LUKE 11

Jesu'ne Dunpunung Shunchanei Ngamrou Marnopi

(Mt 6.9-13; 7.7-11)

1 # Mk 1.35; Lk 3.21; 5.16; 6.12; 9.18,28; 5.33; 7.18. Heitoubi nungkhatnui Jesu'ne bi khatrou shunchabi leiyeinung, heirou Aiyei shuncha hei luiyurbi, heihillou Aiyei ruishik hangrei napung khatne wabi Anung washun “Upawa, John'ne aiyei ruishik rapnung shuncha marnopinakne kanungkhi bei marnopilak.” 2Heirou Jesu'ne yanungei shun, “Nane Dunpunung shunchayeinung asitoubi shunchalak: ‘Pawa, Neiyei khying min heiri rikrai khrumkna hoiniyasu; Neiyei Krungram yennakpiyasu. 3Kaiyei tlainiserrei chaanung-mainungkhi kanthritmakne pilak. 4#Mk 11.25; Mt 18.35. Kanekhi kanungei lalkur thimi rapya kukpikur heinaksine, kaiyei mralya namma marthingyerlak. Heitoubi kaya malhimnara dayerpimaklo.’ ” 5#Lk 18.1-8. Heirou Jesu'ne Aiyei ruishik rapnung shun, “Na hukounakne aiyei palui napung khatdei cheemra masa yantrimnung wabine anung, ‘Keipalui, keine neirouwei mumtol tumkhyumcha puklouriyeise. 6Keiyei palui khat ramkhei chanarou asinunghak keicheemra wa'tlungura, heirou keine anung pichanungei kouchakhatkhi khoumakura!’ toubi wabulanungri, 7heirou neiyei palui heiwane cheemwairei kanthoumakne, ‘Keiyari marhotpimakalo, keipalui! Asinungri cheemkharkhi thungurbi hangkhi rotdurla, heirou keiyei chanao rapkhi keile kalhonne khumdoura ipburchiya. Heine keiri kanthoubi neinungei koukhatkhi loupichangmarou,’ toubi loumallangrouko? 8Lhangaiya, heiyanungri keine nanung tanghakne kyunri, ane aiyei palui hoiyanungkhi loukanthoubi anungei koukhatkhi pinimakhi kya, heiya hoiyanungkhi ane khyamakne kalleng-kallengne buchanei ngamrou ane loukanthoubi aiyei changbomthuk namyerwa heiya loupithutrou. 9#Mt 7.7-11. Heini ngam hoibi Keine nanungei yunpilei: Nane buchalak, heiyanungri nanungei pirou; nane raphalak, heiyanungri nane pharou; cheemkhar hei'umlak, heiyanungri nanungei loulaatpirou. 10Ngamri bucha thimi kantangnung buchakur heiya pirou, heirou huhune raphalanungri, yai rapha heiwaya pharou, heitoubi cheemkhar umbine kngaak thimi heinungri laatpirou. 11Naitlakra hunaksi pa khat khoine neiyei chawane thanga bulanungri frulya loumanpirouko? 12Nimanung neicha napawane waayui-tuishim bunarou hune chogkheya loukhulpirouko? 13Lhangaimak thimirap nanekhi naiyei chanao rapnung lhangaiya piniyanungri, Thangmun ramra klei Pawane Anungei buchakur thimi rapnungei duine Lhawai Khyingya pinimakrouko!”

