A’NPHUTNA 16
16
Hagar leh Ishmael
1Abram kha anuhmei Sarai in sa inkhatbek um leinei pek mak. Tâk-kha amanu’n Egypt mi inkhat arahming Hagar inti sōk nuhngâk aleinei, 2khava jâra amanu’n, Abram hneng, “Rōngpu’n kei nai amannei mak a kae. Kasōknu Hagar hi heisa mo hmun na’nchunpui mak? Ama’n kei sik sa aneipek khakhat thei eng,” ati. Abram in Sarai ṭonghri kha kahnōm jo. 3Khava jâra amanu’n Hagar kha amanbo sik a Abram apek jo. (Hivahi Abram Canaan ram a kum 10 a-omsōa akasōk kae). 4Abram in Hagar hmun a’nchunpuia nai avon jo. Achunghrik kha a’nhret pha hong inlensak joa, akapunu Sarai kha ahnōise jo.
5Khava pha Sarai in Abram hneng ahri, “Hagar in ahnōise eng hi nang taṭhe kae. Kei khet in ama kapek che kae, achung kahrik a’nhret pha ahnōise jo eng. Rōngpu’n tu mo akadik me ṭong tan rasoh, nangmo, kei mo!”
6Abram in amasôn, “Kaṭha jo, ama nasōknu kae, nang ensuina thōia aka-om kae; namadu hrep kha achunga tlo roh.” Khava pha Sarai in Hagar kha ênga atlo jo pha katlânsōt jo.
7 Rōngpu ngeva khan nêrdiram thōia Shur sena hlam a tuiripût hnenga Hagar kha ale’nhmupui. 8Khana ahri, “Sarai sōknu Hagar, khona inphut ahei kasōk chea khon mo se sik nati?”
Ama’n amasôn, “Kakapunua inphut ahei katlânsōt eng kae.”
9Ama’n, “Ahnenga inle ina asōk vachang roh,” ati. 10Khava sōa ahri nôk a, “Ke’n, nang sōn leh pâr katamtak kapek sik che, tûte’num anmani ja kha teitor mak hei ning. 11Nang in sapase inkhat nanei sik, arahming Ishmael nati sik kae, ajârchu Rōngpu’n namalung inrenga naṭana rasa athei pek jo che. 12Tâk-kha nasapa kha ram shakōrtung kapōa ahringkhō ahmang sik; ama mi rakip tadōi kachang sik, mi rakip ama’n adōi sik. A-innkō heia inphut ama ahlop binga ka-om sik.”
13Hagar abinga indera, “Ke’n Pathen kha kahmu khet mo khana khava akahrisōt sik a alakahring eng mo?” ati. Ama’n a’nbekpui Rōngpu kha, “Akahmu sōt Pathen,” atia kae. 14Khava jâra khan mihe’n khava tuikhur Kadesh leh Bered kâra ka-om kha, “Ani kahmu Akahring Inkhat Tuikhur,” tia anphōa kae.
15 #
Ga 4.22
Hagar in Abram sapase inkhat amatet pek a, ama’n arahming “Ishmael” aphō pek. 16Khava pha Abram kha kum 86 katluk jo.
Currently Selected:
A’NPHUTNA 16: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
