LUKE 24

Thōisōtna

(Mt 28.1–10; Mk 16.1–8; Jn 20.1–10)

1Kanive hma-inkei ning jîngkâr hmatak nuhmeihei khan antamantluk marim katui hei kha anchoia thlâna kase hei. 2Thlânkhur kot khârna hlung ale’nhliksōt kha anvahmu jo. 3Khava jâra anmani thlânkhur shunga kahlut jo hei. Tâk-kha Rōngpu Jesu taksa kalōng kha anmani’n hmumak jo hei. 4Khava chunga inhmak a anngirlai, manhret manloa pōn kachek kasi pase 2 anhnenga jōng kangir hei. 5Nupuihei kha kaṭirei jo heia thōiting anhmai anmaluk jo, khahei khan anhnenga, “Heisa mo nangni’n akahring kha akathihei kâra nantajong? 6Ama kathōisōt jo; hin om mak jo. Galileea a-omlai nanhnenga aleihri pek chei:#Mt 16.21; 17.22-23; 20.18-19; Mk 8.31; 9.31; 10.33-34; Lk 9.22; 18.31-33 7‘Mihring Sapa kha thingrakea hem mankop sik a mikasehei kut a pek sōt sik kae, ni 3 sōa kahringa akathōisōt sik kae’ aleiti kha mandonsōt ruh.”

8Khava pha nupuihei khan aṭong hri kha anmandonsōt a, 9Thlâna inphut inle heia, sonle 11 hei hneng leh alak-hei seng hneng omchen kasōk rakip anvahri pek jo hei. 10Nupuihei khachu Magdalene Mary, Joanna, James nu Mary khana anmani leh a’nṭhōi nuhmei lak he’n sonlehei hneng hihei hi anvahri pek hei. 11Tâk-kha sonlehei khan nuhmeihei ṭonghri kha hme hria antahri kae tia anleiloa leitaksen mak hei. 12Tâk-kha Peter kangirsōt a thlânting katlân jo; khana ama inkuna a-en pha hruipōn inze teilo heite leihmu mak. Heimo akachang jo tia amandonhla pum a innting inle jo.

Emmaus a Akase

(Mk 16.12–13)

13Khava ning tak khan Jesu kahnung kajuihei kâra mi 2 Emmaus inti khō inkhat Jerusalema inphut Kilometre 11 kapō inkâra akahla kha anleijōn. 14Anmani 2 he’n omchen kasōk rakip ṭong kha anhria leikase hei. 15Anmani khanga inbek heia anselai khan, Jesu’n asor manhnai heia ale’nṭhōipui hei. 16Anmani’n anhmu ravâng ahme leimanhret tor mak hei. 17Jesu’n anhnenga, “Nangni nanse pum a heiṭong mo a’nbe chei?” tia ader hei.

Anmani anhmai kanguirenga leikangir hei. 18Khava pha ankâra arahming, Cleopas intipa khan ahnenga, “Tûnlai kani ṭhahrep shunga Jerusalema omchen kasōk manhret lo khōhme kha nang rōk che mo?” ati.

19“Heimo akasōk?” tia aleider hei.

“Nazareth Jesu chunga ṭōn kasōk hei kha,” tia anmasôn. “Ama hi sânkathem inkhat, Pathen leh mi rakip in aṭōntlo leh aṭong hria ratha kaneitak inkhat a antalo kae. 20Nithempu kalenhei leh vaikarôn he’n thatna sik a anpek sōt a, thingrakea anhem mankop a kae. 21Israelhei kahuk inhring sik kha ama kachang sik tia keini le’nhōr ung! Khahei rakip chunga, hiva ṭōn kasōk hi tuning ni 3 katluk jo. 22Kankâra nuhmei ṭhahrep he’n animanpir hêr ung; jîngkâr hmatak thlâna vakase hei, 23tâk akalōng kha vahmu mak jo hei. Ama kahring jo tia ankahri pek ngeva hmangtalâra kanhmu hei antia he’nle hei. 24Kanloi hei kâra ṭhahrep thlâna vakase heia nuhmeihei tahri kapōa thlân kha anvahmu, tâk ama khet chu vahmu mak jo hei.”

25Khava sōa Jesu’n anhnenga ati, “Heituk-hrep a akamo chei mo, sânkathemhei tahrisōt rakip taksenna sik heituk a a’nsûm jo chei mo! 26Messiah khan inrengna khahei seng ade nger sik khava sō leh alûrna shunga akahlut sik changmak mo?” 27Khana ama’n Moses lekha heia inphut sânkathemhei tamazet katlunga ṭong Intheng rabu rakip shunga achungchânga ale’nzet senghei kha aleihri manchên pek jo hei.

