JOHON 5

Pukhiri-o yakung yak man yano Jisu ham rwmani

1Aboni ulo Judairokni ter kaisa tongo; Jisu aphuru Jerusalemo tháng kha. 2Jerusalemo Mera Duglam gana nuka kaiba gwnang pukhiri khungsa tongo. Hibru kók bai abono Betsata hwno. 3A nuka-o phula bai, khora bai, yakung yak man ya bai hamyarok kwbángma klai laijak. [Bórok twi pupaknano naisingwi tongo, 4tamni hwn khe Subraini suari khoroksa achom-achom a pukhiri-o ongkhorwi phaiwi twi pupak rw-o; aphuru a pukhiri-o puila ongkhornai borok bo bini jesa hamya phano hamnai.] 5Aro borok khoroksa nokha bisi kwthamchichar hamya klaijak tongo. 6Jisu a borokno aro klaijak nuk kha, bumasíngni simi’-no bo hamya klaijak hwnwi saui manẃi Jisu bono hai hwnwi sẃng kha, “Nwng hamna da nai?”

7A hamya hai hwnwi sa kha, “Takhuk, twi pupak phuru ano pukhiri-o ongkhor rwnai khoroksa phano se kwrwi. Ang tháng te-tháng te’-no ani slái swkang tei khoroksa ongkhor slabo.”

8Jisu bono hai hwnwi sa kha, “Bacha di, nini ríyanrok khochaui him di.” 9Hakhe a borok doropsa hamwi ríyanrok khochaui him kha.

A sal wng kha Sabat sal, 10aboni bagwino Judai hodarok a ham rwjaknaino hai hwnwi sa kha, “Tini Sabat sal, nwng ríyanrok tẃimani abo chini Kerong swbaima klai-o.”#Neh 13.19; Jir 17.21.

11Bo hai hwnwi sa kha, “Ano ham rwnai se ‘Nini ríyanrok khochaui him di,’ hwnwi ano hwn bla.”

12Bórok bono hai hwnwi sẃng kha, “Ríyanrok khochaui him di, hwnnai a borok sabo?”

13Phiya a ham rwjaknai le bo sabo si se sini ya. Borok kwbángma tongma bagwi Jisu aro tong bu li ya.

14Aboni ulo Jisu bono noktharo nugwi hai hwnwi sa kha, “Khna di, nwng tabuk ham kha. Sumsok ta khlai si di, wng ya khe teibo hamya wngna phano tongo.”

15Jisu se bono ham rw-o hwnwi a borok Judai hodarokni thani saui kha. 16Aboni bagwino Sabat salo omo hai khe ham rw-o hwnwi Judai hodarok Jisuno sátok lai kha. 17Hakhe Jisu bórokno hai hwnwi sa kha, “Apha samung khlai máng tongo, angbo ma khlai tongo.”

18Jisu o kók sama bai’-no Judai hodarok bono teibo butharna muchungjak kha; bo Sabat sal rákhok ya, abo simi ya, Kaitornobo Apha hwnwi bo sakno Kaitor bai baksa khlai kha.

Sajlani phan

19Aboni bagwino Jisu bórokno hai hwnwi sa kha, “Ang norokno sóino kubui kók sa-o, Sajla bini bai bo mungsa phano khlai ya, Buphano khlaima nukmano simi se bo khlai-o. Bupha khlaimani abono’-no Sajlabo khlai-o. 20Tamni hwn khe Bupha Sajlano hamjago, hakhe bo khlaimarokno bebak bono phunugo; bo bono omorokni slái phano samung kotorrok phunuk anw, hakhe norok uanajak bai anw. 21Bupha kwthwirokno mwthangwi tisama hai Sajlabo ahai’-no bo khá kama borokno mwthango. 22Phiya Bupha sakphang keboni buj thum ya. Bo Sajlani yago buj thumnani phan yapharwi rw bai kha, 23hakhe Buphano bóri tẃi Sajlanobo bebak’-no bórinai. Sajlano bóri ya khe bo bono rohornai Buphanobo bóri ya.

