LUK 3

Baptisma rwnai Johon pírmani

(Mat 3.1-12; Mar 1.1-8; Joh 1.19-28)

1Rumni habugra kotor Tiberi ha narwkmani nokha bisi chiba ká phuru Ponti Pilat Judiani gobornor. Herod aphuru Galilini bugra, bini takhuk Philipno Ituria bai Trakhoniti angkorni bugra, Lusania khe Abilinini bugra, 2Hanna bai Kaiapha khe ochai bokhorok. Sakariani bwsla Johonni thani aphuru hasing panthoro Kaitorni kók sók phai-o. 3Hakhe bo Jordan twima gana-ginini ha gwnangwi thángwi sumsok nakarjakna tẃi khe bwkha kiphilwi baptisma wng di hwnwi saui pírwi kha. 4#Jis 40.3-5.Jisaia diyarini bijabo o kókno hai hwnwi swijak kha,

“Hasing panthoro khoroksa hai hwnwi chirikhókjak:

‘Subraini bagwi lahar snam di,

bo himnani lamano

kepleng khe ton di!

5Harung ma kuphúngnai,

haplok hathái ma hachernai.

Lama kokoi ma pengsanai,

lahar thatra butra ma miliknai.

6Hakhe bebak borok Kaitor

rohormani mwthangnai-

sano nuk anw!’ ”

7 # Mat 12.34; 23.33. Bini thani baptisma wngna hwnwi borok kwbángma phainairokno Johon hai hwnwi sa kha, “Chibukni bosongrok, Kaitor yagul suna naiwi tongmani yakni khárwi yók di hwnwi norokno sabo uansuk rw lang? 8Norok sumsok yakar kha hwnwi sijakna tẃi khe bwthái kaham thái tong di. ‘Abrahamno chini apha,’ hwnwi ta sa lai di. Ang norokno o kók sa-o, Kaitor o holongroknibo Abrahamni bwsa tikhlai mano.#Joh 8.33. 9#Mat 7.19.Buphang yaphango rua harjak; bwthái kaham thái ya buphangno tanwi hóro khiklai sókjaknai.”

10Hakhe Bororok bono hai hwnwi sẃng kha, “Hakhe chwng tamo ma khlainai sla?”

11Bo hai hwnwi sa kha, “Khoroksani kamchlwi kangnwi tong khe bo kwrwino tei kangsano rw thung; chána gwnangbo ahaino khlai thung.”

12 # Luk 7.29. Teks romnairokbo baptisma wngna phaiwi bono hai hwnwi sẃng phai kha, “Hodakra, chwng tamo ma khlainai sla?”

13“Manthaini bára teks ta rom di,” hwnwi bo bórokno sa kha.

14Sengkrakrokbo bono hai hwnwi sẃng kha, “Chwng le tamo khlainai sla?”

Bo bórokno hai hwnwi sa kha, “Sikiri-sokoro khe khoroksano phano rang ta chá di eba khoroksano phano tatal khe ta ber di. Ajiui manma bai’-no bwkha kochomwi tong di.”

15Lukurok aphuru khe khápang srangjak bai kha tei Johon da Masia wngwi tong tung kha hwnwi bórok khá bising bising uansugui tong bai kha. 16Hakhe Johon bórok bebak’-no hai hwnwi sa kha, “Ang norokno twi bai se baptisma rw-o; phiya ani slái kwplai tei khoroksa phai-o; bini yaklap sokokna suda ang chúk ya. Bo le norokno Phola Kwthar tei hór bai se baptisma rwnai. 17Khamparni bebak gomno chogwi gula-o thumwi da baina bagwi baling bini yago’-no tongo; gundakno khe thwi phlai ya hóro sógwi khibi bainai.”

18Abo hai khe teibo bwkha srang rwnai kók sa te sa te Johon bebakno’-no Kothoma Kaham pír kha. 19Phiya ba Johon habugra Herodno khorai kha, tamni hwn khe Herod bini takhukni bihik Herodia bai tongo, phiya teibo samung hamyarokbo khlai-o, 20#Mat 14.3-4; Mar 6.17-18.aphuru Herod Johonno alongo chop kha, hakhe bini samung hamya teibo samung hamya khlai kha.

Jisu baptisma wngmani

(Mat 3.13-17; Mar 1.9-11)

21Bui baptisma wng khe Jisubo baptisma wngwi kha. Bo suri san phuru nokha phiyokjak kha, 22#Yap 22.2; Lob 2.7; Jis 42.1; Mat 3.17; Mar 1.11; Luk 9.35.hakhe Phola Kwthar pharuk hai wngwi bini sago birkhlai phai kha. Aphuru chuknohani kók hai hwnwi sakhlaijak kha, “Nwng ani khájani Sajla; ang nono’-no belai khe hamjago.”

Jisuni bosong

(Mat 1.1-17)

23Jisu nokha bisi kwthamchi wng twtwi phuru bini samung chengsa kha. Bo Josepni bwsla hwnwi lukurok hwno. Josep Helini bwsla, 24Heli Matatni, Matat Lebini, Lebi Melkini, Melki Janaini, Janai Josepni, 25Josep Matitiani, Matitia Amosni, Amos Nahumni, Nahum Heslini, Hesli Nagaini, 26Nagai Mahatni, Mahat Matitiani, Matitia Simyini, Simyi Josekni, Josek Jodani, 27Joda Johananni, Johanan Resani, Resa Serubabelni, Serubabel Sialtialni, Sialtial Nerini, 28Neri Melkini, Melki Adini, Adi Kosamni, Kosam Elmadamni, Elmadam Erni, 29Er Josuani, Josua Eliasarni, Eliasar Jorimni, Jorim Matatni, Matat Lebini, 30Lebi Simionni. Simion Judani, Juda Josepni, Josep Jonamni, Jonam Eliakimni, 31Eliakim Meleani, Melea Menani, Mena Matatani, Matata Nathanni, Nathan Daudni, 32Daud Jisaini, Jisai Obedni, Obed Boasni, Boas Selani, Sela Nasonni, 33Nason Aminadabni, Aminadab Adminni. Admin Arnini, Arni Hesronni, Hesron Peresni, Peres Judani, 34Juda Jakobni, Jakob Isakni, Isak Abrahamni, Abraham Terani, Tera Nahorni, 35Nahor Serugni, Serug Rehuni, Rehu Pelegni, Peleg Eberni, Eber Selani, 36Sela Kainanni, Kainan Arpaksadni, Arpaksad Semni, Sem Noani, Noa Lamekni, 37Lamek Methuselani, Methusela Enokni, Enok Jaredni, Jared Mahalalelni, Mahalalel Kainanni, 38Kainan Enosni, Enos Setni, Set Adamni, Adam Kaitorni.

Currently Selected:

LUK 3: KOKBSI

Highlight

Copy