28Anmani’n ankhō jōn kha antlung sik jo pha, ama akakhe chet a akase sik le’nhlem; 29tâk anmani’n ankhâma, “Kani katla jo, inthimbei sik jo, reksap jo rih,” anti. Khava jâra ama kha anmani leh akarek sik a leikahlut jo. 30Ama anmani leh dokhânga in-onga, buhlom kha aloa, mahâmṭhat apek a, khana akhōia anmani apek hei. 31Khava pha anhmit inhlâng joa anmani’n ama achang kha anmanhretsōt jo. Tâk-kha anhmit hmua inphut le’nhmang jo. 32Anmani 2 kha inbe heia, “Ama leh hlamlena nihe’n ṭhōisaplai, Ṭong Intheng ahri manchêna a’nbekpui me lai khan nimalung shunga hmei insûk angmak mo?” inti heia kae.

33Anmani khava phatak a khan kathōi heia Jerusalemting inle jo hei, khana sonle 11 leh alak-hei anle’ntûp kha anvahmu hei, 34khahei khan anhnenga, “Rōngpu kha kadiktak a kathōi jo! Simon hneng inlâra kae!” anti.

35Mi 2 hei kha’num anhnenga, anhlam hrona omchen kasōk leh, buhlom akhōi pha, Rōngpu achang antamanhretsōt omchen kha anhri manchên pek jo hei.

Jesu Asonlehei Hnenga A’nlâr

(Mt 28.16–20; Mk 16.14–18; Jn 20.19–23; Ṭōn 1.6–8)

36Anmani’n hiva ṭong hi anhrilai, manhret manloa Rōngpu kha ankâra hong kangira anhnenga, “Nanchunga malung mōngna om rasoh,” ati.

37Anmani’n rathla inkhat antahmu kapōa anmandona, inpir heia kaṭihêr jo hei. 38Tâk-kha ama’n anhnenga, “Heisa mo nanbinga a’nder cheia nanmalung inkei-chiona nantanei? 39Enruh, kakut kake hei hi, kei eng kae, asit una a-en ruh; ajârchu rathla inkhat in kei kapōa taksa ravōi, ru leh châng neimak,” ati hei.

40Ama’n hi ahria, akut akehei amalârpek heia kae. 41Khava katlunga hlamrin tor mak hei, anṭong theia le’npâk hêr hei khana andet-hla hêr; khava jâra ama’n anhnenga ader hei, “Hiva hmun a hin sâk thei heikhat nantanei mo?” 42Anmani’n ahnenga nga sōngsa ahar inkhat anleipek, 43Kha aloa anhmai kunga aleisâk a kae.

44Khava sōa anhnenga ati, “Kei chungchânga Moses Dân shunga a’nzet rakip, sânkathemhei tamazet, khana Hlarabua ale’nzet kha ahong katlung sō nger sik kae tia nangni leh nileiom saplai kaleihri pek chei kha hivahei hi kae.”

45Khava sō tōa Ṭong intheng kha anmanhretna sik anmalung amahlang pek jo hei, 46khana anhnenga, “A’nzet kha hi kae: Messiah kha inrim khōdeng athei sik, ni 3 ning thina inphut kathōi sik, 47khana Jerusalema inphut a jât rakip hneng malung thlengna leh set rangei mandamna sik ama rahminga ṭong inhri inthang sik kae. 48Nangni hiva sâkhi chei kae. 49Ke’n kapa ṭongtep kha nangni chunga kajōngtir pek sik chei. Tâk-kha nanchunga marvâna inphut ratha kha ajōng tlung mak hma seng khōpuia nangni om ruh.”#Ṭōn 1.4

Jesu Marvân Chunga Aketou

(Mk 16.19–20; Ṭōn 1.9–11)

50Khava sōa ama’n anmani kha Bethany katlunga aṭhōisōt heia, ama’n akut akalânga vâng aleipek hei.#Ṭōn 1.9-11 51Ama’n vâng apek lai hei, ama marvân chungting kaketoua, anmani adahlon jo hei. 52Anmani’n ama ankamuk a inpâktak a Jerusalemting inle jo hei. 53Khana anmani Bek-inn shunga Pathen anchoi ka-ân ṭhak a ka-om jo hei.

Currently Selected:

LUKE 24: KOMRBSI

Highlight

Copy