LUKE 12
12
Lhangai Karsa Rapya Chinanungei Tlousher
(Mt 10.26-27)
1 #
Mt 16.6; Mk 8.15. Kheen heirouri thimi kartil chungachaknei ngamrou, ya khatle-khat tatphoprilkur, heirou Jesu'ne lamkrini Aiyei ruishik rapnung kyun, “Nane lhangai karsa rapbei phri'nakne toukarsaei lhou rapya nane muheiyalo. 2#Mk 4.22; Lk 8.17; Eph 5.13. Kouweiyo toulanungri, makhubphopbi mutmakne munne khourouri koukhatkhi makrou, heirou muyermakne munne yulkhourouri koukhatkhi makrouwa. 3Ngam heine nane mehnarei muei yunkur tlourap heiso warnara namyer mayekphanungei kandangeirou, heirou nane cheemwaira munne miya yunchakur heiso cheembungra kakabi paothutdeirou.”
Huya Chiserou
(Mt 10.28-31)
4 #
Jn 15.14-15. “Keine nanung tanghakne yunlei, keiyei paluirap; nane sharungya hatkur manebi heirou hillou koukhatkhi touduichangmak pu rapya chimaklo. 5#Heb 10.31. Heiya nane huya chibom thukleiyo touri Keine nanungei shunpirou: Nane Dunpuya chiyalo, A heine sharungya hatkur hillouri, hanuikhi lhawaiya khiya ramra khinglhakurnei maneyei mantrangkhi leilei; heine nane Keiyei kyunya malungampilak touri, Ayatom nane chilaklo! 6Heitoubi masekwa phangatamya tuychui khintamchanung yorkur nimaka, heiyanungkhi ya rapya khatchatomkhi Dunpune malumkurkhi maklei. 7#Lk 21.18; Pao 27.34; Mt 12.12. Heitoubi nai lurei pukbi klei shampum rapyakhi mshing sherbine khoulei. Heini nane kouyakhi chimaklo; ngamri nari msek-waa chungyakhi duine manklu!”
Christa'ya Ya'kni Heirou Yanemakne Yunthut
(Mt 10.32-33; 12.32; 10.19-20)
8“Keine nanungei muyerlei touri huhune thimi rapbei maibongra a heiri Keiyeime toubi yunthutlanungri, Thimiyei Chanapawa heinekhi heinakrim Dunpuei Thangring rapbei maibongra yunthutpirou. 9#Mk 8.38; Lk 9.26; 2 Tm 2.12. Heiya huhune thimi rapbei maibongra Keiya yanimakne yunlanungri, Thimiyei Chanapawa heinekhi Dunpuei Thangring rapbei maibongra yapimakrou. 10#Mt 12.31-32; Mk 3.28-29. Hukhatne Thimiyei Chanapawaei doura karhane tlou yunlanungri, aya kukpirou; heiya thimi hukhatne Lhawai Khyingei doura yanimakne lhangaimak tlouya yunlanungri, aya kukpimakrou. 11Yane naya Pukhrumna Cheemra urlhakbine, heirou lhou'urpu laa'urpu rapbei maibongra, nimanung Krung rapbei maibongra tlou darnung urlhakyeinung, heirou nane kouya mallangbi kartleiserouwo toubine uksamak. 12#Mt 10.19-20; Mk 13.11; Lk 21.14-15. Ngamri nane heirou kouya yunserouwo tlouri Lhawai Khyingne kheen hunganung naya shunmatueirou.”
