KANTHOUNA 40
40
Joseph'ne Rmong Khat Mallengthutpi
1Heihillouri asitoubi hungthukkura, Egypt Krungei tulfleibi tulkep malan napawale, aiyei mumtol sheem napawa ya napung'khnine yai Egyptbei Krungya karhani lhou touwurla. 2Heirouri Pharaoh'ne aiyei wattouwa uparap napung'khniyei doura touri tulkep malan thimile, mumtol sheem'thimi yakhuntaya meithukni malungkhawura. 3Heitounei ngammei Krungni yakhuntaya manbini Josephya kul chalphopbi khouna kulla, raallui upawaei leina bira kul chalphopbi khoukur. 4Heirouri raallui upawane yakhuntaya Josephbei hutra silnawurbi, Joseph'ne yarukhniya thikulpikur; heisitoubi yani kulrilla kheen bei leimalnakur. 5Heirou nungkhatnuiyei masanungri, Egypt Krungei tulkep malan thimile, heirou mumtol sheem'thimi heinikhi kulrilla rmong khatsol loumankur, heirou yakhuntayei loukman rmong rapya mallengthutyeinung heiyei arthakhi lailaini loukhoi. 6Heirou Joseph'ne ningshunnang yaileinara wachangbi murilyeinungri, thilak, yarukhni heiri beimakni lhawai lahbi louklei. 7Heirouri ani Pharaoh'yei raallui upawaei cheemra kulchalphopbi klei wattouwa upa rapnungei heikngai, “Angturi narukhniri beimakni lhawai klahni mukurya koutouneiyo?” 8Heirouri yakhuntani anungei loukyun, “Kakhuntani masanung rmong khatsol loumanbi, heirou rmong rapya artha mallengthutpirou thimiri hukhi makkurame.” Heirouri Joseph'ne yakhuntaya shun, “Rmongrap heiya artha mallengthutpirouri Dunpu nimaka? Heineri nakhuntaei rmongrap heiwari keinungei yunpilaklo.”
9Heirouri tulkep malan wattouwa upawa heini aiyei rmongya Josephnung asitoubi shunpikur, “Louningthilak, keiyei rmongri asitoubine loukmu, darkha trung khat keimaibongra katpukthut. 10Heitoubi darkha trung heini bankhi khyumtam karphang; heirou banrap heiri katbobini heirou heikhi heiyoukur; heitoubi heibomrap heikhi lhangaini yenminyoukur. 11Heirouri Pharaohyei daarkok heiri keihutra shinbini louklei; heitoubi darkha hei rapya laloubi, heirou Pharaohyei daarkokra heiyui shumlhakbini Pharaohyei hutra keine malanpikur.” 12Heirou Joseph'ne anungei loushun, “Neiyei rmong heiyei arthari asitoubine leilei; darkha trungei ban khyumtam karphang heiri tlaini khyumniya mu'kna. 13Heitoubi khyumniyei rillouri Pharaoh'ne neiya kul'chalphopnarei malhetthutpirou, heitoubi neiyei haallei hoikhouna watlhou bomra hanui kallenglhakyer'thurou; heirouri nangni haallei hoikhou tulkep malannei wattouwa upayei lhoubom heiya toubine Pharaoh'yei hutra nangni hanuikhi daarkok malanpithurou. 14Heiya nangni nungwaiyei kaalnung keiyakhi bei ningthutpilak, heitoubi keiya kringpibi kulchalphopna cheem arouwei keikhi thukkur yananungei Pharaoh'yei maibongra keinung'tlim nangni tlou bei louyunpilaklo. 15Kouweiyo toulanungri, keiyari mine Hebrewa rapbei ram'rouwei mulouheibi bi arou yu'tlungyerkur; heitoubi bi aroukhi keine klalyei lhouya touwurnei ngamrou yani keiya kul rilla chalphopkurri nimakme.”
16Heirou mumtol sheemthimi wattouwa upa heinikhi rmongei artha heiri beimakni chimleime toubi munarouri, ani Josephnung shun, “Keinekhi keiyei rmong khat loukmanme, keine mumtol lhakna bungka khyumtam marthunbini keilura thungchabini loukleime. 17Heitoubi yerrouwei dourei katong bungka heira Pharaohyei shainungei mumtol limlim marshikbini khoukur; heiya keiyei ludourei marthunbangbi klei bungkarei mumtolrap heiri ramwaa rapne chushailoukur.” 18Heirouri Joseph'ne loushun, “Neiyei rmongei arthari asitoulei: Bungka khyumtam heiriso tlaini khyumniya kyun; 19heitoubi tlaini khyumniyei rillouri Pharaoh'ne kulrillouwei neiya louthutpirou, heitoubi neiyari heengdoura manyarhatrou, heirouri ramwaa rapne neiyei sharungei mitee rapya chuthrelbi mailourouwa.”
20Heisitoubi tlaini khyumni hungtlungkur heirouri asitoubine hungthukkura, touri Pharaoh'ne aiyei pukna manshimnei tlaini heirouri aiyei shok rapya namma markhulbini chak khangpikur, heitoubi tlaini heirouri ani aiyei tulkep malan wattouwa upawale, heirou aiyei mumtol sheem wattouwa upawa yarukhniya kul chalphopnarei malhetthutpikur. 21Heitoubi aiyei tulkep malan wattouwa upa heiyari aiyei watlhou bomra hanui kallenglhakyerthu; heisitoubi ani Pharaoh'yei hutra daarkok malanpikur. 22Heiya Pharaoh'ne aiyei mumtol sheem wattouwa upawa heiyari Joseph'ne aiyei rmong artha mallengthutpikur heinakrimni heengra manyarbini hatdurpi. 23Heiya tulkep malan wattouwa upawa heineri nungkngaini leiyei kheenrouri Josephya myekthutpimakni malumwurbi leikur.
Currently Selected:
KANTHOUNA 40: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
