RAPHA HIQWA LAK 27
27
Isak Raq Jakob Ma Ram Tiibok Kuqto
1Isak ka tikii kiikaiq she. Kiimaq amak min amiikai wishe. Apaiq raq ase chhikhuwe Esau ka tiiheakito. Raüta apaiq ma akha nguto, “Ise lei!”
“Ngi arjaq lii,” nguta apaiq raq treto.
2Kiijiishe Isak raq nguto, “Liilaq, ngi ka tikiishe. Kiimaq jaqlo motsaikai min mirha sham. 3Üm liq nai liq sinchü ka wiho laüta, rum na kilaq laüta ngi ma phanshi ra ngam ritkikiq. 4Laüta ngi raq lungwii tiikang phan phaqsea asum akamwiq se shong lumlaq. Laüta ngi ma lam kuq wanlaq. Ngi raq kra phaqsiq latiitiq ümniima, ngi mitsai shaq na atiisup ram ka mitiibok kuq kang.”
5Riita Isak ka Esau rai riibom rai tlaq liipan na, Rebeka raq kra bom riichong ka taito. Kra ningkhan, Esau ka ngam rit kai kaiho jai she 6apaiq raq Jakob ma nguto, “Ngi raq ümchaütiq ümwe raq Esau ma akha chongto tai kang, 7‘Ngi ma rum ngam ashi hiip kikiq. Laüta ngi miitu aheawiq shong lumlaq. Ngi raq kra phaqlot latiitiq, Tatiwe man na, ngi mitsai ha shaq na ümniima ram ram kuq pha.’ 8Riita ise lei, ümchaü min,” nguta Rebeka raq nguto, “Ibom ara tailaq. Kiimaq ngi raq chongtiikang ara phan phan klolaq. 9Nyamse kong sitlaq kriiwa chhechhi arese nai anai phintsaq heati kra lam kikiq. Kriiwa ngi raq ümwe raq kai rotlaq phan ka asumwiq maq shong lum pha. 10Kra ümniiraq lam wan laüta apaiq ma kuq wakiq. Apaiq raq miphaq siqlaq. Raüta apaiq raq ümniima apaiq mitsai shaq na ram miram kuq.”
11Shatmaq Jakob raq anyung ma akha nguto, “Inyung ümniiraq asap haü, iphu Esau ka wiibin wrowe. Shatmaq ihan ka nyeajok jok abin ahü. 12Jursap iwe raq ajaq maq idü na mochhum miraq. Raüta ngi raq apaiq ka laotiikang nguta misap. Raüla ngi raq achu shiiman lap rii na manson khoti milapha riimak shea.”
13Kiijiishe anyung raq treto, “Ise lei, ümkhu thaq na saü chang manson ka idü niitiq misaülaq. Ngi raq jamkho chongtiikang kra phan phan klolaq. Laüta chhechhi senai anai ka ana ngi ma lam kuq kikiq.” 14Kiimaq apaiq ka kra lamkekai kihoto. Raüta anai ka anyung ma lamkuq wanto. Kiimaq anyung raq awe raq lungwiitlaq phan phaqsea ka asumwiq maq shong lumto. 15Raütiishe anyung raq Esau miirii ahea pinthumti, anyung apaiq raq jam na athü kriishe lam wato. Raüta Jakob ma tiisam kuqto. 16Anyung raq chhechhi khü ka Jakob jaq niishe tiisam kuqto. Kiimaq adang kong ba abin ahü ba kiijaq tiisam kuqto. 17Raüta anyung raq Jakob ma asumwiq ashong lum phaqsea kra, winsii rai nong maq apaiq jaq na kuqto.
18Raütiishe Jakob ka awe phaniishe wa wanto. Raüta nguto, “Iwe lei!”
“Ngi arjaq lii,” nguta awe raq treto. “Isenai wa ümniika ümriiti wa?”