Muheimak Laldun Napawa Khatdei Ngamrou Yailim
13Thimichung kartilna tlakrei napawa napung khatne Jesu'nung shun, “Marnopipu, kai pawaei lakkhoupi cheemrei lalrap heiya kakhu teinaoni yerrilnanung Nangne keiyei naowaya bei shunpilaklo.” 14Heirou Jesu'ne anung loumallangkur, “Keipalui, hune Keiya naidoura pichar touyerrouwo? Nimanung nakhu teinaoni nai pawaei lakkhoupi lal heiwaya Keine yerkhaipikurya yarouko?” 15#1 Tm 6.6-10. Heirou Jesu'ne yanungei yunpithu, “Nane marsen touri leiwang thimi rapbei lhourouwei kartleinanung mukheine toulak; ngamri thimi napung khatdei chaanri ane beimakne laldun hoiyanungkhi, heirou aiyei dunbi klei lal heiyei doura ane ringbi klei nimak.” 16Heirouri Jesu'ne yanung anaksi yailim tloune yunpi: “Bongnung chaan khatrou beimakne laldun napawa khat leikhou. Aiyei loumakhi trunwai beimakne lhangainei ngamrou trunwaikhi chungne luklhakur. 17Heirouri aiyei ukningra ningchakur, ‘Keiyei trunwai ari markumbi marpeinanung bikhi makkura, heitoubi chapongkhi changmakura. Arouri keine kou touserou? 18Heiyanungri keine asi tourouwa’, toubine aitam kyun, ‘Keiyei chapong awari thresundawurbi awaya duiyei tang chapong khat hanui sabaangthurouwa, heitoubi heiyei rilwaira keiyei trunwai lung nammale heirou keiyei putchei namyer marpilbi khourouwa.’ 19Heirouri keimsha keitamne - ‘Likarsui lhangaikur napawa nangri! Kum kounaknungei kroni chaanung-mainungei trunwai heirou yrengnungei putchei heitoubi lalkhi chapong bil thimni marpeibi khouwurla. Heini arouri nangne heirapya loubine neiyei malung pilni heirou neiyei malung khrahni chalaka-mailaka, heitoubi nungwailaka,’ toubine yunrou! 20#Jer 17.11; Job 27.8; Laa 39.6; Lk 12.33-34. Heiya Dunpune anung shun, ‘Yuntlungmak thimi nangri! Neiyei rongchanri angtu masahak trim'rouwa; heirouri neiyei marpeikur lalthum heirou putchei namyerwa heiri hune phathungrouwo?’ ” 21Heirouri Jesu'ne atou yunbine luilhakur, “Heinakrimne tlaipangra dun thimi rapri koukhatkhi karshukmakrou, heiya Dunpuei bomrari yaiyei laldun touri kouniroukhi makrou.”
Dunpuya Uklum
(Mt 6.25-34)
22Heirouri Jesu'ne Aiyei ruishik rapnung asitoubi shunkur, “Ane ngam hoibine Keine nanung tanghakne yunpilei touri, nane ringnanung kouya chamaibi leiserouwo, nimanung nai upnungei phirulri kourei louserouwo toubine nai lhawai kanwangni khallahmak. 23Koungameiyo toulanungri naiyei rongchan heiri chamai putya duine lilkhoi, heirou nai sharung heiri phirulyakhi duine manklu. 24#Lk 12.6-7. Ramhangrei yoo-waa rapya thilak; yane trunwai lung touri koukhatkhi tuklhakmak, heitoubi koulung khatkhi luklhakbi khoumak; yane kouroukhi marpeikhoumak, heitoubi chapongkhi dunmak; heiya Dunpune yaya yukpilei. Heirou nari ramhangrei yoo-waa rapyakhi duine manklu! 25Na hukounakne heinungei'tlim ningchabi nai chaanya hutyeng khatchanak shaangduiyerbi ringchangrouko? 26Heiyanung nane heinak mandikur katchayakhi hoikyer manemanungri, koutoubi nane heinak tangkur rongchanyei lhou rapya lhawai klahni ningchabi kleiyo? 27#1 Kr 10.1-10; 2 Ch 9.3-6. Heitoubi ramhangrei pukbi klei par rapya khalthilak; yane lhou churkhi naimak, heirou yai kansamnanung ya'kyek toukhi naimak. Heiya Keine nanungei tanghakne yunpilei touri Krung Solomon'nekhi aiyei dunbi klei lalthumya pulne urthutbi ane kansambinekhi, par namyerrouwei parlim khatchaei lhangai naksine kouninungkhi kansamkhoumak. 28Ramhangrei angtu leikhoubi ningari meiwaira khinglhakbi hongkur kya heengna-rona rapya mansampikur heiri Dunpu. Dunpune heengtrung-rotrung rapyakhi heinak lhangaine mansamkhoulari, Ane naya heirapyakhi duine mansambang-pimakrouko? O uklum-beimak thimirap!
