JOHAN 12

Meriq Raq Jesuq Hok Na Homseng Maq Jutto

(Mot 26.6-13; Mak 14.3-9)

1Tiichhii Wan Poi ma ratrok mishaq na, Jesuq ka amaa wa atiidong wan we, Lajaras hiqshong Bethani hiq na kito. 2Kiijaq tsangshiq raq, apaiq ma anato lungwii dung chungkuqto. Martha ka dung chung liiwan damti riito. Jesuq rai dungsea damti phong niika Lajaras min nga wan damto. 3Kiitiikaq, Meriq raq perang wa apho, athii tsinhea phan homseng tsai ka haptashi tin kra lam raüta, Jesuq hokphi wiinai na nyukto. Raüta apaiq hokphi ka akhudap miishe tiiwe takuqto. Kra nyuktaq krai mren, homseng tsai hom wa kriiraq, kra jam ka wiita nyamto. 4Kra chhi raüta, Jesuq jaqshisetiim phong wa maiq weshi, apaiq shaphaqti ma jawanti, Judas Iskariot raq, 5“Riita, ara homseng tsabum arka kampho siiroqtsam pha sha raüta, kriimaq miitsan maiqse khrum kechang wa shatmaq ahata?” nguta botto. 6Apaiq raq ara bom chongtaq arka, apaiq tsan mong na miitsan miijan maiqsetiim ma mangchan tiitsi raütiika riimak. Shatmaq, apaiq ka ahuk we kha maq bomto. Apaiq ka tsangshiq kampho khiiq kra hoti we. Akhing khing na apaiq raq kra taro kampho khiiq kiiwa khot raü raüta shaphaqtlo.

7Kiijiishe, Jesuq raq apaiq bom ka akhiishe treto, “Apaiq jaqsham ka naq tiibanbi rongkiq!. Arka apaiq raq, ngi tsaikai ranaiq na, i maa lap miitu she tiije kuq wanli tlo. 8Shatmaq, miitsan miijan maiqsetiim ka namshiq rai rilung pattup siruq li. Shatmaq, ngi ka namshiq rai adam na siruq ka simang she.”

Lajaras Tsea Tanto

9Kra akhing na nokmaiqse kong pahea raq Jesuq ka Bethani hiqshong na ngu wa nguta tsütsa ka taito. Kra tai raütiishe, tsangshiq ka Jesuq liikai nguta, Bethani hiqshong kiina kongta hushhu miishe kirai hoto. Tsangshiq kirai wantaq kriika, Jesuq liikai lamlamli min riimak, shatmaq Jesuq raq amaa wa atiidong wan we, Lajaras kriimin liikai lam maq nguta riiphong kiraito. 10Kra nokmaiqse kong kra chhi raütiishe, ramwe jongbi raq Lajaras kiimin Jesuq rai atsea baiq chang nguta kha ka tan thüto. 11Arka Lajaras ka amaa wa tiidong wantaq kra lümaq, Jehudinok phan mungmaiqse kong ka maiq pahea raq, ramwe jongbi thun kra miimthü raüta, Jesuq miishe kamrai wanto nguta ngo miishe Lajaras kiimin atsea baiq chang nguta kha ka photo.

Mungmaiqse Raq Jesuq Jerusalem Maq Taoto

(Mot 21.1-11; Mak 11.1-11; Luk 19.28-40)

12Kiimaq anap ranaiq miishe, mungmaiqse phong pahea Tiichhii Wan Poi lomkai akirai kriiraq, Jesuq ka Jerusalem na saü wantlo she nguta tsütsa ka taito. 13Krai mren, mungmaiqse raq taitsi hii ka maiqmii jaq na doraq maq, Jesuq taokai nguta, chii phai niishe arü ariiq wa trang liishe, kongta hushhu maq kihoto. Raüta, tsangshiq raq apaiq ka tao wanto. Tsangshiq raq apaiq tao wan lam maq, “Shiikeawe ka shreng rong i! Shiikeawe lei, ümmang na juwa kitlaq, kriiwe ka shiiman kuq laq! Shiikeawe lei, Israilnok Hokham we ka shiiman kuq laq!” nguta arü ariiq watrang liishe apaiq ka tao wanto.