19Jakob raq treto, “Ngi ka ümse chhikhuwe Esau ahata. Ümniiraq ngi ma chonglaü ira phan phan klo kang she. Mangchan laüta tiido liina. Laüta ngalaq. Kiimaq ngi raq ümniima ngam lam wan kang ara phanshi ra phaq laq. Laüta ümniiraq ngi ma ram ram kuqlaq.”
20Isak raq nguto, “Ise lei, riita jaq lose liipan niili ngam ka ümbawo lamki laü?”
Jakob raq treto, “Tatiwe, üm Shiikeawe raq ngi khrumke kha maq humkang.”
21Isak raq Jakob ma nguto, “Ise lei, ana itho na wara. Ngi raq ümdü na ijaq maq chhum pha. Ümniika ngohea shaq shaq Esau dea shea?” 22Kiimaq Jakob ka awe tho niishe tiisotto. Raüta awe raq apaiq dü na chhumto. Raüta nguto, “Ümkiq hang ka taikang la Jakob kiq hang ngochang chang. Shatmaq ümjaq phum thun ka Esau jaq phum ikha.” 23Apaiq raq Jakob ka tiitsang mak dea riito. Jamkhano ngukla apaiq jaq phum thun ka Esau jaq phum ikha riito. Raüta apaiq ka ase ma ram ram keho she riito. 24Shatmaq jangshi ri hali bom ka wainongto, “Riita ümniika ngohea shaq shaq Esau dea shea?”
“Ngi dea,” nguta Jakob raq treto.
25Kiijiishe Isak raq nguto, “Ngi ma ngam ka wiijam lam wanlaq. Ngi raq kra phaq latiitiq, ümniima ram ka miram kuqkang.” Kiimaq Jakob raq ngam ka apaiq ma kuqto. Kiimaq apaiq raq spiqtai min wiijam kuqto. 26Raütiishe awe raq apaiq ma nguto, “Ise lei, ana ngi tho na tiisot laq. Laüta itheaphi na shup laq.” 27Apaiq raq awe theaphi na ashup wa tiisotto. Kiijaq Isak raq ase khea tsang kra akhü maq shüto. Raütiishe apaiq ma achu ka akha shiiman kuqto,
“Ise tsang ngii ka ahomwiq,
Tatiwe raq ashiiman kuq
wak ram tsangtlaq ikha.
28Shiikeawe raq ümniima ramungtan wa bang ka mitrok kuqlaq.
Raüta ümwak ram thun ka hiqpo hiq win mitiija laq!
Raüta bunwong nai spiqtai ka chamtraq mirlaq!
29Raüta maiq mung thun ka ümsengi ma mijalaq.
Kiimaq maiq phan thun ka ümwokhong na minyap laq.
Ümphu ümnotiim thaq na tuwejong jalaq,
Kiimaq ümnyung ma asetiim lai ala phan ka
ümwokhong na misilaq.
Ümnaq sontamti ka manson raq mitsai laq.
Kiimaq ümnaq shiimanti ka shiiman milap laq!”
Esau Raq Isak Ma Shiiman Kuqlaq Nguta Tiipaiqneato
30Isak raq achu shiiman kelot jai she, Jakob tiidoho ri li, aphu Esau ka ngamhiip rü maq saü wato. 31Apaiq riimin phaqsea ka asumwiq kloto. Raüta kra awe ma lam kuq wanto. Kiimaq akha nguto, “Mangchan laüta, iwe lei tiidolaq. Laüta ara ngi raq ümniima ngam lam wan kang ara phaq laq. Laüta ümniiraq ngi ma achu shiiman kuqlaq.”
32“Ümniika juwa?” nguta Isak raq waito.
“Ümse chhikhuwe Esau,” nguta apaiq raq treto.
