LUKE 23
23
Jesu Pilate Hmaikunga Angir
(Mt 27.1–2,11–14; Mk 15.1–5; Jn 18.28–38)
1Khava pha anmani ankhenga kangirsōt heia, Jesu kha Pilate hmaikunga anṭhōi jo, 2anmani’n anmahera anhri: “Hiva mipa hin kanmihei hlamlea aṭhōi hei, Rengkalen Caesar hneng ramsêrṭhei pek makna sik ahri, khana ama abinga Reng, Messiah inchangsak a kae.”
3Pilate in Jesu hneng ader, “Nang Jehudihei Reng che kha mo?”
Jesu’n amasôn, “Nang in khanga nati jo.”
4Khan chu Pilate in thempu kalenhei hneng leh mipuihei hneng, “Hiva mipa masetna sik a ajâr heite hmumak eng,” ati.
5Tâk-kha anmani’n anmanhnak chet a, “Ama’n Judea ram pumpuia aṭong mantheina vâng hin mihei inchokna amasō jo. Galileea aphut a tûnchu hinahin kahong jo,” anti.
Jesu Herod hneng Antatir
6Pilate in kha athei pha, “Ama hi Galilee mi mo?” tia ader hei. 7Khana ama’n Jesu hi Herod vairônna ramṭhen a mi achang amanhret pha, Herod hneng Jesu kha atir jo, khava laitak khan Herod Jerusalema leika-om. 8Herod in Jesu ahmu pha, inpâk hranghra, ajârchu ama’n Jesu chungchâng ṭong aleitheia aleihmu hnōmna kasôt jo. Jesu ṭōn-inlak tlo hmu sik a le’nhōra kae. 9Khava jâra Herod in Jesu kha ṭong katamtak aleider, tâk Jesu’n heite leimasôn mak. 10Thempu kalenhei leh dân ojahei hmating hong inhnengsōt heia inhnaktak a Jesu anmaher maset a kae. 11Herod leh asepei he’n anmanuisōa semtlo hōina anleinei. Anmani’n pōn innem anmansia Pilate hneng anleitir male jo. 12Khava ning tak a inphut Herod leh Pilate ṭhōn inchang jo hei; ajârchu khava hma seng anmani ale’n enkada hei kae.
Jesu Thatna sik Ṭongpek
(Mt 27.15–26; Mk 15.6–15; Jn 18.39—19.16)
13Pilate in thempu kalenhei, hlamkakeihei khana mipuihei abek mantûp heia, 14anhnenga ati, “Nangni’n hiva mipa hi mihei hlamle kaṭhōi kae tia kahnenga nanheiṭhōi. Tûn ke’n ama nanhmai kunga enmansinna kanei, tâk nanmaherna kapōa aṭhena heite hmumak eng. 15Herod inum heite aṭhena ahmu mak jâra ahei tir male nôk jo. Hiva mi hin thina sik rahōi kasōk atloṭhe heite om mak. 16Ke’n ama kavōk sik a kha kamasō sik jo.” 17Rakan Kût pha rakip a Pilate in anmani sik kurkhum a inphut mi inkhat amasō pek ri heia kae.
18Tâk-kha anmani ankhenga ka-ông heia, “Ama that roh! Barabbas amasō pek roh!” anti. 19(Khōpui shunga inchok inhâng aleimasōk jâra leh rerûk a mi athat jâra Barabbas kha kurkhum a anta leikhum kae.)
20Pilate in Jesu amasō hnōm jâra mipuihei hneng aleingek nôk hei. 21Tâk-kha anmani ka-ông heia, “Makhei hlon roh, makhei hlon roh,” anti.
22Pilate in vōi 3 tlukna anhnenga ahri, “Heimo atloṭhe aka-om? Thatna sik rahōi kasōk atloṭhe ke’n heite hmusōt mak eng. Ke’n ama kavōk sik a kha kamasō sik jo.”
23Tâk-kha Jesu kha thingrake chunga ahem mankopna sik a anrasa inhnak chen a ka-ông hei, achaina pena anmanhnōm nger joa kae. 24Khava jâra Pilate in antader kha ahnōm pek jo heia Jesu thatna sik ṭong amathlâk jo. 25Bōina insō leh rerûk a mi athat jâra kurkhum a a’nkhumpa kha anmani maduna dungjuia amasō pek jo hei, khana Jesu chunga antamadu dungjuia antlona sik apek sōt jo hei.
Jesu Thingrakea Antamakhei
(Mt 27.32–44; Mk 15.21–32; Jn 19.17–27)
26Sepei he’n Jesu anṭhōisōt jo khana anmani’n khanga anselai arahming Simon inti Cyrenea inphut khōpuia akahong mi inkhat an-intōpui, ama kha anleisur jo, thingrake kha anmandoma Jesu kahnung anmanjui.