24“Ang norokno sóino kubui kók sa-o, ani kók khnaui ano rohornaino poito khlainai borok bo mwthangjak phlai kha. Bo buj thumjak li ya, tamo khe bo thwinani lama bárwi thangnani lama-o sók phai kha. 25Ang norokno sóino kubui kók sa-o, omo tẃi sal phai rwrwgo, abo tabuk’-no sók phai se tong kha, aphuru kwthwirok Kaitorni Sajlani khorang khna anw, hakhe khnanairok thangcha anw. 26Bupha sakphang’-no mwthangnaisa wngma hai Sajlanobo ahai’-no bo mwthangnaisa snam kha. 27Phiya bo Sajlano buj thumnani phan rw kha, bo le Boroknibo Sajla bla. 28Aboni bai ta uana di; omo hai sal phai rwrwgo, aphuru mangkhorni bebak kwthwirok bini khorang khna anw. 29Hakhe bórok mangkhorni ongkhorwi phai anw, samung kaham khlainairok kwthang tongna bagwi thangwi bachanai, phiya samung hamya khlainairok khe majra berjakna bagwi thangwi bachanai.”#Dan 12.2.

Jisuni bagwi sakkirok

30“Ani bai ang mungsa phano khlaiwi man ya; Kaitor ano sama hai se ang buj thumo. Hakhe ani buj thummani abo sói se. Tamni hwn khe ani muchung tẃi ang khlaina nai ya, ano rohornaini muchung tẃi simi se ang khlaina nai-o.

31“Ani bagwi ang sakki rw khe a sakki sói hwnjak glak. 32Ani bagwi tei khoroksa sakki rwnai tongo. Ang saui mano ani bagwi bo sakki rwmani abo sói se. 33Norok Johonni aro borok rohor kha, bo kubuini bwkhak kók sa kha.#Joh 1.19-27; 3.27-30. 34Ang borokni sakki ma nanani nangnai a kók ya, tamo khe norokbo mwthangjak thung hwnwi se o kókno sa-o. 35Johon wng kha chati chẃngma hai kwchẃng khe chẃngjak; a pohoro norok srapsa tongthok laina hwnwi khá kamani. 36Johon ani bagwi sakki rwmani slái phano ani teibo sakki kotor tongo. Apha ano khlai bai di hwnwi rohormarok, omorokno ang Apha bai rohorjakma se hwnwi ani bagwi sakki rwui tongo. 37Ano rohornai Aphani khorang norok khna ya kho phano, bumukhang nuk ya kho phano, bo ani bagwi sakki rwui tongo.#Mat 3.17; Mar 1.11; Luk 3.22. 38Bini kók norokni bisingo kwrwi, tamni hwn khe bo rohormani borokno norok poito khlai ya. 39Elembago mwthangjak phlainai kók tongna hwnwi norok abono cherwi nai lai-o. Aile a elembak se ani bagwi sakki rwui tongo, 40phiya mwthangjakna bagwi norok ani oro phaina nai ya.

41“Ang borok bai kaham hwnjakna nai ya. 42Tamo khe ang norokno saui mano, Kaitorno norok hamjakma kwrwi abo ang saui mano. 43Ang Aphani mungwi phaima se norok ano yachak sok ya, phiya khoroksa swk bini mungwi bo phai khe le norok bono yachak lai-o. 44Norok wng kha khoroksa tei khoroksa bai kaham hwnjakna muchungjago, Kaitorsa bai le kaham se hwnjakna nai ya; hakhe norok bahai khe poito khlaiwi mannai? 45Aphani bwskango ang norokno majra bernai hwnwi khá ta ka di. Norokno majra bernai khoroksa tongo; a borok wng kha Musi, norok poito khlaimani borok. 46Norok sói’-no Musino poito khlaima te anobo khlai kha mun, tamni hwn khe bo swilangmani abo ani kók se. 47Bo swilangmano se norok poito khlai ya khe ani kókno bahai khe poito khlainai ba?”

Currently Selected:

JOHON 5: KOKBSI

Highlight

Copy