LUKE 2
2
Jesu Puknei
(Mt 1.18-25)
1 #
Lk 3.1. Heiyei kumrouri Krung Caesar Augustus'ne Rome Krungkullei klei ram namyerwa heiri thimi mshing shernanungei min mayebaanglaklo toubi chay pikur. 2Anakei lamkri thimi mshing shernei kum arouri, Quirinius'ne Syria'yei Rampu#2.2: Rampu: Governor. hoibi louklei. 3Heitounei ngamrou thimi napung kantangne ai'aiyei yultlaira kallengbine thimi mshing shernanungei min mayebaangnara yaokur. 4#Lk 1.27. Heirouri Joseph'khi Galilee ramra klei Nazareth yultlai heirouweine, Judea rammei Krung David'ya pukkhouna bi Bethlehem yulranung shaalkur. Joseph'ne bi heirou shaallurnei ngamri, akhi David'yei yu-cha khoi. 5Heirouri aiyei ngaimankhou Mary'le kalhonne thimi mshing shernara yaiyei minkhi mayebaangna'nungei shaalkur. Kheen heirouri Mary nao urbi klei. 6Heirouri yane Bethlehem'ra wa'tlungeinung Mary'ri nao puknei trum hungtlungura. 7Heirouri ane aiyei chanapawa shamran pukurla, heitoubi yundarni lhomphopbi, halchaak lhakna theengkungra phneibi khouwurla, ngamri bi heirou yane tlungnanungei cheem khatchatomkhi dingmakura.
Yaosil Thimirap Heirou Thangringrap
8Heirouri yulthung heiyei mnak khatra, bi khatrou yaosil thimi rapne ramhangra masanung yaiyei yao rapya chakngakbi louklei. 9#Lk 1.11; Pao 5.19. Heirouri Thangring khatne yanungei muyerbi, heirou yaidoura Dunpuei thang'alne yuk'alpikur. Heisi tounarouri yari beimakne chikur. 10Heirouri thangring heine yanung shun: Nari chimak! Kouweiyo toulanungri, keine nanungei lhangai pao shunpinung leilei, heirou pao heine thimi namyerwaya beimakne haraoyerrou. 11#Jn 4.42; Pao 5.31; Mt 16.16; Pao 2.36. Ngamri angtuhak David'yei Krungkulla Pu Christa, naiyei Kalpipu khat pukkurla! 12#1 Sa 2.34; 2 Kr 19.29; Isa 7.14. Heirouri nanungei asitoubi muyerrou: “Nane naoshun khat yundarni lhombi, halchaak lhakna theengkungra phneibi louklei wamupharou.” 13Heirouri tallengne Thangmunrei Thangring rapne kartilbi Dunpuya mathangnei laaya shabine, atoubi kyun: 14#Lk 19.38; 3.22. “Thangmunra Dunpuei thang chouni alniyasu, heirou tlaipang dourakhi Aiyei malungkhrah thimi rapnungei kying hoiniyasu!” 15Heitoubi Thangring rapne yai maibong'rouwei Thangmunra kallengkur, heirouri yaosil thimi rapne yaitam yunkril, “Kane Bethlehem'ra wabine, bi heirou thukkur heiya, heirou Dunpuei kanungei shunpikur heirapya wathiyase!” 16Heisi toubi yane khnotni wabine thinarouri, heirou Mary'le Joseph, heitoubi naoshun heikhi halchak lhakna theengkungra phneibi loukhou heiwaya yane wamukur. 17Heirouri yaosil thimi rapne aya wamukur heirouri, Thangringne yanungei naoshun heiyei ngamrou shunpikur heiwaya Mary'le Joseph yakhunung wayunpikur. 18Heirouri yaosil rapne pao heiya shunpinarouri, heiwaya mayek thimirap nammane ngakkur. 19#Lk 2.51. Maryne yai kyun tloubom namyerwaei ngamrou, heitoubi yaiyei ngamroukhi ukningra khyukne ningchabine leikur. 20Heirouri yaosil rapne yaiyei mayekkur, heirou yanungei muyerkur namyerwa heinung'tlim yane laa shabi Dunpuya mathangbi kallengkur; ngamri Thangringne yanungei yunpikur heinakrim thukkur.
