KANTHOUNA 39
39
Joseph'le Potiphar'yei Nu
1 #
Pao 7.9. Heirouri Josephya urlouheibi Egyptra yuktlungkur, heitoubi Pharaoh'yei raallui upawa, Egyptbei thimi Potipharni, aya bi heitamrou yuk'urheikur thimi Ishmaelia rapbei hutrouwei Josephya loulothungkur. 2Heirou Umpune Josephya kalhonpikur, heirou a heiri likarsuina thimi khat khoini aiyei Egyptbei pu upawaei cheemra leikur. 3Heirouri Umpune Josephya kalhonpime touri Potipharni muwurla; heirou aiyei lhou touna kantangrou Josephbei ngamni ayari mhei heiyerpime toukhi ani ningmukur. 4Heingammei aiyei mit'thrilnara Josephya kringpikur, heitoubi ani Josephya aicheemrei klei putchei, lalthum namyerwaei doura pu khoini thikulnanungei lhoubomkhi lhakpiwurbi aihutra namma silnakur. 5Heirouri asitoubi hungthukkura, Potiphar'ne Josephya aiyei cheemmei putchei rapya thikulpi pu khoini bom lhakpikur heirouwei waiyoubini, Josephbei ngamni Umpune Potiphar'yei cheemra phor piwurbi, heirou Umpuei phorni aicheemrei putchei, lalthumrap heirou lou-yekulrei trunwai rapbei dourakhi namma phorni thimmura. 6Heisi toubine Potipharni aiyei cheemrei klei namyerwaya Josephbei hutra yertlengwa silnakur; Joseph leinei ngamrou aiyei lhouri chakcha nimakni lhou deiri koukhatkhi toumakni leikhou.
Heirou Josephri shakrungkhi lhangai, heirou thiyeinungkhi karyuikna. 7Heihillouri asitoubine hungthukkura, aiyei cheempuei nu heiwine Josephya thibini aiyei ukningra maduni pammukur; heirouri ani, “Keikou ipmalnawase, hungalo!” toubi yunbini thoukur. 8Heiya Joseph'ne yapimakurbi, aiyei cheempuyei nu heiwiya loushun, “Kei kleime tounei ngamrou cheempuni bommai aei watlhoura koukhatkhi ningkardonmakme touri nangni ningmulak; heina douroukhi aiyei putchei-lalthumrap nammakhi keihutra yertlengwa silnawurla. 9Cheem arouwei keiya duiyei tang thimiri dei hukhi maklei; heirou cheempunikhi keiyei hutra silnamako touri nangtomngei; ngamri nangri aiyei nu; heineri keine heinaksi lhangaimakei lhouya toubine, koutoubi Dunpuei maibongra karhani borh lhouya keine touchangrouwo?” 10Heirouri asitoubi thukkura, touri cheempuei nu heiwini tlainiser Josephya manelbi yunbinikhi, Joseph'neri aiyei kyun tlouya ninglhakpimakur, heirou akou ipmalnakurkhi toukhoumak; heirou aiyei pongra ramphakhi hungchangpimakur. 11Heirou nungkhatnuiri asitoubine thukkura, Joseph'ne cheemwaira aiyei watlhou churnungei hungchangeinung, cheemwai heirouri thimi hukhatkhi louleimak. 12Heirouri cheempuwini Josephya aiyei linglikchulra louchurmanbini, “Keikou ipmalnawase,” toubi kyun. Heitounei ani aiyei linglikchulya napuiya heiwiyei hutra lakurkhoubini daangra trukthutkur. 13Heirouri Joseph'ne aiyei hutdoura phi'up lakurkhoubi daangra trukthutdurame toubi muwurnarouri; 14napuiya heiwini yai cheemrei klei rapya ungbini kyun, “Thilak, keiyei shalwani kaya rikrai pinanungei Hebrewa napawa khatya cheemmai arou yenlhakbi khouwurla; heirou ani keikou ipmalnawase toubine keiyei leinara hungchangkur, heitounarou keine keiyei hou chouni lou'ungraokur. 15Heirouri keine hou chouni lou'ungraokurya mubi ani aiyei phi'upya keihutra lakurkhoubini daangra trukthutkur.” 16Heirouri Josephbei cheempuni yenkallengbongyen, napuiya heini Josephbei phirul heiya aihutra heisi loukhoukur. 17Heirouri napuiya heiwini thimidei maibongra yunthutdurkhou tlounakrim karlhikmakni aiyei shalwanungkhi louyunpikur, “Thilak, nangni kaicheemra shok hoinanungei yenruilhakkur Hebrewa napawa heini keiya touchopnungei keileinara hungchangkur. 18Heirouri keine hou chouni lou'ungraokur heirouri aiyei phirul awaya keihutra khingurkhoubi daangra trukthutkur.
19“Heisibil neiyei shokpani keinungei mallaknawurkhou,” toubine aiyei shalwanung pao loutamkur. Heirouri ani meithukni malungkhakur. 20Heirouri cheempu heini Josephya manwurbi, Krungei thimi rapya kulchalphopbi khounabi kulrilla Joseph'yakhi chalphopbi khoukur. 21Heiya Umpuneri Josephya kalhonpikur, heitoubi aya kringpi kheiya mutpikur, heitounei ngamrou kulla chalphopkur thimi rapya kngaak rapbei mit'thrilnarakhi ayari kringpikur. 22Kulla chalphopya kngaak thimi rapnekhi kulchalkur thimirap nammaya Josephbei hutra silnakur; heirou kulrilla Joseph'ne churpaangbi klei lhourap nammakhi lhangaithil. 23Heirou kul chalphopya kngaak thimi rapne Josephnungei silnakur watlhourap, heirou putcheirap nammayakhi yani koukhi lhawai klahni khalcha'kna leikhoumak, ngamri Umpune aya kalhonpikur, heitoubi aiyei touwurkhou watlhourap nammakhi Umpune churtrungpibi lhangaithil hoikur.
Currently Selected:
KANTHOUNA 39: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
