RAPHA HIQWA LAK 28
28
1Kiijiishe Isak raq Jakob ka heato. Raüta ramram kuqto. Raütiishe akha tsii chongto, “Kanannok shea wa naq lamkiq. 2Mesapotamia hiq na, ümti Bethuel jam na walaq. Laüta ümhu Laban setiim jechaksere phong kiiwa nyungshi lamlaq. 3Ningkun Ajong Shiikeawe raq ümjam kun shongnga wan tlaü ka mishmanlaq. Raüta ümsetiim ka pahea mitiipuchi kuq wanlaq. Raüta ümniika maiq mung pahea ma awejong mitiijalaq! 4Riita apaiq raq Abraham ma shiiman kuqtaq kiikha ümniikiimin mishman kuqlaq. Kiimaq ümsaü ümsetiim thun kiimin mishman kuqlaq. Kiimaq ara ümnaq siwan laü mung ara, kiimaq Shiikeawe raq Abraham ma kuqtaq mung ara, ümniimiishe mitlap wanlaq!” 5Kiimaq Isak raq Jakob ka Mesapotamia hiq na Laban phana tiiwato. Laban ka Aram mungti Bethuel se. Kiimaq apaiq ka Jakob nai Esau nyung Rebeka ma aphu.
Esau Raq Tsang-nyung Nyungshihali Lamnongto
6Kiimaq Isak raq Jakob ma ramram kuq raüta achak trit wa Mesapotamia hiq na tiiwato nguta Esau raq tsütsa ka taito. Kiimaq apaiq raq, tsütsa ka, Isak raq Jakob ma ramtiibok kuqtaq akhing na, apaiq ma Kanan sheare lam ka mai mak nguta aming kuqto nguta bom kriimin apaiq raq taito. 7Kiimaq apaiq raq, Jakob riika awe nai anyung bom ka tai raüta apaiq ka Mesapotamia hiq na wawanto nguta tsütsa ka taito. 8Kra tairaütiishe Esau raq awe raq Kanannok sheare lam ka lungwii mak nguta sapto. 9Kra ningkhan she apaiq ka Abraham se Ishmael pha niishe wato. Raüta ase jechakse Mahala, Nebaioth sheanyung kriishe lamto.
Bethel Hiq Maq Jakob Rawa Ma Mato
10Jakob ka Beersheba hiq wa tiido wanto. Raüta Haran hiq nü niishe wawanto. 11Raji rashe nyap akhing na apaiq ka asii hiq bashi na saü wato. Kiimaq apaiq ka kiijaq japkito. Apaiq ka rawa na akon she bumkito. Akhupo ka longkaü ashi thaq na tiidea raüta kon wanto. 12Apaiq raq ama maq hiqkhuphi diim ka hiq maq riita ramungtan na saüli chhito. Kiimaq kra hiqkhu phi niika rasetiim kong ka asat kaiti kiitin khan. Ranü na düwanti kiitinkhan akiti aki awati awa chhito. 13Kiimaq Tatiwe ka apaiq tho na achap raü chhito. Kiimaq apaiq raq nguto, “Ngi ka Tatiwe, Abraham Shiikeawe kiimaq Isak Shiikeawe. Ngi raq ara ümnaq kon rai tlaü mung arka ümniima kiimaq ümsaü ümsetiim ma mikuqha. 14Tsangshiq ka hiq raikhü na botkhulai riiphongtlaq kiikha awea lot mai miraq. Tsangshiq raq tsangshiq hiq rai ka trotam na mitiijong wan. Kiimaq ümnaq lümaq nai ümsaü ümsetiim lümaq, Ngi raq maiq phan thun ka mishman kuqha. 15Tsan na tiitsang laq. Ngi ka ümniirai nong shiinong mirha. Kiimaq ümniika ümriiba niili khum haü jiimin tiikhup wong kuq shat mirha. Kiimaq Ngi raq ümniika armung na hali mitiijang sheaho nongha. Ngi raq ümniima kiqkham raüpot khakuq kang thun kra kunli miku piwan shaq wiiwii, Ngi raq ümniika thaq mang.”
16Jakob ka akon wa samkito. Raüta akha nguto, “Tatiwe ka arjaq asi! Apaiq ka arba arjaq asi, kiimaq ngi riika sap mang dea riikang!” 17Kiimaq apaiq ka ahaisi riito. Kiimaq akha nguto, “Arka phiiptsi chang hiq ba! Arka Shiikeawe jam ba sham. Arka ramungtan na wawan chang kilamchong sham.”
18Jakob ka anap ranap na ranap chu maq tiidoto. Raüta rawa na akhu dea chang longkaü kra do raüta tsan na tiitsang miithii longkaü ma kiijaq shongto. Raüta apaiq raq kriithaq na oliptai maq tiibok raüta Shiikeawe ma kiinong kuqto. 19Raüta apaiq raq kra hiq ba ka Bethel nguta mangto. (Kiijaq sitlaq chela ka man na Luj nguta ngutlo.) 20Raütiishe Jakob raq Tatiwe ma sinkham raüpot akha khato: “Riita ümniika ngi rai nong nong sihaüla, kiimaq ngi raq wanhiq khum tiikang arwa tiikhup wongkuq haüla, laüta ngi ma phaq nai sea kra kuq haüla, 21kiimaq ngi ka iwe jam na khu asang maq jangho nonghala, ümniika i Shiikeawe miishe mija haü. 22Krai mren ara tsan na tiitsang chang miithii longkaü shong tiikang arba arka ümnaq shomnoq chang hiq ba miraq. Kiimaq ümniiraq ngi ma phanrap kuqtlaü kriiwa wiita, roqshi khu wa manshi ka ümniima mikuqha.”
Currently Selected:
RAPHA HIQWA LAK 28: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
