JOHAN 11

Lajaras Tsaito

1Riita, maiq weshi, amang min Lajaras nguta, kriiwe ka atsi riito. Apaiq ka anyinai Meriq nai Martha rai siti Bethani hiqti. 2Ara Meriq raq tiina kongkhuji maq Tatiwe hokphi na homseng tsai maq jut raüta, akhudap maq tiiwe tatketi nyung ira. Ara chongtiikai atsiti we arka apaiq ma ano Lajaras. 3Tsangnai sinyi raq, Jesuq ma tsütsa ka akha tiichong kito, “Tatiwe, ümniiraq lungwii tlaü ümphuno we ira atsi.”

4Jesuq raq kra tsütsa ka tairaüta, “Ara tsisi tlaq arka, apaiq miisaq tiithum miitu ka riimak. Shatmaq, ara lümaq Shiikeawe khushü kra tiidong miitu tsitlo. Krai mren, Shiikeawe Se khushü kiimin mijong wan” nguta chongto.

5Jesuq raq Martha nai ano nyung Meriq, kiimaq tsangno Lajaras ka kai mangchan hea riito. 6Apaiq ka Lajaras atsi nguta tsütsa taishat taü miimin, apaiq lamjap hiq shong kiijaq ranaiq nai hali haithü nongto. 7Kra haithü jai shetiq, apaiq raq ajaqshisetiim ma, “Ümchaü ka Judia wang niishe jangho nong rong i,” nguta chongto.

8“Shrinketi we, ümnap ümji ajetiq li kiiwa nanok raq ümniika long maq thong raüta, tsea baiq chang nguta dantaq ihata. Riita, ümchaü ka kiijaq jaram jangkai nong wa tiima tlaü?” nguta ajaqshisetiim raq apaiq ma waito.

9Kiijiishe, Jesuq raq treto, “Ranaiq shi niika, nari roqshi ri anai riimak sha? Krai mren, juwa ranaiq na khum tlaq, kriiti ka tiithap tha mak maq khum tlo. Ara jamkhano ngukla, apaiq raq mangjong hiq wa rawii li ka chhi shat. 10Shatmaq, apaiq ka ranyaq na khum raüla, ranyaq chhi mak kha maq, akhum lam maq atiithap tha akü rai miraq. Ara jamkhano ngukla, ranyaq kha maq apaiq ka tung alam min chhimak miraq.” 11Jesuq raq ara chonglot raüta, tiijosaq hali, “Nakongti we Lajaras ka akon. Shatmaq, ngi kilata, apaiq ka atiisam mirkiha,” nguta tsangshiq ma chongto.

12Kra tairaüta, “Tatiwe, apaiq ka akon riikitaq jiika, asam tiina mirwan nong,” nguta ajaqshisetiim raq apaiq bom ka treto.

13Jesuq riika, Lajaras ka tsaikito she nguta ngo angu riito. Shatmaq, tsangshiq riika, miinan akonja sham ngutli tiimato. 14Kriikha maq, Jesuq raq tsangshiq ma bom ka tiitsang chongkuq nongto, “Lajaras ka atsai she riikito. 15Shatmaq, namshiq ma ahea miitu, apaiq langpit akhing na ngi ka tamii ba chakang. Kra ningkhan, ngi ka kai chochi tiikang. Ara jamto chochi tiikang ngukla, namshiq raq ngi ma mikam wan han. Riita, ümchaü minla, nashiq ka apaiq phaniishe kirong pha.”

16Kiijiishe, “Lo, ikhiijiika, nashiq tarü Shrawe rai adam na kirong phiina. Laita, nashiq min apaiq rai adam maq tsaiki rong phiina!” nguta Thomas (achhop we) raq apaiq kongtibi jaqshisetiim ma Jesuq bom ka tiijo she chongto.

Jesuq Kli Adong Wan Ningkun Nai Rilung

17Jesuq ka Bethani hiqshong na saükai ranaiq niika, Lajaras maa ka longtiip maakho na shaqkili maq rablai she riito. 18Bethani hiqshong ka Jerusalem maq meng tsam saü mak li. 19Krai mren, ano tsaijai Martha nai Meriq ma tsaido jido, majo bom chongke kai akirai, nokmaiqse ka pahea asi.

20Martha raq Jesuq ka kitlo nguta tsütsa ka tai raütiishe, apaiq ka Jesuq humkai nguta chii phai na, lam na kito. Shatmaq, Meriq ka jam niili ngato. 21Martha raq Jesuq ma bom ka akha chong raüta shiri raito, “Tatiwe, ümniika ajaq asi ngu raü ka, i no ka tsai mak chang! 22Shatmaq, ngi raq asapha, ümchaü li jiimin, ümniiraq Shiikeawe jaq wa apaiq miitu jamlai phan wa mijaü haü, kriika tang lichang ningkun mikuq.”

