JOHON 4
4
Jisu bai Samariajwk
1Jisu baptisma rwui Johonni slái sagri kwbáng khlai rwrwgo hwnwi Pharisairok khna kha. 2(Hai phano Jisu sakphang baptisma rw ya, bini sagrirok simi se rw-o.) 3Omono saui manẃi Jisu Judia-o tong yaui Galili-o kiphilwi tháng kha. 4Tháng phuru bo Samaria tẃi ma tháng kha.
5Samariani Sukar hwnwi taun khungsa-o bo phai kha. Abo Jakob bwsla Josepno klangmani chara bai chal tha ya.#Yap 33.19; Jos 24.32. 6Jakobni twikhor aro’-no, hakhe Jisu himmani lengjagwi a twikhor gana-o achuk kha. Aphuru dibor jora.
7Samariajwk khoroksa twi khókna phai kha, hakhe Jisu bono hai hwnwi sa kha, “Ano twi khopsa khan di.” 8(Bini sagrirok chámung paina hwnwi tauno tháng kha.)
9Samariajwk hai hwnwi sa kha, “Nwng le Judai hwn khe, ang le Samariajwk; nwng bahai khe ano twi khan di hwn?” (Judairok Samariarokni yakni twi na lai ya.)#Ejr 4.1-5; Neh 4.1-2.
10Jisu hai hwnwi sa kha, “Kaitor tamo rw abono nwng saui manma tlai, phiya nini thani sabo twi san abono nwng saui manma tlai bini thani se nwng san kha mun, hakhe bo nono twi kwthang rw kha mun.”
11A bwrwi bono hai hwnwi sa kha, “Takhuk, nini yago golabo kwrwi, twikhorbo kuthuk. Nwng buro twi kwthang man lang ba? 12Chini chuchu Jakob chwngno o twikhor klangmani. Oroni twino bo’-bo nung lang kha, bwslasong bai musuk-toknokrokbo bebak nung lang kha. Nwng Jakobni slái phano kotor diba?”
13Jisu hai hwnwi sa kha, “Oroni twino nungnai borok bo twi kangjak phinai; 14phiya ang rwmani twino nungnai borok bo tei twi kangjak phlai glak. Ang rwmani twi bini bisingo twimuk chorom rwui bono mwthang phlainai.”
15A bwrwi hai hwnwi sa kha, “Takhuk, a twino ano rw di. Hakhe ang tei twi kang glak, oro twi khók phainabo nang glak.”
16Jisu bono hai hwnwi sa kha, “Tháng di, nwsaino ringwi oro tubu di.”
17“Ani sai kwrwi,” hwnwi a bwrwi sa kha.
Jisu hai hwnwi sa kha, “ ‘Ani sai kwrwi,’ hwnwi samani abo nwng kubuino sa kha. 18Nwng chwla khorokbano sai song kha, tabuk tongma chwlabo nwsai wng súk ya. Nwng kók kubuino sa kha.”
19A bwrwi hai hwnwi sa kha, “Takhuk, nwng ba diyari se bla. 20Chini Samariani chuchusong o hathái-o Kaitorno suri phai bai-o, phiya Jerusalemo se Kaitorno surithai tongo hwnwi norok Judaisong sa-o.”
21Jisu bono hai hwnwi sa kha, “Ani o kókno khunju kan di, naku. Bororok Aphano o hathái-obo suri phai glak, Jerusalemobo suri glak, abo tẃi sal phai rwrwgo. 22Norok Samariasong sabono suriui tong norok’-no saui man ya; chwng Judairok sabono suri abo chwng saui mano, tamni hwn khe Judairokni bising tẃi se mwthangjaknani lama wngo. 23Omo tẃi sal phai rwrwgo, abo tabuk’-no sók phaiwi tong kha, aphuru sói sói surinairok Aphano phola bai kubui bai khe surinai. Abo tẃi surinairokno’-no Apha nai-o. 24Kaitor le Phola se, aboni bagwino bono surinairok phola bai kubui bai khe ma surithai.”
25A bwrwi bono hai hwnwi sa kha, “Khristo hwnjaknai a Masia phai anw hwnwi ang saui mano. Bo phai khe chwngno bebak saui khna rwnai.”
26Jisu hai hwnwi sa kha, “Nwng bai kók saui tongnai ang’-no bo.”
27Aphuru bini sagrirok kiphilwi phai kheno bono bwrwi khoroksa bai kók sa laiwi tongma nugwi belai uanajak kha. Hai phano “Nwng tamo nai?” hwnwi khoroksa phano a bwrwino sẃng li ya, Jisunobo “Nwng tamo wngwi a bwrwi bai kók sa lai?” hwnwi sẃng li ya.
