LUK 2
2
Jisu achaimani
(Mat 1.18-25)
1A molo Rumni bugra kotor Agosto bini ha-o tongnairokno bumung ma tisa bainai hwnwi sakhlai rwjak kha. 2Abono puila borok lekhamani, aphuru Siriyani gobornor wng kha Kurini. 3Janija bumung tisa rwna bagwi aswk bororok aphuru janija kamiyungo tháng bai kha.
4Josep Galilini Nasaret kamiyungni Daudni kamichang Judiani Betlehemo bumung tisa rwna hwnwi tháng kha, tamni hwn ba bo khe Daud bosongni ba. 5Bo Mariam bai khe bumung tisa lainani tháng kha, Josep bai Mariamno káinani hwnwi kók sẃngwi páijak, Mariam aphuru sakderiya. 6Bórok aro tong phuru Mariamni sak kengna jora wng kha. 7Hakhe bo khoroksa chwla bwsa bá kha, omono bini puilani bwsa, bo a chwraino rí dului guai nokni musuk ada chá rwma manwi-o mokholwi ton kha; tamni hwn khe nograi nogo bórokni tongthai kwrwi kha.
Mera mwrwknairokno Jisu achaimani kók samani
8A amchoi-o mera mwrwknairok sula-o khe tongwi hor horo bórokni mera mwrwgo. 9Aphuru Subraini suari khoroksa bórokni bwskango bacha phai kha; Subraini pohor bai yaksi yagra chẃngsacha wng kha. Hakhe bórok jai kheno kirijak lai kha. 10Tamo khe suari bórokno hai hwnwi sa kha, “Ta kiri di; ang norokni bagwi kothoma kaham se tubu-ui phai-o; abo bebak bororokno khápang srang rwnai; 11tinini horono Daudni kamichang Betlehemo norokni bagwi mwthangnaisa khoroksa achai kha; bo’-no Subrai Khristo. 12Chwrai khoroksa musuk ada chá rwma manwi-o rí dului mokholjak nugwi anw hai kheno norok bono siniui man anw.”
13Chuknohani teibo suari pal kotor khe aro achomsa a suari bai baksa nukjak phai kha. Bórok Kaitorno lobwi hai hwnwi rwchap lai kha,
14“Chuknohani kuchugo
Kaitor lobjak thung!
O swngcharo bo hamjakma bororok ham thung!”
15Suarirok bórok bai kak laiwi chuknoha-o tháng bai khe mera mwrwknairok hai hwnwi sa lai kha, “Him di tho, Subrai chwngno omo ahai wng kha hwnwi sa langmano chwng Betlehemo thángwi nai lai anw.”
16Hakhe bórok do lang kha, hakhe bórok aro Mariam bai Josepno nugwi kha, chwrainobo musuk ada chá rwma manwi-o mokholjak nugwi kha. 17Mera mwrwknairok bono nugwi kheno bórok suari bai sajakmano bórokno saui khna rw kha; 18bórok samani a kók khnanairok bebak’-no uanajak bai kha. 19Yango Mariam khe a kókrokno bwkha bisingo chobwi narwgwi kaham khe uansugui tong kha. 20Mera mwrwknairok sajakma hai’-no nukma tei khnama bagwi Kaitorno kotor hwnwi lobwi kiphilwi tháng lai kha.
Jisuno bumung pharmani
21Nokha salcharni ulo sakur rana phuru a chwraino Jisu hwnwi bumung phar kha; ogo wng ya sini’-no suari bono á bumung rwui klang kha.#Leb 12.3; Luk 1.31.
Jisuno noktharo yapharmani
22Musini Kerongo tongma tẃi abul súnani sal sók phai khe bórok bono Subraini thani yapharna bagwi Jerusalemo tubu kha, 23(tamni hwnmaba, “Swkangni bwsa chwla hwn khe bono Subraini thani ma yapharnai,” hwnwi Subraini Kerongo swijak tongo.)#Lam 13.2,12. 24“Tokthu jorsa eba khe pharuk bwsa jorsa ma ratharnai,” hwnwi Subraini Kerongo tongma hai’-no bórok ratharnabo tháng kha.#Leb 12.6-8.
