RAPHA HIQWA LAK 32
32
Jakob Raq Esau Rai Riihum Miitu Tiijeto
1Jakob ka apaiq wanhiq khum lam kra phan phan wawanto. Kiimaq rasetiim wiijam ka apaiq rai riihumkito. 2Apaiq raq tsangshiq ka chhi raüta akha nguto, “Arka Shiikeawe piitiip.” Kra ningkhan kra hiq ba ka Mahanaim nguta mangto.
3Jakob raq apaiq ma sinkhu na tsasoqtibi Edom mung na tiiki raüta aphu Esau ma bom tiichong hoto. 4Apaiq raq tsangshiq ma bom ka akha tiichonghoto: “Ngi ka Jakob, ümwokhong na siti jaqshi se raq itijongwe Esau ma bom ka tiitai tiikang, ngi ka Laban rai shongrai wakang. Kra ningkhan ngi ka ümchaütiq luhea sirai wa jaitiq ana jangho tiikang. 5Ijaq na nyamse kong, kumtoq kong, sku kong, chhechhi kong, kiimaq disetiim asi. Shiilangwe lei, ngi raq ümniirai tsan riihea wan miitu ara bom ara tiichongho tiikang.”
6Riita ümtiikiiwa tsasoqtibi ka Jakob phanii she jang wantaq, tsangshiq raq akha chongto, “Naishiq ka ümphu Esau phana kikai. Kiimaq apaiq ka ümniirai riihumwa lam niishe watlo. Apaiq rai maiq ka shiblai shea wan raüta watlo.” 7Kra tai raüta Jakob ka kai haito. Kiimaq kai chapato. Kiimaq apaiq raq asengibi maiq thun ka kongnai na triipheato. Kiimaq apaiq sku kong, chhechhi kong, minsaü kong, kiimaq kumtsong kong thun kiimin kongnai ma riipheato. 8Apaiq raq tiimato, “Esau ka wa raüta apha wa kong kra long raüla, jai wa kongti ka chiim mijinlot.”
9Kra raütiishe Jakob raq akha achu jaüto, “Iti Abraham Shiikeawe kiimaq iwe Isak Shiikeawe lei, ngi achu jaü ara tre laq! Tatiwe lei, ümniiraq ngi ka imung na kiimaq inok ita phana jangho laq nguta chonglaü ihata. Kiimaq ümniiraq ngi miitu phanrap lamlu ka ahea midi kuqha nguta ngulaü ihata. 10Ngi ümjaqshise ka ümniiraq ngi ma ümtinkhan wa mangchan tiichhi kuq laü kiimaq tsapkap wan laü kriithun kra lapwan ka thek mang. Ngi raq Jordan rai ka ijaq na jamlai min ahü, miinan nyeakii thitiikang kra lam lam miili jinwan kang. Shatmaq ümchaü ngi ka ara kong nai jong maiq nai nyamse kong kra sheaho latiishe saüki tiikang. 11Ngi ka tiichhiilaq, iphu Esau jaq wa. Ngi ka haitiikang. Haitiikang apaiq watlaq ka naishiq khat wa watlo. Raüta naishiq ka wiita jiipbaiq wa watlo sham. Jechakre nai nosere thun kriimin nong nong maq jiipbaiq wa watlo sham. 12Tsan na tiitsang laq, ümniiraq ngi ma phanrap lamlu ka ahea miraq kiimaq ngi ma isaü isetiim ka maiq jurmin wealot mak, kham jong chum kii na kumtsai riiphongtlaq ikha mitiipuha nguta kiqkham kuq laü ira.”
