LUKE 9

Jesu'ne Ruishik Napung Chiple Khniya Watyilkur

(Mt 10.5-15; Mk 6.7-13)

1 # Mk 16.17-18; Jn 14.12. Heitoubi Jesu'ne Aiyei ruishikrap napung chiple-khniya ungmarkumbine, heirou Ane yanung lhangaimak lhawaiya hulthutnanungei heirou kna limlimyakhi raiyernanungei mantrangya pikur. 2Heitoubi Ane yaya Dunpuei Krungramei lhangai paolaaya shunthutnanung, heitoubi knakhi raiyernanungei Ane atoubi shunmatubi hilkur, 3#Lk 10.4-11; Pao 13.51. “Nane lamreinung toubi koukhatkhi urmakne chawalo; shungkrokkhi shinmak, kaokhi urmak, chaanung-mainungkhi urmak, tuykhi urmak, heitoubi nai linglikkhi khintam tlungne urmarthummak. 4Heirou naya lourobi unglhakna cheem heirou wa'tlungeinung, nane khukarthil heirouwei shaalbongyenri, cheem heitamrou leikhouniyalo; 5heitoubi naya thimi hukhatnekhi louropimanungri, nane yulthung heirouwei pothutdeinung nai homairei rahui makhawurkhoubi heirou yaya mu'kyer khoine mutkhoubine shaalluralo.” 6Heirou ruishik rapne bi heiwaya lakurkhoubi yane yulthung kantangra yenkarwaichabi, lhangaiyei paolaaya yenshunthutkur, heitoubi knakhi yentoulhangaikur.

Herod'ne Jesuei Ngamrou Tamungkur

(Mt 14.1-12; Mk 6.14-29)

7 # Mt 16.14; Mk 8.28. #Lk 9.10,19; Lk 10.17; Jn 1.44. Arouri Galilee'yei Krung Herod'ne thukbi klei Jesuei lhou namyerwa heiyei ngamrou mayeknarouri, ari beimakne tamungkur, ngamri thimi thaneri Yuiluppi Johnri khirouwei ringurthuwa toubi yunkril. 8Heitoubi thimi thaneri atoubi yunkril touri, Elijahri hanui hungthukkurthuwa, heirou thimi deineri bongei Thimkhui rapbei hangrouwei napung khatri ringthutdurthuwa toubine yunkril. 9#Lk 23.8. Heirou Herod'ne kyun, “Keineri John'yei luya dinyerwurla, heiya keiyei mayekbi klei napawa heiri huwo?” Heisi toubine ane Jesu'ya munanungei raphakur.

Jesu'ne Thimi Lishing-phangaya Pichakur

(Mt 14.13-21; Mk 6.30-44; Jn 6.1-14)

10Heitoubi ruishik rapne kallengbi yai touwurkhou lhourap namyerwa heiya Jesu'nung hungyunpikur. Heirou Ane yaya ruilouheibi, Bethsaida toubi ung khukarthillei bi khatranungei chakur. 11#Mk 8.4-10. Heirouri thimi rapne heiya mayeknarouri, yane Aihilla chungne chanthungkur. Heitoubi Ane bi heirou yaya lourobine, yanungei Dunpuei Krungramei ngamrou shunmatupikur, heitoubi kna thimi rapyakhi raiyerkur. 12Heirouri rawai kinni chipwairouri, ruishik chiple-khnine Anungei hungbi shun, “Thimi rapya yulyulla hillurlakalo, heine yane shaallurbi yaiyaiyei chaanung-mainung, heirou yareknanungei bi raphalakasu. Ngamri bi awari thimi karkulna ramhangme.” 13#2 Kr 4.42-44. Heiya Jesu'ne yanung loushun, “Nane yai chaanung-mainungei marshikpiwurlaka.” Heirou yane loumallang, “Kanung kleiri mumtol tum phanga tomchale, thanga khintam tomchaneya. Nangne kaya wayerniyanungri kane wabi thimi namyerwaei chaanung-mainungei loserouko?” 14(Bi heirou thimi napawathilni lishing phanga tlunglei.) Jesu'ne Aiyei ruishik rapnung shun, “Thimirap heiya napung somngasolne lingshaang khoine omyerlaka.” 15Heirouri yane Aiyei shunkurnakne thimi namyerya omyerkur. 16#Lk 22.19; 24.30-31; Pao 2.42; 20.11; 27.35. Heirou Jesu'ne mumtol tum phangale thanga khintamya shinbine, Thangmun lhangra mangalbi Dunpuya mathangkur, heitoubi mumtolle thanga rapya threlchaalbi, thimi rapnung yerpinanungei Aiyei ruishik rapnung malanpikur. 17#2 Kr 4.44. Heirouri thimi nammane ukthone chaamaikur, heirou ruishik rapne yai shaimaleikur tol'har raple thanga har'rap heiri shangphai chiple-khni bilbil thimni markumthungkur.