23Kiijiishe, “Ümno ka adong mirwa nong,” nguta Jesuq raq apaiq bom ka treto.

24“Ngi raq asapha, i no ka phangthum ranaiq adong mirwa nong,” nguta Martha raq Jesuq bom ka treto.

25Kiijiishe, Jesuq raq apaiq ma chongto, “Ngi ahata amaa wa dong wan ningkun tu kiimaq rilung tsitsü raü chong. Jurwa ngi ma kam tlaq, kriiti ka atsai jai min atrali she misi. 26Kiimaq juwa atra sitlaq, kiimaq ngi ma kam tlaq, kriiti ka ümtiikiimin tsai mak she miraq. Ara ngi raq chongtiikang i bomtsi arma ümniiraq kam tlaü sha?” nguta Jesuq raq apaiq ma bom ka tru chongkuqto.

27Kiijiishe, “Tatiwe, kamtiikang! Ngi raq ümniika Khristo, kiimaq Shiikeawe Se, ara mangjong hiq na misaüki nguta chongtlaq we kra, nguta kam tiikang,” nguta apaiq raq Jesuq bom ka treto.

Jesuq Ka Aho Riito

28Martha ka ara riibom jai, ano Meriq hea wa, jam na jang wan nongto. Raüta, atsise maq, “Shrinketi we ka arjaq nashiq tho na. Apaiq raq ümnaq hea tlo,” nguta ano ma tsütsa ka chongto. 29Kra tai raütiishe, Meriq ka tiidopot, apaiq rai riihumkai kihoto. 30Jesuq ka kra hiqshong na misaü wan shaqli riito. Shatmaq, Martha raq riibom kitaq kra ba niili lohoto. 31Kra akhing na, nanok majo kaiti Meriq tahii jam na, apaiq rai tsaiji tlam ma angadam maiq ka asi riito. Tsangshiq raq apaiq ka kinphai na tiidoho kra chhi raüta, tsangshiq riimin apaiq jai phanhoto. Tsangshiq raq tiima ka, apaiq ka ano maakho na maaho kai dongho tlo sham nguta tiimato.

32Meriq ka Jesuq ümbano kiijaq saüki raütiishe, apaiq jichong na tiidungtsok bumki raüta, “Tatiwe! ümniika arjaq asi ngu raü jaq, i no ka tsai mak chang wa!” nguta hoq siqto.

33Jesuq raq Meriq ka aho-anyi jumii kra chhito. Kiimaq apaiq rai nokwe akidam thun hosii rai tlaq thun kiimin chhito. Kra maaho maanyi ka chhi raütiishe, Jesuq tsan na tsangshiq ma tsihea mangchan tsito. 34“Ama ka ümbano lap lan?” nguta apaiq raq tsangshiq ma waito.

“Tatiwe, wara, liiwakiq na,” nguta tsangshiq raq apaiq bom ka treto.

35Jesuq ka aho riito. 36Kra chhi raüta, “Liimanta, apaiq raq apaiq ka pinthum mangchanto,” nguta tsangshiq ka riibomto.

37Shatmaq, maiq wiijamti raq, “Riita, apaiq raq makchuk we mak santla tiihea kuqtaq. Ikhiijiika, Lajaras kiimin mitiichhun kuq lot wa riishatmaq kata,” nguta tsangshiq nai tsangshiq liipan na riibomto.

Lajaras Amaa Wa Tiijangto

38Jesuq ka atsan na mangchan tsihea maq, maa lap chang longkhong kii na, longkilü shaqje tho kiiniishe kito. 39Raüta, “Apang chang longkaü ka linbaiq ronglaq!” nguta Jesuq raq tsangshiq ka thaüto.

“Tatiwe, ümchaü ka anam she sham. Amaa lapkili maq, ümchaü ka rablai she!” nguta amaa we ma anyi raq Jesuq bom ka treto.

40“Ngi raq ümniima chongpha ira taimaü sha? Ümniiraq kamhan jiila, Shiikeawe khushü jonglu kra michhi haü nguta chongpha ihata?” nguta Jesuq raq apaiq bom ka treto. 41Kra chongtaq krai mren she, tsangshiq raq longsha kilü pang chang longkaü kra linbaiqto. Jesuq raq ra nü na lü raüta akha achu jaüto, “I We lei, ümniima kechutum tiikang. Ümniiraq ngi achu jaü ka tre tlaü. 42Ngi raq asap ha, ümniiraq i bom ka ümtiikiimin tlea maü phan. Shatmaq, ngi raq ara bom tiikang arka, arjaq nokwe thung tlaq ariiraq, ngi ka ümniiraq atiikihaü we dea nguta mikam laq nguta ara bomtiikang.” 43Apaiq raq akha achu jaülot raütiishe, tiihong raüta, “Lajaras dongkikiq!” nguta heato. 44Krai mren, Lajaras ka ajaq aji thun ka majop chang khea maq tiijopshat li, kiimaq atheaphi tro niimin khea maq tiijopshat miili she longsha mong wa dongkito. Kiijiishe, “Adü wa khea ka diibaiq ronglaq, lanta, jam niishe miwa laq” nguta Jesuq raq tsangshiq ka thaüto.