Jesu'le Be-elzebul Marhilkna

(Mt 12.22-30; Mk 3.20-27)

14 # Mt 9.32-34. Heirou Jesu'ne tlou thukmakei klei napawa khatrouwei lhim hulthutpikur heirouri tallengne, napawa heiri tlou yunthut manekur. Heirouri thimi rapne beimak ngakkur, 15heiya thimi thaneri atoubi yunthu, “Heiwari lhim rapbei upawa Be-elzebul'ne Anungei mantrang piwurbi, heirou Ane lhimya hulthutkurme.” 16#Mt 12.38; 16.1; Mk 8.11; Jn 2.18; 6.30. Heitoubi thimi dei rapne Jesu'ya rou'kyaowei tloune yunbine, A heiri Dunpuei yapikur thimi hoiyanungri Thangmunrei kngakei lhouya touthutlaklo toubine Anung kngai. 17Heiya Jesu'ne yai kningya muwurbi, heirou Ane yanung kyun, “Ram khatne yaitamtom ngaallurbi lhang-lhang karkhairou dawanungri, ram heiri kouniroukhi pulchimakrou; heinakrimne cheemmai khatne aitamtom karhoukril hoiyanungri, bommai heiri lhang-lhang darou. 18Heinakrimne kraoei krungbomra yane khatle-khat ngaallanungri, heirou yai krungbom heiri kousitoubi pulchirouwo? Nai kyunri, Be-elzebul'ne Keinungei mantrang piwurnei ngamrou Keine lhimya hulthutkur toulei. 19Heiyanungri Keine yaya Be-elzebul'yei mantrangne hulthutkur hoiyanungri, heirou naiyei hilthung thimi rapne yaya koutoubi hulthutrou? Heisi toulanungri naiyei hilthung thimi rapne naya chimmakme toubi murou! 20Heiwari nimak, heinung'tlimri Keine Dunpuei mantrang heiwane lhimya hulthutkur, heiwari Dunpuei Krungbom heiri naidoura yennakkura tounei tlouya mu'kyer. 21Heitoubi mantrang napawa heine hutshu marshikbi aiyei Krungbom heiya chakngaakbine leiyanungri, aiyei lalthum namyerwa heiri deekbai thukmakrou. 22Heiya aya duine mantrang napawa khatne aidoura raal kardoubine, heitoubi aya manewurlanungri, heirou ane cheempuei hutshukhi heirou aiyei lalthum nammakhi lunglouheirou. 23#Mk 9.40; Lk 9.50. Huhune Keiyei thimi hoimanungri, a heiri Keile karhoukril thimi hoirou; huhune Keile kalhonne markumnara trungpimak thimi heiri Keiyei markumkhouya thaichek thimiso.”

Lhangaimak Lhawai Hanui Kallenglhak

(Mt 12.43-45)

24“Lhangaimak lhawai khatne napawa khatrei thukkurbine heirou ane tlaipang karyoune karngana bi yenraphabine karwaichakhou. Heitoubi ane bi khatchakhi rapha'mumaknarou, ane atoubi kyun, ‘Keine keicheemra hanui kallengthurouwa.’ 25Heirou ane aiyei cheemra hanui yenkallengeinung, aiyei cheemri lhangaidui marthingni louklei ane hungkmu. 26Heirouri ane hanui thukkurthubine aya duine lhangaimak lhawai enitamya hanui yenruilhakthu. Heirouri napawa heiri tirreiya duine lhangaimak thimi hoiyura.”

Chimmei Nungkngai

27 # Lk 1.42; 23.29. Heirouri asitoubi thukkur, Jesu'ne tlou namyerwa yunchikur hillouri, thimi chungna tlakrouwei napuiya khatpini kanthoubi anung kyun, “Neiya pukkhoubi pomtangkhoupi napuiya heiwiri kounakne nungkngai hoirouwo!” 28#Lk 8.21; Jn 15.14. Heiya Jesu'ne loumallang, “Heinung tlimri, Dunpuei kyunya ninglhakbine heiyei hilthung thimi rapri kounakkei nungkngai hoirouwo!”