Peter'ne Jesuei Ngamrou Yunthut

(Mt 16.13-19; Mk 8.27-29)

18 # Lk 3.21; 5.16; 6.12; 9.28; 11.1. #Jn 1.49; 11.27; 6.66-69. Heirouri nungkhatnui asitoubi hungthukkur, Jesu'ne aitamtom shunchabi leinarou, Aiyei ruishik rapne Aiyei leinara wathukkur. Heirou Ane yanung loukngai, “Thimi rapne Keiyari huwo toubi yunrilleiyo?” 19#Mt 14.1-2; Mk 6.14-15; Lk 9.7-8. “Thimi thaneri, Nangri yuiluppi Johnme toubi yunrillei. Heitoubi thimi thaneri, Nangri Elijahme toubikhi yunlei, heirou dei thaneri, Nangri bongei Thimkhui rapbei hangrouwei khat ringthutkur heiwarime toubinekhi yunrillei,” toubi yane loumallangkur. 20#Jn 6.68-69. “Heiya naneri koutoulei? Heirou naneri Keiya huwo toubi yunnilei?” toubi Ane yanung kngai. Heirouri Peter'ne loukyun, “Nangri Dunpuei Christame.” 21Heirouri Jesu'ne yanung tlou ari thimidei hukhatnungkhi shunthutmaklo toubi rekrekni shunmatukur.

Jesu'ne Klah-knang Doubi Hirouyounei Ngamrou Ane Yunthutkhou

(Mt 16.20-28; Mk 8.30—9.1)

22 # Lk 9.43-45; 18.31-34; 17.25; Mk 10.33-34. Heitoubi Ane yanungei atoubikhi yunpikhou, “Thimiyei Chanapawa heiri beimakne laeirouhui, heirou Ayari yama-upa rapne, Suipipu upa rapne heirou Tloulamei upa rapnekhi yanimakeirou. Heitoubi Aya hatdurou, heiyanungkhi tlaini khyumnirouri khirouwei ringthutthurou.” 23#Mt 10.38; Lk 14.27. Heirou Ane ya namyernung kyun, “Hukounak khatne Keihilla chanthungniyanungri, ai'msha-aitamya yamakne, aiyei tlainiserei ruiya urbine, heitoubi Keihilla chanthungasu. 24#Mt 10.39; Lk 17.33; Jn 12.25. Ngamri hukounak khatne aiyei lhawai ringnanungei touthimi heiri maangrou, heiya hukounak khatne Keiyei ngamrou aiyei lhawai hormaangkur leiyanungri, a heiri kalpi pharou. 25Heitoubi hukhatne tlaipang namtomma manebi ane rkolbi khoubinekhi, heirou aiyei lhawai manganungri anungei kouya tungcha hoirouwo? Moi, chimri anungei koukhatkhi tungcha makrou! 26#Mt 10.33; Lk 12.9; 1 Jn 2.28; 2 Tm 2.12. Heitoubi thimi hukhatne Keiyei ngamrou, heirou Keiyei shunmatupikur tlou rapbei ngamrou rikrai phakur thimi heiri, Thimiyei Chanapawakhi, Ane Aiyei thang'alle, Aiyei Pawa Dunpuei thang'al heirou Thangring raple kalhonne yongeinungkhi Anung'tlim heinakrimne rikrai phaeirou. 27#Lk 22.18; Mt 10.23; 1 Th 4.15-18; Jn 21.22. Heirou Keine nanung tanghakne kyunri, arou klei thimi thari Dunpuei Krungbom heiya muphabongyenri khiya martammakhi yaoeirouhui.”

