LUK 23
23
Pilatni bwskango Jisu
(Mat 27.1-2,11-14; Mar 15.1-5; Joh 18.28-38)
1Aswk borok aphuru khe rupsa bacha laiwi Jisuno Pilatni bwskango tubu-ui phai lai kha. 2Aro bórok hai hwnwi bono majra ber lai kha, “Chwng nuk kha o borok chini bororokno lama koró rwui tong kha, bo Rumni bugra kotorno teks ta rw di hwnwi sa-o. Ang’-no Khristo, ang’-no bugra hwnwibo gosi-o.”
3Pilat bono hai hwnwi sẃng kha, “Nwng Judairokni bugra da?”
“Nwng’-no o kók saui tong kha bla.” hwnwi Jisu sa kha.
4Hakhe Pilat ochai okrarok bai lukuno hai hwnwi sa kha, “O borokno majra bernani ang mungsa phano bwlam nuk ya.”
5Bórok teibo dabogwi hai hwnwi sa kha, “Bo phrwngma bai Judia gwnangwi bororok uru-muru wng bai kha. Bo Galilini simi chengsaui tabuk oro sók phai kha.”
Herodni bwskango Jisu
6Abono khnaui Pilat hai hwnwi sẃng kha, “Omo Galilini borok da?” 7Bo Jisuno Herodni angkorni borok hwnwi saui manẃi bini thani rohor kha. Herodbo Jerusalemo tongmani jora. 8Jisuno nugwi Herod belai khá srang kha, tamni hwn khe bini kók khnaui Herod bumasíngni simi Jisu bai malaina hwnwi tongmani’-no. Jisu ha-o nuk ya samung khlaimano bo naina hwnwi khatungwi tongmani. 9Aboni bagwino Herod bono kók kwbángma sẃng kha, tamo khe Jisu tháisa phano sa li ya. 10Ochai okrarok bai Kerong phrwngnairok jabirwi bachaui teibo kwrak khe bono majra ber lai kha. 11Herod bini sengkrakrok bai Jisuno yasek khusek khe mwnwi laiwi rí jilik jalak kan rwui Pilatni thani kiphilwi rohor phi kha. 12A salono Herod bai Pilat kiching kha laisa ti kha; agi le naisigwi se man lai ya.
Jisuno butharna dagimani
(Mat 27.15-26; Mar 15.6-15; Joh 18.39—19.16)
13Pilat ochai okrarokno, bokhorokrokno tei lukurokno kwrẃngsa khe ring kha. 14Bo bórokno hai hwnwi sa kha, “O borok bororokno lama koró rwui tong kha hwnwi norok bono ani thani tubu-ui rw phai kha. Nai di, norokni bwskango’-no ang bono sẃng phenegwi nai kha; norok majra berma hai ang le bini mungsa phano majra nuk ya. 15Herodbo hai’-no bini majra nuk yani bai chini thani kiphilwi rohor kha. O borok butharjakna nangnai abo tẃi samung mungsa phano tang ya. 16Hakhe ang bono kisa swk swpragwi yakarwi rohor anw.”
17[Pilat Yókma ter brúm brúm alongo chopjaknairokni bere khoroksano phiyók phiyógwi ma rohoro.] 18Bebak borok hai hwnwi chirikhók lai kha, “Pái khibi di bono! Barabano phiyógwi rw di!” 19(Baraba a tauno bulai-toklai khe phiya borok butharwi alongo chopjakmani.)
20Pilat khe Jisuno phiyókna nai-o. Aboni bagwino bo lukuno tei uáisa sa hor kha. 21Tamo khe bórok hai hwnwi chirikhók lai kha, “Kruso kanta bu di! Bono kruso kanta bu di!”
22Pilat hai hwnwi omo bai khe uáitham sẃng kha, “Tamo wngwi? Bo tamo samung hamya tang lang ba? Ang bono butharjakna nangnai abo tẃi samung mungsa phano tangma nuk ya. Hakhe ang bono kisa swk swpragwi yakarwi rohor anw.”
23Tamo khe bórok “Bono kruso kanta bu di!” hwnwi sotonwi chirikhók phlai tong lai kha; ulo bórok chirikhókma’-no nang kha. 24Bórok naima hai’-no Pilat bono kruso kanta bu di hwnwi dagi kha. 25Bo bu lai tok lai khe phiya bórok butharo hwnwi alongo chobwi tonjaknaino, bórok naima a borokno bo phiyógwi rw kha; Jisuno khe bórokni muchung tẃi khlai thung hwnwi bórokni yago yapharwi rw kha.
Jisuno kruso kanta bumani
(Mat 27.32-44; Mar 15.21-32; Joh 19.17-27)
26Bórok Jisuno tlangwi tháng phuru Kurinini Simon hwnwi borok khoroksano nuk kha. A borok kami bwkhakni tauno phaimani. Bórok bono romwi bini gwdna-o krus boksaui rw kha, hakhe abono Jisuni uklok balwi tẃi rw kha.