Jesu'ya Min Phukpi
21 #
Lk 1.31; Mt 1.25. Heirouri tlaini chotni hungtlungkur heirouri, douwa heiya sermur dinnanungei trum hungurnei ngamrou, aiyei min heiri Jesu toubi phukpiwurla, aiyei min heiri aya urbongei waiyoubi Thangringne shunthutpiwurkhou.
Jesu'ya Pukhrumna Cheemra Makatkur
22 #
Lev 12.2-8. Heirouri Josephle Mary yakhu-shangramni Moses'yei Tloulam hilthungne, yaiyei youkna khoine cheem marthingthutnei trum hungtlungurnei ngamrou, heirou yane nao heiya Dunpunung makatnungei Jerusalem'ra katruiheikur. 23#Hoy 13.2,12. Heirou Dunpuei Tloulamra asitoubi mayebi leilei: “Chanapawa samran'mkhei Dunpunung makatrou da.” 24Heitounei ngamrou yakhu shangramnikhi Dunpuei tloulam hilthungne, ram-mathru pukhatle, nimanung cheem-mathru pukhatya khrumna put khoine makatnungei toubi Jerusalem'ra kat'heibine kakur. 25#Lk 2.38; 23.51. Heiyei kheenrouri Jerusalem'ra Simeon toubi ung napawa khatkhi leikhou. A heiri beimakne lhangai, heirou Dunpuya chini chabi klei napawa khat, heirou ari Israel thimi rapya kalpi phayerknine loukngaak napawa khatkhi hoikhou. Heirou Lhawai Khyingne aya kalhonpibi klei thimi khat. 26Heirouri anungei, ‘Dunpuei kantompikhou Messiah heiwaya aiyei mitne muphabongyen ari himakeirou,’ toubi kandangyerpikur. 27Heirouri Simeonya Lhawaini ruibi Pukhrumna Cheemwaira wachangkur, heirou Tloulamei youkna hilthungne Puei watlhou tounanungei puile-pale naocha heiya Pukhrumna Cheemwaira heilhaknarou, 28Simeon'ne naoshun heichaya aihutne loukhaangloubi, heirou Dunpuya mathangkur: 29“Asinungri, Dunpu, keinungei Neiyei tlou kantompikur heinakne, heirou neiyei shok keiya kyingne shaalyerlakalo. 30#Isa 52.10; Lk 3.6. Arouri keiyei mit'hakne heiyei Ralthutpina bom heiwaya muphawurla, 31Nangne thimi namyerrei maibongra marshikpikur heiwaya: 32#Isa 42.6; 49.6; Pao 13.47; 26.23. Lim deinungkhi Neiyei kningya mutthutnanungei kwaarya, heirou Neiyei thimi Israel rapya mathangei bomra ruilhakpinanungei mantrang pikur heiri namyer muphachila.” 33Simeon'ne naoshun heiyei ngamrou kyunya puile-pawane mayeknarouri, beimakne ngakkur. 34Heitoubi Simeon'ne yakhu-shangramya phor pibi, heirou aiyei pui Mary'nung atoubi shunpikur, “Naoshun ari maangkur Israel rapya fyoukanthounanung, heitoubi ralthutpinanung toubi Dunpune khalthutpikur naoshun khat. Heirou a heiri thimi rapne yanimakne yunmareknungei Dunpurei hutlha khat. 35Heirouri ane ukningrei muei klei rapkhi mutthutpirou. Heirou yai ukning heikhi shonkhyaangne khrulkurnakne hoirou, heitoubi naiyei ukningkhi ane khrulheirouhui.” 36#Pao 21.9; Jos 19.24; 1 Tm 5.9. Heitoubi kheen heirouri beimak tarkur Anna toubi ung trulmei Thimkhuiwi khatkhi leikhou. A heiri Asher cheemkhurrei Phanu-el'yei chanapuiya. 37Napuiya heiwiri aiyei shaalle kum-enitom leikalhonkhou, heirou asinungri aiyei kum somshrile-phali tlungura. A heiri Pukhrumna Cheem'rouwei tekchakhi pochutmakne, masa-nunghang naimakne, cha'kmai ngeibine Dunpuya khrumchabi leikhou. 38Heirouri trum heihakrou anekhi wachangbine, Dunpuya mathangkur, heirou Jerusalem'ya lhukthutyerknine ngaakbi klei thimirap nammanung douwa heiyei ngamrou yunmatupikur.
