JOHON 6

Borok khorok basaino Jisu chá rwmani

(Mat 14.13-21; Mar 6.30-44; Luk 9.10-17)

1Aboni ulo Jisu Galili twibom ayang naro tháng kha. (A twibomno Tiberiabo hwno.) 2Bo hamyarokno ham rwmani soidomni samung nukma bai borok kwbángma bono rwkthar lai kha. 3Jisu hathái-o kasaui thángwi bini sagrirok bai achuk lai kha. 4Aphuru Judairokni Yókma Ter samphajak. 5Jisu yang yang naharwi borok kwbángma bini aro phaima nugwi Philipno hai hwnwi sa kha, “Aswk bororokno chá rwnani chwng buroni chámung painai?” 6(Bo Philipno potaliui naina bagwi se o kókno sa-o; tamo khlainai khlai ya abo bo kaham khe saui manjak se.)

7Philip hai hwnwi sa kha, “Kisa kisa khe rwna phano se aswk bororokni bagwi chámung painani rang khok nwira bai suda se wng glak.”

8Simon Pitorni takhuk Andria hwnwi sagri khoroksa hai hwnwi sa kha, 9“Oro chwrai khoroksa tongo, bini yago barlini ruti lepba tei á maknwi tongo. Aswk borogo omo saboni bukungo silnai?”

10“Bororokno achuk rw di,” hwnwi Jisu bórokno hwn kha. (Aro jabra kwbángma tongo.) Hakhe bebak borok achuk kha, aro chwlarok khorok basai wng thotok. 11Jisu a ruti naui Kaitorno hambai rwui aro achukjak lukurokno banta khe rw kha, phiya a áno nauibo abo hai’-no banta khe rw kha. Hakhe bórok cháui man sak’-no chá lai kha. 12Bórok bebak’-no ok pungwi chá bai khe Jisu bini sagrirokno hai hwnwi sa kha, “Chikhaksa kwma ya tẃi khe bára tong rwkmarokno khochaui ton di.” 13Sagrirok abono khocha bai kha, hakhe naiwi nai ba barlini a ruti lepbani bororok cháma bárano khochamani ura khung chiknwi pung kha.

14Lukurok Jisuni o soidomni samungno nugwi hai hwnwi sa kha, “Omo ba swngcharo phainai hwnmani a diyari se wngna bla.” 15Hakhe bórok bono bugra snamna bagwi romphre nai kha hwnwi saui manẃi Jisu hai’-no hai saichung hathái-o tháng kha.

Jisu twi saka tẃi himmani

(Mat 14.22-33; Mar 6.45-52)

16Sanja jora wng kheno bini sagrirok twibom bwkhak ongkhorwi tháng kha, 17hakhe rungo kasa laiwi twibom ayang naro Kapharnaum bwkhak kiphilwi tháng lai kha. Yang le hor wngwi phai kha, aphuru phano Jisu bórokni aro phai ya kho. 18Aphuruno nokbar kotor sipchama bai twini potika pupak súgwi tong kha. 19Sagrirok mail kaitham kaibrwi chok laiwi tháng khe bórok Jisuno twi saka tẃi himwi rung bwkhak phaima nuk kha, hakhe belai kirijak lai kha. 20Jisu bórokno hai hwnwi sa kha, “Ta kiri di, omo ang se!” 21Hakhe bórok bono rungo tisana nai lai kha, aphuru’-no bórok thángna hwn thani’-no a rung sógwi rwi kha.

Lukurok Jisuno naitukmani

22Teini salo twibom ayang naro tongnai lukurok nai ba aro rung khungsa se. Jisu bini sagrirok bai rungo tháng li ya hwnwi bórok saui mano, bono klangwi sagrirok simi se thángo. 23Aphuru Subrai hambai rw baiwi lukurokno ruti chá rwma gana-o Tiberia bwkhakni rung khungnwi khungtham phai kha. 24Lukurok nai ba aro Jisubo kwrwi, bini sagrirokbo kwrwi, hakhe bórok rungo kasaui Kapharnaumo bono naitukna tháng lai kha.

