A’NPHUTNA 24
24
Isaac sik Nuhmei Inkhat
1Abraham tûnchu kater hêr jo khana atlona rakip chunga Rōngpu’n mahâmṭhat aleipek. 2Ama’n anei rakip amantinta asōk upapen hnenga, “Karakō 2 kâk a nakut heithōn inna intep roh. 3Marvân leh ralei kasyem Rōngpu Pathen rahminga a’ntep sik che kamadu, khachu nang in kasapa nuhmei sik hiva Canaana najong mak sik kae. 4Nang ka’ntetna ram a a’nle chea ka-innkōhei kâra inphut kasapa Isaac nuhmei sik inkhat nava jonga navaṭhōi sik kae,” ati.
5Tâk-kha sōk khan ader, “Nuhngâk kha kei leh inṭhōia hiva ram a hongna sik a-inn adahlon hnōm mak inchu, heikhonga sik? Nahong inphutna ram a khan nasapa hi tir male sik ṭhamak ning mo!”
6Abraham in amasôn, “Kasapa sona son tir makna sik intluk ngar roh! 7Marvân kasyem Rōngpu’n kanu kapa inna leh ka-innkōhei ram a inphut aheiṭhōisōt eng, khana ama’n katu kasahei hiva ram hi apek sik heia ka-ôrtak a intep a kae. Nang in kasapa nuhmei sik inkhat naheiṭhōi torna sik ama’n nahma angeva ahei tir sik. 8Nuhngâk kha nang leh hong sik ahnōm mak inchu, hiva ṭongtepna inphut nang masō sik che kae. Tâk-kha kasapa chu hei-hei achang inum sona son naṭhōi male hêrmak sik kae.” 9Khava jâra sōkpa khan akapu Abraham rakō kâra akut athōna Abraham ngekna kha tlosōtna sik intep a kae.
10Abraham karōi ka-ensui sōk khan akapu sharîngsei 10 aṭhōia, Mesopotamia sak tinga Nahor omna khōpuia khan leikasea kae. 11Ama avatlung pha khōpui vânga tuikhura khan asharîngsei hei amanbok jo hei. Apha kha khōhlei kae, nuhmei tuithena sik anheisōk pha kae jo. 12Ama’n derna anei, “Kakapu Abraham Pathen, Rōngpu, kakapu hneng naṭong tepna kha mathlung roh, khana tuning hin hmesōna amannei roh. 13Khōpuia nuhngâk-hei akahong heia antui thena sik tuikhur panga hin kei ka-om eng. 14Ke’n inkhat hneng, ‘Natuibe maṭhum inna tui aman in roh,’ tia kader sik. Amanu’n ‘In roh, khana nasharingsei hei sik um kavathe sik,’ ahei ti’nchu khavakha nasōk Isaac nuhmei sik nakadei kha chang rasoh. Khanga achang inchu, nang in kakapu hnenga naṭongtep kha pui namathluk pek jo ti kamanhret sik jo.”
15Ama’n aderna kha achaimak hma, adâra tuibe indom Rebecca kha heikatlung jo. Ama Abraham sōpuipa Nahor leh anuhmei Milcah sapa Bethuel sanu kae. 16Ama nuhngâk khangdông hme kaṭhatak inthenga alaka-om inkhat kae. Ama kasea atuibe athe mansip a hong inle jo. 17Sōkpa kha ama inhmupui sik katlâna avahri, “Natuibea tui kha lungsettak a aman in roh.”
18Amanu’n, “Apu, in roh,” atia adâra tuibe kha inranga ahong maṭhuma akhopna sik aleisun pek. 19Ama’n a-insō pha, amanu khan, “Nasharîngsei hei ta-in sik um kavathe sik, katluk a inhei rasoh,” ati. 20Ranhei tui dônna thlengkônga inranga atuibe kha asun manrōk a sharîngsei hei kha ankhop mak lai seng tuikhura katlân nôk a tui avathe pek heia kae. 21Khana Rōngpu’n hme amansō sik mo tia sōkpa khan kadai hngera nuhngâknu kha a-en ravet a kae.
22Amanu khan aṭōn achaisō pha, mipa khan, sana hnârton mankatam akeisōa ahnâra amakhei pek jo khana sana zakser kalen 2 akutbâna amannei jo. 23Ama’n ader, “Napa kha tu mo ahri pek roh. Napa inna kei leh kamihei jân rekna sik hmun ka-om sik mo?”