29“Heirou nane kouya chamaiserou, nimanung kouya upbi leiserouwo toubi khalchanabi nai ukning plangurmak. 30#Mt 6.8. (Koungameiyo toulanungri, uklum'beimak tlaipang thimi rapnekhi heinakya ningchalei.) Heirou nai Pawane naiyei kwatsam namyerwaya yukmupilei. 31Heinung'tlimri, nane Aiyei Krungramya rapharilak, heiyanungri Ane nanungei namyerwa pirou.”
Thangmun Ramrei Laldun
(Mt 6.19-21)
32 #
Jn 12.15-17. “Mandikur Yaorul, nari chimak, ngamri nai Pawane Aiyei Krungbom heiwaya nanung pinungei yapiwurla. 33Heini nane naiyei klei lalthum namyerwa heiya yorwurbine, heitoubi tuy heiri kanring thimi rapnungei yerpilak. Heirouri nanungei khman naimak tuykao marshikbine Thangmun ramrei lalya dunlak; bi heirouri lalkhi kanthritmakrou, heitoubi mucha thiminekhi muloukhei manemakrou, heirou ramutnikhi shaitumkur manemakrou. 34#Lk 18.22. Ngamri naiyei lal leinara nai ukning-lhawaikhi kardonbi leirou.”
Yratui Shokrap
35 #
Mk 13.33-37; Mt 25.1-12; Eph 6.14. “Nane krakni kanthrambi heirou naiyei shambkhi kansambine, heirou naiyei shirek meisharkhi manshok'marshikbi karngeilak, 36#Mk 13.34-36. heirou shok rapne yaiyei cheempuni nu'klou markhulnarei yenkallengya loukngaak'naksine leiyalo. Heiyanungri cheempu heine yenkallengbi cheemkhar hung'umyeinung tallengne yane anungei cheemkhar loulatpikur heinakne toulak. 37#Jn 13.3-5; Mt 24.42; Lk 21.36. Heirou cheempu heine yenkallengeinung iplhakmakne louklei shokrap heiri kounakei likarsui lhangairouwo! Keine nanungei tanghakne yunpilei, heirouri Upawane Aiyei shamb bangmarshikbi yaya omyerrou, heitoubi yale kalhonne ombine yanungei watlhou toupirou. 38Heirou Ane masa yantrimrou, nimanung heiya duine theengni hungbinekhi heirou Ane hungchanphanarou marshikbi louklei thimi rapri kounakne nungwairouwo! 39Heiya nane mulak touri mucha thimi rapne kounaksi kheenrou cheem heirouei mucharou wachangleiyo toubi cheempuni mumaknei ngamrou chakngaakbi kleinakne, 40#Mt 24.43-44; 1 Th 5.2; Kre 3.3; 16.15; 2 Pt 3.10. nanekhi marshikbi karngeilak, ngamri Thimiyei Chanapawa heiri naiyei marshikmakne louklei kheenrou yongkurkhi kya.”