13-15Kra rawa ka kiijaq japto. Raütiishe Jakob raq anyamse kong phong kiiwa aphu Esau ma kongphiq keho miitu pong na tseato: Chhechhi chhekaü kong ka shinai kiimaq chhepong ka roq nai; kiimaq sku akaü ka shinai kiimaq sku ali ka roq nai, kumtsong kong nyakpü sochang kaü roqtsam, asetiim rai nong nong, minsaü ka kaüroqblai kiimaq minsaü saü pong roqshi, kumtoq kaütiim akaü roqnai kiimaq kumtoq kaü aliwe kaütiim ka roqshi tseato. 16Raüta apaiq raq kriithun ka akong akong na triipheato. Raüta kongshi kra liiti ka ajaqshisetiim wa weshishi ma tiishea hoto. Raüta apaiq raq tsangshiq ma akha chongto, “Kili ronglaq ngi ma sinkhu na. Kiimaq akong kongkhu na kaiti kong kra nai jai na kaiti kong heawea niika ashaqpuq puq tiihea tiihea lanta kironglaq.” 17Raüta apaiq raq ajaqshi se sinkhu na kaitiwe kiima akha aming kuqto, “Ümtiikiiwa iphu Esau rai riihumtlan, kiimaq apaiq raq ümniima, ‘Ümtijongwe ka juwa? Ümnüna kai wa? Ara ümkhaki na tsuqho tlaü nyamse kong arka ju nyamse kong wa?’ nguta wai raüla, 18Ümniiriika akha tre ratlo, ‘Arthun arka ümjaqshise Jakob nyamse kong. Apaiq raq arka atijongwe Esau ma kongphiq keho miitu tlam hoto. Jakob apaiq ka naishiq jai na kitlo.’” 19Kiimaq apaiq raq jai na kaitiwe kongnai ngojawe kra miimin, kongtsam ngojati kiimiimin. Kiimaq ahinti ümchuwa asenginok nyamse kong tsuqho tlaqti thun wiita ma kiikhii siisaq aming ka kuqto: “Ümtiikiiwa namshiq tarü raq Esau rai riihumtlan na, akha siisaq ngo ratlo. 20Namshiq raq akha chong ratlo, ‘O lii, ümjaqshise Jakob ka naishiq jai na kitlo.’” Jakob riika akha tiimato, “Ngi raq apaiq tsan ka ara kongphiq thun armaq mitlinha. Kiimaq ümtiikiiwa ngi raq apaiq rai riihumtiikang, jursap apaiq raq ngi mra ka adii mirkuq sham.” 21Kiimaq apaiq raq kongphiq thun ka apaiq ma sinkhu na tlam hoto. Raüta apaiq ka kra rawa ka kra piitiip niili japkito.
Jakob Ka Penuel Hiq Maq Riikito
22Kra rawa niili Jakob ka akon maq tiidokito. Raüta tsang-nyung wiinai, kiimaq chakliip nyung wiinai kriiri, kiimaq asetiim roqshi ri ashi kra shea raüta Jabbok Rai kra jinto. 23Apaiq raq tsangshiq ka kra jurai reko niishe tiikai baiqjai she, apaiq tachong hupsam ümchuwa sitlaq kriishe kunli tiiki baiqto. 24Shatmaq apaiq ka apaiq hon hon seli she jai na tiichong kito.
Kiijiishe maiq weshi apaiq phana wato. Raüta apaiq rai ranap rawüho na saüli riikisiqto. 25Riita kra maiqwe raq tsangnai riiki raitlaq ka apaiq ra tangmak she chhi raüta, apaiq raq Jakob hiiko niishe bukto. Krai mren apaiq hüko triiche chang ba ka asi she riikito. 26Kra maiqwe raq nguto, “Ngi ka awashe riipha; rawii wanto she.”
“Ümniika tiiwa mang, ngi ma shiiman kuq maü wiiwii,” nguta Jakob raq treto.
27“Riita ümmang ka juwa?” nguta kriiwe raq waito.
“Imang ka Jakob” nguta apaiq raq treto.
28Kriiwe raq nguto, “Ümmang ka Jakob riimak she. Ümniika Shiikeawe rai riikilaü kiimaq maiqrai min riikilaü. Laüta ümniiriisii tanglaü. Kra ningkhan ümmang ka Israil she miraq.”
29Kiijiishe Jakob raq nguto, “Riita ümchaü min ümmang ka juwa chonglaq.”
Shatmaq apaiq raq treto, “Ümniiraq imang ka jaram sap wa rotlaü?” Kra ngu raüta apaiq raq Jakob ka shiimanto.
30Kiijiishe Jakob raq nguto, “Ngi raq Shiikeawe ka mantut na tiqtaq sham riichhi kang. Kra taü miimin ngi ka atrali sitiikang.” Kra ningkhan apaiq raq kra hiq ba ka Peniel nguta mangto. 31Jakob ka Peniel maq tiidowan na rashe ka adong she riito. Kiimaq ahok ka doqshdoq she riito. Jamkhano ngukla ahüko ka asi she riikito. 32Kra ningkhan ümchaü niitaq Israil saüse phan riika ahüko triiche chang ba wa achhum ka phaq mak pentlo. Jamkhano ngukla ara hüko triiche chang ba arjaq Jakob ka bukto.
Currently Selected:
RAPHA HIQWA LAK 32: TANGSBSI
Highlight
Share
Copy
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
