LUK 15
15
Kwmanai merani rwngthoma
(Mat 18.12-14)
1Salsa teks romnairok bai basijakrok kwbángma Jisuni kók khnana phai kha. 2Pharisairok bai Kerong phrwngnairok hunu-hanai khe hai hwnwi sa lai kha, “O borok basijakrok bai kwthaui tongo, bórok bai chá suda chá-o.”#Luk 5.29-30. 3Hakhe Jisu bórokno o rwngthoma sa kha,
4“Rom di, norokni bisingo borok khoroksani mera mak sara tongo. Aboni bisingo mak sa kwma kha-bo tamo khlai no? Bo tei mak chukuchi-chukuno sula-o klangwi a mak sano man ya sak naitugwinai. 5Bo abono man kheno belai tongthokjagwi bini phairukungo tisaui 6nogo tubu kha. Hakhe bo bikichingsong bai noksa-nok-arino kwrẃngsa khe ringwi hai hwnwi sa kha, ‘Norokbo ang bai baksa tongthok di, a mera kwmamani abo ang man phi kha.’ 7Ang norokno o kók sa-o, abo hai kheno chuknoha-o tongnairok sumsok yakarna nang ya chukuchichuku kahamrokno tẃiwi tongthokmani slái sumsok gwnang khoroksa sumsok yakar khe teibo tongthokjago.”
Kwmanai rangni rwngthoma
8“Eba khe rom di, bwrwi khoroksani rang khokchi tongo. Aboni bisingo khoksa kwma kha-bo tamo khlai no? Bo chati phnangwi nok pharwi abono man ya sak kaham khe naituknai. 9Bo abono man kheno bikichingsong bai noksa-nok-arino kwrẃngsa khe ringwi hai hwnwi sa kha, ‘Norokbo ang bai baksa tongthok di, a rang kwmamani abo man phi kha.’ 10Ang norokno o kók sa-o, abo hai kheno sumsok gwnang khoroksa sumsok yakar khe Kaitorni suarirok tongthokjago.”
Maya gwnang phani rwngthoma
11Jisu hai hwnwibo sa kha, “Borok khoroksani bwslasong takhuknwi tongmani. 12Bwsla kusu buphano hai hwnwi sa kha, ‘Apha ani banta sompotino ano tabuk rw di.’ Hakhe bupha a bwsla khoroknwino sompoti banta khe rw kha. 13Nokha salnwi saltham ulo kheno bwsla kusu bini banta sompoti phal baiwi a rang tlangwi nokni ongkhorwi tháng kha. Bo tei kwrẃngsa hakchalma-o tháng kha, aro bini rangrokno hanang-pinang khe swbaiwi khibi bai kha. 14Bini mungsa kwrwi tẃi bo swbai bai kha. Aphuru a ha gwnangwi belai khe asari nang kha; ahai wngwi bo bigra kha kha. 15Hakhe bo aroni borok khoroksani aro samung nai kha. A borok bono uak mwrwkna bagwi chara-o rohor kha. 16Uakrok chámani a múiturokno suda cháui bo ok supungna muchungjago; kebo bono chána rw li ya. 17Ulo khe bo khá sichaui hai hwnwi sa kha, ‘Aphani aswk selengrok chá se chá bai ya nu se nung bai ya, ang oro ma chá ya ma nung ya thwina naiwi ma tongo. 18Aphani aro tháng phirwi ang hai hwnwi sauinai, Apha, ang Kaitorni thani sumsok khlai kha, nini thanibo khlai kha. 19Ang nwsla hwnjaknani chúk li ya; nini selengrok hai kheno anobo ton ja di.’ 20Abo hai khe bo bachaui buphani aro kiphilwi phai kha.
“Bo nok bai akhini’-no hakchalwi tong kho, aphuru bupha bono nuhurwi belai khe khairok kha, hakhe khachigwi thángwi bwslano chwrapsa kwbagwi motom su-ui kha. 21Hakhe bwsla buphano hai hwnwi sa kha, ‘Apha, Kaitorni thani ang sumsok khlai kha, nini thanibo khlai kha. Ang nwsla hwnjaknani chúk li ya.’ 22Tamo khe bupha selengrokno hai hwnwi dagi kha, ‘Do di, kan kaham chum kaham tubu-ui bono kan rw phai di chum rw phai di; yasi-o yasitem soraui rw phai di, yakungo yaklap ká rwui rw phai di. 23A dega kuphungno tubu-ui rathar di. Phai di, chwng tabuk tongthogwi chá lai anw nung lai anw. 24Tamni hwn ba ani o angsla thwiwi thángma se, tabuk thangcha phi kha; kwmaui thángma se manjak phi kha.’ hakhe tongthogwi bagrum bár lai kha.
25“Aphuru bwsla okra kheto-o. Bo kiphilwi phai phuru nok gana sók phai twtwi wng kheno rwchapmung muisupmung khna hor kha. 26Bo seleng khoroksano ringwi ‘Aro tamo wng lai?’ hwnwi sẃng kha. 27Seleng bono hai hwnwi sa kha, ‘Nini nwphayung kiphilwi phai kha. Bono kaham kwrẃng khe kiphilwi manma bagwi nwpha a dega kuphungno rathar kha.’ 28Hakhe bwsla okra belai jolijagwi nogo hapna soi li ya. Aboni bagwino bupha phaiwi bono nogo hap di hwnwi koi kha. 29Bo buphano hai hwnwi sa kha, ‘Nai di, aswk sal ang seleng hai khe nini samung tangwi phai kha. Ang nini kók tháisa phano bár ya kho. Nwng ano tamo rw kha? Bayap sak baksarok bai ratharwi chá laina hwnwi aile punsa mak sa phano se rw ti ya. 30O nwsla le bwrwi baliknairok bai tongwi nini sompoti swkwmaui khibi kha. Tabuk bo nogo phaima le a dega kuphungno se rathar si-o.’ 31Hakhe bupha hai hwnwi sa kha, ‘Sajla, nwng le ang bai máng tongnai bla. Ani mungsa kwrwi tẃi manwi nini máng se. 32Chwng tongthogwi bagrum ma bár lai thai, tamni hwn ba nwphayung thwi thángma se, tabuk thangcha phi kha; kwmaui thángma se, manjak phi kha.’ ”
Currently Selected:
LUK 15: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