Kngakei Lhouya Touyerknine Shuncha

(Mt 12.38-42)

29 # Mt 16.4; Mk 8.12; Lk 11.16; Jn 3.4-5. Heirouri thimi rapne Aya karhilne wakar'umnarouri, Ane loushun, “Angtu chaanyei thimi rapri kounakkei lhangaimak hoiyuranu! Yane kngak lhouya touyerknine shunlei, heiya yanungei kngakei lhouri Thimkhui Jonahyei ngamrou nimakne deiri koukhatkhi mutpimarou. 30#Jn 3.4. Heinakrimne Thimkhui Jonah heiri Ninevehyei thimi rapnung kngakei mu'kna hoiyernakne, Thimiyei Chanapawa heikhi angtu chaanyei thimi rapnung kngakei mu'kna hoiyerrou. 31#1 Kr 10.1-10; 2 Ch 9.1-12. Pichar tounei tlainirouri Sheba'yei Krungei nu heiwini mayungbine, heirou angtu chaanyei thimi rapya ane klal theibaangeirouso, ngamri ane airamya lakurkhoubi ram karyoune yenkarwaichabi Solomonyei shingkheiyei tlou shunmatukhoupi heiya ningnungei wakhou. Arouri Keine nanung tanghakne yunpirou touri Solomonya duiyei tang thimi khat leileihui. 32#Mt 12.6; Jn 3.5.Heitoubi picharrei tlainirouri Ninevehyei thimi rapne mayungbine naya klal theibaangeirou, ngamri Jonahni lhangai pao shunthutkurya mayeknarou, heirou yane yaiyei borh'rouwei ukning hungurkhou; arou Keine nanungei tanghakne yunpilei touri, arouwei Jonahya duiyei tang thimi napung khat leileihui!”

Sharungei Kwaar

(Mt 5.15; 6.22-23)

33 # Mt 5.15; Mk 4.21; Lk 8.16. “Thimi hukhatnekhi shirek meisharya manshokbi koukhatnekhi malleyerbine khoumak, nimanung shangphaine khupkhalbi khouwurmak; heinung'tlimri, ane meisharya dunna doura khoubine, heirou cheemwaira wachang thimi namyerwane kwaar heiya mu'kyer. 34Naiyei mitlung heiri nai sharungei kwaar meisharnaksi. Naiyei mitlung heine lhangaimakanungri, naiyei sharung namyerwakhi kmeh hoirou. 35Heini naiyei solha heiri kmeh hoiyurmaknung nane mukheine yrengchalak. 36Naiyei sharung heine kouroukhi kmeh naimakne, pulne warranungri, shirek meisharni naya warkyernakne, naiyei sharung heikhi bi kantangrou kwaar hoirou.”

Jesu'ne Lhangai Karsa Thimi raple Heirou Tloulamei upa rapya Klaldayer

(Mt 23.1-36; Mk 12.38-40)

