A’NPHUTNA 35
35
Bethel a Pathen in Jacob Vâng Apek
1Pathen in Jacob hneng, “Bethel a se roh, sona son va-om roh. Nang in na-u Esaua inphut natlânsōt lai nahnenga ale’nlâr Pathen, kei sik a maichâm inkhat syem roh,” ati.#Aph 28.11-17
2Khava jâra Jacob in a-innshung leh ahong inṭhōipui hei hneng, “Miram pathen nantanei hei kha hlonsōt ruh khana nantaksa insi intheng una pōn intheng si ruh. 3Hiva hmun hi nidahlona Bethel ting akase sik jo me kae, khana khan kamalung châmlai leh kasena rakip a ani’nthōpui Pathen sik a maichâm kasyem sik kae,” ati. 4Khava jâra anmani’n Jacob hneng miram Pathen antanei seng leh ankōrton hei kha’m Jacob hneng anpek sōt jo. Shechema sasōkung inkhat thōia khahei kha avûm jo hei.
5Jacob leh asa he’n ansesōt pha, khava hnenga khōpuihei hneng Pathen in ṭitna kalentak aleimannei hei, khava jâra anmani’n leihnong mak hei. 6Jacob in Canaana ka-om Luz, tûnchu Bethel tia a’nhret jo hmun a khan amihei seng leh kahong hei. 7Khava hmun a maichâm inkhat asyema, khavakha Bethel Pathen rahming amanrôn, ajârchu ama’n a-upa hnenga inphut atlânsōt lai khan Pathen in hiva hmuntak a hin ahnenga le’nlâra kae. 8Rebecca inzennu Deborah kha khana khan leikathi khana Bethel thlang tinga sasōkung thōia anleivûma kae. Khava jâra khavakha “Ṭapna Sasōkung” tia anleiphō.
9Mesopotamia inphut Jacob ahong inle pha Pathen in ahnenga vōi khat inlâr nôk a mahâmṭhat aleipek. 10Pathen in ahnenga, “Narahming hi Jacob inti, tâk tuna inphut chu Israel a’nti sik jo che kae,” ati. Hing’hin Pathen in Israel tia aleiphō jo.#Aph 32.28 11Khana Pathen in ahnenga, “Kei Akahratpen Pathen eng kae. Sa leh nai katamtak nei roh. Jât katamtak nanga inphut hong inthok sik hei khana nang hi renghei pusōn akachang sik che kae.#Aph 17.4-8 12Abraham leh Isaac hnenga kaleipek ram kha nang kapek sik che. Khana nang kahnunga nasōn-napâr hei hneng um kapek sik hei,” ati. 13Hivasōa Pathen in adahlon jo. 14Pathen in ṭong aleihri pekna hmuntak a khan Jacob in mandonsōtna sik hlung aleiphun, khana khava chunga olive thaitui leh ju asunthlōna mantheng sōtna aleitloa kae.#Aph 28.18-19 15Khava hmun kha Jacob in Bethel tia aphō jo.
Rachel Thina
16Jacob leh a-innshung he’n Bethel andahlona kase jo hei, anmani Ephrath tlungna sik ala’nkârjap lai Rachel kha asanei pha hong katlung jo, naiha inhnaktak a kaphu jo. 17Naiha nat a’nhnakpen lai khan, nai inneinu’n ahnenga, “Ṭitmak roh, Rachel; hivahi sapa inkhat nôk kae,” atipek. 18Tâk-kha ama thi rong ati jo, achaina kaphuk masa leh inṭhōia anai rahming Benoni tia aleiphō, tâk apa’nchu Benjamin tia aleiphō.
19Rachel kha athi pha Ephrath hlampanga anleivûm jo, tûnchu Bethlehem tia inhret jo. 20Khana khan Jacob in mandonsōtna sik hlung inkhat aleiphun, khavakha tuning katlung Rachel thlân kae ti manhretna sik a laka-om. 21Jacob in khanga kasea Eder innber inshâng rekhat langting rephōr asyem jo.
Jacob Sahei
(1 Th 2.1–2)
22Jacob in khava ram a a-omlai Reuben in apa nuhmei manbohei kâra Bilhah kha ale’nchunpui jo; Jacob in atheia ahnuk leikana hêr.
Jacob in sapa 12 aleinei hei. 23Leah tanei hei: Reuben (Jacob sapa upapen), Simeon, Levi, Judah, Issachar, leh Zebulun hei hi kae. 24Rachel tanei hei: Joseph leh Benjaminhei hi kae. 25Rachel sōknu Bilhah tanei hei: Dan leh Naphtali. 26Leah sōknu Zilpah tanei hei: Gad leh Asher hei hi kae. Hiva sapahei hi Mesopotamia ram a a’nte hei kae.
Isaac Thina
27Abraham leh Isaac leiomna Hebron sira Mamre inti hmun a khan Jacob kha apa Isaac inhmupui sik leikase.#Aph 13.18 28Isaac kha kum 180 leikahring, 29khana kater hêra leikathi jo; asapa Esau leh Jacob in anleivûma kae.
Currently Selected:
A’NPHUTNA 35: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
