LUK 16
16
Siyan kwrwng menajar
1Jisu bini sagrirokno hai hwnwi sa kha. “Gwnang khoroksa tongmani, bini menajar khoroksa tongo. ‘Nini a menajar nini rangrok hanang-pinang khe swbaiwi tong kha,’ hwnwi borok khoroksa a gwnangno sa phai kha. 2Hakhe bo menajarno ringwi hai hwnwi sa kha, ‘Nini mungwi abo tamo khna? Tubu di, bwswk swbai kha swbai ya ani thani bebak isap rw phai di. Nono tei menajar narwk li ya.’ 3A menajar khá bising bising hai hwnwi uansuk kha, ‘Nokphang ano tei samungo narwk li ya hwno. Ang tabuk tamo khlainai? Ha tannabo ani phan kwrwi, bírna khebo lachi-o. 4Tabuk samung mungsa tang anw, hakhe nokphang ano yakarwi rohor khe ano nogo sitoknai o borok tongo.’ 5Hakhe bo nokphangni thani lakai gwnangrokno khoroksa khoroksa khe ring rw hor kha. Bo khoroksano hai hwnwi sẃng kha, ‘Ani nokphangni thani nini lakai bwswk tong?’ 6‘Thok mon sara tongo,’ hwnwi bo sa kha. Menajar bono hai hwnwi sa kha, ‘Achuk di. Hi’n, nini isap, oro dakti bachi swi di.’ 7Bo tei khoroksano hai hwnwi sẃng kha, ‘Nini la; nini lakai bwswk tong?’ ‘Mai dingra khung sara tongo,’ hwnwi bo sa kha. Menajar hai hwnwi sa kha, ‘Hi’n, nini isap, oro charchi swi di.’ 8O menajar peretno siyan kwrwng khe samung tangma nugwi nokphang bono baikhene kha. Tamni hwn ba pohoro tongnai bororokni slái o swngcharni bororok bui bai tongna rwng kugo.”
9Jisu hai hwnwibo sa kha, “Aboni bagwi ang norokno o kók sa-o, rang-rí páiwi thángwibo ayang masíngo thwi yani ha-o tongwi manẃina tẃi khe o swngcharni rang-rí bai bayap kha di. 10Samung kotoino kaham khe khlainai borok bo samung kotornobo kaham khe khlainai; phiya samung kotoino kaham khe khlai ya khe a borok samung kotornobo kaham khe khlai ya. 11Hakhe norok o swngcharni rang-ríno chokoi-phokoi khlai khe sabo norokni yago manwi kaham tonraknai? 12Norok buini manwino chokoi-phokoi khlai khe norokni manwino norokno sabo rwnai?
13“Khoroksa seleng phano nokphang khoroknwini seleng khatiui man ya; bo khoroksano naisler khe tei khoroksano hamjaknai, eba khe khoroksano khá súk khe tei khoroksano samung nangjak glak. Nwng Kaitorni seleng khati twtwi rang-ríni seleng khátiui man ya.”#Mat 6.24.
Jisu kók tháinwi tháitham samani
(Mat 11.12-13; 5.31-32; Mar 10.11-12)
14Rangno mokol chẃngnai Pharisairok Jisuni o kókrok khnaui bono mwnwi lai kha. 15Jisu bórokno hai hwnwi sa kha, “Norok buini bwskango sakno akhini borok kaham khe phunuksa tiro, aile Kaitor norokni bwkha saui mano. Borok kaham hwn phano Kaitorni mokolo selengmasingcha.
16“Baptisma rwnai Johonni jora tẃi’-no Musini Kerong bai diyarirokni kók rákhokjak kha; aphuruni simi Kaitorni hani Kothoma Kaham pírjak rwrwk kha, hakhe aro hapnai bororok jotono dundrogwi hap lai kha.#Mat 11.12-13. 17Ha bai nokha se kwma anw ba, Kerongni kók biphiring kolsa phano kwma glak.#Mat 5.18.
18“Hikno kagwi tei khoroksa bwrwi nanai bo lupcha se; phiya a kakjak bwrwino nanai bono hai’-no lupchano.”#Mat 5.32; 1Ko 7.10-11.
Gwnang bai bigrani rwngthoma
19“Gwnang khoroksa tongmani. Bo rí-chum jilik jalak kano, sal brúm brúm tongthok cháthok khe tongo. 20Lasar hwnwi bigra khoroksa tongo, bini bwsak gwnangwi kwsa máng. Bo gwnangni nuka-o tubu tubu-ui rw phaijago. 21A gwnangni cháma bára mai hanta kwsarmarokno cháui’-no bo bohok kwchang rwna naija-o. Sẃirok suda se bini kwsarokno swlak phai-o. 22A bigrasa thwi kha, hakhe suarirok bono tlangwi Abraham bai achuk rwui kha. Salsa a gwnangbo thwi kha, hakhe phobjak kha. 23Bo morke-o belai tekto manẃi ma tongwi kha; bo bokhorok tisaui nahar kha, hakhe hakchalo Abrahamno nuhur kha, Lasarnobo bo bai achukjak nuhur kha. 24Bo hakhe hai hwnwi sa hor kha, ‘Apha Abraham, ano khairok jaba di! Lasarno ani thani rohor di, yasichugo twi chomsaui bo ani bwslaino misi phai thung. O hóro ang belai tekto manẃi tong kha!’ 25Abraham hai hwnwi sa kha, ‘Chwlasa, muitu khe nai di, swngcharo tong phuru nwng bwswk kaham khe tong bu kha; o Lasar abo hai’-no bwswk hamya bisingo ma tong bu kha. Aboni bai bo oro tabuk kaham khe tongo, nwng khe tekto manẃi ma tongo. 26Hai phano norok bai chini kwcharo hakhor kuthuk tongo. Aboni bagwino oroni norokni aro thángna muchungwibo khoroksa phano thángwi man ya, phiya norokni aronibo oro phaiwi man ya.’ 27Hakhe a gwnang hai hwnwi sa kha, ‘Apha, hakhe ang koi ja-o, ani aphani nogo Lasarno rohor ja di. 28Aro ani takhuksong tei khorokba tongo. Bórok simi phano oro tekto man phai ya tẃi khe bo thángwi hus khe rwui thung.’ 29Abraham hai hwnwi sa kha, ‘Nini takhukrokno hus khlai rwna bagwi Musi bai diyarirok tongo; bórokni kókno nini takhuksong khna thung.’ 30A gwnang hai hwnwi sa kha, ‘I’nhi, Apha Abraham, aswk bai wng glak. O kwthwirokni hani borok khoroksa swk thangwi bachaui bórokni thani tháng khe se bórok sumsok yakarnai.’ 31Tamo khe Abraham bono hai hwnwi sa kha, ‘Musi bai diyarirokni kók bórok khna ya khe kwthwirokni hani borok khoroksa swk thangwi bacha phano bórok khá hap glak.’ ”
Currently Selected:
LUK 16: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
