A’NPHUTNA 21
21
Isaac Inte
1 Rōngpu’n aṭong leitep dungjuia Sarah vâng aleipek jo, 2khana Abraham in upa ahongchang jo pha anuhmei kha achung kahrik joa Abraham sapa inkhat amatet pek jo. Pathen in nai anei sik ati phatak a khan sapa kha aleimatet jo.#He 11.11 3Abraham in Isaac tia arahming aphō jo, 4khana Isaac khan ni 8 atluk jo pha Pathen mansena dungjuia Abraham in asapa vun aleitanpek.#Aph 17.12; Ṭōn 7.8 5Isaac a’ntet pha Abraham akum 100 katluk jo. 6Sarah’n, “Pathen in inpâkna leh manuina ahei rôn pek jo eng. Hiva ṭong kathei rakip in inpâk a anmanui pui sik eng,” ati. 7Khava sōa amanu’n ahrisa, “Sarah’n nai amatet a netui aman in sik ti hi Abraham hneng tu’n mo aleihri pek sik? Achang inum upa achang shunga ke’n sapase inkhat kanei pek jo.”
8Naipang kha hong kakhang jo, anetui in abâng ning khan, Abraham in sâktlâng kalentak aleitlo.
Hagar leh Ishmael Atirsōt
9Egypt jōrnu Hagar tamatet Ish-mael leh Sarah sapa Isaac le’ndei hei, sem leh sôk anleitlo. 10Sarah’n ahmu heia Abraham hneng ahri, “Sōknu leh asapa hi hnongsōt heiroh. Kasapa Isaac in nakarōi achen sik kha hivanu sapa hin insempui thei hêrmak ning.”#Ga 4.29,30 11Hivahin Abraham malung aleitôn hêr; ajârchu Ishmael kha’m asapa kae. 12Tâk-kha Pathen in Abraham hneng, “Pasenai leh nasōknu sik a malung hōimak tlomak roh. Sarah’n tlo roh ati rakip kha tlo roh. Ajârchu kalei intepna nasōn-napâr hei kha Isaac hruia inphut nanei sik hei kae.#Ro 9.7; He 11.18 13Sōknu sapa kha’m sa leh nai katamtak kapek sik, jât inkhat hongkachang sik hei,” ati.
14Abraham in ajînga jîngkâr hmatak kathōia buhlom leh shavun penga tui kha Hagar aleipek. Naipang kha amanu amanpōk a aleitirsōt jo. Amanu’n Abraham leh an-inṭhen kahnunga Beersheba ramhâng rajeia kalôn lelea ka-om jo. 15Shavun penga tui kha atlang jo pha, asa kha hnômbia amanjea adahlona 16metre 100 inkâr hmun a in-onga leika-om. Amanu abinga inbek a, “Kasapa kathi kahmu sik hi ke’n detor mak ning,” ati. Amanu’n khava hmun a ale’n ong pha amanu leikaṭap joa kae.
17Naipang kaṭap kha Pathen in aleithei, marvâna inphut Pathen ngeva he’n Hagar hneng, “Nachâmna heimo ka-om, Hagar? Ṭitmak roh. Naipangpa ṭap rasa Pathen in athei jo. 18Thōi roh, se’na ama so vapom roh khana vamathlem roh. Ama sōn leh pâr a inphut ke’n jât kalentak inkhat kasyem sik kae,” ati. 19Khava sōa Pathen in ahmit amahlâng pek a tuikhur inkhat amanhmu. Ama kasea shavun penga tui avathea asapa’m ajing aman in jo. 20Pathen in naipangpa kha ahong khang leh inṭhōia a-ompui. Ama Paran ramthip a ka-oma shahnong kathem hongkachang jo. 21Anu’n ama nuhmei sik Egypt a inphut aleijong pek.
Abraham leh Abimelech Inhnōmna
22 #
Aph 26.26
Khava pha Abimelech in re-hlam kakei Phicol leh inṭhōia kasea Abraham hneng ahri, “Nang in natlona rakip a Pathen in a-ompui che. 23Khava jâra tûntak hin Pathen rahminga nang in kei leh kasahei hneng, a-emak leh kasōn kapâr hei hneng ahōn mak ning tia intepna nei roh. Ke’n nahnenga kaṭha nenga katlo che kapōa nang innum kei hneng leh na-omna ram a hin kaṭha natlo sik eng tia intepna nei roh.”
24Abraham in, “Kei intep eng,” ati.
25Abimelech sōk he’n rumhrat a anta leilo tuikhur jâra Abraham in inphinna aleinei. 26Abimelech in ahri, “Khavakha tu’n mo aleitlo manhret mak eng. Nang innum hiva ṭong hi kahnenga leihri mak che, khana hivahi ahma inkeipen katheina kha kae.” 27Khava sōa Abraham in kemōng leh se ṭhahrep Abimelech hneng aleipek khana an-inhnia inhnōmna inkhat anleinei. 28Abraham in kemōng rup a inphut kemōngte 7 aleiṭhensōt hei. 29Abimelech in Abraham hneng, “Heisa mo khavakha natlo?” ati.
30Abraham in amasôn, “Hiva kemōng 7 hei hi inlo roh. Hiva tlona hin ke’n tuikhur hi kaleicho kae ti hi nang in nahnōmna kae.” 31Khava jâra ahmun kha Beersheba tia anphō jo, ajârchu khava hmun khan anmani 2 ṭong le’ntep heia kae.
32Khang’khan anmani’n Beersheba a ṭong intepna inkhat anleinei sōa Abimelech leh Phicol kha Philisti ting inle jo hei. 33Abraham in Beersheba a hmeila kapō thingkung inkhat alinga, akahring ṭhak Rōngpu Pathen kha akamuk a kae. 34Philisti ram a pha kasôttak aleibera Abraham leika-om.
Currently Selected:
A’NPHUTNA 21: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