33Kiijiishe Isak ka atiikhai she riihoto. Raüta ahü ahan ka wiitashe tiikhai wanto. Kiimaq apaiq raq waito, “Riita ngam lamki raüta ngi ma ngamja lamke wanti irka juwa? Ümnaq misaü wa shaq na ngi raq aphaq kun she. Lata ngi raq apaiq ma atiithum achu shiiman ka kuq kang she. Krai mren kra achu shiiman ka pattup pat-sa apaiq miilishe miraq.”
34Esau raq ara tai raüta, apaiq ka tiihong raüta ahoshe riito. Kiimaq atsan tsi hea maq hoqto. Raüta nguto, “Iwe lei, ümnaq achu shiiman ka ngi miiri dea kuqlaq!”
35Isak raq treto, “Ümno wa raüta ngi ka laoto. Ümniirii achu shiiman ka apaiq raq lamhoto she.”
36Esau raq nguto, “Apaiq raq ngi ka ümchaü lak ariiraq jangnai she laotlo. Apaiq mang ka Jakob ngutlaq kra tiidada ahata. Apaiq raq ngi rii chhikhuwe arang ka lamhoto. Kiimaq ümchaü hali apaiq raq ngi rii achu shiiman kra lamhoto. Riita ümniiraq ngi rii achu shiiman ka tiichong maü dongdii she shea?”
37Isak raq treto, “Ngi raq apaiq ka ümkhu thaq na tijongwe ma ashong kun she. Kiimaq ngi raq apaiq ma tanyang senobi thun ka adikong ma tiija baiq kang she. Ngi raq apaiq ma bunwong nai spiqtai min kuqbaiq kang she. Ise lei! ümchaü ngi raq ümniima kechang ka jam min ahü she!”
38Esau ka awe jaq wa kai tiipaiq tiinea raüta akha jaü ruq li jaüto: “Iwe lei, ümjaq na ashi ra dongdii min achu shiiman ahü shea? Iwe lei, ngi miimin achu shiiman kuqlaq!” Kra ngu raüta apaiq ka aho she riihoto.
39Kiijiishe Isak raq apaiq ma nguto,
“Ramungtan wa bangkham min ümniima ahü,
Hiqpo hiqwin wak ram min ümniima ahü.
40Ümnep ja kra sham laütli ümniika misi haü,
Shatmaq ümno dise ma mija haü.
Li jiimin ümtiikiiwa ümniika pong wela mijaho haü,
Apaiq wokhong wa ümniika midongho haü.”
41Esau raq Jakob ka ngengto. Jamkhano ngukla awe raq Jakob ma achu shiiman kuqto. Apaiq raq akha tiimato, “Iwe maajo miitu akhing ka ajeli she saü wantlo; kiitiikiitiq ngi raq Jakob ka mitsat baiqha.”
42Shatmaq Rebeka raq Esau raq mat sütaq tho ka heto. Raüta apaiq raq Jakob ka tiiheakito. Raüta akha nguto, “Tailaq, ümphu raq phuk milam. Raüta ümniika atsea mirbaiq. 43Ümchaü min, ise lei, ibom chongpha tailaq. Jaqlo Haran hiq na iphu Laban phana walaq. 44Laüta apaiq rai heashi siwa damkiq. Ümphu tsankhiq kra misang kilaq. 45Kiimaq ümniiraq apaiq ma jamlai wa riilaü kra alaq she mirbaiq. Kiitiikiitiq ngi raq maiq weshi ra ümnaq tiijang shea wa mitiiwa kang. Ngi raq ise wenai ka ranaiqshi niili jamkho misumha?”
Isak Raq Jakob Ka Laban Phana Tiiwato
46Rebeka raq Isak ma nguto, “Ngi ka Esau tanyungtiim pong mung sheare kriirai silata anii makaiq she. Arthaq na Jakob riimin ara Hitaiqnok sheare phong wa nyungshi ra lam wan haü jiika, ngi miika atsai kai riiwe khoti ahea lin miraq.”
Currently Selected:
RAPHA HIQWA LAK 27: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
