LUKE 22
22
Jesu Dōina Ṭōnmantluk
(Mt 26.1–5; Mk 14.1–2; Jn 11.45–53)
1Rakan inti, Che philo Buhlom Revei sik pha kha leikahnai jo.#Sōk 12.1-27 2Thempu kalenhei leh Dân oja he’n mipuihei kha anleiṭit hei, khava jâra marûk a Jesu thatna sik hlam kha anleijong jo.
Judah in Jesu Pek sōt sik a Ahnōm
(Mt 26.14–16; Mk 14.10–11)
3Khava sōa sonle 12 hei kâra Judah Iscariot intipa shunga Seitan kahlut jo. 4Khava jâra Judah kasōk a thempu kalenhei leh Bek-inn kahngâk ṭōnpui karônhei hneng kasea heikhong mo Jesu apek sōt thei sik tia ava’nbekpui jo hei. 5Anmani inpâk heia sêr pek sik a kahnōm jo hei. 6Judah khan ahnōm jo jâra, mihei manhret loa pek sōt theina sik hlam inkot ajong jo.
Rakan Kût Thlai sâkna sik Jesu’n Amantluk
(Mt 26.17–25; Mk 14.12–21; Jn 13.21–30)
7Chê philo Buhlom Revei shunga Rakanna thlai sik a kemōng thatna sik kani kha hong katlung jo. 8Jesu’n Peter leh John atir heia, “Rakan Kût a khōhlei thlai nisâkna sik vamantluk ruh,” ati hei.
9Anmani’n ahnenga ander, “Khon mo kantamantluk sik namadu?”
10Ama’n amasôn hei, “Nangni khōpuia son nanhlut pha leh pase inkhat tuibe indom inkhat nan-intōpui sik. Ama hlutna inn katlunga jui ruh. 11Khana inn kapupa hnenga khan hinga vahri ruh: ‘Oja khan nahnenga ahei hri, khon mo kasonlehei leh Rakan Kût thlai kantasâk sik?’ 12Ama’n chungden kalentak mantluksa inkhat amanhmu sik chei, khana khan heirakip leimantluk ruh,” ati hei.”
13Anmani kase heia Jesu’n ahri pek hei kapōa heirakip anvahmu jo, khana khan Rakan Kût thlai kha anmantluk jo.
Rōngpu Jân-thlaisâk
(Mt 26.26–30; Mk 14.22–26; 1 Cor 11.23–25)
14Pha ahongtluk jo pha, Jesu dokhânga ahmun ahlōa asonlehei leh in-ong jo hei. 15Ama’n anhnenga ati, “Ke’n khōdeng kathei mak hma hiva Rakan Kût thlai hi nangni leh nisâksap sik kamadu hêr. 16Ajârchu ke’n kahri pek chei kae, Pathen rengram a hiva mantheina hi pui atluk mak kârseng ke’n sâk hêrmak jo ning.”
17Khava sōa Jesu’n kōklei kha aloa Pathen manpâkna apek a ati, “Hivahi inlo ruh khana nankâra insem ruh; 18Ajârchu ke’n kahri pek chei kae, Pathen Rengram kha ajōng tlung mak kârseng tuna inphut ke’n hiva vomhrui ju hi innok mak jo ning.”
19Khava sōa ama’n buhlom kha aloa Pathen manpâkna apek a, har akhōia, anmani apek heia ati, “Hivahi nangni sik a a’npek sōt kataksa kha kae, kei mandonsōtna sik a hi tlo ruh.” 20Thlai kha ansâksō pha, khava kapōa kōklei kha apek heia ati, “Hiva kōklei hi nangni sik a akalōng jo kathisen vâng mêrchîkna katetkhum jo, Pathen intepna ather kha kae.#Jer 31.31-34
21“Tâk-kha enruh! Kei kapek sōt sikpa kha dokhânga hin kei leh ka-omsap!#Hl 41.9 22Mihring Sapa kha Pathen tamantluksa dungjuia akathi sik kae; tâk akapek sōt sikpa kha heituk a ṭitpek ka-om jo mo!”
23Khava pha anmani kâra tupen mo khanga katlo sik kha tia indertō heia kae.
