LUKE 10
10
Jesu'ne Ruishik Napung Somretle-khniya Pao Chananungei Malhet
1 #
Mk 6.7; Lk 9.1-2,51-52; 7.13. Heiyei hillouri Upawane napawa napung somretle-khniya khalthutbi, heirou yaya yulthung kantangra, heirou bi kantangra lamkrini louchananungei toubi napung-khni-khni kalhonne watyilnung marshikkur. 2#Mt 9.37-38; Jn 4.35. Heirou Ane yanung shunmatupikur, “Luknungei trunwairi beimakne chunglei, heiya lukpirou thimiri chungmaklei. Heine nane loupunung shunchalak, heirou Ani trun heiya luknanungei lhouchur thimirap yenyilpirou. 3#Mt 10.7-16; Mk 6.8-11; Lk 9.2-5; 22.35-36. Nane chawalo. Thilak, yekshang tlakra yaoshun klei'nakne Keine naya malhetlhaklei. #Mt 10.16. 4#Lk 9.3; 2 Kr 4.29. Nane tuy kaokhi urmak, nimanung koukouya painanungei kaokhi urmakne chawalo, nimanung khorkhangkhi urmakne chawalo; heitoubi lamrakra karyimbi thimi hukhatnungkhi tlou kallangkhoumakne chawalo. 5#1 Sa 25.6. Heitoubi nane kounaksi cheem khatra wachangeinung, ‘Naicheem arou kying hoiniyasu’ toubine lamkrini wayunlak. 6Heirou cheempu heine kyingei thimi louhoiyanungri, nai kyingei tlou wabekur heiso aidoura leiniyasu; hei nimanungri nai kyingei tlou bekur heiso nanungei hanui kallengneyasu. 7#Lk 9.4; 1 Co 9.6-14; 10.27; 1 Tm 5.18; Khn 24.15. Heitoubi nane cheem heirou yarekbine, heirou cheempu heine nanungei koukouya chamainungei marshikpi heiwaya chamaibine bi heirou nane yarekkhoulaka, kouweiyo toulanungri lhouchur thiminungei aiyei churnei klahman marshikpiri youkna. Heitoubi nane cheem khat'rouweine cheem khatra chutchane leikhoumakneya. 8Heitoubi nane khukarthil khatra wachangeinung bi heirou yane naya louropilanungri, heirou yane nai maibongra marshikbine loudunpikur heiwaya chamailak; 9heitoubi khukarthil heirou kna thimi rapya raiyerpikhoulak, heirou nane yanungei atoubi shunpilak, ‘Dunpuei Krungbom heiri nai pongra yennakura.’ 10#Lk 9.5; Pao 13.51; 18.6. Heiya nane khukarthil khatra wachangeinung, bi heirou naya louropimanungri, heirou nane khullamra wathukbine atoubi yunkhoulaka, 11‘Kai homairei popkur nai khukarthillei rahuiya kane nai maibongra makhawurkhoulei, awari naya muthunglak tounei. Heiya nane mulaka touri Dunpuei Krungram heiri naipongra yennakkura.’ 12#Mt 10.15; 11.24; Kan 19.24-28; Jud 7. Arou Keine nanungei tanghakne yunpilei touri Dunpune pichar tounei tlainirouri naiyei khukarthil awaya duine Sodomei khukarthilni Dunpuei kringpiya phaeirouso!”
Uklum Makna Khukarthilrap
(Mt 11.20-24)
13 #
Isa 23.11-18; Ezk 26.1—28.26; Jol 3.4-8; Ams 1.9-10; Zec 9.2-4. “Chorazinyei khukarthil, nanungri kounak lah'knaei shakrung hoikurawo! Bethsaida'yei khukarthil, nanungkhi lah'knaei shakrung hoileime! Naiyei khukarthil rapbei rilwaira touwurkhou kngakei lhourap heiya Tyrele Sidonyei khukarthil rilwaira mutpikhoulanungri, khukarthil heiraprei klei thimi rapne koulumnungkhi yane ombine, phichunya upbine, heirou yaiyei lura rahui chaiphangbine thleira kalletchabi, yaiyei lhangaimak lhou raprei yane ukning hungurlame toubi mutnanungei touwurlarou! 14Heiya Dunpuei pichar tounei tlaini heirouri nanung'tlimri Tyrele Sidonyei thimi rapnungei duine Dunpune kringpirou. 15#Isa 14.13-15. Heitoubi Caperna-um nangri neitamya nungthou katokni khangbangnileinu! Heiya neiyari khiya ramra namsundapirou!” 16#Mt 10.40; Mk 9.37; Lk 9.48; Jn 5.23; 15.23; Jn 13.20; 12.48. Jesu'ne Aiyei ruishik rapnung kyun, “Huhune naiyei kyun tlouya ninglhak thimi heiri Keiyei kyunkhi ninglhakrou, heirou huhune naitlou ningnemak thimirap heiri Keiyei tloukhi ningnemakrou, heirou huhune Keiya yanimak thimirap heiri Keiya yenyilpikur Ayakhi yanimaklei.”
