LUK 13
13
Sumsok yakar ya khe komornai
1Aphuru’-no aro tongnai baksa borok Jisuno Galilini khoroknwi khoroktham borokni kók saui khna rw kha. Galilini a bororok Kaitorni thani rathar phuru Pilat bórokno buthar kha. 2Jisu bórokno hai hwnwi sa kha, “Abo hai khe butharjakma bai bórok Galilini tei bororokni slái sumsok gwnang hwnwi da norok khá ka? 3Hai ya! Ang norokno o kók sa-o, sumsok yakar ya khe norokbo bebak’-no abo hai’-no komornai. 4Siloamo nok kuchuk bai sinchrepjagwi a thwinai chicharrok bórokni le tamo sla? Jerusalemo tongnai tei bororokni slái bórok teibo borok hamya hwnwi da norok khá ka? 5Hai ya! Ang norokno o kók sa-o, sumsok yakar ya khe norokbo bebak’-no abo hai’-no komornai.”
Khwichang buphangni rwngthoma
6Aphuru Jisu o rwngthomano sa kha, “Borok khoroksani angur bari-o khwichang phangsa tongmani. Salsa bo khwichang khakna naiwi tháisa phano man li ya. 7Aboni bagwino bo bari nainaino hai hwnwi sa kha, ‘Nai di, nokha bisiktham káui tháng kha, o khwichang buphango khwichang khakna naiwi tháisa phano man phai ya. Omono tanwi khibi di. Tamo wngwi kwrwi-kwrwini bo aro ha tos kusubwi tongjaknai?’ 8Bari nainai hai hwnwi sa kha, ‘Nokphangsa taklai bisa tong gra di. Ang yaphango ha chogwi phas rwui nai anw. 9Khali thái khe ba kahamno, thái ya khe ba tanwi khibi di.’ ”
Sabat salo kompi khoroksano Jisu ham rwmani
10Salsa Sabat salo Jisu thumnogo phrwngwi tongmani. 11Aro mwtai hamya kolobjak bwrwi khoroksa tongo, a mwtai hamya bono nokha bisi chichar hamya khiklai ton kha. Bo guji khasuk kha, kisicha phano kepleng khe bachaui man ya. 12Jisu bono nugwi hai hwnwi sa hor kha, “Bwrwima, nwng o hamyani yakni yók kha!” 13Ahai hwnwi bo bini sago yak bera kha, hakhe logi logi’-no a bwrwi kepleng khe bachaui Kaitorno lob kha.
14Sabat salo Jisu hamya ham rwma bagwi thumnokni hoda jolijagwi lukuno hai hwnwi sa kha, “Samung tangna bagwi nokha saldok tongo. Ham rwjakna khe a sal dokni bisingo se ham rwjak phai di, Sabat salo ya.”#Lam 20.9-10; Uái 5.13-14.
15Hakhe Subrai bono hai hwnwi sa kha, “Phatrarok! Sabat salo musukno eba koraino guai nokni khengwi twi khan rwna bagwi tháng ya abo tẃi borok norokni bisingo sabo tong? 16O bwrwima bo Abrahamni bwsajwkno bla. Soitan bono nokha bisi chichar kolobwi tong kha. Hai khe Sabat salo bono Soitanni yakni phiyókmani chajak li ya diba?” 17Bini o kók bai bini kena arirok lachi kothro kha, phiya bebak bororok khe bini aswk uanamasingcha samung nugwi tongthokjak bai kha.
Horua bwchlwini rwngthoma
(Mat 13.31-32; Mar 4.30-32)
18Jisu hai hwnwi sẃng kha, “Kaitorni ha bubo tẃi? Ang abono tamo bai sunai? 19Omo horua bwchlwi hai se. Borok khoroksa abono bini bari-o kái kha. A bwchlwi achaiwi torwi-logwi buphang wng kha. Hakhe toksa-toktẃirok bini bedego bothop thum phai kha.”
Chuanni rwngthoma
(Mat 13.33)
20Jisu hai hwnwi tei uáisa sẃng kha, “Kaitorni hano ang tamo bai sunai? 21Omo chuan hai se. Bwrwi khoroksa abono mai balingsa-o sablu-ui bulma le bebak mai se lomwi tháng kha.”
Dugar kesep
(Mat 7.13-14,21-23)
22Jisu Jerusalem bwkhak tháng tẃi kamirogo taunrogo phrwng lang kha. 23Borok khoroksa bono hai hwnwi sẃng kha, “Hodasa, mwthangjaknai bororok báng tha ya da?”
Jisu bórokno hai hwnwi sa kha, 24“Dugar kesep tẃi’-no hapna bagwi káphra di. Ang norokno o kók sa-o, borok kwbángma hapna nai anw, hai phano habwi man glak. 25Nokphang bachaui dugar berepnai, hakhe norok phataro bachaui dugar bu-ui ‘Nokphangsa, chwngno dugar phiyogwi rw di,’ hwnwi sa phuru bo hai hwnwi sa anw, ‘Norok buroni ang saui man ya!’ 26Norok aphuru hai hwnwi sa phir anw, ‘Nwng bai chwng chá lai kha nung lai kha, chini arorogo nwng phrwng phai kha.’ 27Bo hai’-no hai hai hwnwi sa anw, ‘Norok buroni ang saui man ya. Ani oroni tháng di, chengtarok!’#Lob 6.8. 28Abraham, Isak, Jakob tei diyarirokno norok Kaitorni ha-o tongma nuk anw, yang norok khe phataro rwkhlai rwjak. Aphuru norok ua hului ma kap anw.#Mat 22.13; 25.30. 29Salkabaini, salthángbaini, salsibaini tei salgrabaini phaiwi bororok Kaitorni hani panda-o achuk phai anw.#Mat 8.11-12. 30Aphuru nai di, tabukni uklokrok swkang wng anw, phiya tabukni swkangrok uklogo klai anw.”
Jerusalemno Jisu hamjakmani
(Mat 23.37-39)
31Aphuru’-no Pharisai khoroknwi khoroktham Jisuni thani phaiwi hai hwnwi sa kha, “Nwng oroni ongkhorwi tháng di, Herod nono butharna naiwi tongo.”
32Jisu bórokno hai hwnwi sa kha, “A siyalsano saui di, ‘Tini bai khwna ang mwtai hamya rwkhlainai, hamya ham rwnai, salthamni salo ani samung páinai.’ 33Ang thángna bwkhak ang ba tinibo, khwnabo, sonibo ma himnai; Jerusalemno karwi tei kubun jaga-o diyari butharjak anw abo wngwi man ya.
34“O Jerusalem, Jerusalem! Diyarirokno nwng butharo, nini thani Kaitor bai rohorjaknairokno holong khitaro. Tokma bini bwkrang tola-o toksarokno koroui tonma hai ang bwswk se nini borokno yak kwbagwi tonna nai kha; nwng abo hai khlai rw li ya. 35Tabuk norokni nok khibijak súk anw. Ang norokno o kók sa-o, ‘Subraini mungwi phainaino Kaitor hamari rw thung, hwnwi sa ya sak norok ano tei nuk glak.’ ”#Lob 118.26.
Currently Selected:
LUK 13: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