14Jesuq raq kumtoq kaü ashi humto. Raüta, kra kaü raikhü na chao raüta apaiq ka wato. Arka Asii Bomtsi na awaiq thü bomchong kra phan phan she kuwanto. Kiijaq akha nguta waiqto:

15“O, Jerusalem chela lei,

ümniika naqhai song kiq she jo!

Liilaq, ümhokham we ka saühoto she.

Kumtoq kaüshii se raikhü na

chao raüta kitlo.”

16Kra akhing na ajaqshisetiim raq ara chong tlaq bomtsi liichum arka, tak mak dea riito. Shatmaq, Jesuq ka amaa wa dong wan raüta, apaiq khushü ngao jonglu wantaq kra chhi wan jai shetiq, tsangshiq raq Asii bomtsi na awaiq thü bomtsi liichum arka, apaiq miitu dea chong tlo nguta tak wanto. Kiimaq tsangshiq raq kra akhing na klo wantaq jaqsham kriika apaiq miitu dea shamkuqkai ngutiishe takto.

17Jesuq raq Lajaras ka amaa, maakho mong wa tiidong hea wan raüta, atra tiidong wantaq kra chhi wanti nokmaiqse phong raq, kra awang chang tsütsa chhi wantaq kra, mungmaiqse ma kai tsaki wanto. 18Mungmaiqse phong wa maiq pahea raq, apaiq taokai lam na kirai witaq thun kriika, apaiq raq ara awang chang jaqshamtaq tsütsa kra taiwi raüta kiraito. 19Ara mungmaiqse raq Jesuq tao wan kra chhi raütiishe, Phorisinok ka tsangshiq nai tsangshiq liipan na, bom ka akha riichongto, “Liimanta, notsam, nashiq riika tanglot mai dongdii she! Liirong laq, mangjong maiqse tlotli raq, apaiq jai li she phan wanto!”

Griknok Raq Jesuq Rai Riihumro Riito

20Kra poi akhing na, Jerusalem na Shiikeawe shomnoq kai nguta mungmaiqse phong kiraitaq thun kra phong na, Griknok min asi riito. 21Tsangshiq ka Philip pha na wato. (Apaiq ka Gelili wang na Bethsaida hiqti riito). Raüta, apaiq ma, “Shiilang we lei, naishiq ka Jesuq rai riihum ro tiikai,” nguta bom ka tiitaito.

22Kiijiishe, Philip raq Andru ma kra bom ka tlü chongto. Raüta, tsangnai wiita she, Jesuq phana waraüta, Griknok bom ka Jesuq miishe tlü chongto. 23Kiijiishe, Jesuq raq tsangshiq ma bom ka akha chongkuqto, “Maiq Se ma apaiq khushü tiijongke akhing ka ümchaü hong wato she. 24Ngi raq chongtiikang arka tengteng: Tsam rai ka wak na jangki raüta, hiqmong na atsai arki ikha siwan hü wiiwii ka, raishi laqlaqse asiiliili misi. Shatmaq, kra raishi sitlaq kriika, atsai raüta cham wan raütiq, anyam ka midong wan. Raüta arai ka pahea she midong man wan. 25Krai mren, jurwa maiqmii rilung ka lungwii tlaq, kriiti raq maiqmii rilung ka atiimo mirbaiq. Shatmaq, jurwa maiqmii rilung ka ara mangjong hiq maq asaisi riiwan tlaq, kriiti raq maiqmii rilung ka, pattup pat-sa atra siwan miitu mithü wan. 26Kiimaq jurwa i jaqshi ma jawan raüta, ngi shiililii wan lungwii tlaq, kriiti ka, i jai phan phan wa wawan raa tlo. I jaqshi ka, ngi rai nong nong maq sichang. Kiimaq, jurwa ngi shiililii tlaq, kriiti ka i We raq mishreng.”