Akalen sik Chungchânga Inkhena
24Ankâra tu mo akalenpen sik tia mandonna chungchânga inkhena leikasōk jo.#Mt 18.1; Mk 9.34; Lk 9.46 25Jesu’n anhnenga ahri, “Jât-hlop hei reng he’n anrama mihei chunga ratha annei, anvai karônhei khan ‘Mihringhei ṭhōn ung kae,’ anti.#Mt 20.25-27; Mk 10.42-44 26Tâk-kha nangni sik a chu khanga changmak; nangni kâra akalenpen khan matlumpen kapō akachang nger sik kae, khana hlamkakei khan sōk kapō akachang nger sik kae.#Mt 23.11; Mk 9.35 27Ajârchu bu ka-ôa akasâk sik a a’n-ongpa leh a-inzenpa kha tu mo akalen jôk? Kadik, dokhâng chunga bu ka-ôa a’n-ongpa kha kae. Tâk-kha kei chu nankâra nan-inzen kapōa aka-om eng kae.#Jn 13.12-15
28“Nangni chu kakhōdeng theina rakip a nanleiompui eng; 29kapa’n kei vairônna sik ratha apek jo eng kapōa, khava ratha khet kha ke’n nangni kapek sik chei kae. 30Karengrama kadokhâng chunga nansâk sik nan-in sik khana Israel phung 12 chunga vai karôn sik a reng in-ongna in-ong sik chei.”#Mt 19.28
Jesu Peter in Ahri manhlem sik Ahridek
(Mt 26.31–35; Mk 14.27–31; Jn 13.36–38)
31“Simon, Simon! Rangei roh! Hlei kathlōpa’n sahûm leh avai aṭhen kapōa, akaṭhamak a inphut akaṭha ṭhensōtna sik, nankhenga enmansinna sik a, Seitan khan hnōm pekna achen jo. 32Tâk-kha nataksenna atlâk makna sik ke’n kaderpek jo che, khana kei hneng naho’nle nôk pha nang in nasōpuihei naman-ngar chet sik heia kae,” ati. 33Peter in amasôna, Rōngpu, nang leh inṭhōia akathisap sik leh kurkhum a akahlutsap sik a intluk jo eng.”
34Jesu’n amasôn, “Peter, kahri pek che kae, kei hi vōi 3 manhret mak eng natimak kârseng tuning jân âr khōngmak ning.”
Sêrkōk, Mârsha, khana Chemjâm
35Khava sōa Jesu’n asonlehei hneng ader hei, “Ke’n nangni sêrkōk, mârsha, kekōk kasea katirsōt chei pha khan nantavât heikhat aka-om mo?”#Mt 10.9-10; Mk 6.8-9; Lk 9.3; 10.4
“Heite inkhat vâtmak ung,” anti.
36Jesu’n anhnenga, “Tâk-kha tûnchu sêrkōk, mârsha kanei khan a’nchoi sik kae; khana chemjâm kaneimak in azakkō kalen a’njōra a’nchôk sik kae. 37Ajârchu kamanthei chei kae, ṭong intheng tahri, ‘Ama mikasehei mahâmsetna achenpui hei,’ ti kha, kei chunga hui akatlung nger sik kae, ajârchu kei chunga ale’nzet kha hui ajōng katlung jo kae.#Is 53.12
38Sonlehei khan anti, “Enroh, Rōngpu! Hinahin chemjâm 2 ka-om.” Ama’n aleimasôn hei,
“Kha katluk jo.”
Olive Tlâng Chunga Jesu’n Ader
(Mt 26.36–46; Mk 14.32–42)
39Jesu khōpuia inphut heikasōk a angaia asenari Olive Tlâng ting kase jo; khana asonle he’n akahnung anleijuia kae. 40Ama ahmun kha atlung jo pha, anhnenga ahri, “Ma-thlemna nantlâk inhlut makna sik der ruh.”
41Khava pha anmania inphut hlung indeng phâknahrep a ama kasea amarkhup athlep a ader jo. 42“Apa, nalungdo achang inchu, hiva inrengna kōklei hi keia inphut alosōt pek roh. Tâk-kha kei lungdo intlo mak sona nang lungdo intlo rasoh,” ati. 43Marvâna inphut ngeva inkhat jōng inlâra aratha amanngarpek jo. 44Ama’n adehla reia, malung kahlutchet a ader a arathlen thisen rahme kapōa raleichunga jōngkatla jo.
45Aderna inphut athōisōt pha, asonlehei hneng kahonga malung inrima invōichera anleikaje kha avahmu hei. 46Ama’n anhnenga ati, “Heisa mo akaje chei? Thōi ruh mathlemna nantlâk inhlut makna sik der ruh.”