37 # Lk 7.36; 14.1. Heitoubi Jesu'ne tlou kyun luikur hillouri, Lhangai karsa napawa napung khatne cha'kmai marshikbine Aya cheemra pulne chamaimalnanungei wa'ung; heisi tounarouri Ane wabine aicheemra chamainungei ommalnakur. 38#Mk 7.1-5. Heirou Jesu'ne chamairou youyeinung hut chikmathaimaknei ngamrou Lhangai karsa thimi heiwari beimakne kngakni heithikur. 39#Lk 7.13. Heisi tounarouri Jesu'ne Lhangai karsa thimi heiwanung kyun, “Asitoubi lhangai karsa thimirap nane naiyei chakpang-kaikamya baoratom marthingni rsilmthaibine, heiya naiyei ukrilrari mardunni heirou lhangaimakne thimlei. 40Yuntlungmak thimirap nari! Rilwaikhi heitoubi baoyakhi sheempi puri Dunpu nimako? 41#Tit 1.15; Mk 7.19. Heiya nane kanring thiminungri naiyei chakpang-kaikam rilwaira klei lhangaimakyatom pibine, heirou nane tharmuei lhoura namyerwa marthingame toubine ningchalei. #Mt 23.25-26. 42#Mt 23.23-25; Lev 27.30; Mic 6.8. Lhangai karsa thimirap, nanungri beimakne lah'kna shakrung hoilei! Ngamri nane Dunpunung kumserrei trunwai, anna-lounaya, heirou muiknam heengna-ronaya macha khatdei siruk chipri makatbi leilei, heiya nane Dunpunung chimle malungshiyei ukning heiri lhou hoimakne toulei. Heini nane deidei rapyakhi karkulmakne, chimle malungshiyei lhouya tounanung marnolak. 43#Mt 23.6-7; Mk 12.38-39; Lk 20.46. Lhangai karsa thimirap nanungri kounakei lah'kna hoilei! Nari Pukhrumna Cheemrari omna chounaratom omkni, heitoubi keithil tlailamrakhi thimi chungna maibongra naya chouni rikrai khrumyernilei. 44#Mt 23.27. Nanungri kounak klahyei shakrung hoirouwo! Heitoubi nari lhankul shunkhalmak lhanpurnak hoilei, heirou thimi rapne mumakne doura robaangurbi heiya tatputlhakbi dalhakur heinaklei.” 45Heirou Tloulamei upa napung khatne anung kyun, “Upawa, neiyei heitoubi kyun heiri kaya laoknaei tlou!” 46#Mt 23.4. Jesu'ne anung loumallang, “Tloulamei uparap, nanungkhi beimakne lah'knaei lhoulei. Nane thimi rapbei namkalla urchangmaknung put khritya khangbaangbine, heiya nari naiyei hutmayungcha khatnekhi yaiyei put kharit heiwaya trungpinanungei lamthutnemaklei. 47#Mt 23.29-32; Pao 7.51-53. Nari kounakei thuithikurreiyo! Nane Thimkhui rapbei lhanya lhangaidui mansambine khoupi - heiya yayari nai nutar-patar rapne hatdurkhou Thimkhui rapme. 48Nane naitam yunkna, touri nai nutar-patar rapbei touwurkhou lhou rapya hil-chanthunglei; heiya yane Thimkhui rapya hatdurkhoubi, heirou nane yai lhanyaori lhangaidui mansambaangbi khoupilei. 49#1 Co 1.24; Col 2.4. Heitounei ngamrou Dunpuei mukheiyei tloune yunkhoupi, ‘Keine Thimkhuirap heirou Paocha thimi rapya yenyilpirou, heirou yane thayari hatdurou heitoubi thayari klah-knang piwurbine marhotdurrou.’ 50#Mt 23.34-36. Heine angtu chaanyei thimi rapya bongei tlaipang kanretirrei waiyoubine hatkur Thimkhui rapnung'tlim klah-knang dayerrouso, 51#Kan 4.8; 2 Ch 24.20-21; Zec 1.1. moi, Keine nanungei tanghakne shunlei, Abelya hatkurrouwei waiyoubine heirou thraishang rilwaira khrahpalle Khyingei bom khintam tlakrou hatkur Zechariah'yei chaan phane yai ngamrou angtu chaanyei thimi rapya klah-knangei tanti piyeirouhui! 52#Mt 23.13. Tloulamei uparap, ulleiyo naidoura kounakne lahnaleime! Nane roushingya marpeikhouna bomyei hangya louheila, heirou nahaknekhi bom heirouri changnimaklei, heitoubi wachangkni thimi rapyakhi nane loumarhotbi changyermaklei!” 53Jesu'ne bi heiya lakurkhoubi shaalkur heirouri, Tloulamei upa raple heirou lhangai karsa thimi rapne Aiyei leinara wachangbi beimakne malungkhane yuncharilkur, heitoubi lhoubom chungwaei ngamrou Anung beimakne ngaibine, 54#Mk 12.13. heirou Ane tlou yunshuila'nungri klal dayerna'nungei rou'kyao tloune kngai.

Currently Selected:

LUKE 11: MARIBSI

Highlight

Copy