LUKE 8

Jesu'le Pulne Chamalkna Napuiyarap

1 # Lk 4.15; Mk 15.40-41; Mt 27.55-56; Lk 23.49. Heihillou tallengne Jesu'ne Khukarthil kantangrale heirou yulthung kantangra karwaichabine, Dunpuei Krungramei ngamrou lhangai paolaaya shunthutpikur. Heirou ruishik chiple khnikhi Ale kalhonbi pulne karwaichakhou, 2heirou napuiyarap thakhi, touri -lhangaimak lhawai tungbi leinarei hulthutdurbi kna raikur napuiya: Magdalene toubi ung Mary, (airouwei lhimkrao enitam hulthutpikur); 3heitoubi Herodyei shok rapbei phringki upa Chuzaei nu Joanna; heirou Susanna, heitoubi napuiya deideikhi yaiyaiyei manecha urthutbine Jesu'ya heirou Aiyei ruishik rapyakhi churtrungpikur.

Lungtuk Thimi Khatdei Ngamrou Yailim

(Mt 13.1-9; Mk 4.1-9)

4Heirouri thimi rapne yulthung khatdei hilla yulthung khatne, thang'knaini Jesuei leinara wakartilkur hillouri, Jesu'ne yanungei yailimei tloune atoubi loushunpikur: 5“Bongnung napawa khat louleikhou, heitoubi ane lung tukrou toubi wathukkur. Heirou ane yekulra trunwai lungya heisi yentuklhaknarouri, lung thari lamruira dalhakur, heitoubi lung rapri thimiyei hopangni tatmrekur, heirou ramwaa rapnekhi khulchaloukur. 6Heirou lung thaneri thlung hangra dalhakurbi katpukthut, heirou thleiphu maknei ngamrou trikcha rapri tallengne yentaarkur. 7Heitoubi lung thaneri thru hangra dalhakurbi, heirou thru trung rapne kadtangeinung trunwai trungrap heiri thruni karhukphopkur. 8#Mt 11.15. Heirou lung thari thleiphura dalhakurbi, lungrap heiri lhangaidui katpukthutbi ya heiri heikhi macha khat heikur.” Heitoubi Jesu'ne asi yunbine luilhakur, “Nane khna klei thimirap hoiyanungri, louninglhaklak!”

Yailim Tlou Rapbei Ngam

(Mt 13.10-17; Mk 4.10-12)

9 # Isa 6.9-10; Jer 5.21; Ezk 12.2. Heirouri ruishik rapne Jesu'nung heinaksi yailimei tlouri kouya kyunno toubine kngai, 10heirou Ane loushun, “Nanungri mideine muphamak Thangmun Krungramei ngamrou muei klei tlou rapya yunpiwurla, heiya thimi deinungri yailimei tloune shunthutpilei, heine yane yaimitne thirou, heiya yane muphamakrou, heitoubi yai khnane louninglhakrou, heiya yai loukning heiri kouyo touri yane mulhakmkrou.”

Jesu'ne Lungtuk Thimiyei Yailimya Yunkarshangpi

(Mt 13.18-23; Mk 4.13-20)

11 # 1 Th 2.13; 1 Pt 1.23. “Yailim heiri anakya kyun, ‘lung heiri Dunpuei tloulhang. 12Heitoubi lampaalla dalhakur lungrap heiri Dunpuei tlouya mayekbi, heirou lhangaimakne yaya malhimbi, tlourap heiya yai ukningrei louthutlouheibi, heirou yaiyei uklum heiwaya maangyerbi kalpi phayermakur heinak thimi rapya kyun. 13Heitoubi thlung doura dabaangkur lungrap heiri, Dunpuei tlouya hakraone ninglhakbi, heiwaya yaiyei ukningra khyukne loulhakmaknei ngamrou yaidoura klah-knang hungei kaalnung malhimnara dakur thimi rapya kyun. 14Thruhangra dalhakur lung rapri, Dunpuei tlouya mayekbine, yaichaanrou lhawai klah hungeinung heirou tlaipangei laldun hoikniyei ukningne martlaoloubine Dunpuei tloulhang rapya malumkur. Heitoubi yaichaanrou rong’tlungmakne dongkur heenghei'naksine karsukmak thimi rapya kyun. 15Thleiphu hangra dalhakur lungrap heiri, Dunpuei tloulhangya mayekurbi, yane lhangaine ukningra khoubine, heiyei hilthungne chabi, heirou yai chaanrou klui phane hei heikyer heinaksi thimi rapya kyun.”