Jesuq Tsea Ma Mat Kha She Tanto

(Mot 26.1-5; Mak 14.1-2; Luk 22.1-2)

45Meriq rai riihumkai nokmaiqse pahea aki rai kriiraq, Jesuq raq jamlai wa awang chang jaqshamtaq kra chhito. Raüta, tsangshiq riimin apaiq miishe kamto. 46Shatmaq, tsangshiq phong wa maiq wiijamti ka jam na jang wanto. Raüta, Jesuq raq jamlai jaq wa shamtaq kra Phorisinok miishe tiitaito. 47Krai mren, Phorisinok nai ramwe jongbi ka welabi rai ngongthun raüta bom ka akhiishe riiwaito, “Riita, ümchaü nashiq raq ara jamkhii riichang wa? Liimanta, apaiq raq atinkhan she awang chang jaqsham tlaq ara! 48Nashiq raq apaiq ka akhli, awang chang jaqsham ka tiisham ruq li tiisham hai jiika, mungmaiqse wiitarü raq apaiq ma siisaq she mikam wan. Kiimaq Roman welabi raq nashiq thaq na kha minyan. Raüta, nashiq nok Shomjam nai namung ara tsangshiq raq ashthen she mirbaiq!”

49Kra akhing na tsangshiq welabi phong na wela we ashi asi riito. Apaiq mang ka Kaiaphas. Apaiq ka kra rawii Ramwe Ajong Pinthum jati we riito. Apaiq raq anok welabi ka akha sonto, “Namshiq ara angikong! Namtsii min ahü! 50Maiqmung ashi kra thenkai nam ma, maiq weshi tsai kai riiwe kra ahea miraq nguta namshiq raq tak man sha?” nguta anok welabi ka sonto. 51Riita, apaiq raq ara bomtaq arka, apaiq tsiitsii maq abom riimak. Shatmaq, kra rawii, apaiq ka Ramwe Ajong Pinthum we kha maq, Jesuq ka Jehudinok mung maiqse miitu mitsai nguta riisham bomchong tiithai bomto. 52Apaiq tsai tlaq arka, Jehudinok mung miitu lamlam li ka riimak. Shatmaq, Shiikeawe sengi ümchuwa pongmung mung na riinyin shin raüta sitlaq, kriithun ka wiita pumshi ma tiija wan miitu mitsai.

53Kra ranaiq miiphat she, Jehudinok welabi raq, Jesuq ka tsea baiq miitu matkii ka tsangshiq jaq na shamshat she riito. 54Kriikha maq, Jesuq ka Jehudinok phong na rashra ka khumki mak she riito. Shatmaq, kra ba wa tiijin wan raüta, apaiq ka Ephraim chela niishe kihoto. Kra chela ka kumtsaiphii binjü tho na riito. Apaiq ka kiijaq ajaqshisetiim rai sikito.

55Kra akhing na Tiichhii Wan Poi ho miika ajeli she riito. Kriikha maq, nokmaiqse pahea hiqshong rap wa, Jerusalem na Poi ho ma thung hoto. Kra thung hotaq thun kriika, Tiichhii Wan Poi lomdam ma, tsangshiq khum kra tiisii wan miitu, mrochhi wan phumram kham maq tiibatkai ngutiishe thung holito. 56Tsangshiq ka Shomjam rinkea na thungtii rai lam maq, Jesuq ka asi sha ahü wiinya nguta shri raa lii rit wanto. Kiimaq, tsangshiq nai tsangshiq liipan na, “Namshiq raq jamkho tiima tlan? Ara Poi lomkai dam apaiq ka miki sham ngutiisha tiima tlan?” nguta bom ka riiwaisoto. 57Shatmaq, ramwe jongbi nai Phorisinok riika, Jesuq ka alap ra nguta aming ka atatwi she riito. Jurwa Jesuq thohe jiiq, kriiti raq welabi ma tsütsa ka tiitai ra nguta aming ka tatthü je she riito.

Currently Selected:

JOHAN 11: TANGSBSI

Highlight

Copy