24Amanu’n, “Kapa rahming Bethuel, Nahor leh Milcah sapa kae,” tia amasôn. 25“Kan-inna nantlungna sik hmun inkhat ka-om khana sapôt leh phi katamtak ka-om,” ati.
26Khava pha, mipa kha amarkhup athlep a inkuna Rōngpu akamuk jo. 27Ama’n, “Kakapu hnenga aṭong tepna taksen theitak a inthlung pek, kakapu Abraham Pathen, Rōngpu kha manpâk a om rasoh! Rōngpu’n kakapu inkōhei hneng intlunhrek a aheiṭhōi enga kae,” ati.
28Nuhngâk kha anu inna katlâ-na thuhming rakip kha avahri jo. 29Rebecca ṭapa, Laban inti ka-om, ama kasōksōt a, Abraham sōkpa omna tuikhura katlân jo. 30Laban khan asernu zakser leh hnârton aleinei hei kha avahmu jo khana mipa ṭong mantheina amanu’n thang akōi kha’m athei jo. Ama, Abraham sōkpa, asharîngsei hei hnenga tuikhura aleingirna khan vakase, 31khana ahri, “Inna hong roh, kei leh inṭhōi rih. Rōngpu vâng kachen mi inkhat che kha kae. Heisa mo hina vânga akangir che! Ka-inna nang sik a mantluksa tlunghmun kanei, khana sharîngsei hei sik hmun karōk ka-om.”
32Khava jâra mipa kha inna khan kasea, khana Laban in sharîngsei hei phur kha amaṭhum heia kahar leh sapôt apek hei. Khava sōa Abraham sōkpa leh amihei ke sôpna sik Laban in tui alōk pek hei. 33Khana busâk sik anheidôn pek hei pha, mipa khan, “Ke’n kahri sik ṭong kahri mak hma bu sâk mak hi ning,” ati. Laban in, “Hri manjōm roh, hri roh” ati.
34Ama’n aphut a ahri, “Kei Abra-ham sōk eng kae. 35Rōngpu’n kakapu kha kalentak a mahâmṭhat apek a mikahaotak inkhat a asyem. Ama’n, kemōng, ketak, sehrat, selôi, sana dangka, sōknu leh sōkpa, sharîngsei, shakōrtung arup-rup ka-tamtak aleipek. 36Kakapu nuhmei Sarah’n atersōa sapa inkhat aneipek, khana kakapu khan anei rakip asapa kha apek jo. 37Kakapu ṭongpek eng kha kajuina sik intepna inkhat amannei eng. Ama’n, ‘Hiva Canaan ram a nuhngâk kasapa nuhmei sik kadei mak roh. 38Khava kanek a chu, nang se ina kapa mihei, ka-innkōhei kâra kasapa nuhmei sik vajong roh?’ ati eng. 39Ke’n, kakapu hneng, ‘Nuhngâk khan kei leh hong sik ahnōm mak inchu heikhong sik hmen?’ tia kader. 40Ama’n amasôn eng, ‘Ke’n aṭong kajui ṭhak Rōngpu’n angeva nahma atir sik khana hmesōna apek sik che. Kapa innshung mi, kami heia inphut kasapa nuhmei sik inkhat navahmu sik. 41Nang na’ntepna inphut na’nhliksōt theina sik inkhat rōk khachu: nang ka-innkōhei hneng navasea, anmani’n anhnōm mak che’nchu, khava pha nang masō sik che kae,’ ati.