Shangphaine Makhupbi Khoukur Meishar

(Mk 4.21-25)

16 # Mt 5.15; Lk 11.33; Mk 4.21. “Thimi hukhatnekhi meisharya manshokbi lukshangphaine makhubphopbi khoumaklei, nimanung ipna rkhum daakra dunbi khouwurmaklei. Heinung'tlimri ane meishar dunna meitharl doura dunbaangbine khoulei, heiyanungri cheemwaira thimi rapne polhakyeinung kwaar heiya mupharou. 17#Mk 4.22-23; Mt 10.26-27; Lk 12.2-3; Eph 5.13. Heitoubi koukhatkhi muyermakne munne khourouri maklei, heirou munne yulkhoubi klei namyerwa heikhi yulkhoumakne waarnara urthutdeirou. 18#Mk 4.24-25; Mt 13.12; 25.29; Lk 19.26. Heiyanungri nai mayekloukur heirapri mukheine nai ukningra khoulaka, ngamri thacha klei thimi rapnungri marthumni pilhakrou, heiya tekkhi mak thimi raprouwei aiyei thacha kleime toubi ningchakhou heiyakhi yertleng louthutrou.”

Jesuei Puiwi Heirou Aiyei Teinaorap

(Mt 12.46-50; Mk 3.31-35)

19 # Mt 13.55-56; Pao 1.14. Heirouri Jesuei puiwile Aiyei teinao rapne Aya murillou wakur, heiya thimi rapne chungachaknei ngamrou yane Aya murilchangmakur. 20Heitounei ngamrou thimi napung khatne Jesu'nung loushunpi, “Neipuile, Neiyei teinao rapne yuntlangmaira mayungbine Neiya murilknine ngaakbi leilei.” 21#Lk 11.28; Jn 15.14. Heisi tounarouri Jesu'ne yanung loushun, “Keiyei pui, heirou Keiyei teinaorap touri Dunpuei tlouya mayekbi, heitoubi heiyei hilthungei lhoutou thimirap heirime.”

Jesu'ne Yuilhou Trimkyer

(Mt 8.23-27; Mk 4.35-41)

22 # Mk 6.47-52; Jn 6.16-21. Nungkhatnui Jesu'ne Aiyei ruishik raple pulne malira polhakbi, heirou Ane yanung shun, “Kane samadruei khatlhang mnakra heirallase.” Heisitoubi yane heiralthutkur. 23Heirouri yane mali heisi hulbine wayeinung, Jesuri iplhakura. Heirou thilak, loumuthungmakne samadruei yuinalaak doura lhimnung kathukkurbi yuilhou katfyoukur, heirouri yai mali heiri yui boklhakurbi dumrou waiyoukur, heitounei ngamrou yari shuikngam thukna trumra leikur. 24#Lk 5.5; 8.45; 9.33,49; 17.13. Heirouri ruishik rapne hungbi Jesu'ya ipbi leinarei fyoubi shun, “Upawa, Upawa! Kari hirou youwane!” Heirou Jesu'ne ipnarei loukanthoubi, heirou Ane chay pibine martheele heirou yuilhouya shunkur; heirouri marthee heiwari trimkur heirou yuilhoukhi yendongkur. 25Heitoubi Ane aiyei ruishik rapya shun, “Naiyei uklumri koura leileiyo?” Heiya yari chi'knale kngakle kalhonne, yaitam yunkril, “Napawa ari huwo, kounaksi thimiyo? Ane martheele yuilhouya chaytloune shunwurnarou, heirou yane aiyei tlouya chanthunglei!”