Jesuq Raq Apaiq Tsailam Chongto

27“Riita, ümchaü ka ngi ma i tsan tsihea akhing she saü wato. Riita, ümchaü ngi raq jamlai she wa minguha? ‘I We loi, ara akhing ara ngi ma naq tiisaükiq dea,’ ngutiisha minguha? Shatmaq, kiikhiika ngulot mang. Ara jamkhano chong tiikang ngukla, ngi mangjong hiq na pokikang arka, ara chong tiikang chamchao wamong armaq lea wan miitu dongdii akiha! 28I We loi, maiqse ma üm khushü jonglu kli dea tiichhikuq laq!” nguta Jesuq ka Awe rai riibomto.

Kiijiishe, “Ngi raq I khushü jonglu ka tiichhi kuq kang she. Kiimaq Ngi raq jangshi ri hali mitiichhi kuq nongha,” nguta ra wa maiq bom ashi raq Jesuq bom ka treto.

29Mungmaiqse phong kiijaq thungrai tlaqti raq, kra bomtsi ka taito. Raüta, maiqphong kiiwa wiijamti ngiika, ramokto nya nguta bomto. Kiimaq maiq wiijamti ngiika, “Notsam, rase raq apaiq rai riibom damto!” nguta tsangshiq liipan na bom ka riichongto.

30Kiijiishe, Jesuq raq tsangshiq ma akhiishe chongkuqto, “Ara bomtsi saükitaq arka, ngi ma chongke ka riimak. Arka namshiq ma chongke miitu saükito. 31Ümchaü arshe, mangjong maiqse khapho akhing ka. Ümchaü akhing ara mangjong hiq rümti we kra tiidea baiq akhing she saü wato. 32Ümtiikiiwa ngi ka ra na tsom wan jiiq, kiitiikaq ngi raq wiitarü ka ngi phana mitriitam wan ha.” 33Jesuq raq ara bomtaq arka, apaiq ka jamkhii chamchao raüta tsai chang wa, kra miitu chongto.

34Kra tai raütiishe, “Nashiq Thungtri na Khristo ka pattup misi nguta chongtlo ihata. Shatmaq, ümniiriika Maiq Se ka ra na tsom chang dongdii miraq ngutiika jamkho ngutlaü? Riita, ara Maiq Se ngutlaü arka juwa?” nguta mungmaiqse phong thung tlaq kriiraq Jesuq ma bom ka waito.

35Kiijiishe Jesuq raq tsangshiq bom ka treto, “Namshiq ma rawüli ka heashili she mili. Rawüli asi bala, namshiq ka rawü lam phan tlan kra, phan ruq phan lantli si ronglaq. Ranyaq raq namshiq ka pang wan tlo jiiq. Juwa ranyaq mong na khum tlaq, kriiti riika, apaiq ka ümnüno kihotla, kriika sap mak. 36Kriikha maq, namshiq ma rawü li kra likushat li tlaq bala liipan na, namshiq ka rawü li kiima kam rong laq. Kra riihan jiitiq, namshiq ka rawü maiqse ma mija wan han.”

Jehudinok Apako Raq Jesuq Ma Kam Mak

Jesuq raq ara traho bomtsi ara chongkuq lot raütiishe, apaiq ka tsangshiq maklii wa ahin nü niishe tiiko wan lam maq kihoto. Raüta, maiq maklii akaiq kaiq niishe kihoto. 37Apaiq raq tsangshiq makki na atinkhan awang chang jaqsham maq tiichhike wanje taü miimin, tsangshiq raq apaiq miika kam mak riito. 38Arka, shammi we Isaia raq riisham bom achongthü kra tiikupi wan miitu she hongtha wanto. Apaiq raq akha chongthüto:

“Riita, Tatiwe lei,

naishiq raq achongkuq hai

tsütsa kriima juro kam wan tiita?

Riita, ija,

Tatiwe raq apaiq ningkun jong ka jumo tiichhi kuq wan tiita?”

