A’NPHUTNA 25
25
Abraham Sōn leh Pâr Ralak-hei
(1 Th 1.32–33)
1Abraham in nuhmei hlop Keturah intinu anei nôk. 2Amanu’n Zimran, Jokshan, Medan, Midian, Ishbak, leh Shuah aneipek. 3Jokshan hi Sheba leh Dedan hei pa kae. Dedan sōn leh pârhei kha Asshurim, Letushim leh Leummim hei kae. 4Midian sapahei kha Ephah, Epher, Hanoch, Abida leh Elda hei kae. Hihei hi Keturah sōn leh pârhei kae.
5Abraham in anei rakip Isaac hneng aleidahlon pek; 6tâk ama alei hring lai seng anuhmei hlop-hlop sahei hneng chu kutchoi aleipek hei. Khana hiva sapahei hi Nisōtinga ramheia asapa Isaac a inphut inkâra atirsōt hei.
Abraham Thina leh Vûmna
7-8Abraham akum 175 katluk a katerbera kathi. 9Asapa Isaac leh Ishmael in Mamre nisōtinga ka-om Hit mi Zohar sapa Ephron intipa hleia Machpelah Hlungkhura khan anleihre jo. 10Hiva hlei hi Abraham in Hit-heia inphut aleirachôk kae. Khava hmun a khan Abraham leh anuhmei Sarah anleivûm hei.#Aph 23.3-16 11“Kei Ani kahmu Akahring Inkhat Tuikhur” inti hnenga aleika-om Isaac kha Abraham thisōa Pathen in mahâmṭhat aleipek.
Ishmael Sōn leh Pârhei
(1 Th 1.28–31)
12Sarah sōknu Egypt jōrnu Hagar in Abraham sa aleinei Ishmael khan 13hiva sōn leh pârhei, an-intetna dungjuia abân bâna inpek hei: Nebaioth, Cedar, Adbeel, Mibsam, 14Mishma, Dumah, Massa. 15Hadad, Temah, Jetur, Naphish leh Kadema hei hi kae. 16Anmani hi phung 12 hei anpu sōnhei kae; khana hiva rahminghei hi ankhō tlâkna leh anrephōr matungna hmunhei kha anleimanrôna anleiphō hei. 17Ishmael kha athi pha akum 137 katluk jo. 18Ishmael sōn leh pârhei khan Assyria hrona Egypt nisōtinga Havilah leh Shur kâra khō anleisât hei. Abraham sōn leh pâr heia inphut ahlop a leika-om hei.
Esau leh Jacob Intet
19Abraham sapa Isaac thuhming kha hi kae. Isaac apa chu Abraham kae. 20Laban unu khana Bethuel (Mesopotamia inphut Aram jât) sanu Rebecca kha anuhmei sik a a-ompui pha Isaac akum 40 leikatluk jo. 21Rebecca kha sa aneimak jâra Isaac in Rōngpu hnenga nuhmei sik a aleider. Rōngpu’n amasôn pek a Rebecca kha achung hong kahrik jo. 22Nai a’nphir hei amatet sik leikasōk, khana an-intet mak hma von shunga anmani kha inre ṭhak hei. Khava jâra ama’n, “Heisik a mo kachunga hing’hin kachang jo?” ati. Khava jâra Rōngpu hneng ṭong masônna inkhat kader sik a leikase.
23 Rōngpu’n amanu hneng ahri pek,#Ro 9.12
“Navon shunga jât 2 ka-om hei;
Nang in inre-indōia ka-om jât 2 namatet sik hei.
Inkhat in inkhat kanek a kahrat chet sik.
Upa khan anaipa arazen sik kae.”
24Amanu saneina sik pha kha ahong tlung jo pha, khana ama’n sapa a’npher 2 aleinei hei. 25Ahma kakei kha kasenthim, khana avun kha ahme kakai pōn apō, khava jâra arahming Esau tia anphō. 26Inhni tlukna khan Esau kerahmit amatutlit a hong inte, khava jâra arahming Jacob tia anphō. Anmani annei hei pha Isaac kha kum 60 katluk jo.
Esau in Upa Changna Ratha Ajōrsōt
27Naihei hong kalen jo hei, Esau shachâng kase kathem hongkachang, ramsōk-vângsōk hringkhō indu leikae, tâk Jacob chu inna sip tia om indu mi kae. 28Isaac in Esau kha lum alodet, ajârchu ama’n ahei choi ramshahei aleisâk ria kae. Rebecca’n chu Jacob kha aleilungset det.
29Ni khat Jacob in be kara aleibut a aleiomlai Esau shachânga inphut hong inlea kae. Avon leikaṭâm hêr 30khana Jacob hneng, “Kei vonṭâm kade jo; sâk thei nasōng akasenjap kha ajing ahei pe roh,” ati. (Khava jâra arahming Edom anti).
31Jacob in, “Nang upa changna ratha neina kha kei napek sik eng inchu, hivahi kapek sik che,” ati.
32Esau in, “Kaṭha jo! Kei thi rong kati jo; upa changna ratha neina khan heimo kei sik ṭhatchômna ka-om sik?” ati.
33Jacob in, “Hmapena na-upa changna ratha neina kha kapek sik che tia intepna nei roh,” ati.#He 12.16
Esau in intep a a-upa chang ratha neina kha Jacob apek jo. 34Khava sōa Jacob in buhlom ajing leh antui ajing aleipek jo. Ama’n sâk sik, in sik asâk a-insō leh kathōia kase jo. Khavakha Esau in upa changna ratha neina heitea asakmakna kha kae jo.
Currently Selected:
A’NPHUTNA 25: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