Jisu se mwthangnai chámung

25Bórok twibom ayang naro Jisu bai malaiwi hai hwnwi sẃng kha, “Hodakra, nwng buphuru oro sók phai kha?”

26Jisu hai hwnwi sa kha, “Ang norokno sóino kubui kók sa-o, a ruti ok pungwi ma chá kha hwnwi se norok ano naitugo, ani soidomni samung nugwi naituk ya. 27Sogwi thángnai chámungni bagwi ta tang di, mwthang phlainai chámungni bagwi se tang di. Borokni Sajla se abo tẃi chámung norokno rwnai, tamni hwn khe Bupha Kaitor aboni bagwi se bono mari bu-ui rw-o.”

28Hakhe bórok bono hai hwnwi sẃng kha, “Kaitorni samung khlaina bagwi chwng tamo khlaina nangno?”

29Jisu hai hwnwi sa kha, “Kaitor rohormani borokno poito khlai di; omo’-no Kaitor khlai di hwnmani.”

30Bórok hai hwnwi sẃng khua, “Nono poito wngna tẃi nwng chwngno bubo tẃi soidomni samung phunuk kha ba? Nwng tamo khlainai? 31‘Bo bórokno chá rwna bagwi chuknohani chámung rw kha,’ hwnwi elembago sama hai’-no chini chuchusong hasing panthoro manna chá lang kha.”#Lam 16.4,15; Lob 78.24.

32Jisu bórokno hai hwnwi sa kha, “Ang norokno sóino kubui kók sa-o, Musi norokno rwmani a chámung abo chuknohani ya. Apha se chuknohani a chámung kubuino rw-o. 33Tamni hwn khe chuknohani ongkhorwi phainai abo se Kaitor rwmani chámung; bo’-se swngcharno mwthangnai.”

34Bórok bono hai hwnwi sa kha, “Hodakra, chwngno abo tẃi chámung máng rwui tong di.”

35Jisu bórokno hai hwnwi sa kha, “Angno mwthangnai chámung. Ani thani phainai borok bo ok khui phlai glak, phiya ano poito khlainai borok bo twi kang phlai glak. 36Norok ano nugwi suda poito khlai ya, o kók ang norokno sa kha bla. 37Apha ano rwmani joto borok ani thani phainai, phiya ani thani phainai borokno ang kiphil rwui rohor glak. 38Tamni hwn khe ano rohornaini muchung tẃi samung khlainai hwnwi se ang chuknohani ongkhorwi phai-o, ani muchung tẃi khlaina hwnwi ya. 39Ano rohornai ano rwmani a bororokni bere khoroksano phano kwmajak yaui páithakni salo ang bórokno khoroksa kwrwi tẃi mwthangwi tisa thung hwnwi se bo muchungjago. 40Sajlano nugwi poito khlainairok mwthangjak phlai thung hwnwi se Apha muchungjago, hakhe páithakni salo ang bórokno mwthangwi tisanai.”

41“Ang’-no chuknohani ongkhorwi phainai a chámung,” hwnwi bo sama bai Judairok bono tẃi hunu-hanai sa lai kha. 42Hakhe bórok hai hwnwi sa lai kha, “O borok Josepni bwsla Jisu ya diba? Buma buphasongno chwng saui mano. Hakhe bo tabuk bahai khe chuknohani ongkhorwi phainai hwnwi saui tong sla?”

43Jisu bórokno hai hwnwi sa kha, “Omo tẃi hunu-hanai ta sa lai di. 44Ano rohornai Apha yak so ya khe khoroksa phano ani thani phaiwi man ya; phiya páithakni salo ang bono mwthangwi tisa anw. 45Diyarirok hai hwnwi swi lang kha, ‘Jotono Kaitor bai phrwngjak anw.’ Aphani kók khnaui rwngnairok bórok jotono ani thani phai-o.#Jis 54.13. 46Aphano khoroksa swk nuk kha, a kók ya kho; Kaitorni aroni phainai bo simi se Aphano nugo. 47Ang norokno kubu kubui’-no sa-o, ano poito khlainai borok bo mwthangjak phlai kha. 48Ang’-no mwthangnai chámung. 49Norokni chuchusong hasing panthoro manna cháui suda thwi bai kha. 50Phiya o chámung le Chuknohani ongkhorwi phaima se, hakhe abono chánai borok bo thwi glak. 51Ang’-no chuknohani ongkhorwi phainai a mwthangnai chámung. Tumungno khoroksa swk o chámungno chá khe bo kwthang tong phlainai. Ang bono chámung rwna hwnmani abo khe ani bahan se, swngchar ba mwthangjak thung hwnwi abono ang rwnani.”