Jesuei Thang Holkur

(Mt 17.1-8; Mk 9.2-8)

28 # Lk 3.21; 5.16; 6.12; 8.51; 9.18; 11.1. Ane tlourap heiya yunchikur hillou tlaini chotni leibi heirou Jesu'ne Peter, John heirou James yakhyumya Ale kalhonne ruilouheibine, lhungdoura shuncharou kakur. 29Heirou Ane heisi shunchayeinung Aiyei thang heiri lailong holkur, heitoubi Aiyei shambkhi khngou'liplip alkur. 30#Pao 1.9-11. Heitoubi tallengne thimi napung-khnine Ale kalhonne tlou kallangrilkur. Yarapri Moses'le Elijah, 31#Lk 9.22; 13.33. heirou yakhukhi Thangmunrei thang'alne kalhonpikur, heitoubi Jesu'ne Dunpuei kning lhou heiya Jerusalem'ra tlungyerna'nungei ngamrou yunrilkur. 32#Jn 1.14; 2 Pt 1.16. Peter'le, aiyei palui rapri iplhakurbi louklei, heiya yane ipnarei kanthouweinungri, yane Jesuei thang'al heirou Ale kalhonbi klei thimi napung-khniya mukur. 33#Lk 5.5; 8.24,45; 9.49; 17.13. Napung-khni heine Jesu'ya lakurkhoubi shaalkur hillouri, Peter'ne Anung shun, “Upawa, kane bi arou klei awari likarsui lhangailei, heineri kane bi atamrou Pucheem khyumtam sabaangase, khatri Neinungei, khatpari Moses'nungei, heitoubi khatri Elijah'nung hoiyerrase.” (Aiyei kyun heiri kouwo touri akhi mumaklei.) 34Heirou Ane heisi yunbi leiyeinung, nungthou lhangrei rameini yaidoura yongbi heiyei lhimne yaya yukmallekur; heirouri rameini yaya yukmallenarouri yari beimakne chiyura. 35#Isa 42.1; Mt 3.17; 12.18; Mk 1.11; Lk 3.22; Jn 12.28-30; Laa 2.7; 2 Pt 1.17. Heitoubi ramei hangrouwei houkhatne atoubi yukpaokur: “Awari Keiyei khalthutpikur Chanapawa- nane Aiyei kyunya ninglhaklak!” 36#Mt 17.9; Mk 9.14-29. Heitoubi kyun hou heine dongkur heirouri, bi heirou Jesutom heiklei. Heirouri ruishik rapne koutlou khatkhi yunmakne riecha leikur, heitoubi yaimitne mulhakur thukkur lhoubom heiyei ngamrou yane thimi hukhatnungkhi yunthutpimakur.

Jesu'ne Lhimpop Napawa Douwa Khatya Kna Raikyer

(Mt 17.14-18; Mk 9.14-27)

37Heithangei tlainirou Jesu'le Aiyei ruishik napung khyumni lhungdourei yongchumyeinung, thimi chungwane Jesu'ya loumurilkur. 38Bi heirouri thimi chungna tlakrei napawa khatne ungraochabi loushun, “Upawa! Keine neinungei buchalei, keiyei khatchatom klei chanapawa heiya thilak! 39Lhimni aya manphopbine khouyeinung, heirou ane ungraochabi, thleira kanelhakur, heisitoubi aiyei takara chimphunkhi kathukkur; heisi toubine aitam aiyei sharungyakhi podtatkur; heirou lhim heine aya tekchakhi lakurkhoumak! 40Heirou keine neiyei ruishik rapnung shunbine lhimya hulthutdurpilo toubi buchanarou, heiya yane hulthut manemakkur.” 41Heirou Jesu'ne loumallang, “Nari kounakei uklum mak thimirap heirou lehyei lhoutou thimi rapbo! Keiri nale kounak tlane kalhonbi leiserouweiyo? Keine nale kounak tlane lhou urmalnaserouwo?” Heitoubi Ane napawa heinung shun, “Neiyei chanapawa heiya ara heilaklo.” 42Heirou napawa douwa heine wachangeinung lhim heine aya namkanelhakurbi thleira kalletchakur. Heisi tounarouri Jesu'ne lhimya chay pibi hulthutkur, heitoubi douwa heiyei kna heiya raiyerpibi aiyei pawanung silnapikur. 43#Lk 9.22; 18.31-34; 17.25. Heirou thimi nammane Dunpuei mantrangei lhou toukur munarou beimakne ngakurchi.

Jesu'ne Hanuikhi Aiyei Hinei Ngamrou Yunthutkhou

(Mt 17.22-23; Mk 9.30-32)

Heiya thimi rapne Jesuei toukur lhou rapya kngakni thibi leiyeinung, Ane Aiyei ruishik rapnung kyun, 44#Lk 18.32. “Keiyei kyun tlourap awari naiyei khnara ninglhakur hoiniyasu! Ngamri Thimiyei Chanapawa heiyari hutmantrang tlaipang thimi rapbei hutra pilhakrouwa.” 45#Lk 18.34. Heiya ruishik rapneri yunthutkur tlou heiri kouwo touri kanreni mumakura. Tlou heiri yanungei kandangne mutpimaknei ngamrou yane muheimakura, heirou yane hanui ngaimallangthuroukhi chiwurnei ngamrou lhoubom heiwaya ngaithimakne dongkur.