Ruishik Napung Somretle-khni Yenkalleng
17Ya napung somretle-khnine yenkallengeinung heirou yane hakraone kyun, “Upawa, hyingmak lhim rapnekhi kane Neiminra yaya chay pinarou, yane louchanthungkur!” 18#Jn 12.31; Kre 12.8-9; Isa 14.12. Heirou Jesu'ne yanung loushun, “Keine Satanya nungthourei liptlai kwaarnak yongdakur loumuthungkur. 19#Kan 3.15; Laa 91.13; Mk 16.18. Louninglak! Keine nanungei manenei mantrangya piwurla, touri, nane frulyakhi heirou chogkheyakhi churchangrou, heitoubi naya karhoukril thimi rapyakhi nane manerou; heirou yane naya koukhatkhi touyemkur manemakrou. 20#Hoy 32.32; Laa 69.28; Dan 12.1; Mt 7.22; Php 4.3; Heb 12.23; Kre 3.5; 13.8; 21.27. Heiya hyingmak lhawai, lhim rapne naiyei kyunya chanthungleime toubi heiwirou nane malungambi haraokur toumak; heinung'tlimri naiminya Thangmunrei Lailikra mayewurkhoulame toubi nane nungaiyalo.”
Jesuei Nungkngai
(Mt 11.25-27; 13.16-17)
21 #
1 Co 1.26-29. Heitoubi kheen heirou Jesu'ri Lhawai Khyingei ngamrou Aiyei ukningra nungkngaine thimmurbi Ane kyun, “Pawa, Thangmun heirou tlaipangeikhi Dunpu! Keine Neiya mathanglei, ngamri Nangri mukhei thimi rapnungle heitoubi marno thimi rapnungkhi mutthutmakne muei khoukur lhoubom heiya muheimak thimi rapnung heirou marnomak thimi rapnung kandangyerpila, Moi, Pawa, Neiyei hoiyerkniri heinakrime. 22Keiyei Pawane put namyerwa heiya Keinungei piwurkhoula. Chanapawa heiri huwo touri Pawanetom nimakne dei hukhatnekhi mumaklei, heirou Pawari huwo toukhi Chawanetom nimakne, heirou Chawane khalthutdurbi muyerkur thimi nimakne dei hukhatnekhi mumakrou.” 23#Jn 8.56; Heb 11.13; 1 Pt 1.10-12. Heirouri Jesu'ne Aiyei ruishik rapbei lhangra kallekbine Ane yanung munne kyun, “Naimitdei mukur heirapya kmu thimiri likarsui lhangailei! 24Keine nanung tanghakne shunlei touri, bongnung Thimkhuirap heirou Krung rapnekhi nai kmu rapya mu'kni, heiya yane mukhou'changmak, heirou nai myekkur heirapya yanekhi mayekni, heiya yane heirapya mayekkhoumak.”