27Bórok kwbángma bini uklok uklok him laijak; aboni bisingo bwrwirok baksa tongo, bórok bini bagwi muisubuk chaui kap laijak. 28Jisu uphilwi bórokno hai hwnwi sa kha, “Jerusalemni bwrwimasong, norok ani bagwi ta kap di; norokni sakni bagwi se kap di, norokni bwsarokni bagwi se kap di. 29Tamni hwn khe omo tẃi sal phai anw, ‘Banjirok’-no ham kha, ogo bwsa tẃi yarokno ham kha, phiya bwsa abuk ma chá rw yarok’-no ham kha!’ hwnwi bororok ma sa anw. 30Aphuru bororok hatháirokno ‘Chini saka-o klai phai di!’ hwnwi ma sa anw, haplokrokno ‘Chwngno koton phai di!’ hwnwi ma sa anw.#Hos 10.8; Phu 6.16. 31Buphang kwthangno se ahai khlai khe kwthwino bahaiba khlaino?”
32Bórok samung hamya tangnai tei khoroknwinobo Jisu bai baksa butharna bagwi tlang kha. 33“Bokhorok chárá ” hwnwi kwrẃngsa-o sók phai khe bórok Jisuno aro kruso kanta bu kha, a samung hamya tangnai khoroknwinobo abo hai’-no khlai kha, khoroksano bini yagra bwkhak, tei khoroksano yaksi. 34Aphuru Jisu hai hwnwi sa kha, “Apha, bórokno nakar di. Bórok tamo khlai tong kha abo bórok’-no saui man ya.”
Bórok pat ka rwui bini ríno banta khe na lai kha.#Lob 22.18. 35Lukurok aro bachaui naiwi tong kha. Judai bokhorokrok bono mwnwi laiwi hai hwnwi sa kha, “O borok buino le mwthango; bo Kaitorni chongjak Masia hwn khe sakno mwthang thung!”
36-37Sengkrakrokbo bono mwnwi lai kha. Bórok bini gana thángwi arak ham tha ya hadi laiwi “Nwng Judairokni bugra khe sakno mwthang di!” hwnwi sa lai kha.
38Bini bokhorok saka-o,#23.38: Tei kubun kwcham bijabo o kókbo dalo Grik, Latin tei Hibru kók bai. “O borok Judairokni bugra,” hwnwi swijak.
39Aro khachijaknai a borok hamya khoroknwini bere khoroksa bono kului hai hwnwi hwn kha, “Nwng’-ba Masia hwn bla? Hakhe nwng’-bo thang di, chwngnobo mwthang di.”
40Tamo khe tei khoroksa bono damrogwi hai hwnwi sa kha, “Nwng Kaitorno kiri ya da? Chwng khoroktham dalsa khe ma thwinai. 41Chini le sói’-no, chwng tangma hai’-no chwng manjagwi tongo. Bo le mungsa phano samung hamya tang ya.” 42Hakhe bo Jisuno hai hwnwi sa kha, “O Jisu, nwng bugra wngwi phai phuru ano ta pok ja di.”
43Jisu bono hai hwnwi sa kha, “Ang nono o kók sa-o, tini’-no nwng ang bai baksa Paradaiso tongwi anw.”
Jisu thwimani
(Mat 27.45-56; Mar 15.33-41; Joh 19.28-30)
44Dibor ká twtwi wng khe sal chẃng li ya, hakhe sarikni kwtham jora ha gwnangwi mwnagwi tong kha. 45Aphuru noktharni rí swngjak khaknwi wngwi khichigwi tháng kha.#Lam 26.31-33. 46Jisu hai hwnwi chirikhók kha, “Apha, nini yago ani pholano yapharo!” O kókbo sa bai kha, hamabo lai kha.#Lob 31.5.
47Sengkrak okra abono nugwi Kaitorno lobwi hai hwnwi sa kha, “Omo sói’-no borok kaham.”
48Tamo wngno wng ya naina hwnwi aro kuthumnai bororok abono nugwi bebak’-no khaklap bu bu-ui se nogo kiphil bai si-o. 49Galilini simi Jisuni logi-o phainai bwrwirok bai bono sininai bebak bororok hakchalo bacha twtwi omorokno nai tong lai kha.#Luk 8.2-3.
Jisuno phobmani
(Mat 27.57-61; Mar 15.42-47; Joh 19.38-42)
50-51Josep hwnwi borok khoroksa tongo, bo Judiani Arimathia taunni borok. Bo belai borok kaham; Kaitorni ha bu phuru phaino bo abono naisingwi tongo. Kaunsilni chalai phano bo bórokni chapmano’-bo chajak ya, samungnobo chajak ya. 52Bo Pilatni bwskango thángwi Jisuni mangno sanwi kha. 53Bo abono tikhlaiwi lilonni rítrak bai dul kha; holongdabo khurmani mangkhoro bo abono tonwi kha. A mangkhoro khoroksa phano phobjak ya kho. 54A salo Judai Tiyar sal, aphuru sabat sal wng tẃi wng tẃi.
55Galilini simi Jisuni logi phainai bwrwirok Josepni uklok uklok thángwi mangkhor nai lai kha, Jisuni mangno bahai khe tonjak kha abono nai bu kha. 56Hakhe bórok nogo kiphilwi thángwi langi-thok motom tei methi thok motom snamwi lai kha.
Kerong rwksaui bórok Sabat salo samung tang yaui tong lai kha.#Lam 20.10; Uái 5.14.
Currently Selected:
LUK 23: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