27Mipui katamtak in akahnung anleijui; anmani kâra nuhmei ṭhahrep ama sik a akaṭap leh a’n-ôi le’nvei hei. 28Jesu’n anmani langting inheia ahri, “Jerusalem sanuhei! Kei sik jâra ṭap mak ruh, tâk nangni nanbing sik a leh nansahei sik a ṭap ruh. 29Ajârchu, ‘Sa kaneimak, nai kavonhêr mak khana anetuia nai kaveihêr mak nuhmeihei kha heituk a mahâm kaṭha hei mo!’ tia mihe’n anhongtina sik kani kha hong katlung jo. 30Khavakha mihe’n tlângbunghei hneng, ‘Kanchunga jōngtla roh!’ khan chu hmebunghei hneng, ‘Athup roh!’ anta hongtina sik pha jo kae!#Ho 10.8; Ṭph 6.16 31Ajârchu thing kha ahring lai hinga akasōk achang inchu, achâr pha heimo akachang sik?”
32Ṭōnse katlo milak 2 he’m Jesu leh thatsap sik a anleikei hei. 33Anmani’n “Lurōk,” inti hmun kha antlung pha, Jesu kha thingrakea anhem mankop jo, ṭōnse katlo inkhat kha achangting, inkhat kha aveiting anleimakhei jo hei. 34Jesu’n ati, “Apa, rangei mandam hei roh! Ajârchu anmani’n heimo antatlo manhret mak hei.”#Hl 22.18
Khana anmani’n ankâra vâng-enna anneia azakkō kha insem jo hei. 35Jehudi hlamkakei he’n, “Ama’n milak ahuksōt hei; ama Pathen takadeisōt Messiah achang inchu abinga inhuk rasoh!” antia anmanuisōlai khan aleikangir mipui he’n heimo akasōk sik tia anlei en madip a kae!”#Hl 22.7
36Sepeihei kha’num anmanuisōa: kahong heia ju anhongpek a#Hl 69.21 37khana anti, “Nang Jehudihei reng nachang inchu, nabinga inhuk inhring roh.”
38“Ama hi Jehudihei reng kae” tia alu chungdet a anmazet a anleitâr pek.
39Ṭōnse katlo a’nkhei inkhatpa khan inzak apek a, “Nang Messiah kha changmak che mo? Nabinga inhuk roh, keini’m ahuk roh,” ati.
40Tâk-kha inkhatpa khan araseia ati, “Nang Pathen ṭitmak che mo? Nang in ama leh in-angtlinga ṭong tanna kha nachen jo kae. 41Hei-achang inum eini tachen hichu akadik kae, eini’n nitlona rahōi kasōk hrep kha nihmu kae. Tâk-kha ama hichu akaṭhamak heite tlolo kae.” 42Khana ama’n Jesu hneng, “Eh Jesu, nang in reng inkhat a nahong pha leh ahei mandonsōt roh,” ati.
43Jesu’n ahnenga, “Tuning nang, paradise a aka-omsap sik mea intep eng,” ati.
Jesu Thi
(Mt 27.45–56; Mk 15.33–41; Jn 19.28–30)
44-45Pung 12 radona inphut kani vârmak jo, khana pung 3 katlunga ralei pumpui inthim jo. Khana kani avâr mak lai shunga khan Bek-inn shunga pinden pōnzâr inkhei kha her hnia inhler jo.#Sōk 26.31-33 46Khava pha Jesu’n rasa inhnaktak a a-ôna, “Apa, nakut chunga karathla kapek che,” ati. Hi ahria kathi jo.#Hl 31.5
47Sepei ṭōnpui karônpa khan omchen kasōk hei kha ahmu pha ama’n Pathen amanpâk a ati, “Inchêntak a hiva mipa hi mikaṭha kae.”
48Khana khava hmun a a’ntûp a aka-en hei seng khan omchen kasōk hei kha anhmua an-ôp ankabena an-innting inle jo hei. 49Galileea inphut a aheikajui mipuihei leh Jesu inhret hei, kahlajap a akangir hei khan omchen kasōk hei kha anlei ena kae.#Lk 8.2-3
Jesu Thlâna Antahre
(Mt 27.57–61; Mk 15.42–47; Jn 19.38–42)
50-51Judea ram a Arimathea khōa arahming Joseph inti mi inkhat leika-om. Ama kha mikadik leh kaja ka-om tak Pathen Rengram ajōng katlung sik aleikahngâk inkhat kae. Ama chu Sehmang-pachonghei kâra inkhat achang inum anṭong mathlâk leh anchunga akahnōm mak inkhat leikae. 52Ama Pilate hmaikunga kasea Jesu kalōng kha avader. 53Khava sōa ama’n Jesu kalōng kha akadom mathlâk a hruipōn innem neng vâng akatōma, hlung thlân inkhōrsa, tûte ala’nhre makna inkhat a avahre jo. 54Khava kani kha inrin ning kae, Châmhngat kani a’nphut mak hma det kae.
55Galileea inphut a Jesu kahnung aheikajui nupuihei khan Joseph kha anjuia Jesu kalōng aman jena leh ahrena thlân kha anvahmu. 56Khava sōa anmani’n innting inle heia Jesu kalōng kano sik marim katui thai leh maru-marâng anleimantluk a kae.#Sōk 20.10; Dân 5.14
Dân dungjuia anmani’n Châmhngat kani ning khachu le’nhnga jo hei.
Currently Selected:
LUKE 23: KOMRBSI
Highlight
Share
Copy
Want to have your highlights saved across all your devices? Sign up or sign in
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