Yratui Shok Nimanung Yrathi Shok
(Mt 24.45-51)
41Peter'ne kngai, “Upawa, Neiyei yailim heiri kanungtom kyunko, nimanung thimi nammanungkhi hoirouko?” 42#Lk 7.13. Heirou Upawane loumallang, “Arouwei yratui nimanung mukhei shok heiri huwo? A heiri cheempuei putchei namyakhi heirou aiyei shokrap deiyakhi thikulnanungei toubi ruikhlang silnabi watyilkhoukur heinakme. 43Heitoubi heinaksi shok heiwaya cheempuni yenkallengeinung yra thimakne loukleiya chanphalanungri kounakei nungkngai hoirou! 44Heiyanungri, Keine nanungei tanghakne kyunri, heinak yratui-krak shok heiyari cheempuni aicheemrei putchei namtommaya thikulnanungei ruikhlang watlhou silnapirou. 45Heiya shok heine aitamtom ningchabine, aiyei cheempu heiri kallengmakeirou toubi ningnaimakne, heirou ane shok dei rapya napuiya-napawa lhuimakne umphit toubine, heirou chamalip-maimalipbi leiwurnarouri, 46heitoubi shok heine aiyei cheempuni kallengrouya ningchamakne louleikur tlainirou loumuthungmakne yenkallengbi, cheempu heiwane shok heiwaya manbine umphit touwurbine heirou malungamnamak thimi raple pulne khingthutdurbi klah dayerheirou. 47Heirou cheempuei kning hilthungei watyilkhou heiya murerikhi churnimakne aitamei kningyatom toubine louklei shok heiyari beimak klahyei tanti dayerrou. 48#Khn 25.2-3; Msh 15.29-30; Lk 8.18; Lk 19.26. Heiya cheempuni aya touyerkni heiri kouweiyo toubi mumakne loukleiya hoiyanungkhi, heirou aya umphit toubomthuk heiyei doura ane koulhou khat louchurbi louleiyanungri, ayari thuithini umpimakrou. Heitoubi marthumni pilhakur thimi raprei chungne buthutlouthurou; heirou thimi rapne duine toupikur thimi raprei, thimi rapne toupikur heiyakhi duine airouwei buthutlourou.”
Jesu'ne Hungthukrou Kyou Kumchaanya Mu'kyer
(Mt 10.34-36)
49 #
Lk 22.15. “Keiri tlaipang arou mei shulhakbi heirou Keiyei kning hilthungne kaangyerna'nungei kyong! 50#Mk 10.38-39; Jn 12.27. Keine lounungei yui lupnei lhou khat leileihui, Keine lhoubom heiya loubongyen Keiyari kounakbui illhakrouwo! 51Keine tlaipang doura kyong awari kyingya yenpirou kyong marbuni nane malungamko? Heiri nimak, kyingya yenpinungei nimak, heiya lhang-lhang dayerrou kyong. 52Asirouwei waiyoubine bommai khatrou napung-phanga leinarou napung-khyumni lhang khatra leibi heirou napung-khniya karhourilrou, heitoubi napung-khnikhi napung khyumya heinakrimne karhourilrou. 53#Mt 10.34-36; Lk 21.16; Mic 7.6. Pa rapne yai chanao raple karhourillou, heinakrimne chanao rapnekhi yai pa rapya karhourilbi leirou; heirou pui rapne yai chawi rapya karhouril heinakne, heirou chawi rapnekhi pui rapya karhourou; heirou neeni rapne yai moucha rapya karhourillou, heinakrimne mouwi rapnekhi neeni raple karhourillou.”
Kumchaanya Mukheine Chanthungbi Klei
(Mt 16.2-3)
54Jesu'ne thimi chung rapnungkhi kyun, “Rameini kulrel lhangrei kayeinungri heirou nane kyun: ‘Arouri nung rorou youlei,’ heirou nai kyunnakne nungkhi rolei. 55Heirou martheene khate-lhangrei kadtheeyeinung heirou nane-arouri nung marthingni allou waiyoulei toubine kyun, heinakrimne kinnikhi kat'allei. 56Lhangai karsa thimirap! Nane nungthoura heirou thleirakhi thibine nungmartheeyei ngamrou yunchanglei; heiyanungri nane angtuei chaan aei ngamrou koutounei yunchangmak?”
Nangle Karhoukril Thimi raple Karyalrilnung Toulak
(Mt 5.25-26)
57“Nari koutounei lhangai lhouya tounanungei naitamya pichar toumakleiyo? 58Thimi hukhatne neiya theibaangbine pichar pu maibongranung uryeinung, pichar bi heirou wa'tlungbongnung neiya theibaang thimile karyalrilbi tlou luirilnanungei toulak, nangne heisi toumakanungri ane neiya pichar maibongra tangchabine, heirou pichar puni neiya lhousillaei hutra pilhakrou, heitoubi raallui puni neiya kulla chalphopnanung pilhakurou. 59Keine nanung tanghakne yunpilei, touri, heirouri nangne chuibom thukya chuibongyen kulra chalphopbi leirouwa.”
Currently Selected:
LUKE 12: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
