RAPHA HIQWA LAK 31
31
Jakob Laban Phawa Juto
1Jakob raq Laban setiim raq akha ngutlo nguta bom ka taito, “Jakob raq nawe rii hupsam wiita she lamhoto. Nawe tachong tsiiq maq piikii raüta apaiq ka chiithe jong she jakito.” 2Kiimaq apaiq riimin chhito Laban ka man na jamkho apaiq rai kongshi kiimshi sitlaq ikhiika simak she. 3Kiijiishe Tatiwe raq apaiq ma nguto, “Ümwe hiqshong nai ümphu ümnotiim shong chang hiq kiiniishe jangho nonglaq. Ngi ka ümniirai misi kang.”
4Kra ningkhan Jakob raq Rechel nai Lea ma apaiq rai nyamse rümchang wak ram kiijaq mirhumlaq nguta bom ka tiichong wanto. 5Apaiq raq tsangnai ma akha nguto, “Ngi raq shri ra liitiikang. Ümwe ka man na ngi rai jamkhiiwa ari aram maq siwan kai, kiikhiika simak she. Shatmaq iwe Shiikeawe ka ngi rai nong nong siwanto. 6Namnai wiita raq asap han, ngi ka namwe miitu iningkun wiita kuq lata jaq shamkuq kang. 7Kra taü miimin, apaiq raq ngi ka laolii wanto. Raüta ijaq maq kiimin jangroq shitin klaito. Shatmaq Shiikeawe raq apaiq ma idü na ajaq miika tiimiiq mak. 8Ümtiikiiwa Laban raq, ‘Awaiq setiim asi si chhehhi thun ka ümjaq maq miraq’ nguta ngutlaq, nyamse kong wiita raq asetiim ka awaiq setiim asi siisaq nyung kuqtlo. Kiimaq ümtiikiiwa apaiq raq, ‘Awaiq tlam raq raq thun chhechhi setiim ka ümjaq maq rii miraq,’ nguta ngutlaq, nyamse kong tlotli raq asetiim ka awaiq tlam raq raq siisaq nyungtlo. Nyamse kong tlotli raq asekong ka awaiq tlam raq raq siisaq nyungtlo. 9Shiikeawe raq nyamse kong ka ümwe jaq wa nyeahoto, raüta kriithun ka ngi miishe kuqto.
10“Alahai akhing na, ngi raq rawa ma ashi makang, kiimaq akha chhikang, chhechhi pong wetiim thun akaütiim rai ala haitlaq kriika awaiq tlam raq raq, waiqtam setiim maq twaiq raq raq, kiimaq awaiq lamsetiim ka asi siisaq chhikang. 11Shiikeawe rase raq ngi ma rawa ma maq akha chong kuqto, ‘Jakob!’ nguta nguto. Kiijaq ngi raq ‘Ngi arjaq lii,’ nguta trekang. 12‘Liilaq’ nguta apaiq raq nguto. ‘Chhepong wetiim tlotli akaütiim rai ala haitlaq thun ka, awaiqtlam raq raq, waiqtam setiim maq twaiq raq raq, kiimaq alan setiim maq twaiq raq raq siisaq. Ngi raq arthun ara akha klo kuq tiikang, jamkhano ngukla Laban raq ümniima jamlai wa haihii rat tlaq kriika Ngi raq chhikang she. 13Ngi ka Shiikeawe ümniirai Bethel maq riihumkang ira. Kiijaq ümniiraq longkaü ashi tsan na tiitsang chang miithii shong thü laüta olip tai maq tiibok thülaü ihata. Kiimaq ümniiraq kiijaq Ngi rai sinkham raüpot shatthü laü ihata. Riita ümchaü min ümniika tiido laq. Laüta ümwü chhi chang hiqshong kiina jangho nonglaq.’”
14Kiijiishe Rechel nai Lea raq Jakob bom ka akha treto, “Iwe jaq wa tachong hupsam nainai raq lap chang ka jam min ahü she. 15Apaiq raq nainai ka pong mungti ikhli she liitlo. Apaiq raq naishiq ka asha riiphaqto. Ümchaü sanha apaiq raq nai nai tri apaiq ma akuq kampho ka wiita thum thum she sha phaqto. 16Riita ara tsiiq nai nyam thun Shiikeawe raq naiwe jaq wa nyeahotaq arka nashiq rii she. Kiimaq nasetiim rii she. Shiikeawe raq ümniima jamkho chongkuqtaq kra phan phan klolaq.”
17-18Krai mren, Jakob ka awe phana Kanan mung na jangho nong miitu she tiijeto. Apaiq raq asetiim nai tsang nyung nai ka kumtsong kong raikhü na tiingato. Raüta apaiq nyamse kong kunli ka apaiq khaki na, sinkhu na apaiq raq Mesapotamia maq atsiiq anyam ümchuwa laptaq thun ka wiita tsuqho raüta kihoto. 19Laban ka apaiq skukong bin sikai kihoto. Kiimaq apaiq tatimii shon Rechel raq awe jam wak kaü sumla thun kra huk hoto. 20Jakob raq Laban ma apaiq ka alaüho she nguta chong mak laothü raüta kihoto. 21Apaiq jaq na tachong hupsam ümchuwa sitlaq kra kunli hoho raüta taü laükhiq kihoto. Raüta apaiq raq Euphretis rai kra jinto. Raüta ku-akin tonglong hiq Gilead wang nü kiina kihoto.
