A’NPHUTNA 18
18
Abraham in Sapa Anei sik Ṭongtepna
1Mamre a a’ntheng thingkunghei kâra Abraham hneng Rōngpu le’nlâr. Sûn kani lumlaitak Abraham in kot kunga in-onga aleiomlai 2khō ahongthlir pha pase 3 aleikangir aleihmu hei. Anmani ahmulim hei leh an-intō sik a heikatlânsōt. Kakhup a ahmai in ralei amantôna,#He 13.2 3ati, “Kapuhei, châm inhngat loa chu ka-inn hi adahlon pek mak ruh; nangni inzen sik a hiva hmun a kei ka-om eng. 4Nanke sôpna sik a tui heichoi pek chei rong; hiva thingkung hnōia nangni châm a’nhnga pek ruh. 5Sâk sik um ajing heichoi rong; hivahin nanhlam hrona ratha apek sik chei. Nangni’n ka-inna nankahong hi kei kajana nantapek eng kae, hiva jâra ke’n nangni razen chei rong.”
Anmani’n anmasôn, “Inpâk ka-om, kahnōm ung.”
6Abraham inrangtak a khōilu Pōn-inna katlâna Sarah hneng avahri, “Inrang roh, najâmdi kaṭhapen bora inkhat he’nlo roh, khana buhlom heisyem roh.” 7Khava sō leh ama aserup ting katlâna sehrat ate akathai inkhat akadeisōt a asōkpa apek a ama’n inrangtak a asyem jo. 8Ama’n sene thai ajing, sene ajing, hme leh aloa khana mihei hmaikunga sâk sik adônpek hei. Thingkung thōia khan atak-khet in arazen heia anmani’n anleisâk.
9Khava sōa anmani’n “Nanuhmei Sarah khon mo aka-om?” tia anleider. Ama’n amasôn hei, “Ama chu khōilu pōn-inn shunga ka-om.”
10 #
Ro 9.9
Anmani kâra inkhat in, “Tûna inphut thlakō atluk pha kei kahong nôk sik eng, khava pha nanuhmei Sarah’n sapa inkhat anei sik kae,” ati.
Ama kahnunga khan Sarah kha kot kunga kangira an-inbek aleirangei hei. 11Abraham leh Sarah kha upa leikachang jo hei, khana Sarah’n thlatina apōn hmu kha leihmu mak jo. 12#1 Pe 3.6Khava jâra Sarah’n abinga aleimanuia, “Tûnchu kei kater jo eng, tûn katlunga nuhmei-pase inchunna kalaneitor sik mo? Khana kapuise’m kater joa kae,” ati.
13Khava sōa Rōngpu’n Abraham hneng, “Heisik a mo Sarah’n amanuia ‘Kei hingtuk kater jo enga sa kalaneitor sik mo?’ ati. 14#Lk 1.37Rōngpu sik a a’ntak heimo aka-om? Ke’n kahri kapōa khan tuna inphut thla 9 tlukna kei hong inle sik eng khana Sarah’n sapase inkhat amatet sik kae,” ati.
15Sarah khan aṭit jâra, “Manui mak eng,” aleiti.
Mipa khan, “Kadik, namanui” ati-pek. “Namanuia kae,” ati.
Abraham in Sodom sik Aderna
16Khava sōa mihei khan khava hmun andahlona Sodom hmutheina sik hmun khat a leikase hei. Abraham khan anmani kathaksōt sik a leikase sap hei. 17Khana Rōngpu’n abinga ati, “Ke’n katlo sik hi Abraham hnenga thup mak ning. 18Ama sōn leh pârhei kha akalen leh akahrat jât hongkachang sik hei, khana ama inphut ke’n jât rakip vâng kapek sik hei kae. 19Asahei leh asōn apâr he’n kaṭong anjuina sik, akadik leh akaṭha antlona sik, amansena sik hei tia ama hi kakadeisōt jo kae. Anmani’n khanga antlo’nchu ke’n ahnenga kalei intepna hei seng kha ama sik a katlo pek sik.”
20Khava sōa Rōngpu’n Abraham hneng, “Sodom leh Gomorrah chunga ṭit ka-om tak masetna ka-om jo khana ansetna kalen hêr jo. 21Ke’n kathei jo masetna hei hi akadik leh akadik mak jongsōtna sik akasesuk sik eng kae,” ati.
22Khava sōa pase 2 hei kha Sodom kajōna kase jo hei, tâk Rōngpu chu Abraham leh leika-om hei. 23Abraham in Rōngpu hneng asora aleider, “Kadiktak a nang in ṭhenakase hei leh akaṭhe hei kha nasuk manhmang sap sik jo hei mo? 24Khōpuia ṭhenakase mi 50 an-om inchu khōpui pumpui nasuk manhmang sik mo? Mi 50 hei hukna sik a nang in ṭhenmak tin che mo? 25Akaṭhemak hei kha ṭhena kaneihei leh inṭhōia that mak hei tin chea kae. Khachu akae theimak kae. Khachu tlothei mak tin che. Khanga natlo’nchu ṭhena kaneimak hei kha ṭhena kaneihei leh inṭhōia karâkna pek sōmna kae sik jo. Khachu akae theimak kae. Raleichung pumpuia ṭong katanpa khan kadiktak a ṭōn atlo sik kasōk.”
26 Rōngpu’n, “Sodoma ṭhenakase mi 50 kahmu’nchu, anmani jâra khōpui pumpui kaṭhensōt sik,” tia amasôn.
27Abraham in vōi khat ahri nôk, “Rōngpu nahnenga kangamtak a ṭonghri manjōmna kanei jâra arangei mandam roh. Kei hi mihring inkhat hnâm eng kae, khana heikhat hrina sik um ratha neimak eng. 28Tâk-kha ṭhenakase 50 changloa mi 45 leika-om khakhat thei. Khōpui pumpuia khan 5 vât jâra khan nasuk manhmang sik mo?”
Rōngpu’n amasôn, “Khōpuia khan ṭhenakase mi 45 kahmu’nchu ke’n khōpui suk manhmang mak ning.”
29Abraham in ahri nôk a, “Khōpuia khan ṭhenakase mi 40 rōk ka-om thei hei.”
Rōngpu’n amasôn, “Ṭhenakase mi 40 an-om innum ke’n suk manhmang mak ning.”
30Abraham in, “Rōngpu, lungsettak a ahrângpek mak roh, kahri nôk sik kae. Mi 30 rōk an-om inne heikhong sik?” ati.
Ama’n, “Ke’n mi 30 lim kahmu’nchu tlomak ning,” ati.
31Abraham in, “Rōngpu, na-hnenga inngamtak a ṭong kahri manjōm jâra arangei mandam roh. Mi 20 kapō rōk an-om ine heikhong sik?” ati.
Ama’n, “Mi 20 kahmu’nchu khōpui hi suk manhmang mak ning,” ati.
32Abraham in, “Lungsettak a na-hnuk amannat pek mak roh, Rōngpu, vōi khat kahri nôk sik jo kae. Mi 10 lim an-om ine heikhonga sik? ati.”
Ama’n, “Mi 10 lim an-om innum khavakha suk manhmang mak ning,” ati. 33Abraham leh an-inbeksō kahnunga Rōngpu kha kasesōt jo, khana Abraham um a-inna inle jo.
Currently Selected:
A’NPHUTNA 18: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