Lhangai Samaria Napawa Napung khatdei Ngamei Yailim
25 #
Mt 10.16; Mk 10.17; Lk 18.18. #Mt 22.34-40; Mk 12.28-34. Tloulamei upa napung khatne wabi Jesu'ya rou'kyao tloune wakngai, “Upawa, klui naimak khringei rongchanya phananungei keine kou touserouwo?” 26Heitounei Jesu'ne anungei loukngai, “Tloulamra kousitoubine yunlei? Heitoubi nangneri heirapya kousitoubi pamulei?” 27#Khn 6.5; Lev 19.18; Rom 13.9; Gal 5.14; Jas 2.8. Heirou napawa heine loumallangkur, “Upawa, neiyei Dunpuya neiyei ukning rilchangni, heirou neiyei lhawai kyaone, neiyei mantrang nammane, heirou neiyei solungne muidane malungshilak, heirou neiyei cheemlhunrei thimi rapyakhi neitamya malungshi'nakrimne malungshilak.” 28#Lk 20.39; Lev 18.5. Heirouri Jesu'ne anung shunpikur, “Neiyei mallangkuri chimbillei, heine nangne heinakrim toulaka; heisi toulanungri nangne khring chaanya pharou.” 29Heirou Tloulamei Upawane aitamya chimyerknine, heirou ane Jesu'nung loukngai, “Keiyei cheemlhunrei thimi touri huwo?” 30Jesu'ne loumallang, “Bongei chaan khatrou napawa napung khatne Jerusalem'rouweine Jericho'ranung yuchumnarou, lamrakra mucha thimi rapne aya manbine, putchei lunglouheibi, heirou khi'khlangne ummurbi, lamruira khinglhakurpi. 31Heitoubi kheen heirouri asitoubi thukkura touri, Suipipu napung khatne lam heirou yunarouri ane napawa heine kanelhakbi klei heiwaya munarouri, ane lam lhang khatra pillurkhoubi ralkur. 32Heihillou Leviyei napawa napung khatkhi yenralnarou, anekhi napawa heiya mulhakur heirouri, ane napawa heiya kallekthikhoubine, heirou anekhi lam lhang khatra theiwurbi ralkur. 33#Lk 9.51-56; 17.11-19; Jn 4.4-42. #2 Ch 28.15. Heiya Samaria napawa napung khatne lam heirou hungnarou, napawa heiya ane mulhakur, heirouri aiyei ukningra napawa heiya beimakne kringnakur. 34Heirou ane napawa heiyei leinara wachangbi, napawa heiya watlhou toupiwurbine, aiyei sharungrei yemwurbi nawurna bi namyerrei doura shirek teiphangpibi, heirou phitumni lhompikur, heitoubi ane napawa heiya aiyei tungna sapuk doura khangbaangbi heirou ane thimi tlungna cheem khatra urlhakpibi aya kna thiyerpikur. 35Heitoubi heithangei tlainirou ane tuy denari khintam urthutbine cheempunung pikhou. Heitoubi ane cheempunung shunkhou, ‘Cheempuwa, nangne napawa aya beicha louthikulpilak, heitoubi neiyei changkur yuhal-tuy heiri namyer keine hanui heikallengeinung mallenglhakpirou.’ ” 36Heirou Jesu'ne atoubi kngai, “Nai khalnarouri ya napung khyumrou hune mucha thimi rapbei hutra klah dakur napawa heiya yai cheemlhunrei thimi khatnakne watlhou toupikur hoirou?” 37Heirou Tloulamei Upawa heine loumallang, “Napawa heiya lhangaine kringpikur thimi heiwarime.” Jesu'ne anung shunpi, “Nangkhi shaalbi heinakrimne toulaka.”
Jesu'ne Marthale, Mary Yakhu teinaoya Wathipi
38 #
Jn 12.1-3; 11.1-45. Heirouri Jesu'ne Aiyei ruishik raple, kalhonne wayeinung, yane yulthung khatra wa'tlungnarou, Martha toubi ung napuiya napung khatne aya louropikur. 39Heirou Mary toubi ung aiyei naowine Upawaei pongra ombine, heirou Aiyei marnopiya ningbi leinarouri, 40Martha heine aiyei lhoupang luichangmakurnei ngamrou ane malungkhawurbi, yai leinara wathukbine wakyun, “Upawa, keinaowine keitamtomya horkhouwurbi keine watlhou paang luichangmakur awaya Nangne mupimakurako? Keiya bei churtrungpinanungei Nangne ayakhi bei heishunpilaklo!” 41#Lk 7.13. Heirou Upawane anung loushun, “Martha, Martha! Nangri watlhou churnungei chungachakurnei ngamrou beimakne lhawai lahwuralei; 42heiya toumak yamak watlhou khat leilei. Maryne heinak chimmei watlhouyatom khalloubi toulei, heirou heinaksi lhou heiri thimi hukhatnekhi airouwei loukhei manemakrou.”
Currently Selected:
LUKE 10: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
