LUKE 15
15
1 #
Lk 5.29-30; 19.7; 8.8. Nungkhatnui ruithou thimi raple heirou mikul chalmak thimirap chungwane Jesuei marnopiya ningrou wakartilkur. 2Lhangai karsa thimi raple heirou Tloulamei upa rapne yaitam yunkril, “Napawa heiri mikul chalmak thimi rapya ungmartilbi heirou Ane yale pulne chamaibi leilei!” 3Heisi tounarou Jesu'ne yanung anakei yailim tlouya yunbi shunkur: 4#Ezk 34.11,16; Lk 19.10. #Mt 18.10-14. “Nai tlakra napung khatne aiyei yao macha khat leinarou, yai tlakrei yao khatcha kanwaiyuranungri, ane kou tourou? Ane yao somkole takoya ramhangra lakurkhoubine, heirou ane kanwaikur yao heichaya mubongyen raphamakrouwa! 5Heitoubi ane yao heichaya rapha mulanungri, ane beimakne nungwaiwurbi, yao heichaya aiyei lhabangra yenchungheikur. 6Heirou aicheemra yenkallengkur. Heitoubi ane aiyei paluirap, heirou aiyei cheemlhun thimi rapya ungmarkumbine heitoubi ane yanung kyun, ‘Keiyei kanwaikur yaoya rapha munarou, keiri beimakne nungwaiyura, heine ka nammane keile kalhonne haraowase!’ 7#Lk 15.10; Lk 19.10; Jas 5.20. Heinakrimne Keine nanungei tanghakne yunlei, ‘Borh thimi napung khatne ukning hungnarou, tharmu klei thimi somkole takoei ukning hungkurya duine Thangmun ramra nungkngai hoirou.’
Maangkur Tuychui
(Mt 18.12-14)
8“Heitoubi napuiya khatpini aiyei tuypik chiptam khounarou khatchari manganungri heirou ane kousi tourou? Heiyanungri ane shirek meishar manshokbine, heirou ane cheemwai karyoune therphabi, heirou ane tuypik heichaya mubongyen kalthi raphakur. 9Heitoubi ane tuypik heichaya raphamukur heirouri, ane aiyei palui rapya heirou aiyei cheemlhunyei thimi rapya pulne ungkartilbi heirou ane yanung kyun, ‘Keiri keiyei maangkur tuypik achaya rapha muwurnarou beimakne nungwaiyurame. Heini ka nammane keile kalhonne haraowase!’ 10Heinakrimne, Keine nanung tanghakne yunlei touri ‘borh thimi napung khatne ukning hungeinung Dunpuei Thangring rapbei bomra kounakei nungkngai hoirou.’ ”
Kanwaimaangkur Chanapawa
11 #
Mt 21.28. Jesu'ne heisi yenyunthu, “Bongnung chaan khatrou napawa napung khatdei chanapawa napung-khni pukkhou. 12#Khn 21.15-17. Heirou yakhu teinaowei tlakrei naowane yai pawanung atoubi kyun, ‘Pawa, kai cheemrei lalthum nam'rouwei keiyei phabomthuk siruk heiso khaipilaka.’ Heisi tounarouri aiyei pawa heine aiyei dunbi klei cheemrei lalthum namyerwa heiya aiyei chanapawa napung-khninung yerkhaipikur. 13#Par 29.3. Heihillou tlamakne leibi chanapawa yaimawa heiri aiyei phabomthuk lalthum namyerwa heiya yertlengwa yormathaiwurbi, heirou ane tuyhei urlouheibi, cheem lakkurkhoubi puichakur. Heitoubi ane miramra karwaichabi, aiyei klei tuy namyerwa heiya koukhi biso-bibal naimakne yrengkur. 14Heihillouri ram heirou purcham thukkurbi, heirou aiyei tuykhi luilhakurbi, putchei touri koukhatchakhi makkur heirouri, 15ane ram heirou klei thimi khatdei cheemra changbi lhou churnung ngaiphakur, heisi tounarouri cheempu heiwane aya yekulra watyillurbi, aiyei hog rapya silyerkur. 16Heirou ane hog rapne chabi klei hogchak rapyakhi beimakne madukur, ngamri hukhatnekhi anungei chaanung-mainungei koukhatkhi thulpimakur. 