LUK 22
22
Jisuno butharna kók chap laimani
(Mat 26.1-5,14-16; Mar 14.1-2,10-11; Joh 11.45-53)
1Auang bángla ter samphaui phai kha, abono Yókma ter hwno.#Lam 12.1-27. 2Ochai okrarok tei Kerong phrwngnairok Jisuno butharna bagwi bising bising lama naitugwi tong lai kha, tamni hwn khe bórok lukuno kirijago.
3Aphuru Judasni bisingo Soitan hap phai kha; a Judasno Iskariotbo hwno, bo’-bo sagri chiknwirokni bere khoroksa. 4Bo ochai okrarok tei noktharni sebuk okrarokni thani thángwi bahai khe Jisuno bórokni yago rom rwui rohornai hwnwi sa lai kha. 5Bórok tongthokjagwi bono rang rwna hwn lai kha. 6Judabo gosi kha, hakhe bororok saui man ya tẃi khe Jisuno rom rwui rohorna bagwi lama naitugwi tong kha.
Yókma Terni panda khlai rwmani
(Mat 26.17-25; Mar 14.12-21; Joh 13.21-30)
7Auang bángla Ter bisingo’-no dopha yókmano muitu khlaiwi mera bwsa ratharna sal sók phai kha. 8Jisu Pitor bai Johonno hai hwnwi saui rohor kha, “Tháng di, chini bagwi Yókma Terni panda khlai di.”
9“Chwngno buro khlai di hwnwi nwng hwn?” hwnwi bórok sẃng kha.
10Bo hai hwnwi sa kha, “Khna di, tauno hap kheno twi gola tẃijak borok khoroksa norok bai malai anw. Bo bai thángwi bo hapmani nogo’-no habwi di, 11hakhe nokphangno hai hwnwi saui di, ‘Hodakra bini sagrirok bai bu khotolo Yókma terni panda khlainai hwnwi nono sẃng rwhoro.’ 12Bo thiti khlaijak sakani khotol kotor kaisa norokno phunuk anw. Aro’-no bebak khlai sok di.”
13Bórok thángwi Jisu saui rohorma hai’-no nugwi aro Yókma Terni panda khlai kha.
Subraini panda
(Mat 26.26-30; Mar 14.22-26; 1Ko 11.23-25)
14Chána jora wng kheno Jisu chonghorrok bai baksa khe chána achuk kha. 15Bo bórokno hai hwnwi sa kha, “Ang sátokjakma swkang o Yókma Terni norok bai panda chá laina belai muchungo. 16Tamni hwn khe ang norokno o kók sa-o, Kaitorni ha-o omo tẃi panda wng ya sak ang omo hai khe tei chá glak.”
17Aphuru Jisu khuri naui Kaitorno hambai rwui hai hwnwi sa kha, “Hi’n, na di, norok jotono omono nung lai di. 18Ang norokno o kók sa-o, Kaitorni ha phai ya sak ang tabukni simi omo tẃi angur bwtwi tei nung glak.”
19Aphuru bo ruti naui Kaitorno hambai rw kha, hakhe abono swkagwi hai hwnwi saui bórokno rw kha, “Omo ani bahan, [norokni bagwi omo rwjak kha. Ano muitu khe omo hai khlai di.” 20Chá lai bai khe bo abo hai khe’-no bórokno hai hwnwi saui a khurino rw kha, “O khuri wng kha Kaitor ani thẃi bai swmai kwtal tangmani, omo norokni bagwi kochok rwjakmani ani thẃi.]#Jir 31.31-34.
21“Nai di, ano rom rwnai borok bo oro ang bai baksa’-no chá lai thani achukjak.#Lob 41.9. 22Kaitor khá chongma hai’-no Borokni Sajla thwi anw, tamo khe bono rom rwnai borok bo bwswk se hamya sitra no!”
23Bórokni bisingo sabo o samung tang thotok hwnwi sagrirok aphuru khe bórok kiching bórok sa lai kha.
Sagrirokni bere sabo tor kuk?