52Aboni bagwino Judairok bórok kiching bórok panjalwi tokra rw lai ahai hwnwi sa lai kha, “O borok tamo khe bini bahanno chwngno chána hwnwi rwui mannai ba?”

53Jisu bórokno hai hwnwi sa kha, “Ang norokno sóino kubui kók sa-o, norok Borokni Sajlani bahan chá ya khe, phiya bini thẃi nung ya khe norok kwthang ya. 54Ani bahan chánai borok, ani thẃi nungnai borok bo mwthangjak phlai kha, hakhe ang bono páithakni salo mwthangwi tisanai. 55Ani bahan se sóini chámung, ani thẃi se sóini nungjaknai. 56Ani bahan chánai borok, ani thẃi nungnai borok bo ani bisingo tongo, angbo bini bisingo tongo. 57Apha kwthang ano rohoro, bini bai’-no angbo kwthang; omo hai kheno ano chánai borok bo ani bai thangnai. 58Hakhe omo’-no chuknohani ongkhorwi phainai a chámung; omo norokni chuchusong cháui thwimani a chámung ya. O chámungno chánai borok bo kwthang tong phlainai.”

59Kapharnaumni thumnogo phrwngwi tong phuru Jisu o kókrokno sa-o.

Mwthang phlainai kók

60Omono khnaui sagrirokni bisingo baksa baksa hai hwnwi sa lai kha, “Omo khe jobor kók kwrak klai-o! Omono sabo khnaui mannai?”

61Bini sagrirok abono tẃi hunu-hanai sa laimano Jisu saui manẃi hai hwnwi sa kha, “Aswk bai’-no norok yakar bai sinai, hai da? 62Rom di, Borokni Sajlano bini agini tong thani kasaui tháng phima nuk khe norok tamo hwnnai sla? 63Borokno mwthangnai wng kha Kaitorni Phola se, bórokni phan le mungsa phano chúk ya. Ang norokni thani kók samani abono Phola, abono mwthangnai. 64Hai phano norokni bere baksa poito khlai ya.” (Sabo sabo bono poito khlai ya, sabo ba bono rom rwno Jisu abo yaphangni simi’-no saui mano.) 65Bo kók manju-ui hai hwnwi sa kha, “Hai hwnwino ang norokno o kók sa-o, Apha phai rw ya khe kebo ani thani phaiwi man ya.”

66Aboni bagwi bini sagrirokni bisingo kwbángma uslu bai kha, bo bai tei himnai kwrwi kha. 67Abono nugwi Jisu a sagri chiknwirokno hai hwnwi sẃng kha, “Hakhe norok buda thángna muchung bai?”

68Simon Pitor hai hwnwi sa kha, “Subrai, saboni aro chwng thángnai? Nini thani se mwthang phlainai kók tongo. 69Hakhe nwng’-no Khristo, Kaitor kwthangni Sajla hwnwi chwng katswi sauibo man kha tei poitobo khlai kha.”#Mat 16.16; Mar 8.29; Luk 9.20.

70Jisu bórokno hai hwnwi sa kha, “Norok chiknwirokno ang sagri chong ya diba? Ahai twtwi se norokni bere khoroksa soitan tongo!” 71Bo omo Simon Iskariotni bwsla Judasni kók sama se Sagri chiknwirokni bere bo khoroksa wng twtwi suda se Jisuno rom rwnai.

Currently Selected:

JOHON 6: KOKBSI

Highlight

Copy