39Riita, ija, ara riisham bom chong thütaq arai mren she, tsangshiq raq Jesuq ma kamwan mak she dea riito. Ara jamkhano chong tiikai ngukla, Isaia raq hali, Shiikeawe manson ka tsangshiq khuthaq na anikai kun she nguta bom ka akha hali tiithai chongthü nongto:

40“Shiikeawe raq tsangshiq mak ka atiichuk baiq wishe.

Kiimaq tsangshiq tsii ka atiimo baiq wishe.

Krai mren, tsangshiq riika chhi mak she.

Kiimaq tsangshiq tsii ka tsang mak she.

Kiimaq ngi raq tsangshiq tsii ka tiitsang kuq wan jiiq nguta,

tsangshiq ka ngi phana wamak she,

nguta Shiikeawe raq chongtlo.”

41Isaia raq ara riisham bom chongkuq thütaq arka, apaiq raq jai na Jesuq khushü jonghea dong wan chang dea asi shaq, kra chhi raüta chongthüto.

42Kiikha riikli jiimin, Jehudinok welabi phong wa, maiq pahea raq Jesuq ma kam wanto. Shatmaq, tsangshiq ka, Phorisinok ma hai ma, tsangshiq kamtsantsii kriika, ra na doli nokwe man na, tiichhi mak miili sito. Kriika, Phorisinok raq tsangshiq ka sinagok wa tiidong baiq jiiq nguta, kriima hai ma adam apaü lam miili kamto. 43Ara jamkhano chongtiikai ngukla, tsangshiq ma mungmaiqse raq, ‘ümniidea ahea’ nguta shomra riiwe kriika Shiikeawe raq, ‘ümniidea ahea,’ nguta ngo kriithaq na athii atsin nguta lungwiitlo.

Jesuq Bomtsi Kli Rung Kappe

44Kra akhing na, Jesuq raq chiiriim raüta agilülü maq traho bomtsi ka akhiishe chongkuqto, “Jurwa ngi ma kam tlaq, kriika ngi ma kam wan lamlam li ka riimak, shatmaq ngi tiikaiti we miimin kamtlo. 45Jurwa i sham chhi tlaq, kriiti riika ngi tiikaiti we sham kiimin chhi tlo. 46Ngi ara mangjong hiq na kikang arka, maiqse ma rawü tli kekai nguta kikang. Krai mren, jurwa ngi ma kam tlaq, kriiti ka ranyaq nyang na simak she miraq. 47Ashi ra raq, i bom chong ara taishatshat taü maq, lang mak jiika, ngi raq apaiq ka kappe maq shin mang. Ngi ka mangjong maiqse kra ajiq alam nguta shinkai akiha ka riimak. Shatmaq, mangjong maiqse tiichhiikai miitu kikang. 48Riita kriikha na, jurwa ngi ka shipoq tlaq, kiimaq i bomtsi ara lang mak riitlaq, kriiti khaphoke wanti ka phowe asi miraq. Ara ngi raq chongkuq tiikang i bomtsi arli she, phangthum ranaiq na, apaiq kha phoke wanti phowe ma mija! 49Ara chongtiikang arka tengteng: Ara jamkhano chongtiikang ngukla, ngi raq ümchuwa bom chongkuq tiikang arka, i tsiitsii maq achong kuq ha riimak. Ngi tiikaiti we, i We raq, arka chongke ra tlo nguta aming kuq tlaq, kriili chongkuq tiikang. 50Kiimaq ngi raq asap ha, apaiq aming bomtsi arka maiqse ma pattup pat-sa rilung raüchong. Krai mren, i nü maq jamlai bomtsi wa bom tiikang arka, i We raq ara bomtsi ara chong kuq laq nguta, achongkuq kriili chong kuq tiikang. Apaiq bomtsi kli ngi raq maiqse ma tlü chongkuq tiikang.”

Currently Selected:

JOHAN 12: TANGSBSI

Highlight

Copy