Laban Raq Jakob Jai Johoto
22Kriimaq ranaiqtsam sijai na Jakob ha juhoto she lii nguta Laban ma tsütsa ka tiitaito. 23Kra tai raüta apaiq raq asenginok kra sheaho raüta Jakob jai ka johoto. Apaiq raq ramiishi jojai she ku-akin tong long hiq Gilead wang wiishe apaiq ka lohoto. 24Kra rawa na rawa ma maq Shiikeawe ka Laban phana kito. Raüta akha nguto, “Tsii lam shat riiliijo. Jakob ka moshkeng leng naq shiikeng kiqjo.” 25Jakob raq apaiq piitiip ka pum na teito. Kiimaq Laban raq apaiq piitiip ka apaiq ma tanyang senobi rai adam maq ku-akin tonglong Gilead wang na teito.
26Kiimaq Laban raq Jakob ma nguto, “Ümniiraq ngi ka jaram wa laothü laü? Laüta isetiim jechak sere ka redong na alap shumwi nyungre ikha jam nguto tsuqho laü? 27Ümniiraq ngi ka jamto lao laü? Kiimaq ngi ma chonghü maq ahuk se maq jam nguto juho laü? Ümniiraq ngi ma chong haü jiika, ngi raq ümniika chojong chise kiimaq ashi ange jaqsinpin thun nai phaqlam toro thun tsü lata atiikiha chang wa. 28Ümniiraq ngi ma kiim riiphea isaütiim thea phi niimin tiishup maü maq kiho laü. Kiimaq isetiim jechakre miimin han sang maq siki rong kiq jo ngutiimin triibom maü riilaü. Kriika angi maiqjiq kiimung laü! 29Ngi raq ümdü na ijaq maq mimiiq lot ha. Shatmaq ümwa rawa ümwe Shiikeawe raq ngi ma ümniika shiikeng raa mak nguta atiiwin riito. 30Ngi raq asapha, ümniika namhiq rotsi raq ahaü she, kra ningkhan kiholaü. Shatmaq ümniiraq ijam wak kaü sumla thun ka jam nguto hukho laü?”
31Kiijiishe Jakob raq treto, “Ngi ka ahai. Jamkhano ngukla ümniiraq ijamkun wa ümse nai jechak nyung nai kra achea mirwan haü sham nguta tiima kang. 32Shatmaq ümniiraq arjaq naishiq phong arwa ashi ra raq ümjam wak kaütiim sumla thun hukhotaq jiika, kriiti ka atsai chang miraq. Riita arjaq, nai senginok tarü raq chhishat na ümhupsam phanshi ra asi jiika lii liina. Laüta jang wanlaq.” Jakob raq Rechel raq Laban jamwak kaü sumla thun hukhoto ngutiika sap mak dea riito.
33Kiimaq Laban ka Jakob tombutiip mong na nyap wato. Raüta ritto. Raütiishe apaiq ka Lea tombutiip niishe wato. Kiimaq adi nyung wiinai tombutiip niishe wato. Shatmaq apaiq jamwak phra kaütiim ka hummak dea riito. Raütiishe Rechel tombutiip niishe wato. 34Rechel raq jamwak phra kaü thun ka lamhoto. Raüta kumtsong raikhü na damchang kheadiim thong khiiq thun mong na thüto. Raüta apaiq ka kriithun thaq na ngato. Laban raq tombutiip ka kunli ritto. Shatmaq kriithun ka hummak dea. 35Rechel raq awe ma nguto, “Shiilangwe lei, ngi ma ümtsan naq tiikhiqkiq. Ngi ka ümkhaki na chaplot mang. Ngi ka ikheasam akhing.” Laban raq ritto. Shatmaq apaiq jam wak kaü thun ka hummak dea riito.
