh zürao pu nune di die sata, sidie sata, sidie pu cemi yi die pu zürao yie mülhü no sü. 20Süze thazü sazühzüra mi thüna ne, kürathooe thünoyi eli punu di die sata. 21Mu pu sasoo süpü yiyi, eli süo ri punu pühri di die sata, mu süh-o ri süsü bita. 22Sidie mi thünako mütü süpü yi, süri unu di die sata. Mütü salü thünopü ri sata. 23Sülize rhühla küsü tülü puko lasü tice süpü sopüh cemi thita? Kükrelamori, mi thünako mütü süpü yipüh u cemi thiva tila? Zisü. 24Jisu puko zü küla die sü, neko kütholüsi mori Poo küku se kümo hihi la kukri tata mome? 25Mi küsako dolüno rhülasü kütace thüno yi mori tümhi thisü yomo eli tüyo shoyimi bi tayo. 26Süri küsako mu süko rhühla küsü la zoe neko Moses lüsidalü sühprülü dibi die Poo puce po die; I Abraham Po Isaac Po mu James Po zo, zi küma nekoe phi mo zo me? 27Pue küsako Poo mori kürhühko Po zo, mu nekoe kukri müzho shüh tayo zo.
Zü kha küsü küzho thoo
28Süsa lüsiküsemi püh-e puko kümüli küba mu Jisu puko zü küla nve küva sesü die ta vori pu kütso die; 29Dipühoe zü kha küsü mütüko dolü küra thoo la? zisü. Jisu pu zü küla die; Zü khaküsü kürathoo sü; Yhie Isreal! Rünyiyite, Nyepooe Poo zo, Nyepooe püh libi zo. 30Mu noe n mülü süh, nkürhühro mütü süh, n külü mütü süh mu n küku mütü süh Nyepoo Jihova khrüte. 31Mu zü khaküsü künao lizo hizi; N sühzanumi khrü püh ntho n kükhrü biyite. Zü khaküsü kükre pühri hinyihi ceri zhoku ti di zo; zita. 32Süsa lüsiküseoe Pu yisü, vezo, Kümüthao, noe Poo püh libizo, mu Pu mo kümosa kükredi. 33Mu u mülü mütü, uküsekülü mütü, u kürhühro mütü, mu u kuku mütü süh, Pu khrüyi no küti hi müto püh rüthoküthi mu rüsu küthi mütü ceri veku li küti küpo hi küthotü po sü zo; zita. 34Süsa pu mutes shüh die zü küla küsü ngo die Jisu pu yisü, No Poo küde züh kümüprüh bamo zo; zita, mu mipühri Puce mha kütso sa rürüh ta.
Messiah jüh kütso küti
35Süsa Jisu kürüsucelü mi mütha kübace Pu lasü, dibi die lüsiküseko Khrista David nuo lizi yo la? 36Kükrelamori, David-e Kümüsa Rüpü lüno; Nyepooe a Nyepoo ce; I n ngomuko kha püh n phekhra thiva kümothe a zaco bazoyite, zisü tila. 37David thori Pu yi Nyepoo lita lize, süo dibi die Pu nu tata? Zita. Süsa thüma kro küzhoo unü shüh die Pu khü rünyiyi.
Jisu lüsiküseko müjo küsü
38Süze Pu kümütha zü lüno pukoce po die; lüsiküseko yo neko menuyi te; 39Süko u khüne kürüchu süh die shota, lhethothikolü mipo u külu, Synagoguelü thüba küralü ba, tülhüko lü küzhomi balü ba, zi küti uko nüyo. 40Sükosüe samepüko tütiyi tayo, mu küthüra die küsho thi müshoyo, hikoe kümüjo ngo mükro kuto.
Thüno samepü püh mha kha küsü
41Süze Jisue mhangubüh rapeco kübace thümakoe dibi die u rükako püh mhangubühlü sü bas hi küti peba, mu mhakünemikoe mhakükro kügü süba. 42Sücesü thüno samepü mhaküdipü püh-e vori die dapra küna puco presa püh kügü sü. 43Süsa pu müthaküyiko cipüh Puce süyi die puko yisü; I neko ce Potü süto, mi mhakha mhangubühlü küsüko dolü thüno same mhaküdipü hi mha khasü kükro thozo. 44Kükrelamori, mie u küswu küle küba lüno khasü, eli hipüe küditho lüri pu kübadü mu pu süh lhü küto mütü khasü küva la; zita.
Currently Selected:
MARK 12: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
