LUK 14
14
Hamya khoroksano Jisu ham rwmani
1Salsa Sabat salo Jisu Pharisairokni bere bokhorok khoroksani nogo mai chána hwnwi tháng kha; hakhe bororok Jisuno naichomwi tong lai kha. 2Aphuru yakung yak dujak khoroksa Jisuni bwskango phai kha. 3Hakhe Jisu Kerong phrwngnai bai Pharisairokno hai hwnwi sẃng kha, “Sabat salo hamya ham rwui mano hwnwi chini Kerong sa da sa?”
4Tamo khe bórok tháisa phano sa li ya. Jisu a borokno samo náhárẃi ham rwui rohor kha. 5Hakhe bo bórokno hai hwnwi sa kha, “Norokni bere khoroksa swkni bwsla eba musuk phano Sabat salo twikhoro klai khe Sabat sal hwnwi bono logi logi’-no tisa ya da tong no?”#Mat 12.11.
6Bórok kók tháisa phano sa phirwi man li ya.
Nograi bai nokphangno phrwngmani
7Jisu nai ba baksa nograirok khamplai kaham naiwi achugo. Aboni bagwino bo o rwngthoma bebakno sa kha. 8“Khoroksa swk nono kái lai panda-o kobok khe khamplai kaham naiwi ta achuk di. Tamni hwn khe nini slái phano borok kotor kobokjakna tongo. 9Hakhe norok khoroknwino koboknai a nokphang nono hai hwnwi sa phai anw, ‘Bono o khamplaino rw di.’ Aphuru nwng lachi kothronai, khamplai hamya obo ma achuknai. 10Abo tẃi wng yaui kobokjagwi tháng khe khamplai hamya-o se achugwi di. Hakhe nokphang nono hai hwnwi sa phai anw, ‘Takhuk, khamplai kahamo bachaui achuk phai di.’ Aphuru aswk nograirokni bwskango nini mwkhang chẃngnai.#Phk 25.6-7. 11Tamni hwn ba kotor wngna sadinai borok bo kotoi snamjaknai; phiya kotoi wngna sadinai borok bo kotor snamjaknai.”#Mat 23.12; Luk 18.14.
12Jisu bono koboknaino hai hwnwi sa kha, “Nwng buino mai khopsa chá rwna nai khe aro nikiching, nini takhuk, nini sandai-masak eba noksa-nok ari gwnangrokno ta kobok di; kobok khe bórok nono kobok phir anw, hakhe nwng sujak phir anw. 13Nwng panda achuk rw khe aro bigra, kompa, khora, phularokno se kobok di. 14Hakhe nwng hamchanai, tamni hwn khe bórok le nono abono su-ui man phi glak, borok kahamrok thangwi bacha phuru nwng Kaitor bai sujaknai.”
Panda kotorni rwngthoma
(Mat 22.1-10)
15Bo bai chá lai tongnairokni bere borok khoroksa abono khnaui Jisuno hai hwnwi sa kha, “Kaitorni hani panda-o ma achuknairok bórok bwswk se hamchanai!”
16Jisu bono hai hwnwi sa kha, “Borok khoroksa panda kotor achuk rwmani. Bo aro borok kwbángma kobok kha. 17Chána jora wng kheno bo bini selengno rohorwi a kobokmarokno ‘Phai si di, bebak wng bai kha,’ hwnwi sa rw hor kha. 18Tamo khe bórok mungsa ya mungsa samung phunugui jotono sak phér bai kha. Khoroksa hai hwnwi sa kha, ‘Ang kheto paima tongo, abono thángwi ma naiwi anw; ano yakar jaba di.’ 19Tei khoroksa hai hwnwi sa kha, ‘Ang musuk jorba paima tongo, abórokno naina bagwi ang lam rw kha; ano yakar jaba di.’ 20Tei khoroksa hai hwnwi sa kha, ‘Ang káijak dorop, aboni bagwino thángwi man glak.’ 21A seleng kiphilwi phaiwi bini nokphangno omorokno bebak saui khna rw phai kha. Hakhe nokphang jolijagwi hai hwnwi sa kha, ‘Do di, taunni lamarokni beser-basarni bigrarok, komparok, phularok tei khorarokno tubu-ui phai di.’ 22Srapsa tongwi a seleng hai hwnwi sa phai kha, ‘Nokphangsa, nwng dagi tẃi’-no khlaijak kha, teibo khamplai bára tong kho.’ 23Hakhe nokphang selengno hai hwnwi sa kha, ‘Tháng di, kami bwkhakni lamarokni bororokno tubu-ui phai di, hakhe borok nok pung phai anw. 24Ang norokno o kók sa-o, a kobokjaknairok khoroksa phano ani o pandani bahai man glak.’ ”
Sagri wngna khe
(Mat 10.37-38)
25Borok kwbángma Jisuni logi him laijak. Bo uphilwi bórokno hai hwnwi sa kha, 26“Ani thani phainai borok bo buma-bupha, bihik-bwsa, takhuk-bukhuk phiya sakno suda khibi ya khe ani sagri wngwi man ya.#Mat 10.37. 27Sakni krusno balwi ani logi phai ya khe a borok ani sagri wngwi man ya.#Mat 10.38; 16.24; Mar 8.34; Luk 9.23. 28Norokni bisingo khoroksa swk nok kuchuk tongna khe bo a samungno bini yago tongma rang bai paiwi da mano hwnwi uansugui lekha granai. 29Wng ya khe nokthai simi lu baiwi a nokno paiwi man ya khe abono nuknairok jotono hai hwnwi saui mwnwinai, 30‘O borok cheng hwnwi le cheng kha, pái se man ti li ya.’ 31Eba khe bugra khoroksa swk sengkrak khorok chisai tẃiwi tei khoroksa sengkrak khorok nwichisai tẃijak bugra bai choba nang laina tháng khe bo a bugrano pa da páino hwnwi uansugui nai granai. 32Pái thotok wng ya khe a bugra hakchalo tongsani’-no bo kwtha lainani kók sa laina bagwi borok rohornai. 33Omo tẃi kheno tong kwrwi khibi ya khe norokni bisingo khoroksa phano ani sagri wngwi man glak.”
Samung nang ya sóm
(Mat 5.13; Mar 9.50)
34“Sóm manwi kaham’-no, phiya pab ya wngwi tháng khe abono pab rw phinani tei lama kwrwi. 35Abo khetobo samung nang li ya, nokbra-obo samung nang li ya; abo khibiui rwjago. Khunju tong kheba o kókno khna di.”
Currently Selected:
LUK 14: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