24“Chini bere sabono kotor hwnnai,” hwnwi sagrirok kók báng laiwi tong lai kha.#Mat 18.1; Mar 9.34; Luk 9.46. 25Hakhe Jisu bórokno hai hwnwi sa kha, “O swngcharni bugrarok bororokno kók khna rwui tongo, bokhorokrokbo ‘Lukuni samung khlainai’ hwnjago. 26Tamo khe norokni khe abo tẃi ya. Norokni bere kotor hwnjaknai bo kotoi wngthai klai-o, phiya norokni bere bokhorok hwnjaknai bo seleng hai wngthai klai-o.#Mat 23.11; Mar 9.35. #Mat 20.25-27; Mar 10.42-44. 27Chána achuknai da tor kuk, mai-mui boknai seleng da tor kuk; sabo tor kuk? Chána achuknai bono tor kugo! Phiya ang le norokni bisingo seleng hai khe se tong ja-o.#Joh 13.12-15.
28“Ang tekto man phuru norok ang bai máng tong kha. 29Apha ano bokhorok snamma hai angbo norokno snamnai, hwnwi ang kók rw kha. 30Ani ha-o norok ang bai baksa chá lai anw nung lai anw, phiya achukthayungo achugwi Israilni bosong chiknwirokno buj thum anw.”
Pitor gosi glak hwnwi Jisu samani
(Mat 26.31-35; Mar 14.27-31; Joh 13.36-38)
31Hakhe Subrai hai hwnwi sa kha, “Simon, Simon, khna di! Gisti mai chogwi gundak swkakma hai norokno chokna hwnwi Soitan san kha, 32tamo khe nwng poito yakar yaui tongna tẃi khe ang nini bagwi suri san kha. Nwng khá kiphil phuru ani takhukrokno rak rw di.”
33Pitor hai hwnwi sa kha, “Subrai, ang nwng bai baksa alongo thángna suda, phiya butharjakna suda gosi-o!”
34Jisu hai hwnwi sa kha, “Pitor, ang nono o kók sa-o, tini tokla kokchik ya sini nwng ano sini ya hwnwi uáitham sa anw.”
Tiyar wng di
35Aphuru Jisu bórokno hai hwnwi sa kha, “U uáisa ang norokno rang buya, bogol buya tei yaklap buya khe rohor phuru norok mungsani phano biyal khe da ma tong kha?”
“Mungsani phano ya,” hwnwi bórok sa kha.#Mat 10.9-10; Mar 6.8-9; Luk 9.3; 10.4. 36Jisu hai hwnwi sa kha, “Tabuk le rang tong khe ba tẃi thung, bogol tong khebo hai’-no. Seng kwrwi khe bo kamchlwi phalwi phano pai thung. 37Ang norokno o kók sa-o, ‘Samung hamya tangnairokni bere bo khoroksa khopjaknai,’ hwnwi Elembago swijakmani o kók ani sago na se nang phainai; tamni hwn khe ani bagwi swijakmani abo nang phaina naiwi tong kha.”#Jis 53.12.
38Sagrirok hai hwnwi sa kha, “Nahar di, Subrai. Oro seng kongnwi tongo.”
“Aswk bai’-no wng anw,” hwnwi bo sa kha.
Tháistwi Hathái-o Jisu suri sanmani
(Mat 26.36-46; Mar 14.32-42)
39Jisu taunni ongkhorwi Tháistwi Hathái-o tháng kha, bo abo hai khe tháng thángo; sagrirokbo bini logi tháng kha. 40Aro sók phaiwi Jisu bórokno hai hwnwi sa kha, “Belokjak ya tẃi khe suri san di.”
41Hakhe bo bórok bai kagwi tei kisa hakchalo thángwi yáskú sungwi hai hwnwi suri san kha, 42“Apha, nwng muchung khe o khurino ani oroni nor di; omobo ani muchung tẃi ya, nini muchung tẃi’-no wng thung.” 43[Chuknohani suari khoroksa nukjagwi bono khá rak rwui klang kha. 44Khá nangwi Jisu teibo kaichomwi suri san kha; aphuru thẃi bothon hai khe bini kolomtwi ha-o klai kha.]
45Suri san baiwi bo bachaui sagrirokni aro kiphilwi phai kha, hakhe bórokno khákhamjagwi muktrwi thángwi tongmani nuk phai kha. 46Bo bórokno hai hwnwi sa kha, “Tamo wngwi norok muktrwi thángwi tong? Bacha di, belokjak ya tẃi khe suri san di.”