Jesu'ne Lhimpob Napawa Napung Khatya Raikyer

(Mt 8.28-34; Mk 5.1-20)

26Heirou Jesu'ne Aiyei ruishik raple pulne mali hulloubine, Galilee Samadru mairowei klei Gerasa(Gerasenes) ramra wa'tlungkur. 27Heirou Jesu'ne samadru ruira honi wathukyeinung, bi heirou khukarthilra klei lhimpob napawa napung khatne Aya rorilkur. Napawa heiri phirulkhi yaomakne, cheemrakhi kallengmakne, lhanyaora karwaichabidik leikhou. 28#Mk 1.24; Jn 2.4. Heirouri ane Jesu'ya loumukurle tallengne, hou chouni ungraokur, heitoubi aitam thleira Jesuei hopongra kanelhakbi ungraobi kyun, “Choudui Dunpuei Chanapawa, Jesu! Nangri keirouwei kou maduwo? Keiya klah dayermaknungei keine Neiya buchalei!” 29Aiyei heitoubi buchakurei ngamri, Jesu'ne napawa heiyei rillei klei lhimkrao heiya thukkurnanungei chay pikur. Karyomne napawa heiya manbi hutrum-horumrakhi thirrui phonphopbine kulchalbi khoukur, heiya ane heinak rapyakhi thadtatdurbine, lhimkrao heine aya khukarthillei pura hulthutkur. 30Heirouri Jesu'ne anung loukngai, “Neiminri kousi ung?” Heirou ane loumallangkur, “Keiyei minri ‘Mob’ toubi ung,” kouweiyo toulanungri, anungei lhimkrao chungwane changurnei. 31Heirou lhimkrao rapne Jesu'nung yayari thleipur rilra malhetlhak-maknanungei buchakur. 32Kheen heirouri lhungdou mnaak khatra hog rul khat silbi klei. Heirouri lhim rapne yaya hogrullei hangra malhetlhakpilo toubi Jesu'nung buchakur, heirouri Ane yaya hogrul rapbei hangra malhetlhakur. 33Heirou yane napawa heirouwei thukkurbi hog rapbei rilla changkur. Heisi tounarouri hogrul heine lhungdou mnak kanyarra ranlhakbi, heirou ya namtomni samadruei rilra dalhakurbi martlaobi hikur. 34Heirouri hogsil thimi rapne thukkur lhourap heiya munarouri, yane trukurbi, pao heiwari khukarthilla klei thimi rapnungkhi karyoune hungtamkur. 35Heisitounei thimi rapne thukkur lhou heiwaya thirou toubi wathukkur, heirou yane Jesuei leinara wakarsilyeinung, lhimpob napawa heiri, aiyei kna lhangaiwurbi, Jesuei pongra phirul baangbine, mukhei-karbilni ombi louklei heiwaya yane wamukur. Heisi tounarouri ya namyerwa heiri beimakne chikur. 36Heirou lhouthuk heiya mulhakur thimi rapne yadikni yunkril, touri kousi toubi napawa heiyei lhimpop kna heiri lhangaikurasa! 37Heitoubi ram heiyei bi karyoune klei thimi rapne Jesu'ya yairam heirou leimaklo toubi shunbine shaalyerkur; ngamri yari beimakne chiyura. Heitounei ngamrou Jesu'ne mali tungbine shaalkur. 38Lhim-kraoya hulthutdurpi napawa heiwane Jesu'nung kyun, “Keikhi Nangle kalhonne chaeise.” Heiya Jesu'ne napawa heinung atoubi shunmatupibi hilkur, 39“Neicheemra kallenglaka, heitoubi Dunpune neinungei toupikur lhou rapya shunthutpilak.” Heirou napawa heine Jesu'ne anungei toupikur lhourap heiyei ngamrou khukarthil karyoune karwaichabi shunthutkur.

