LUKE 14
14
Jesu'ne Kna Napawa Napung Khatya Raiyerpi
1Mathrilna tlaini khatrou Jesu'ne lhangai karsa rapbei upa khatdei cheemra cha'kmai marshiknara yaona'nungei wanarou, bi heirou thimi rapne Jesu'ya beimakne thirochabine louklei. 2Bi heirou hut-ho porfletkur napawa khat Jesuei leinara wachangkur. 3#Mt 12.10; Mk 3.4; Lk 6.9. Heirouri Jesu'ne Tloulamei uparap heirou lhangai karsa thimi rapnung tlou kngai, “Mathrilna tlainirou kna lhangaikyerri kaiyei Tloulamra karhanung lhou kouleilei?” 4Heiya yarap heiri koukhi mallangmakne rie louleikur. Heirouri Jesu'ne kna napawa heiwaya aiyei hutne yrothibi raiyerkur, heitoubi aya shaalyerkur. 5#Mt 12.11; Lk 13.15. Heitoubi Ane yanung kyun, “Nai tlakra aiyei chanapawa nimanung aiyei halpa khat dunnarou, Mathrilna tlainirou khurra dalhakuranungri, heiwaya taangthutpimakrou thimiri hu leileiyo?” 6Heiya yari hukhatnekhi aiyei kngai tlou heiri mallangchangmakur.
Ukning Marnim Heirou Kringpikhei
7Heirou thimi thane yaya mideine cha'kmai marshikbi ungeinung omnabom lhangainara omknine chancharap heiya munarouri, heirou Jesu'ne yanung yailim tloune kyun; 8#Par 25.6-7; Lk 11.43; 20.46. “Hukhatne naya nulounei cha'kmai marshiknaranung ungpiyeinung, heirou nane omna lhangainara omnanungei thiphamak. Ngamri naihangra naya duiyei bomtang thimi louyaokhi kya, 9heirouri naya ungbi klei cheempuni hungbine, ‘nai ombi louklei omnabom lhangaina arouwei chutdalo, heitoubi omna lhangaina arouri bomtang thimine ommasu’ toubi yunlanungri, heirou nari omna nimnara yong'omrou da, heirouri nari rikraikhi doupharou. 10Heinungchumri, nane wachangbi omna nimnara ombi leiyanung, heirou naya ungbi klei cheempu heine hungbine naya ane ‘Keipalui, omna lhangainara ka'ommalo’ toubi unglhakpirou. Heisi toulanungri marngeibi klei yama-krung kounakei maibongra mine naya rikrai khrumpirou. 11#Mt 23.12; Lk 18.14; Mt 18.4; 1 Pt 5.6. Huhune tang thimi hoiniya'nungri ukning marnim thimi hoirouda, heirou huhune ukning marnim thimi hoiyanungri aya tang thimi hoiyerrou.” 12#Jas 2.2-4. Heirou Jesu'ne aya ungloubi markhulpi Cheempu heiwanung shun, “Nangne cha'kmai marshikbine neiyei palui rapya, nimanung neiyei karnakril cheemkhur-rokhurrei thimi rapya, nimanung neiyei cheemlhunyei laldun thimi rapya ungbine marngeiyeinung-neiyei toupikurya duine yairouwei kallenglhaknungei toubine ningchabi ungmak, heiya neiyei toupiwurnei khlangri heisi kallenglhakrouri leileihui. 13#Lk 14.21. Ngam heine nangne cha'kmai marshikbine, kanring thimi rapya, hut-deek ho-deek thimi rapya heirou mitdeo thimi rapya unglhakpilanungri; 14#Par 25.6-7; Lk 11.43; 20.46. heirouri nangri phor pharou; heiyei ngamri yane neinungei koukhatkhi mallenglhak'nungri makkhi kya. Heiya tharmu chim thimi rapne katringthut tlainirouri Dunpune neinungei mallenglhakpirou.”