17Heihillou ane aitam ukningra ningchabi kyun, ‘Kai pawaei neekbi khou shok rapneyakhi, yane chamaleine rampha yaya thulbangpibi khoupilei, heiya keiri bi arou msulni hirou waiyouni leilei.’ 18#Laa 51.4. Keine kanthoubi kai pawaei bira kallengbi hungyunrouwa, ‘Pawa, keiri neiyei maibongrakhi heirou Dunpuei maibongrakhi borhyei lhouya touwurla. 19Keiri neichawa toubi ungyeroukhi kallonamakura; heine keiyari neiyei neekbi khou shok khatnakne loulhakpilak.’ 20Heisi toubi ane kanthoubi aiyei pawaei bira yenkallengkur. Heirou ane tlatnarei hungeinung aiyei pawane aya loumukur; heisi tounarouri aiyei ukningra beimakne kringpikur, heirou ane louchanrobine, aiyei chawaya lourkolbine machuppikur. 21Heirou aiyei chawane kyun, ‘Pawa, keiri Dunpuei bomrakhi heirou neiyei maibongrakhi shunya ningmakne borhyei lhouya touwurkhoula. Heini keiri neiyei chanapawa toubi ungnungeikhi kallonamakura.’ 22#Kan 41.42; Zec 3.4. Heirouri pawane aiyei shok rapya ungloubi kyun, ‘Khrangtoubi, duiyei lhangai linglikchul khat yenthutbi keiyei Chanapawa heinung nabangpilak! Aiyei hutmayungra hutshikhi luplhakpilak, heitoubi aiyei hora khorkhangkhi tunglhakpilak. 23Heitoubi nane chawurbi halshun marnam khat manbine hatlaka, heitoula toubi ka nammane pulne nungkngaiyei cha'kmai markhullase! 24#1 Tm 5.6; Eph 2.1,5; 5.14; Lk 9.60. Ngamri keicha napawa ari hikurnakne kanwaiwurkhou, heiya angturi ringthutkur'naksiyura, a heiri kanwai'maangurkhou, heiya angturi ari hanui hungthukkura!’ Heirou asitoubi chaak khaangbine haraokur.”
25Kheen heirouri cha upawa heiri yekulra chakur. Heirou ane yenkallengeinung, cheemra yenkarnakur heirouri cheemra laa shanei houle heirou phung-um daar-umnei houle, nuybi loukleiya ane hungmayekkur. 26Heitounarouri ane shok napung khatya unglouheibi ngaithikur, ‘Cheemrari kou toukurrawo?’ 27Heirou shok heiwane loushun, ‘Neiyei naowa heiri cheemra yenkallengura, heingammei nai pawane aiyei chawa heiri koukhi shuikngam makne hanui yenkallengthuwa toubi ane halshun marnam khat hatyerbine chaak khanglei.’ 28Heirouri cha upawa heiri malungkhawurbi cheemwaira hungchanglo touri yamakkur, heitounarou aiyei pawane wathukbi aya hungchangalo toubi wamanelkur. 29Heiya ane aiyei pawanung loumallangkur, ‘Thilak, kum kounak kralni keine neinungei shok khatnakne lhou churpi-pangpibi klei, heirou keine neiyei kyunya kouroukhi kartleikur toumakne chanthungpi. Heiya nangne keinungei kouya toupikur leiyura? Heirou tlangshuncha khatyakhi hatbine keiyei palui raple kalhonne chamaikurkhi makhui! 30Heiya neiyei chanapawa paryaiwa heine neiyei lalthum namyerwa markumloubi, kyun ningmakei lhoura chawurbi, lalthum namya yrengurkhoubi, heirou ane cheemra yenkallengnarou, nangne anungei manklu hal marnam khatya louhatpilei.’ 31Pawane loushun, ‘Keicha upawa, nangri keile karyom leikalhonlei, heirou keiyei klei lalthum namyerwa heikhi neiyeithil. 32Heiya angturi kane nungkngaine markhulbi leirou da, ngamri neiyei naowa heiri hikurnaksi hoikhou, heiya asinungri a heiri ringkurnakura, a heiri kanwaiwurkhou, heiya asinungri a heiri phawurla.’
Currently Selected:
LUKE 15: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