Jesu Antasur
(Mt 26.47–56; Mk 14.43–50; Jn 18.3–11)
47Sonle 12 hei kâra Judah hlamkeina mipui kha anjōngtlung jo pha Jesu chu ṭong aleihriṭhak a leika-om. Ama’n Jesu kha majôp sik a ahei hnai. 48Tâk-kha Jesu’n ahnenga ati, “Judah, nang in Mihring Sapa kha majôp a pek sōt sik mo nati?”
49Sonle a-ompui hei khan omchen kasōk sik kha anhmu pha, anmani’n, “Rōngpu! chemjâm kantahmang sik mo?” anti. 50Khana ankâra inkhat in Thempu Kalen sōkpa achang tinga akōr kha aleituk mathlâk pek jo.
51Tâk-kha Jesu’n, “Hivahin katluk jo,” ati. Khana mipa kōr kha asit a amandam pek jo.
52Khava sōa Jesu’n thempu kalenhei leh Bek-inn kahngâk ṭōnpui karônhei khana upa akasur sik a akahong hei hneng ati, “Nangni’n kei chunga inru kapōa sung leh chemjâm inthōa aheikakōn chei mo? 53Bek-inna anikatâi nangni leh leika-omsap me, nangni’n sur sik a aleirei mak chei. Tâk-kha khō inthim vairônna pha, tûn hi nangnihei ṭōn tlona pha jo kha kae.”#Lk 19.47; 21.37
Peter in Jesu Ahri Manhlem
(Mt 26.57–58,69–75; Mk 14.53–54,66–72; Jn 18.12–18,25–27)
54Khava sōa anmani’n Jesu ansura, Thempu Kalen inna ankeimanhlut jo. Peter in inhlajap a aleijui. 55Thempu Kalen lâmtea hmei anmansûk a an-oa in-ong jo hei, khana Peter um khahei kâra le’n ong. 56Khava sōa sōk nuhmei inkhat in Peter kha hmei hnenga a’n-ong kha ahmu pha, kasang kanga a-ena, “Hiva mipa hi’m ama leh a’nthlop hei kae,” ati.
57Tâk-kha Peter in inhlema, “Eh nuhmei, ke’n ama manhret mak eng,” ati.
58Pha bongkhat sōa pase inkhat in Peter ahong hmusōt a ati, “Nang um ankâra inkhat che kae!” Tâk-kha Peter in amasôn, “Eh pase, kei changmak eng.”
59Khana pung inkhatsō radona pase hlop inkhat in inhnaktak a, “Hiva mipa hi’m Jesu leh ale’nthlopkhet hei kae ti hi inkei-chiona omak, ajârchu ama hi’m Galilee mi inkhat kae!” ati.
60Tâk-kha Peter in amasôn, “Eh pase, nang in nahri kha ke’n manhret mak eng!”
Ama’n khanga ṭong ahri laitak khan ârkhōng hong kakhōng jo. 61Rōngpu kha inheia Peter ahei ena khana Peter in Rōngpu ṭonghri, “Tuning âr akhōng mak hma, vōi 3 manhret mak eng nati sik eng,” ati kha amandonsōt joa kae. 62Peter kasesōt a malung kana tak a vakaṭap jo.
Jesu Antamanuisō khana Antavōk
(Mt 26.67–68; Mk 14.65)
63Jesu kahngâk-hei khan, anmanuisōa anleivōk. 64Anmani’n ahmai ankatōmpek a, “Tu mo nakavō? sânsōt roh!” anti. 65Khana anmani’n manuisōna ṭong katamtak anleihria kae.
Sehmang-pachonghei Hmaikunga Jesu
(Mt 26.59–66; Mk 14.55–64; Jn 18.19–24)
66Khō ahong vâr jo pha, upahei, thempu kalenhei, khana Dân ojahei le’ntûp hei khana Sehmang-pachong ângkunga Jesu kha anleiṭhōi manhlut a kae. 67“Nang Messiah che kha mo? ahri pek roh,” anti.
Tâk-kha ama’n anhnenga, “Ke’n kahri pek chei inum, nangni’n taksen mak tin chei, 68Khana ke’n ṭong kader chei inum amasôn mak tin chei. 69Tâk-kha Mihring Sapa kha tuna inphut Akahratpen Pathen kut changting a’n-ong sik jo kae,” ati.
70Ankhenga anhria, “Khan chu nang Pathen Sapa kha che mo?” anti.
Ama’n amasôn hei, “Kei kae eng nangni’n nanti.”
71Khana anmani’n, “Eini’n amanchênna sik sâkhilak rangei mak jo me? Nitakkhet in aṭong hri nithei jo,” anti.
Currently Selected:
LUKE 22: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