36Kiijiishe Jakob ka atsan khiq ninlot mak she riito. Kriikha maq apaiq raq akhiq lam maq, “Riita ngi raq jamlai mra wa tiidong kang?” nguta waito. “Ngi raq jamlai tri wa jinkang, ümniiraq ngi atinkhan tiikot rot li chang ka? 37Ümchaü ümniiraq ita iwii thun kun kun she ritlaü. Riita ümta ümwii ka arjaq asi hum laü shea? Ümchaü arjaq ümsenginok nai isenginok makki na phong laq. Krai mren tsangshiq riitiq nanai liipan wa juwe wa alam kra michong laq. 38Ngi ka ümniirai ümchaü wiiroqnai she sikang. Üm skukong nai ümchhechhi kong thun raq ase nyung kuq mak riito nguta ahü. Kiimaq ngi raq üm nyamse phong kiiwa ngi raq sku pongse ashi ra dongdii min taphaq mang riikang. 39Ümtiikiiwa asea raq sku kaüshi ra kaq raüla, kra mokitlaq rii ka ngi rii wiishe sum tiikang. Ngi raq kra asea raq akaq kra ümphana lam wan lata kriika ngi jiq riimak jo nguta tiitai wa mang. Ümniiraq ijaqwa ranaiq niilo kiimaq rawa niilo, ahuk raq hukho raüla, kra tham ka ijaq wa jaütlaü. 40Ngi ka ümtinkhan wa ranaiq na rashe kii raq chhaq kiimaq rawa na rasong raq kaq raüta chamchao wan kang. Ngi ka rawa konhü lea wan kang. 41Atinkhan ngi chamchao wan kang ümniirai wiiroqnai siwan kang liipan na. Wiiroq shi ri wiiblai ka ngi raq ümniima minshiiq kuq kang, ümse nai jechakse nai kra lap miitu. Kiimaq wiitrok ka ümnyamse kong rümkuq kang. Kiitinkhan niiko wan kang kra taü miimin, ümniiraq ijaq maq ningchang ka jangroq shitin klai wan laü. 42Riita iwetiim Shiikeawe, Abraham Shiikeawe kiimaq Isak Shiikeawe ka ngi rai ahü nguraü ka, ümniiraq ngi ka jaqmii maq man niiphü mitiiwa baiq haü wa. Shatmaq Shiikeawe raq ngi chamchao ka chhito. Kiimaq ngi raq minshiiq kang kra chhito. Kiimaq ümwa rawa apaiq raq nanai liipan na kha ka phokuqto she.”
Jakob Nai Laban Liipan Na Wehea Riijato
43Kiijiishe Laban raq Jakob bom ka treto, “Ara jechaksere arka isetiim. Tsangsetiim thun ka ngi rii. Kiimaq ara nyamse kong thun armin ngi rii. Riikhaqli miika, arjaq phan raq ümchuwa ümmak maq chhitlaü kriika ngi rii siisaq. Shatmaq ngi raq ise jechak setiim kra nai tsangsetiim thun kra tiikhing lot mang she, 44kra ningkhan ümchaü ka ngi ümniirai wehea riija kli she rotiikang. Nanai wehea riijatiikai kra saqse miitu longkaü thun ka arjaq phong i.”
45Krai mren Jakob raq longkaü ashi do raüta shongto. Kriika pattup miitu tsan na tiitsang chang manphan longshong ma tiija miitu. 46Apaiq raq asenginok ma longkaü thun riichom ronglaq nguta thaüto. Raüta kiijaq longkaü thun ka tiiphongto. Kra raütiishe kra longphong tho na nga raüta tsangshiq raq phaqsea kloto. 47Laban raq kra longshong ka Jegar Sahadutha nguta mangto. Kiimaq Jakob riika Galeed nguta mangto. 48Laban raq Jakob ma nguto, “Ara longkaü thun phongtiikai ara nanai wiita miitu tsan na tiitsang chang miraq.” Kra ningkhan kra hiq ba ka Galeed nguta mangto. 49Kiimaq Laban rahali nguto, “Nanai kiimriiphea laita sitiikai arka Tatiwe raq liishattiq mirlaq.” Kra ningkhan kra hiq ba ka Mijpa nguta mangto. 50Laban riika akha hali nguto, “Ümniiraq ise jechaksetiim kra haihii haüla, riimakla ümniiraq maiq nyung nyetiim lam haüla, kra ngi raq sap mang li jiimin, tsan na tiitsang shat riilaq, Shiikeawe raq nashiq ka liishat. 51Riita arjaq nanai liipan na longkaü thun phong kang arka tsan na tiitsang chang longshong kaü she. 52Riita ara longphong wiinai ara kiimaq tsan na tiitsang chang longkaü shongtiikai arka bom tiitsang chang manphan she. Ngi ka ara longphong ara tlea lata ümniika khat ki mang she. Kiimaq ümniiriimin ara longphong ara jin raa mak, kiimaq ara tsan na tiitsang chang longkaü ara jin laüta ngi ka khat wa raa mak. 53Abraham Shiikeawe kiimaq Nahor Shiikeawe raq nanai liipan wa kha ka mipho.” Kiijiishe, awe Isak raq shomnoqtlaq Shiikeawe mang na, Jakob raq kra sinkham bomtsi raükha kra mithüha nguta kiqkham kuqto. 54Apaiq raq nyamse kaüshi tato. Kriika apaiq raq pum na honglu na takuqto. Kiimaq apaiq raq asengibi ka dung sea miitu heato. Tsangshiq raq phaq sea lot raütiishe tsangshiq ka kra pum niili kra rawa ka japto. 55Kriimaq napjai ranap chu miishe Laban raq asaütiim nai ase jechaksetiim kra kiimriiphea theaphi na shupto. Raütiishe waphaijo nguta bomto. Raütiishe tsanghiq niishe jang wanto.
Currently Selected:
RAPHA HIQWA LAK 31: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