42“Tuning kei tuikhur kahei tlung pha, ke’n Pathen derna kanei, ‘Kakapu Abraham Rōngpu Pathen, kaṭōn tlona hi hui amathlung pek roh. 43Kei hinna tuikhura hin ka-om eng, nuhngâk tui kathe inkhat ahong pha leh, ke’n atui bea inphut tui in sik kader sik. 44Amanu’n kha ahnōm inchu khana kasharîngsei hei sik a tui avathe jo’nchu amanu kha kakapu sapa nuhmei sik a nakadei kha chang rasoh,’ kati. 45Rasa sōkloa hinga kaderna kator mak hma khan Rebecca’n adâra tuibe ahei kadoma kahong, khana tuikhura kaṭuma tui avathea kae. Ke’n ahnenga, ‘Lungsettak a tui in sik apek roh,’ kati. 46Inrangtak a adâr chunga inphut atuibe amaṭhuma ‘In roh, khana nasharîngsei hei ta-in sik kavathe nôk sik,’ ati. Khanga kalei in jo khana sharîngsei hei kha’m aman in mankhop heia kae. 47Ke’n kader, ‘Tu mo napa?’ Ama’n, ‘Nahor leh Milcah sapa Bethuel kae,’ tia amasôn eng. Khava pha ke’n, hnârton kha ahnâra zakser khan akut a kamanneia kae. 48Khana kei inkun enga Rōngpu kha kakamuk. Khana kakapu Abraham innkō hnenga ani heikaṭhōi inthlung, khana khan kakapu sapa nuhmei sik a asanu ani inhmu Rōngpu Pathen kha kamanpâk joa kae. 49Tûnhin, nangni’n, kakapu hnenga tlohlam kasōk kha pui mathluk sik a nanin-tluk inchu khana akaṭha tlopek sik nanti’nchu ahri pek ruh; kha achangmak inum ahri pek ruh khana ke’n heimo tlo sik kha kamandon sik jo,” ati.
50Laban leh Bethuel in anmasôn, “Hiva ṭōn hichu Rōngpua inphut ahong kasōk achang jâra keini man-don ṭhen sik changmak jo. 51Hinahin Rebecca ka-om jo; ṭhōi ina se jo roh; Rōngpu ama khet in ahri kapōa, nakapu sapa nuhmei chang jo rasoh,” anti. 52Hiva ṭong hi Abraham sōkpa khan athei pha, ama inkuna Rōngpu kha akamuk jo. 53Khava pha ama’n, pōn, inretna sana, dangka hrui hei alosōt heia Rebecca apek jo. Khana ama’n mankatamtak kutchoihei aṭapa leh anu aleipek hei.
54Khava sōa, Abraham sōkpa kha leh ami he’n, bu kha ansâk an-ina jân kha karek jo hei. Jîngkâr anhong thōi pha ama’n, “Kakapu hneng inle jo rong,” ati.
55Tâk-kha Rebecca ṭapa leh anu’n, “Ni 10 a-emak leh kani vekhat bek nuhngâk hi keini leh omsōm hi rung, khava sō leh kasethei sik,” anti.
56Tâk-kha ama’n, “Akhâm mak ruh. Rōngpu’n kakhōhme hong hi hme amansō jo eng; kakapu hneng inle jo rong,” ati.
57Anmani’n, “Khan chu nuhngâknu kha beme sona ama’n heimo ati sik rangei rih,” tia anmasôn. 58Khava jâra anmani’n Rebecca anbek a, “Mi-pa hi leh akase sik nahnōm mo?” tia ander. Ama’n, “Ôk,” tia amasôn hei.
59Khava jâra anmani’n Rebecca leh a-innshung karôn upapen kha Abraham sōkpa leh amihei kajuia anmanse jo hei. 60Khana anmani’n Rebecca kha hinga mahâmṭhat anlei-pek: “Sernu, nang hi mi lishing hei nu hongchang roh! Nasōn-napâr he’n, an-inrepuihei khōpuihei tor hei rasoh.”
61Khava pha, Rebecca leh asōknu kha Abraham sōkpa kha leh inṭhōia akase sik intluk heia sharîngsei chunga kachōng jo hei, ankhenga se anphut jo.
62Isaac kha “Ani kahmu sōt Aka-hring Inkhat Tuikhur” inti ramthip shunga khan kahonga Canaan thlâng tinga ramṭhen a leika-om jo. 63Isaac khōhlei ting hlei razeia vakalônsōt a sharîngsei hei anhong kha aleihmu. 64Khana Rebecca’n Isaac kha ahmu pha, sharîngsei chunga inphut kaṭum jo! 65Khana Abraham sōkpa hneng ader, “Hlei razeia eini kasora akahong so tu mo kae?” Ama’n, “Ama so kakapu kae,” tia amasôn. Khava pha Rebecca’n apōn hmaikhu a’nloa pōnlu a’nkhu jo.
66Khana sōkpa khan Isaac hneng atlosōt rakip kha ahri pek jo. 67Khava pha Isaac in Rebecca kha, anu Sarah omna pōn-inn shunga khan aṭhōi manhlut a, ama anuhmei kachang jo. Isaac in Rebecca kha alungset, khang’khan anu om mak jâra amalung aleikaher kha lung mōngna anei jo.
Currently Selected:
A’NPHUTNA 24: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