Jisuno rommani
(Mat 26.47-56; Mar 14.43-50; Joh 18.3-11)
47Bo kók saui tong phuru borok kwbángma aro sók phai kha, Judas hwnwi sagri chiknwirokni bere khoroksa bórokno tubu-ui phai-o. Bo Jisuno motom suna hwnwi gana-o tháng kha. 48Hakhe Jisu bono hai hwnwi sa kha, “Judas, motom suma hai khe se nwng Borokni Sajla rom rw si-o?”
49Tamo wngna nai kha abono saui manẃi Jisuni logisongrok hai hwnwi sẃng kha, “Chwng seng tisa sina da Subrai?” 50Bórokni bere khoroksa le ochai bokhorokni selengno kosonwi se rw gra kha, bo a selengni yagrani khunju rakhlai rw kha.
51Jisu hai hwnwi sa kha, “Aswk bai’-no wng kha, ta khlai si di!” Bo a borokni khunjuno tangwi ham rw phi kha.
52Bono romna phainai ochai okrarokno, noktharni sebuk okrarokno Jisu hai hwnwi sa kha, “Ang ba dagait da, sengrok tokphungrok bai khe norok phai kha ba? 53Ang aswk sal brúm brúm noktharo norok bai máng se, norok aphuru ano yak tisa ya. Tabuk le norokni jora phai kha ba, mwnakmabo kwplai wngma jora.”#Luk 19.47; 21.37.
Pitor Jisuno gosi ya wngmani
(Mat 26.57-58,69-75; Mar 14.53-54,66-72; Joh 18.12-18,25-27)
54Bórok Jisuno romwi ochai bokhorokni nogo tlang lai kha. Pitor hakchalo tong twtwi rwktharwi tháng kha. 55Nokhla kwcharo baksa hór mwchẃngwi achugwi tong laijak, Pitorbo bórokni bisingo achugwi kha. 56Hór gana-o bono achugwi tongma nugwi selengjwk khoroksa bono naisigwi hai hwnwi sa kha, “O borokbo bini logini’-no!”
57Pitor abono gosi yaui hai hwnwi sa kha, “Bwrwima ang bono si se sini ya!”
58Kisa tongwi borok khoroksa bono nugwi hai hwnwi sa kha, “Nwng’-bo bórokni bere khoroksa!”
“Chwlasa, ang ya!” hwnwi Pitor sa kha.
59Srapsa tongwi tei khoroksa bono hai hwnwi dabogwi sa kha, “O borok sói’-no bini logini’-no, bo’-bo Galilini borok!”
60Pitor hai hwnwi sa kha, “Chwlasa, nwng tamo sa abono ang romwi man ya!”
Bo kók saui se tong kho, aphuru kheno tokla kokchigwi rw laha. 61Subrai uphilwi Pitorno dadak-didik nahar kha. Hakhe “Tini tokla kokchik ya sini nwng ani sini ya hwnwi uáitham sa anw,” hwnwi Subrai samano Pitor muitu manjak kha. 62Hakhe bo phataro thángwi swlwgwi kap kha.
Jisuno bu laimani
(Mat 26.67-68; Mar 14.65)
63Jisuno mwrwknairok bono mwbo mwnwi lai kha, bubo bu lai kha. 64Bórok bini mokol khapungwi bono hai hwnwi sẃng kha, “O diyarisa, nono sabo bu sa di!” 65Abo hai khe bórok bono teibo kók kwbángma saui lachi rw kha.
Kaunsil bwskango Jisu
(Mat 26.59-66; Mar 14.55-64; Joh 18.19-24)
66Ai khe’-no okra chakrarok, ochai okrarok tei kerong phrwngnairok kuthum lai kha, hakhe Jisu Kaunsil bwskango tubujak kha. 67“Chwngno sa di, nwng Masia da?” hwnwi bórok Jisuno sẃng lai kha.
Bo hai hwnwi sa kha, “Ang sa phano norok poito tháng glak. 68Phiya ang norokno kók tháisa swk sẃng phano norok sa glak. 69Tamo khe tabukni simi Borokni Sajla Kwplaisa Kaitorni yagra bwkhak achugwi tong anw.”
70Bórok bebak’-no hai hwnwi sẃng kha, “Hakhe nwng da Kaitorni Sajla?”
Jisu bórokni hai hwnwi sa kha, “Ang’-no bo hwnwi norok’-no saui tong kha bla.”
71Hakhe bórok hai hwnwi sa lai kha, “Chini tei sakki samung kwrwi kha. Chwng sakphang’-no bini khukni kók khna kha!”
Currently Selected:
LUK 22: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