Jairus'yei Chanapuiya Heirou Jesuei Linglikra Thirthungkur Napuiya Khat

(Mt 9.18-26; Mk 5.21-43)

40Heirou Jesu'ne samadruei khatlhangra yenkallengeinung, thimi rapne Aya louropikur, ngamri ya namyerwane Aya karngeibine louklei. 41Heirouri Jairus toubi ung napawa khatkhi bi heirou wa'tlungkur, a heiri yulthung khatdei Pukhrumna Cheemrei lhou'urpu upa khat. Heitoubi ane Jesuei ho pongra khuklu kanthrunchabi heirou Jesu'ya aicheemra wananungei shunchakur, 42ngamri aiyei khatchatom klei kum chiple-khni tlung chanapuiya heicha hikur. Heirouri Jesu'ne heisi wanarouri thimi rapne Aya bi kantangrei louchanthungbi kar'umphopkur. 43Heirou yai hangra kum chiple-khnirek hee karsobi kna napuiya khatkhi loukyao; heitoubi aiyei kna heiri thim kounakyakhi yrothiyerbinekhi kna heiri raikyer manekhoumak. 44Ane thimi chungna tlakra wachangbine Jesuei hilla chanthungbi heitoubi Aiyei linglikchul msurra thirthungkur; heisi tounarouri aiyei hee karsokhou heiri tallengne kapbura. 45#Lk 8.24. Heitounarou Jesu'ne kngai, “Keiya hune therthungkuro?” Heirou thimi namyerwane hunekhi thirmakme toubi yunyeinung, Peter'ne loumallang, “Upawa, thimi anak chungwane Neiya kar'umphopbi leina arouri hune Neiya thirthungkuro toubi ngaiphakurya kouweiyo?” 46#Lk 5.17; 6.19. Heiya Jesu'ne kyun, “Thimi khatne Keiya thirthungurla, ngamri, Keiyei mantrang kanchaithutkur Keine mayekthungurla.” 47Heirou napuiya heiwini aya mulhakurla, heineri yulchangmarou toubi ningmuwurnei, ane kanchunle kalhonne wathukbi, Jesuei ho pongra khuklu kanthrunchane kanelhakbi, thimichung maibongra ane koutounei Aya thirthungkuro, heirou aiyei hee karsokhou heiri koutoubi raikuro toubi yunthutkur. 48#Mt 9.22; Lk 7.50; 17.19; 18.42. Jesu'ne napuiya heiwinung kyun, “Keichawi, neiyei uklum heine neiyei hee karsokhou heiri raiyura, heine neimalung khrahni shaallaka.” 49Jesu'ne heisi yunbi louleiyeinung, Pukhrumna Cheemrei lhou'urpu upawaei cheemrei napawa khatne wabi, heirou ane Jairus'nung washun, “Neichawiri hiyurame, heine Upawaya toulahmaka.” 50Heiya Jesu'ne tlou heiya loumayeknarou, Ane Jairusnung loushun, “Uksamak, nei'ukningra malungamni leiyalo, heine neichawi heiri lhangairou.” 51Heirou Ane cheem heirou wa'tlungeinung, cheemwaira Peter'le, John heirou James'le heirou nao heiyei pui-pa nimakne thimi deiyari hukhatyakhi Akou kalhonne wachangyermakur. 52Heirou thimi nammane nao heinung'tlim kanrillaa-sherni chapbi louleiyeinung, Jesu'ne washun, “Nari chapmakalo; nao heiri himakme, ipme!” 53Heitounarouri ya nammane Aya loulaokna, ngamri nao hei hiyurame touri yane kmu. 54Heiya Jesu'ne nao heiya hutbangra churbine kyun, “Napuiyacha, kanthouwalo!” 55Heirou nao heiyei lhawai hanui yenkallengbi tallengne kanthoukur; heirouri Jesu'ne nao heichanung koukou heipichalak toubine shun. 56#Mt 8.4; Mk 3.12; 7.36; Lk 9.21. Heirouri aiyei pui-pa rapri ngakkura; heiya Jesu'ne yanung thukkur lhou heiwaya hukhatnungkhi shunthutnung yamakme toubine chay piwurkhou.

Currently Selected:

LUKE 8: MARIBSI

Highlight

Copy