Khulbung Marngei Tang khatdei Yailim
(Mt 22.1-10)
15 #
Kre 19.9. Heirou cha'kmai marshiknara omkanthrin thimi rapbei hangrei napung khatne tlou heiya mayeknarouri, ane Jesu'nung kyun, “Dunpuei Krungramei marngeibi knei markhulnara omthungrou thimirap heiri kounakei nungkngai hoirouwo!” 16#Mt 22.1-10. Heirou Jesu'ne anung loukyun, “Bongnung chaan khatrou napawa khatne Knei tangne marshikbi heirou ane Yamarul chungne unglhakbi marngeinanungei wairangkhou. 17Herouri Cheempu heiwane aiyei shok rapya hillurbi thimi rapya unglhakyerkur, ‘wachangpiyalo yamarul, kneiyei cha'kmai marshikbi khouleime!’ 18Heiya thimirap nammane wachangmaknei malung-khamaknungei loubuchakur, heirou lamkri heiwane loushun, ‘Keiri yekul khat lolhakurla, heine heiwaya thikullou chamakri yamakarou; kringpibi keiyei shuncha ari yapilo, keiri wachangmakarou.’ 19Heitoubi thimi napung khatnekhi loushun, ‘Keiri halpa pu phanga lolhakurkhoula, heine keiri heirapya halput raktenanungei chakurra; kringpibi keiyei buchari yapilaklo keikhe wachangmakarou.’ 20Heitoubi napung khatnekhi loushun, ‘Keiri nu loubi ruilhaktirhui, heiyei ngamni neiyei ungnara wachangmakarou.’ 21Heirouri shok heiwane kallengurbi heirou tlou namma heiya aiyei Cheempunung hungshunpikur, heirouri cheempu heine malungkhane aiyei shokya heishun, ‘Khnotni chawurbi khullamra karwaichabi klei, heirou khukarthillei lamtlaira rochabi klei thimi rapya, heirou kanring thimi rapya, hutdeek-hodeek thimi rapya, mitdeo thimi rapya, namma yen'unglhaklaka.’ 22Heirou shok heiwane loumallangkur, ‘Upawa, neiyei shunkur chay heiri touwurlame, heiyanungkhi thimi omnanungei bomri chungne leileihui.’ 23Heisi tounarou Cheempu heine aiyei shoknung kyun, ‘Chathuwalo, khukarthillei, lamtangrei heirou lam banrakhi karwaichabi klei thimirap namyerya unglhaklaka, heitoubi Keiyei cheem heiri thimyerlaka. 24Keine na namnung tanghakne yunpilei touri Keine khulbung marngeinanung cha'kmai marshikbi ungkur thimirap heiso hukhatchakhi Keiyei marshikkur heiwaya martam’phamarou!”
Ruishik Khat Hoinei Manklu
(Mt 10.37-38)
25Heirouri thimi chungwane Jesule kalhonbi chayeinung heirou Ane yai lhangra kallekbi yanungei kyun, 26“Hutkhatne Keihilla chanthungrou dawanungri, ane aiyei charra-teinao rapya, heitoubi ai'msha aitamya malungshiya duine Keiya malungshima'nungri, a heiri Keiyei ruishikme touri hoimakrou. 27#Mt 16.24; Mk 8.34; Lk 9.2-3. Huhune aitamei ruiya urmakne Keihil chanthunganungri, a heiri Keiyei ruishik khoi manemakrou. 28Nai hangra hukhatne turngdou khat sabaangnung marshiklanungri, heirou lamkrini ane ombine sabaangrou kyou heiwaei manri kounakbil hoirou, heirou aihutrei klei heiri heiwaya sabaangbi luilhaknanung roleiyo nimanung romakleiyo toubi tribi thirirou da. 29Hei nimakne ane lamkrini cheemmunya thulbangribi, heihillou turngdou heiri sabaangeinung luilhakur manemakne leiyuranungri, heiwaya thibi klei thimi rapne aiyei toubi klei lhou heirou yane laonarou. 30‘Napawa heine cheem sabaangurbi heiwaya luilhakur manemakurame’ toubi yane yunnarou. 31Krung khatne aiyei raallui lishing chip urbine wathukyeinung, heirou Krung khatne raallui lishing somni urbi aya kardounungei louleiyanungri, heirou ane lamkrini ombine, aiyei raallui rapne krung khatdei raallui rapya kardouril manerou-manemakrou toubine lamkrini trithirou da. 32Hei nimanungri, ane wakarnakbongnung pao urrou thimi rapya louyilwurbi, kardourilmakne kyingne leirilnanungei lamkrini Krung heiwanungei shunchanungei tourou da. 33#Lk 18.29-30; Php 3.7. Heinakrimne, nane naiyei klei namyerwaya horkhoumanungri, na hukhatkhi Keiyei ruishik hoichangmakrou,” toubi Jesu'ne yenyunbi luilhakkur.
Karshukmak Mitti
(Mt 5.13; Mk 9.50)
34“Mittiri lhangai, heiya mitti heine aiyei mnikya makanungri, heirou mitti heiya hanui mnikyer manerouko? 35#Mt 11.15; 13.9,43; Mk 4.9; Lk 8.8. Heine mitti heiri thleira khingkur nimanung thulkhumra khremalamkur nimanungri koukhatkhi karshukmakrou. Louninglhaknanung khna klei thimi rapne ninglhakpilaksu.”
Currently Selected:
LUKE 14: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
