A’NPHUTNA 17
17
Intep Merchîkna Vuntan
1Abram kum 99 atluk pha Rōngpu ahnenga inlâra, “Kei Akahratpen Pathen eng kae. Kaṭong jui roh khana akadik tlo ṭhak roh. 2Ke’n nang leh ṭong intepna kanei sik khana sōn leh pâr katamtak kapek sik che,” ati. 3Abram inkuna raleia ahmai amantôna ka-om, khana Pathen in ahri, 4“Ke’n nang leh hiva ṭong intepna hi kasyem kae, nang jât katamtak hei anpusōn akachang sik che kae tia kei a’ntep eng kae. 5Nang rahming Abram inti mak jo ning, Abraham a’nti sik jo che kha, ajârchu ke’n nang jât katamtak hei pa a kasyem sik che kae.#Ro 4.17 6Ke’n nang sōn leh pâr katamtak kapek sik che, ṭhahrep reng hongkachang sik hei. Tu leh sa katamtak nahong nei sik khana anmani jât katamtak hongkachang sik hei.
7“Ke’n nahnenga ka’ntepna hi nang leh natu-nasahei hnunga khang katlunga ahei tik chen a intepna inkhat a kajui sik. Kei hi nang leh natu-nasahei Pathen kachang sik eng.#Lk 1.55 8Tûntak a khōhme nachangna ram hi, nang leh natu-nasahei kapek sik chei kae. Canaan ram pumpui hi ahei tik a natu-nasahei chen kachang sik, khana kei an-Pathen kachang sik eng.”#Ṭōn 7.5
9Pathen in Abraham hneng, “Nang leh hnunga natu nasa khang kat-lunga ṭongtep hi nantajui nger sik a akahnōm nger sik chei kae. 10#Ṭōn 7.8; Ro 4.11Nang leh natu-nasahei kâra pasenai rakip vuntan sik hi nankhenga akahnōm nger sik chei kae. 11-12Tûna inphut pasenai ni 8 atluk ning vun nantatan et sik, nan-inna a’nte sōk-hei leh ram hlop a nantarachôk sōk-hei kha’m a’nveisa sik hei kae. Hivahin nang leh kei kâra ṭong intepna ka-om ti hi amalâr sik kae. 13Mi rakip vuntan et sik, khana hivahin kei leh nang intepna ahei tik a ka-om ti malârna sik a taksa mêrchîkna inkhat sik kha kae. 14Pase vuntanlo kha kei leh ṭong intepna kha ajuimak jâra kei mi inkhat a intei theimak ning.”
15Pathen in Abraham hneng, “Nanuhmei hi Sarai tia bekmak jo roh; tuna inphut arahming hi “Sarah” jo kae. 16Ke’n amanu vâng kapek sik khana ke’n ama a sapase inkhat kapek sik che. Ke’n ama vâng kapek sik a kha jât-hei nu kamanchang sik khana ama sōn leh pâr heia inphut reng hongkachang sik hei,” ati.
17Abraham in ahmai ralei asuktōa inbok a akamuk, tâk ama’n amandon pha amanuia, “Mi’n kum 100 atluk pha sa alaneitor sik mo? Sarah kum 90 jo hin nai alanei thei sik mo?” ati. 18Ama’n Pathen hneng ader, “Heisa mo Ishmael in kakarōi kahlō akachang theimak sik?”
19Tâk-kha Pathen in, “Changmak ning, nanuhmei Sarah in sapase inkhat alaneipek sik che, arahming Isaac nati sik kae. Ama leh atu asahei chunga ke’n kaṭong tepna kamathlung sik. Khavakha are-rea intepna inkhat kha kae. 20Nang in Ishmael sik naderpek kha kathei jo, khava jâra ama’n sa katamtak leh sōn leh pâr katamtak aneina sik vâng kapek sik jo. Ama reng 12 hei pa kachang sik, khana asōn apârhei jât kalentak a kasyem sik hei. 21Tâk-kha ka ṭongtep chu, akumtinga hiva pha Sarah tamatet sik nasapa Isaac chunga kamathlung sik kae,” ati. 22Pathen in Abraham hneng hiva ṭong hi ahrisō pha, adahlon jo.
23Khava kanitak a khan Abraham in Pathen ṭong ajuia, asa Ishmael leh a-innshunga aleirachôk asōk-hei inveina paseseng vun atanpek jo hei. 24Abraham in avun atanlai hin akum 99 katluk jo, 25khana asapa Ishmael kha akum 13 katluk jo. 26Anmani 2 khava ning khan anvun anleitan sōma kae, 27Abraham sōk rakip hei leh anvun antan et jo.
Currently Selected:
A’NPHUTNA 17: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