Nazareth'ra Yenkallengkur
39Josephle Mary'ne Dunpuei Tloulamei youkna namyerwa heiya luilhakhoubi, yane Galilee'ra klei yaiyei Nazareth yullei cheemra yenkallengkur. 40#Pic 13.24; 1 Sa 2.26. Heitoubi douwa heiri tangthutbi heirou thangkhi thukkura; heitoubi douwa heiri mukheine thimmura; heirou Dunpuei phor heiri aidoura bilthimne leipikur.
Napawa Douwa Jesu'ne Pukhrumna Cheemra Louklei
41 #
Khn 16.1-8; Hoy 23.15. Kumserrei Jesuei pui-pane Jerusalem'ra Ralthutpina Kum tlunnara kayaokur. 42Jesu'ne ai'mshaei kum chiple-khni hungtlungkur heirouri yane haalleinakne Ralthutpina tlainiyei markhulnara yaorou kathuwa. 43Tlaini heiyei markhul heiya luilhakurbi, yane cheemranung yenkallengkur, heiya napawa douwa Jesu heiri Jerusalem'ra heileithungkur. Heileithungkur heiwari aiyei pui-pa rapne mukhoumakur; 44heirou douwa heiri aiyei palui raple kalhonne lamkrini louchawarou toubine ningchakhou, heitounei ngamrou yane tlaini heiyei nunghangfchip lam tlabine, heiyei hillouri yane karnakril thimi rapbei hangrale, aiyei palui-lingthrallei hangrakhi thiphayoukur. 45Heirouri yane aya rapha'mumakura. Heitounei ngamrou yane Jerusalem'ra hanui wa'tlungkur. 46Heirou yane douwa heichaya Pukhrumna cheemwaira, ane Jehudiyei upa raple kalhonne ombine, heirou yai marnopi rapya ningbine, heirou yanungei tlou ngaibine louklei yane wamukur. 47Heirouri aiyei mukheiyei tlou mallangkur heirapya mayek thimirap namyerri beimakne ngakkur. 48#Mk 3.31-35. Aiyei pui-pa rapne aya wamunarouri yane ngakkurbi, aiyei puiwine anung shunkur, “Keicha-samranwa, kounungei nangne kanung asi toukurawo? Neipa kakhuri neiya raphanarou beimakne lhawai lahwura.” 49Heirouri ane yanung loumallang, “Kounungei nane keiya raphakurawo? Keine Pawaei Cheemra leiroume touri nane mumako?” 50Heiya ane heitoubi loumallangkur heiri yane mumakura. 51#Lk 2.19. Heisi toubine Jesu'ne yale kalhonne Nazareth'ra kallengkur, ane bi heirou yai shunya hilthungne leikur. Aiyei puiwine thukkur lhourap namyerwa heiya aiyei ukningra marpeibi khoukur. 52#Lk 1.80; 2.40. Jesu'ne sharungrale heirou Aiyei thangrakhi khintamrekpa Dunpule heirou thimi rapbei kar'ullei mathangpile kalhonne tangthutkur.
Currently Selected:
LUKE 2: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