Hune Duiyei Tang Thimi Hoirouwo?

(Mt 18.1-5; Mk 9.33-37)

46 # Lk 22.24. Heirouri ruishik rapbei hangra hune tangdui thimi hoirouwo toubine yathilne tlou yeetrilkur. 47Heirou Jesu'ne yai ukningrei kning rapya munarouri, Ane douwa khatya khaangloubi Aiyei pongra mayungyerkur. 48#Mt 10.40; Lk 10.16; Jn 13.20. Heitoubi Ane yanung kyun, “Huhune keiyei minra douwa achaya loulhakpilanungri, Keiya loulhak hoirou; heirou huhune Keiya loulhak thimi heiri Keiya yenmalhetpi Ayakhi loulhak thimi. Ngamri naihangra nam'rouwei mandidui heichane na nam'rouwei tangdui thimi hoirou.”

Nale Karhourilmak Thimi Heiri Naiyei Hoirou

(Mk 9.38-40)

49 # Lk 5.5; 8.24,45; 9.33; 17.13. #Lk 11.23. Heirou John'ne kanthoubi loushun, “Upawa, napawa khatne lhim popkur napawa khatya Neiminra lhimkraoya hulthutpikur kane kmu, heirou kane aya toumaklo toubi kyun, ngamri, napawa heiri kaihangra kyao thimi nimak.” 50“Nane aya loukhampimak,” toubi Jesu'ne anungle heirou ruishik dei rapnungkhi shun, “Koungameiyo toulanungri, huhune nale karhourilmak thimi heiri naiyei hoirou.”

Samariya Yulthung Khatne Jesu'ya Loulhaknimakne Horkur

51 # Mt 8.19-22. Heirouri Jesu'ne Aya Thangmunra loubaangnanungei kheen hungtlungkur heirouri, Ane Aiyei ukningra ningmarshikbi Jerusalem'ra wananungei hoyoubi pothutkur. 52Heirou Ane Aiyei ruishik rapya lamkrini maibongra louhilkur, heitoubi yane Samaria'yei yulthungra Aya louronanungei loumarshikkur. 53Heiya thimi rapne Aya louropinimakur, koungameiyo toulanungri Aiyei lamtla heiri Jerusalem'ra'nungme touri yane loukmu. 54#2 Kr 1.9-16; Mk 3.17. Ruishikrap Jamesle John'ne heiya munarouri, yane Anung kyun, “Upawa, Nangne yapiyanungri bi arou kane Thangmunrei meitaya rosundayerbine ya namyerya tlumni kangyernileiko?” 55Heirou Jesu'ne yailhangra kallekbi yaya samkur, ngamri Thimiyei Chanapawa heiri miya maangyernanungei kyong nimak, heiya kalpinanungei kyong. 56Heitoubi Jesu'le Aiyei ruishik rapne yulthung deiranung raalbine chakur.

Hune Jesuei Hilthung Ruishikrap Hoichangrou

(Mt 8.19-22)

57Heirouri atoubi hungthukkura, yane heisi lam tlanarouri napawa napung khatne Jesu'nung kyun, “Upawa, keiri Nangne koura-koura chawanungkhi Neihilla chanthungrou.” 58Heirou Jesu'ne anung loushun, “Yekshang rapbeikhi masanung chaknanungei thleipur klei, heirou ramwaa rapbeikhi chaknanungei rabu klei, heiya Thimiyei Chanapawaeiri lu khaangbi karngananungei bi khatchakhi mak.” 59Ane napawa napung khatnung kyun, “Keihilla chanthungalo.” Heiya napawa heine loumallang, “Upawa, keiyari cheemra shaalyerrilak, heitoubi keine hungbi pawaei khiya ruiriyeise.” 60Heirou Jesu'ne anung shun, “Khi thimi rapne yaiyei khi rapya louruilaksu. Heiya nangri chabine Dunpuei Krungbomei tlouya shunthutpilak.” 61Napawa napung khatne kyun, “Upawa, keiri Neihilla chanthungrou, heiya lamkrini keiya cheemra shaalyerrilak, heitoubi keine hungbi cheemmairei thimi rapya hungkaryem khouriyeise.” 62Heirou Jesu'ne anung shun, “Hukhatne lou trunyeinung louhinya chukalleibi, hil'lhangra kallekbi mayungkur thimirap heiri Dunpuei Krungramei thimime touri karsukmakrou.”

Currently Selected:

LUKE 9: MARIBSI

Highlight

Copy