MARK 13
13
Jisue kürüsuce müka va küto jüh küpo
1Sidie Pu kürüsucelü lüno tapra küzüce, Pu müthaküyiko Puce, Kümüthao yhie, Kütsüko ri mu ceküthiko ri dibizo die thita shehe! Zisü. 2Jisu Puko zü kül; a die; no ce künye hiko ngo bame? Kütsü phu kütu va mo die pühri po küpiba pü bayi lho, zita.
Mha kübü küti mu kümüthi vori küto
3Sülize Pue kürüsuce rüpeco Olive cejütu yo ba kübace Peter, James, John mu Andrew uko mükhrüh Pu kütso diesü; 4Mha hikohi dipüh küthice tato sheli hace po süte; mu mha hikohi thi tsüyi ta to küzüce dipüh püh bata? Zi die kütso ta. 5Jisu puko khü küla diesü; mipüh pori ne shu kütse züh tata mo küto la münuyite. 6Kükrelamori. Thüma kükro aza lün vori die; I no zo; zidie mi kükro shu züh tata to tila. 7Süri neko thüri küthi mu riwhü khü küpo küzüko se küsüce neko lü kühoküro thita hite kükrelamori, mha hikohi vori moyi lho zo tila; süri thülao molu. 8Sücesü shühye püh shühye püh mütsü, mu küde püh küde püh phimu süri to; mu thüthi kükrekre tiko lü ceyice süto, mu thükre mu kümüzhe kütiko süri to, mha hikohi kümüzhe püh kümüre thi küto thürako zo. 9Süri neko tho ne rüle peyite. Kükrelamori, mi neko tü püh müthikühukolü mu Synagogko lü süto. Mi neko tsali vüto sidie aza la mu puko mhuzülü zhopo püh thi sü küto la mi neko züh die küzhoko mu küdeko ce voto. 10Süsheri züyiküveo püh shühyie mütü ce posü mürato. 11Süri mi neko züh ta vo neko kha püh mi belü küsüce, nekoe dipüh po teshi, mori, lü teshi küti müdo die ne lü künyi thi hite. Eli bavüdo süo lü npo dipüh pono zi sheli süo poyite; kükrelamori, nekoe mori Kümüsa Rüpü tho po ba zo tila. 12Sücesü u zürao tho u sazüo tüsü mi po dokhrito, mu upo tho unu tüsü mipo dokhrito, mu ununekoe ukrüneko mütsu süri die mi po süko dokhrito. 13Mu a za la mipo neko mütü mütsü to, süri hie zo tha thüla tso küyio külayi to.
Kümüzhe shüh küto
14Süri Daniel sadzühküseo popu jüh po püh kümüta; mhava mürho zo küto kümütsü thi zo kütioe ta vori putha zü kümolü tha küyi ngo küyice, sücesü phiyo kütimi po se kükreyi te; sülize Judealü kübako po ta sü cejütuko yo vo tayi. 15Mu cejütuyo kübako po celü mha khiyi tolizu die cejü kiri hite. 16Mu yilü kütako po u khüne khiyi tozu die rürüh la vori hite. 17Süri sütüceko sü u nulhüpü ba mori unune no kübako kümüzhe shüh zoto. 18Eli neko ta küto tü sü po tüsühce mo küto la sho bayite. 19Kükrelamori, sütüceko sü kümüzhe püh Pooe mha mülhü küsü prühlü no vori tsü kütsori südüsü kümüzhe küti di mu hisa ri süziyi külho thizo to tila. 20Mhaceno Nyepooe tüsozhoko thi müzü sü mo tipühthilize, mipühri külayi lho tazo mütse, Süri küda küyiko zhozhi külü la Nyepooe tüsozhoko thi müzü süto. 21Mu sülize thüma kühopühri neko yisü, Yhie, Khrista hice ba mori lice ba zi zori mülü hite. 22Kükrelamori, kücezü Khristako mu kücezü sadzühküseko süri die zasiko mu u malhü mhathoko thi püh mi kato, sidie thiyi küvethe küda küyiko ri shu züh rütse tato. 23Süri nekoe münuzo yite, Yhie, I müzümüra lü mha mütü püh nekoce posü vaho.
Thümanuo la vori küta
24Süri kümüzhe küti tüsozho süko sa nace zühta to, mu khri ri pu küve khasü mu tato. 25Mu thümiko rüra tato, sülize tüyo kukuko sü küna vato. 26Sidie ukoe Thümanuo kuku mu zapo zale thi die kümhülü no vori küzü ngoto. 27Süsa Pu Pu shoyimi kütsüh püh cejü küla lüno vo tüyo küla kütso tükhra dako lüno Pu küda küyiko phu künguyi to.
Shedübo yono kümütha zü kha küsü
28Shedüboo yono neko züveo seyite, Pücoko müzü layi die pu nyi nyisa thü prari küzüce, nekoe tülü tate, ziyo. 29Süsübi neko ri mha hikohi thi vori küta ngo küyice, süsü müno tüte, cekhace bate, zi küti seyite. 30I nekoce potü süto, mha hikohi thi vori ta kümothe, tsüdo külhüko hi mhapühceri di ta lho. 31Tüko dita to, eli azüko mhapühceri di tayi lho. 32Süri tüso süo mu bavüdo süo la zoe Poo zo kümosa tüyo shoyimi mori nuo zori mipühri semo. 33Münu bayite, khü mu la mu sho ba zoyite, kükrelamori, nekoe di küthice to sü se kümo la. 34Mipühnee rüna kümüprüh pühlü vota küzüce küku kha püh pu cetako mu mhatho u thütsüh püh süko prü sü mu ceko kükhüo po mha pe münu ba no sü va ta küta bizo. 35Süla neko khü mu la bazo yite, kükrelamori, nekoe ce nyepoo dipüh küthi ce vori tosü se kümo la, thüva to me, müso tülu to me, modie thüvü kükhu to me, küswüho to shi se kümo la. 36No züh küzülü Pupo mha vori die n ngoyi tamo küto la. 37Khü mu la ba zoyite, zi küsü hi nekoce ri mu kükreko ce ri mütü po süho.
Currently Selected:
MARK 13: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