25Aphuru Jerusalemo Simion hwnwi Kaitorno surinai borok kaham khoroksa tongo; Israilrok yókna hwnmano bo naisingwi tongo tei Phola Kwthar bono kobolwi tongo. 26Subrai rohorna hwnmani a Masiano nuk ya sak bo thwi glak hwnwi swkango Phola Kwthar bono saui man rwjak. 27Simion Phola bai tubujagwi noktharo phai kha; tei kerongo tongma hai khlaina hwnwi buma bai bupha Jisuno noktharo tubu khe 28Simion a chwraino bamsogwi Kaitorno lobwi hai hwnwi sa kha,
29“Bubagra, tabuk nwng
kók rwma tẃi,
nini selengno bwkha kwchang rwui yakarwi rohor si di;
30tamni hwn ba nwng rohormani
mwthangnaisano ang mokol baithang nuk kha,
31bebak dophani bororokni
bwskango nwng bono phunuk kha,
32 #
Jis 42.6; 49.6; 52.10. bo wng kha buini bororokno nini pohorno phunuknai
tei nini borok Israilrokni
mwkhang chẃng rwnai pohor.”
33Jisuno tẃiwi kók sajakmarokno khnaui Josep tei buma uanajak kha. 34Simon bórokno hamari rwui chwraini buma Mariamno hai hwnwi sa kha, “O chwraini jarwi Israilrokni baksa ma kwlwknai, baksaba ma thangchanai. Bono Kaitor bai chongjak hwnwi phunukjaknai, bini bagwi borok kwbángma’-no kók hamya sanai, 35hakhe bórokni bwkha bisingo tamo tong sijak anw tei nini bwkha-o seng yórjakma hai khe nwng bwkha báijak anw.”
36Aro Hanna hwnwi diyarijwk khoroksa tongo, bo Aser bosongni, Phanuelni bwsajwk. Bo belai bwrwichwk; káijakmani nokha bisi sni ulo, 37bo randi wng kha, aphuruni simi nokha bisi charchi-brwi bo randi’-no wngwi tong kha. Bo tei noktharni kutul li ya; bo ubas khe suri sanwi Kaitorno hor sal suri máng tongo. 38Bo katswi aphuru’-no aro sók phaiwi Kaitorno hambai rw kha, phiya Kaitor Jerusalemno phiyókna hwnwi naisingwi tongnairokno bo a chwraini kókno saui khna rw kha.
Nasareto kiphilmani
39 #
Mat 2.23. Subraini Kerongo tongma hai khlai baiwi bórok bórokni kamiyung Galilini Nasareto kiphilwi tháng lai kha. 40Chwrai torwi-logwi phai rwrwgo, siui-nugui khá siui phai rwrwgo. Kaitor bono naikhlaiwi tongo.
Noktharo chwrai Jisu
41 #
Lam 12.1-27. Bisi brúm brúm Yókma tero bini buma-buphasong Jerusalemo thángo. 42Hakhe bo nokha bisi chiknwini chwrai phuru bórok bisi brúm brúm thángma hai Tero tháng kha. 43Ter pái khe bórok kami bwkhak lam rw lai kha, yang Jisu khe Jerusalemo tong rwk kha, Josep tei buma abono saui man ya. 44Kiphilwi tongnai bikiching palrok bai se tongna hwnwi chongwi bórok salsani lama himwi phai kha. Ulo khe bórok sakni borok tei sinima bororokni bisingo bono naitugwi nai lai kha. 45Bórok aro bono naitugwi man ya wngwi bórok naituk te naituk te Jerusalemo phai lai khua. 46Nokha salthamni ulo bórok bono noktharo manẃi kha, bono aro Kerong phrwngnairokni bisingo achugwi bórokni kók khnaui tongmani, phiya bórokno sẃng phenegwi tongmani nugwi kha. 47Bo kók samano khnanairok bini kók rwngmano tei kók uphil samarokno nugwi uanajak bai kha. 48Buma bupha bono nugwi mwlang cha lai kha; tei buma bono hai hwnwi sa kha, “Sajla, nwng chwngno tamni omo hai khlai kha? Nai di, nwpha bai ang bwswk biji-biji khe nono ma naituk kha.”
49Bo bórokno hai hwnwi sa kha, “Tamo wngwi norok ano naituk lai? Ang Aphani nogo ma tongnai hwnwi norok saui man ya da?” 50Phiya ba bo samani kókno bórok romwi man li ya.
51Jisu aphuru khe bórok bai baksa Nasareto kiphilwi phai kha tei bo bórokni kók khnaui tong kha. O nangwi tháng phaimarokno buma tháisa kwrwi tẃi bwkha-o kholwi narwk bai kha. 52#1Sa 2.26; Phk 3.4.Jisu torwi-logwi, siui-nugui phai rwrwk kha, bo Kaitor baibo hamjak rwrwgo, borok baibo hamjak rwrwgo.
Currently Selected:
LUK 2: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