28Hakhe a bwrwi gola khibiui klangwi tauno tháng phirwi bororokno hai hwnwi saui kha, 29“Phai di, borok khoroksano nai phai di! Ang agi khlaimarokno bo bebak ano sa bai kha. Bo Masia wng glak diba?” 30Aboni bagwino bororok taunni ongkhorwi Jisuni aro tháng lai kha.
31Aphuru’-no sagrirok Jisuno hai hwnwi hwn kha, “Hodakra, kisa swk chá ja di.”
32Hakhe bo hai hwnwi sa kha, “Ani thani chámung tongmano norok saui man ya.”
33Aboni bagwino sagrirok bórok kiching bórok hai hwnwi sẃng lai kha, “Khoroksa swk da bono chámung rw phai lang hwno?”
34Jisu bórokno hai hwnwi sa kha, “Ano rohornai samung tholwi rohormano khlai bainani abo se ani chámung. 35Norok ba hai hwnwi sa lai ya da, ‘Tei nokha talbrwi kheno mai rana wng anw.’ Ang norokno o kók sa-o, kheto naharwi nai di, mairok kormolala wngwi rana wngwi tong bai kha. 36Ranaisa bini manthaino man kha, bo raui thummani abo mwthangjak phlainai. Hakhe sarnai bai ranai baksa khe tongthok lainai. 37Oro o kók le sói se, ‘Khoroksa sarnai tei khoroksa ranai.’ 38Norok samung tang ya kho abo tẃi kheto-o se ang norokno rohoro. Bui batelai aro tang kha norok batelai hai’-no man kha.”
39“Ang agi khlaimarokno bo bebak ano sa bai kha,” hwnwi a bwrwi sama bai a taunni Samariarok kwbángma Jisuno poito khlai kha. 40Aboni bagwino Samariarok bini aro phai phuru Jisuno “Chwng bai tongwi tháng di,” hwnwi koi lai kha. Hakhe Jisu aro nokha salnwi tong lang kha.
41Bo samano khnaui teibo kwbángma poito khlai kha, 42hakhe a bwrwino hai hwnwi sa kha, “Tabuk le chwng poito khlai kha, nwng sama bai ya, tamo khe sak baithang khnama bai chwng saui man kha o borok’-no katswi Khristo, swngcharno Mwthangnaisa.”
Jisu tangphang khoroksani bwslano ham rwmani
43Jisu aro nokha salnwi tong langwi Galili-o tháng kha. 44Jisu bo sak’-no o kók sa kha, “Diyari bini ha-o bórijak ya.”#Mat 13.57; Mar 6.4; Luk 4.24. 45Bo Galili-o sógwi kheno aroni bororok bono yachak sok kha, tamni hwn khe bórokbo Yókma tero Jerusalemo thángo, hakhe aphuru Jisu samung khlaimarokno nukbu kha.#Joh 2.23.
46Aboni bagwino Jisu bo twino angur bwtwi khlaima dikholo, Galilini Kana tauno kiphilwi tháng kha. Aro ophichar khoroksa tongmani, bini bwsla Kapharnaumo hamya klaijak.#Joh 2.1-11. 47Jisuno Judiani Galili-o phai-o hwnwi khna kheno bo bini aro thángwi hai hwnwi koi phai kha, “Kapharnaumo ani chwlasa thwina naiwi tong kha. Phai di, bono ham rw ja ba di.”
48Hakhe Jisu bono hai hwnwi sa kha, “Soidom bai uanamasingcha samung nuk ya sak norok khoroksa phano poito khlaina nai ya.”
49A ophichar bono hai hwnwi sa kha, “Hodasa, ani chwlasa thwi ya sini ani logi phai di.”
50Jisu bono hai hwnwi sa kha, “Tháng di, nwsla hamnai!”
A borok Jisuni kókno poito khlaiwi tháng kha. 51Lama-o bini selengrok malaiwi “Nwsla ham kha!” hwnwi bono sa kha.
52“Buphuru ham kha ba?” hwnwi bo sẃng khe bórok hai hwnwi sa kha, “Miya diborni damsa-o bini kulum ham kha.” 53Katswi aphuru’-no Jisu “Nwsla hamnai!” hwnwi samano bupha muitu manjak kha. Hakhe bo bai bini nokni bebak borok poito khlai kha.
54Judiani Galili-o phaima ulo Jisu omo bai khe uáinwi soidomni samung khlai kha.
Currently Selected:
JOHON 4: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
